Tes Haujlwm 6

Xaiv Xya Leej Ua Haujlwm

1Lub sijhawm ntawd muaj neeg los ua Yexus li thwjtim coob zujzus ntxiv, ces cov Yudais uas haislus Kilis thiab cov Yudais uas haislus Henplais txawm tsis sibhaum. Cov Yudais uas haislus Kilis yws hais tias txhua hnub uas faib zaub-mov, lawv tsis faib rau cov pojntsuam uas yog neeg Yudais uas haislus Kilis. 2Ces kaum-ob tug timthawj thiaj hu tagnrho cov ntseeg tuaj uake thiab hais tias, “Tsis tsimnyog uas peb cov timthawj ciali tso kev qhia Vajtswv Txojlus tseg es mus ua cov saib txog kev noj kev haus. 3Yogli ntawd, cov kwvtij, nej ciali xaiv xya leej hauv nej cov los rau peb; lawv yuavtsum yog cov uas sawvdaws hwm, puvnpo Vaj Ntsujplig tus Dawbhuv thiab muaj tswvyim. Peb yuav tsa lawv ua tes haujlwm no, 4kom peb thiaj yuav muaj sijhawm thov Vajtswv thiab qhia Vajtswv Txojlus.”

5Sawvdaws pomzoo ua rawsli cov timthawj hais. Yogli ntawd, lawv thiaj xaiv Xatefanus, tus uas puvnpo txoj kev ntseeg thiab Vaj Ntsujplig tus Dawbhuv, thiab xaiv Filiv, Paukhaulus, Nikanaus, Timoos, Pamenas, thiab Nikaulus uas nyob pem lub nroog Ati-aukias tuaj, nws yog Lwm Haivneeg uas yav tas los tau kiavxeem los coj Yudais txoj kev ntseeg. 6Cov ntseeg txawm coj xya leej ntawd los rau cov timthawj, ces cov timthawj thiaj tsa tes rau saum lawv thiab thov Vajtswv rau lawv.

7Vajtswv Txojlus txawm nthuav dav mus zujzus. Cov ntseeg uas nyob hauv lub nroog Yeluxalees tau huamvam coob heev ntxiv, thiab muaj cov povthawj hlob coob leej tau los ntseeg Yexus.

Xatefanus Raug Ntes

8Xatefanus yog ib tug uas puvnpo Vajtswv txoj hmoovhlub thiab hwjchim, nws tau ua tej txujci tseemceeb thiab ua tej uas neeg xav tsis thoob rau sawvdaws pom. 9Tiamsis muaj qeeleej uas yog tswvcuab hauv cov Neeg Ywjxeeb#6:9: Neeg Ywjxeeb: Yog cov Yudais uas luag ntes coj mus ua qhev, tiamsis lawv tau raug txhiv rovqab los lossis ciali tau txais txoj kev ywjpheej rov los ua lawv tus lawm. lub tsev sablaj (luag ibtxwm hu li ntawd), uas yog muaj cov Yudais uas tuaj hauv lub nroog Kulenes thiab hauv lub nroog Alexadias nyob rau hauv. Lawv cov ntawd thiab cov Yudais uas tuaj pem lub tebchaws Kilikias thiab hauv lub xeev Exias tuaj, txawm nrog Xatefanus sibcav. 10Tiamsis Vaj Ntsujplig tau pub tswvyim zoo heev rau Xatefanus thaum nws tsa ncauj haislus, ua rau lawv cav tsis tau nws.

11Yogli ntawd, lawv txawm ntiav qeeleej ua timkhawv dag hais tias, “Peb hnov nws thuam Mauxes thiab thuam Vajtswv!” 12Lawv ua li ntawd kom cov pejxeem, cov txwjlaug thiab cov xibhwb uas qhia Kevcai muaj kev kubntxhov. Lawv thiaj sau nthwv los ntes Xatefanus thiab coj nws mus cuag cov thawjcoj hauv Koomhaum qibsiab. 13Lawv tseem coj ob-peb tug los ua timkhawv dag hais tias, “Tus txivneej no niajhnub thuam peb lub Tuamtsev uas dawbhuv thiab thuam Mauxes txoj Kevcai. 14Peb hnov nws hais tias tus Yexus uas yog neeg Naxalev no yuav muab lub Tuamtsev no rhuav thiab yuav hloov Mauxes txoj kevcai uas Mauxes tau muab rau peb lawm!” 15Tagnrho cov neeg uas nyob hauv lub Koomhaum Qibsiab ntawd ntsiantsoov Xatefanus, lawv pom tias nws lub ntsejmuag zoo ib yam li ib tug timtswv ceebtsheej lub.

Currently Selected:

Tes Haujlwm 6: MWW2022

Highlight

Copy