Tes Haujlwm 2

Vaj Ntsujplig Tus Dawbhuv Los

1Thaum txog hnub Pheetekhos,#2:1: Pheetekhos yog 50 hnub tomqab ua kevcai Hla Dhau. cov ntseeg sawvdaws tuaj sibsau uake nyob rau ntawm ib qhov chaw. #Levi 23:15-21; 2Kev 16:9-11 2Uaciav txawm muaj ib lub suab nrov ntxhe ntws saum ntuj los ib yam li ib nthwv cua hlob-hlob los puvnkaus rau hauv lub tsev uas lawv tabtom nyob uake ntawd. 3Lawv pom zooli tej nplaig hluavtaws los thiab faib pes rhe mus rau saum lawv txhua tus. 4Lawv thiaj puvnpo Vaj Ntsujplig tus Dawbhuv thiab txawm ciali pib hais tau lwmyam lus rawsli Vaj Ntsujplig tau pub rau lawv.

5Muaj cov Yudais uas hwm Vajtswv tuaj txhua lub tebchaws uas nyob hauv qabntuj no tuaj so rau hauv lub nroog Yeluxalees. 6Thaum lawv hnov lub suab ntawd, muaj neeg coob-coob txawm los sibsau uake thiab xav tsis thoob li, vim lawv txhua tus nyias taus nyias hnov cov ntseeg ntawd hais lawv haivneeg yam lus.

7Lawv tsis paub yuav hais licas, ces lawv txawm nug hais tias, “Cov neeg uas tabtom haislus no tsis yog neeg Kalilais lov? 8Ua licas peb txhua tus ho hnov lawv hais tau peb tej lus? 9Peb yog neeg Pathias, neeg Medes, thiab neeg Elas; ibtxhia yog tuaj hauv Mexuputamias tuaj, tuaj hauv Yudas thiab Kapadaukias tuaj; tuaj hauv Pootus thiab Exias tuaj, 10tuaj hauv Felinkias thiab Pafilias tuaj, tuaj hauv Iziv tuaj, thiab tuaj hauv tej cheebtsam ntawm tebchaws Linpias uas nyob ze Kulenes tuaj. Ibtxhia yog tuaj hauv lub nroog Loos tuaj, 11uas yog cov Yudais thiab Lwm Haivneeg uas tau kiavxeem los coj Yudais txoj kev ntseeg, ibtxhia yog tuaj hauv lub povtxwv Khetes thiab hauv Alanpias tuaj; peb puavleej hnov lawv hais peb tej lus uas yog hais txog tej txujci tseemceeb uas Vajtswv tau ua los lawm!” 12Lawv hnov li ntawd, lawv xav tsis thoob thiab tsis totaub li, lawv sibnug zomzaws hais tias, “Tej no yog licas tiag?”

13Tiamsis muaj lwmtus hais saib tsis taus cov ntseeg tias, “Cov neeg ntawd qaugcawv lawm!”

Petus Tej Lus Qhia

14Thaum ntawd Petus nrog rau kaum-ib tug timthawj txawm sawvtsees, nws thiaj hais nrov-nrov rau cov neeg coob-coob ntawd hais tias, “Cov kwvtij Yudais thiab nej txhua tus uas nyob hauv lub nroog Yeluxalees, nej ua tibzoo mloog, kuv yuav qhia tej no rau nej. 15Tamsim no nyuamqhuav yog cuaj teev sawvntxov xwb, cov txivneej no tsis yog qaugcawv li nej xav. 16Tiamsis tej no yog muaj rawsli Yau-ees, uas yog tus xibhwb cev Vajtswv lus tau hais tseg lawm hais tias:

17“ ‘Vajtswv hais tias, thaum txog tiam uas ntiajteb yuav kawg, Kuv yuav ua li no:

Kuv yuav pub Kuv tus Ntsujplig rau txhua tus.

Nej tej tub tej ntxhais yuav cev Kuv tej lus.

Nej tej tub hluas yuav ua yogtoog,

thiab nej tej neeglaus yuav ua npausuav pom. #Yau 2:28-32 (LXX)

18Tsis tas li ntawd xwb, thaum txog tiam ntawd,

Kuv yuav pub Kuv tus Ntsujplig rau Kuv cov tubtxib, tsis hais pojniam thiab txivneej,

lawv yuav cev Kuv tej lus.

19Kuv yuav ua tej txujci tseemceeb rau saum nruabntug,

thiab ua tej cim qhiatshwm rau hauv lub qabntuj no.

Yuav muaj ntshav, muaj hluavtaws thiab muaj pataws auv niab;

20lub hnub yuav tsaus,

thiab lub hli yuav liab li ntshav,

uantej Hnub tseemceeb uas ci ntsa-iab ntawm tus Tswv los txog.

21Thaum ntawd leejtwg uas thov tus Tswv pab, tus ntawd yuav dim.’

22“Cov kwvtij Yixalayees, nej ciali mloog tej lus uas kuv yuav qhia no! Yexus uas yog neeg Naxalev, yog tus uas Vajtswv tau pub hwjchim rau Nws ua tej txujci tseemceeb. Tej no nej yeej paub huvsi, rauqhov tej ntawd twb tshwmsim nyob rau hauv nej no lawm. 23Qhov uas Yexus raug muab cob rau nej txhais tes, raug nej thiab cov neeg txhaum muab ntsia rau saum ntoo khaublig, thiab muab Nws tua povtseg, qhov ntawd twb yog raws nraim li Vajtswv tau pomzoo thiab npaj tseg los lawm. #Math 27:35; Malak 15:24; Lukas 23:33; Yauh 19:18 24Tiamsis Vajtswv twb tso Nws dim ntawm txoj kev tuag thiab tsa Nws sawv rovqab los muaj txojsia lawm, vim txoj kev tuag lub hwjchim tuav tsis tau Nws cia. #Math 28:5-6; Malak 16:6; Lukas 24:5 25Rauqhov Daviv hais txog Nws hais tias:

“ ‘Kuv niajhnub pom tus Tswv nyob ntawm kuv xubntiag;

Nws nyob ntawm kuv sab xis, kuv thiaj tsis ntxhovsiab. #Nnkauj 16:8-11 (LXX)

26Twb yog vimli no kuv thiaj zoosiab,

thiab kuv tej lus puvnpo kev zoosiab xwb.

Txawm kuv yog neeg nqaijtawv xwb los

kuv tseem muaj kev ciasiab,

27rauqhov Koj yeej yuav tsis tso kuv tus ntsujplig cia rau hauv tubtuag teb;

lossis cia Koj tus tubtxib uas ncajncees cev nqaij lwj nyob rau hauv qhovntxa.

28Koj twb qhia txog txojkev uas coj mus tau txojsia rau kuv lawm,

thiab qhov uas Koj nrog kuv nyob, ua rau kuv zoosiab kawg li.’

29“Cov kwvtij, kuv muaj cuabkav qhia rau nej paub txog peb yawgkoob Daviv, hais tias nws twb tuag thiab lawv muab nws coj mus log lawm, niajhnub no nws lub ntxa tseem nyob. 30Thaum ub nws yog ib tug xibhwb cev Vajtswv lus. Nws paub tias Vajtswv twb coglus rau nws hais tias Vajtswv yuav tsa nws ib tug xeebntxwv los ua vajntxwv ib yam li nws. #Nnkauj 132:11; 2Xamu 7:12-13 31Daviv twb paub tej uas Vajtswv yuav ua yav tomntej lawm, yogli ntawd nws thiaj hais txog qhov uas tus Mexiyas sawv hauv qhovtuag rovqab los hais tias,

“ ‘Vajtswv tsis tau tso Nws tseg rau hauv tubtuag teb;

lossis Nws cev nqaij tsis tau lwj nyob rau hauv qhovntxa.’

32Tus Yexus no yog tus uas Vajtswv tau tsa sawv hauv qhovtuag rovqab los, thiab peb sawvdaws puavleej ua timkhawv txog zaj no. 33Nws tau raug tsa mus nyob rau ntawm Vajtswv tus uas yog Nws Txiv, sab tes xis, thiab Vajtswv tau pub Vaj Ntsujplig rau Nws rawsli Vajtswv tau coglus tseg lawm. Qhov uas nej pom thiab hnov no yog Nws qhov khoomplig uas Nws tau muab nchuav los pub rau peb. 34Daviv yeej tsis tau mus saum ntuj ceebtsheej dua li, tiamsis nws hais tias,

“ ‘Tus Tswv hais rau kuv tus Tswv hais tias:

Los zaum ntawm Kuv sab xis no #Nnkauj 110:1

35mus txog thaum Kuv muab Koj cov yeebncuab ua lub rooj tiag taw hauv Koj qab xibtaws.’

36“Yogli ntawd tsoom Yixalayees, nej sawvdaws yuavtsum paub tseeb hais tias tus Yexus uas nej muab ntsia rau saum ntoo khaublig, yog tus uas Vajtswv tau muab tsa ua tus Tswv thiab ua tus Mexiyas!”

37Thaum sawvdaws hnov li ntawd, lawv nyuajsiab kawg li, lawv txawm nug Petus thiab cov timthawj hais tias, “Cov kwvtij, peb yuav ua licas?”

38Petus teb lawv hais tias, “Nej txhua tus yuavtsum tso nej tej kev txhaum tseg thiab ua kevcai rausdej hauv Yexus Khetos lub npe, kom Vajtswv thiaj yuav zam nej lub txim; thiab nej thiaj yuav tau txais Vajtswv qhov khoomplig, uas yog Vaj Ntsujplig tus Dawbhuv. 39Rauqhov Vajtswv tej lus cogtseg yog cog rau nej, nej cov menyuam, thiab cov neeg uas nyob deb-deb, cov uas tus Tswv uas yog peb tus Vajtswv hu los cuag Nws.”

40Petus tseem ntuas thiab qhia lawv ntxiv hais tias, “Nej yuavtsum nrhiav kev khiav kom dim ntawm txoj kev rautxim uas yuav muaj los rau cov neeg uas siabphem no!” 41Cov neeg uas ntseeg Petus tej lus qhia, thiajli ua kevcai rausdej, thiab hnub ntawd muaj kwvlam li 3,000 leej tau los ntseeg ntxiv. 42Lawv kubsiab lug kawm tej uas cov timthawj qhia, lawv sibhlub sibpab, lawv noj Yexus rooj mov thiab thov Vajtswv uake.

Lub Neej Ntawm Cov Ntseeg Yexus

43Thaum sawvdaws pom tej txujci tseemceeb uas cov timthawj ua, lawv xav tsis thoob li. 44Tagnrho cov ntseeg sawvdaws koom ib lub siab, nyias nqa nyias tej qhov txhia chaw tuaj tso uake ua sawvdaws tug. #Teshl 4:32-35 45Lawv muab lawv tej av thiab tej khoom uas yog lawv tug muag, thiab muab tej nyiaj ntawd faib rau txhua tus rawsli tus uas muaj kev cheemtsum. 46Lawv niajhnub mus pehawm Vajtswv hauv lub Tuamtsev, lawv noj Yexus rooj mov, thiab noj mov uake hauv lawv tej vaj tej tsev los ntawm txoj kev zoosiab thiab lub siabdawb siabzoo, 47lawv qhuas Vajtswv, thiab txaussiab rau tej kev zoo uas tej neeg sawvdaws qhuas txog lawv. Thiab txhua-txhua hnub, tus Tswv yeej coj cov uas dim lawm los ntxiv rau lawv.

Currently Selected:

Tes Haujlwm 2: MWW2022

Highlight

Copy