Tes Haujlwm 5

Ananias Thiab Xafilas

1Muaj ib tug txivneej hu ua Ananias, nws tus pojniam hu ua Xafilas. Nkawd kuj muab nkawd thaj av muag thiab. 2Ananias tau muab ib qho ntawm cov nyiaj ntawd khaws cia lawm; nws tus pojniam los kuj nrog nws paub thiab, ces nws txawm nqa hlo cov nyiaj ntawd mus rau cov timthawj.

3Petus hais rau nws hais tias, “Ananias, uacas koj cia Xatas kav koj lub siab es ua rau koj ciali dag Vaj Ntsujplig tus Dawbhuv los ntawm qhov uas koj muab koj thaj av muag thiab ciali khaws ib qho nyiaj ntawd cia lawm? 4Thaum koj tsis tau muag koj thaj av, thaj av ntawd yeej yog koj li; thaum koj muab muag lawm, cov nyiaj ntawd yeej yog koj li thiab. Uacas koj yuav muaj lub siab ua li ntawd? Tsis yog koj dag neeg, tiamsis yog koj dag Vajtswv!”

5Thaum Ananias hnov Petus hais li ntawd, nws txawm vau hlo thiab tuag kiag lawm; txhua tus uas hnov zaj no, sawvdaws ntshai kawg li. 6Cov tub hluas txawm los muab Ananias lub cev qhwv thiab kwv coj mus log.

7Kwvlam li peb txoosteev tomqab ntawd Ananias tus pojniam txawm tuaj txog, tiamsis nws tsis paub txog tej xwm uas muaj dhau los ntawd li. 8Petus nug Xafilas hais tias, “Koj qhia rau kuv seb, koj thiab koj tus txiv neb muag neb thaj av yeej tau nyiaj npaum li ntawd xwb lov?”

Nws teb tias, “Yog, yeej tsuas tau npaum li ntawd xwb.”

9Petus txawm hais rau nws hais tias, “Uacas koj thiab koj tus txiv neb yuav koom ua ib lub siab dag Vaj Ntsujplig tus Dawbhuv? Koj saib seb, cov neeg uas kwv koj tus txiv mus log tabtom los txog ntawm qhovrooj, lawv yuav muab koj kwv mus ib yam nkaus thiab!”

10Tamsim ntawd Xafilas txawm vau hlo rau ntawm Petus kotaw thiab tuag kiag. Thaum cov tub hluas los txog thiab pom tias Xafilas tuag lawm, lawv txawm kwv nws mus log rau ntawm nws tus txiv ib sab. 11Tagnrho pawg ntseeg thiab txhua tus uas hnov zaj no, sawvdaws ntshai kawg li.

Cov Timthawj Ua Tej Txujci Tseemceeb

12Cov timthawj ua ntau yam txujci tseemceeb thiab ua ntau yam uas neeg xav tsis thoob rau sawvdaws pom. Tagnrho cov ntseeg tuaj nyob uake rau ntawm Xalumoos lub qabkhav. 13Txawm yog tej neeg sawvdaws qhuas cov ntseeg kawg li los tsis muaj leejtwg muaj cuabkav los koom nrog lawv li. 14Txawm li ntawd los pheej muaj cov pojniam thiab txivneej uas los ntseeg Vajtswv coob zujzus los ntxiv rau lawv. 15Los ntawm tej haujlwm uas cov timthawj ua, neeg thiajli coj cov uas muaj mob tuaj pw rau ntawm tej txaj thiab tej lev ntawm ntug kev, kom thaum Petus taug kev tuaj, nws tus duab thiaj yuav los raug cov neeg mob ntawd qeeleej. 16Tseem muaj neeg coob-coob hauv tej zos uas nyob ibncig lub nroog Yeluxalees coj tej neeg uas muaj mob thiab tej uas raug tej ntsujplig phem tuaj rau cov timthawj kho; cov ntawd txhua tus puavleej zoo huv tibsi.

Cov Timthawj Raug Kev Tsimtxom

17Yogli ntawd, tus Tuam Povthawj Hlob thiab tagnrho cov uas nrog nws ua haujlwm, uas yog cov Xadukais, thiaj khib cov timthawj heev; lawv thiaj tuavhauv ua phem rau cov timthawj. 18Lawv txawm ntes cov timthawj coj mus kaw rau hauv tsev lojcuj loj. 19Tiamsis hmo ntawd tus Tswv ib tug timtswv los qhib lub tsev lojcuj tej qhovrooj, thiab coj cov timthawj tawm mus. 20Nws hais rau lawv hais tias, “Nej ciali tawm mus sawv hauv lub Tuamtsev, thiab qhia tagnrho zaj uas hais txog lub neej tshiab no rau sawvdaws mloog.” 21Cov timthawj txawm ua li ntawd, lawv thiaj sawvntxov mus rau hauv lub Tuamtsev thiab pib qhia sawvdaws.

Tus Tuam Povthawj Hlob thiab cov uas nrog nws ua haujlwm txawm hu tagnrho cov Yudais cov thawjcoj hauv Koomhaum qibsiab tuaj sablaj; lawv txawm txib neeg mus coj cov timthawj hauv tsev lojcuj los cuag lawv. 22Tiamsis thaum cov neeg uas lawv txib ntawd mus txog, lawv tsis pom cov timthawj nyob hauv tsev lojcuj lawm. Lawv txawm rov los hais rau cov nomtswv hais tias, 23“Thaum peb mus txog ntawm lub tsev lojcuj, peb pom tej qhovrooj tseem muaj nruasphoo xauv khovkho, cov fajxwm los tseem sawv ntawm tej qhovrooj zov; tiamsis thaum peb qhib tej qhovrooj, yeej tsis pom ib tug neeg nyob rau hauv li lawm!”

24Thaum tus thawj tubrog uas zov lub Tuamtsev thiab cov thawj povthawj hlob hnov li ntawd, lawv xav tsis thoob li, hais tias xyov cov timthawj dua twg tag lawm. 25Tamsim ntawd txawm muaj ib tug txivneej tuaj hais rau lawv hais tias, “Nej mloog kuv hais nawb! Cov neeg uas nej muab kaw rau hauv tsev lojcuj, tamsim no lawv tabtom qhia sawvdaws hauv lub Tuamtsev!” 26Thaum ntawd, tus thawj tubrog nrog rau nws cov tubrog txawm mus coj cov timthawj rov los. Lawv kuj tsis ua phem rau cov timthawj, rauqhov lawv ntshai nyobtsam cov pejxeem muab pobzeb ntaus lawv.

27Lawv coj cov timthawj los sawv tabmeeg cov thawjcoj hauv lub Koomhaum qibsiab, ces tus Tuam Povthawj Hlob txawm taug lawv zaj. 28Nws hais tias, “Peb twb txwv nej tunrho lawm hais tias nej tsis yoom tuav tus txivneej no lub npe qhia hlo li los sav! Nej saib seb, tej uas nej qhia twb nrov-ncha mus thoobplaws lub nroog Yeluxalees lawm, thiab nej tseem yuav muab tus txivneej ntawd cov ntshav los rau peb ris thiab.” #Math 27:25

29Petus thiab cov timthawj teb tias, “Peb yuavtsum mloog Vajtswv lus, tsis yog mloog neeg lus. 30Nej muab Yexus tua los ntawm qhov uas muab Nws ntsia rau saum tus ntoo khaublig, tiamsis tomqab ntawd peb cov yawgkoob tus Vajtswv twb tsa Nws sawv hauv qhovtuag rovqab los lawm. 31Vajtswv tau kom Nws mus nyob ntawm Vajtswv sab xis, thiab tsa Nws ua tus Thawjcoj thiab ua tus Cawmseej kom cov Yixalayees tso lawv tej kev txhaum tseg, lawv lub txim thiaj yuav raug zam. 32Tej no peb thiab Vaj Ntsujplig tus Dawbhuv yeej ua tau timkhawv. Vaj Ntsujplig yog tus uas Vajtswv pub rau cov neeg uas mloog Nws lus.”

33Thaum cov nomtswv hnov li ntawd, lawv chim heev, lawv xav muab cov timthawj tua povtseg lawm xwb. 34Tiamsis cov nomtswv ntawd muaj ib tug uas yog Falixais hu ua Nkamaliyees, nws yog ib tug xibhwb qhia Kevcai uas tej neeg sawvdaws hwm heev. Nws txawm sawv hauv lub Koomhaum qibsiab thiab xaaj kom lawv coj cov timthawj tawm mus sabnraud ibpliag, 35ces nws txawm hais rau cov thawjcoj hauv Koomhaum qibsiab tias, “Cov kwvtij Yixalayees, nej yuav tau ua tibzoo saib kom meej-meej txog tej uas nej yuav ua rau cov neeg no. 36Nej nco tau hais tias tsis ntev tas los no The-udas tau tawm los khav hais tias nws yog ib tug neeg tseemceeb; kwvlam 400 leej tuaj nws tog, tiamsis nws raug tua tuag lawm. Cov neeg uas tuaj nws tog kuj khiav uasab uasua thiab ploj tag li lawm. 37Dhau ntawd, thaum cov nomtswv tabtom txheeb cov pejxeem tej npe seb muaj coob licas, muaj dua ib tug txivneej hu ua Yudas, nws yog neeg Kalilais, nws ntxias tau ib pab neeg coob-coob tuaj nws tog, tiamsis nws kuj raug tua tuag lawm, ces cov neeg uas tuaj nws tog txawm khiav uasab uasua tag lawm thiab.

38“Yogli ntawd, kuv hais rau nej hais tias, nyob rau zaj tamsim no los nej yuavtsum tsis txhob ua licas rau lawv cov no, cia lawv nyob lawv zoo dua. Yog tias tej uas lawv npajsiab yuav ua thiab tej uas lawv twb ua tas los ntawd yog neeg li haujlwm xwb, ces tej ntawd yeej yuav ploj mus, 39tiamsis yog tias yog Vajtswv li haujlwm, ces nej yuav kov tsis yeej lawv li. Tseem ntshai nyobtsam yog nej tawmtsam Vajtswv thiab!”

Cov thawjcoj hauv Koomhaum qibsiab thiaj pomzoo rawsli Nkamaliyees hais. 40Lawv hu cov timthawj los, muab cov timthawj ntawd nplawm, thiab txwv tsis pub lawv hais txog Yexus lub npe, ces txawm tso lawv mus lawm. 41Thaum cov timthawj tawm ntawm cov thawjcoj hauv Koomhaum qibsiab mus lawm, lawv zoosiab kawg li, rauqhov Vajtswv suav hais tias lawv yog cov uas tsimnyog raug kev txajmuag vim Yexus lub npe lawm. 42Lawv niajhnub qhia Txoj Moo Zoo uas hais txog Yexus uas yog tus Mexiyas rau sawvdaws mloog nyob rau hauv lub Tuamtsev thiab hauv neeg tej vaj tej tsev.

Currently Selected:

Tes Haujlwm 5: MWW2022

Highlight

Copy