YouVersion Logo
Search Icon

Tes Haujlwm 19

19
Paulus Nyob Hauv Efexaus
1Thaum Apaulaus nyob hauv lub nroog Kauleethaus, Paulus tau taug kev hla hauv cheebtsam Kalatias mus txog rau lub nroog Efexaus. Nws tau mus ntsib cov ntseeg qeeleej 2thiab nug lawv hais tias, “Thaum nej los ntseeg, nej puas tau txais Vaj Ntsujplig tus Dawbhuv?”
Lawv teb tias, “Peb twb tsis tau hnov dua hais tias muaj Vaj Ntsujplig tus Dawbhuv li.”
3Paulus nug hais tias, “Yogli ntawd, nej ua kevcai rausdej licas?”
Lawv teb tias, “Peb ua rawsli Yauhas txoj kevcai rausdej.”
4Paulus hais tias, “Yauhas txoj kevcai rausdej yog qhia txog kev tso tej kev txhaum tseg; thiab qhia kom sawvdaws ntseeg tus uas tseem yuav lawv nws qab los, tus ntawd yog Yexus.” #Math 3:11; Malak 1:4; Lukas 3:4, 16; Yauh 1:26-27
5Thaum lawv hnov li ntawd, lawv txawm ua kevcai rausdej los ntawm tus Tswv Yexus lub npe. 6Paulus txawm tsa tes rau saum lawv, ces Vaj Ntsujplig tus Dawbhuv tau los rau saum lawv. Lawv txawm haislus txawv-txawv thiab qhia Vajtswv Txojlus. 7Lawv cov ntawd muaj kwvlam li kaum-ob tus txivneej.
8Paulus mus rau hauv tej tsev sablaj thiab muaj siab tawv qhia tej neeg sawvdaws tau peb lub hlis. Nws nrog lawv sibcav thiab yaum lawv txog Vajtswv lub Tebchaws. 9Tiamsis cov neeg ntawd qeeleej muaj lub siab tawv thiab tsis kam ntseeg. Lawv tabmeeg thuam txog tus Tswv Txojkev rau sawvdaws mloog. Ces Paulus txawm tso lawv tseg thiab coj nws cov thwjtim nrog nws mus, thiab nws niajhnub#19:9: Tej phau ntawv qub uas xuas tes sau, ntxiv pib thaum kaum-ib teev sawvntxov mus txog rau plaub teev yav hnubqaij. mus coj kev sibtham nyob rau hauv Tilanus chav tsev sablaj. 10Nws pheej qhia li ntawd tau ob xyoos, ua rau tagnrho cov Yudais thiab Lwm Haivneeg uas nyob hauv lub xeev Exias tau hnov Vajtswv Txojlus.
Xakhevas Cov Tub
11Vajtswv pub hwjchim rau Paulus ua tej txujci tseemceeb uas tsis tau ua dua los. 12Txawm yog Paulus tej phuam so hws thiab nws tej ntaub thaiv xubntiag xwb, los thaum coj mus tso rau saum cov neeg uas muaj mob, ces lawv tej mob txawm zoo hlo, thiab tej ntsujplig phem los ciali tawm ntawm lawv mus lawm. 13Cov Yudais qeeleej uas taug kev rau qhov ub qhov no uatxuj siv tus Tswv Yexus lub npe ntiab tej ntsujplig phem tawm. Lawv hais rau tej ntsujplig phem ntawd hais tias, “Kuv tuav Yexus, tus uas Paulus qhia lub npe ntiab nej tawm mus.” 14Muaj xya tus kwvtij, lawv yog Xakhevas uas cov Yudais tus Tuam Povthawj Hlob cov tub, yog cov ua li ntawd ntag.
15Tiamsis tus ntsujplig phem ntawd teb lawv hais tias, “Yexus los kuv kuj paub, thiab Paulus los kuv kuj paub; tiamsis nej ho yog leejtwg?”
16Tus txivneej uas raug tus ntsujplig phem ntawd txawm muab lawv ntaus sab kawg thiab nws ntaus yeej lawv txhua tus. Lawv thiaj khiav tawm hauv nws lub tsev mus, tiamsis lawv tej ristsho ntuag tas thiab ib ce to tag huv tibsi. 17Cov neeg Yudais thiab Lwm Haivneeg uas nyob hauv Efexaus puavleej hnov txog zaj no, lawv ntshai kawg li. Ces Tswv Yexus lub npe txawm nrov-ncha mus thoobplaws txhua qhov. 18Muaj cov ntseeg ntau leej tau tuaj thiab lees tabmeeg sawvdaws txog tej kev txhaum uas lawv tau ua los lawm. 19Cov neeg uas txawj ua khawvkoob ntau leej muab lawv tej ntawv khawvkoob coj tuaj hlawv povtseg tabmeeg sawvdaws. Muab tagnrho lawv tej ntawv ntawd sau los uake yog raug nqi 50,000 lub nyiaj.#19:19: lub nyiaj: Ib tus tubzog ua haujlwm ib hnub tsuas tau ib lub nyiaj xwb (saib Math 20:2). 20Vimli ntawd, tus Tswv txojlus#19:20: Vimli ntawd, tus Tswv txojlus; lossis Vimli ntawd, los ntawm tus Tswv lub hwjchim, txojlus. thiaj nthuav dav thiab huamvam loj zujzus ntxiv.
Kev Kubntxhov Nyob Hauv Efexaus
21Tomqab tej xwm ntawd dhau lawm, Paulus tau txiavtxim siab#19:21: Paulus tau txiavtxim siab; lossis Vaj Ntsujplig tshoov Paulus siab, nws thiaj txiavtxim siab. hla phua lub xeev Makedaunias thiab Akhayas mus rau nram lub nroog Yeluxalees. Nws hais tias, “Tomqab kuv mus txog nram lawm, kuv yuavtsum mus saib kom tau lub nroog Loos thiab.” 22Nws thiaj txib Timautes thiab Elatus, ob tug uas nrog nws ua haujlwm, mus rau tim lub xeev Makedaunias, tiamsis nws tseem nyob hauv xeev Exias ib ntus thiab.
23Thaum ntawd nyob hauv lub nroog Efexaus tau muaj kev kubntxhov loj heev, vim yog tus Tswv Txojkev. 24Muaj ib tug kws ntaus-nyiaj hu ua Demetius. Nws muab nyiaj ntaus ua tej lub nyuag tsev teev mlom me-me uas zoo li lub tsev teev tus mlom pojniam Atemis, thiab nws lub chaw lagluam tau ua rau cov uas ntaus-nyiaj tau nyiaj ntau heev. 25Nws txawm hu tagnrho cov uas ntaus-nyiaj ntawd thiab lwm cov uas ua haujlwm zoo ib yam li lawv tuaj uake. Nws hais rau lawv hais tias, “Nej sawvdaws yeej paub tias peb txoj kev npluanuj yog los ntawm tes haujlwm no. 26Zaumno, nej twb pom thiab hnov tej uas tus nyuag Paulus ntawd ua lawm. Nws twb mus haub-ntxias tau ntau tus neeg uas nyob hauv Efexaus no thiab yuavluag thoob hauv lub xeev Exias hais tias, tej nyuag vajtswv uas peb xuas tes ua no yeej tsis yog vajtswv kiag li. 27Qhov no yog ib qho uas txaus ntshai heev, vim yuav ua rau peb lub lagluam no tau ib lub npe tsis zoo. Tsis tag li ntawd xwb, tseem yuav ua rau tus mlom pojniam Atemis uas muaj hwjchim loj lub tuamtsev tsis muaj qabhau thiab nws lub hwjchim ciali raug puastsuaj mus; nws twb yog tus mlom uas txhua tus neeg hauv lub xeev Exias thiab thoobplaws hauv qabntuj no txeev pehawm!”
28Thaum sawvdaws hnov li ntawd tag, sawvdaws chim heev, lawv txawm qw nrov-nrov hais tias, “Cov neeg Efexaus tus mlom Atemis yog tus loj kawg!” 29Tibpliag xwb ces txawm muaj kev kubntxhov mus thoobplaws hauv lub nroog. Lawv txawm tuaj ntes kiag Nkai-us thiab Alitakhaus uas yog neeg Makedaunias, uas nrog Paulus taug kev, cab kiag khiav mus rau tom lub tshavpuam ua yeebyam. 30Paulus xav mus rau ntawm cov neeg ntawd hauvntej, tiamsis cov ntseeg tsis kheev Paulus mus. 31Qeetus nomtswv hauv lub xeev Exias uas yog Paulus cov phoojywg, kuj xa xov mus cheem kom nws tsis txhob mus tshwm hauv lub tshavpuam ua yeebyam ntawd thiab.
32Thaum ntawd cov neeg coob-coob uas tuaj uake ntawd tabtom ntxhov heev; nyias taus nyias qw li ub li no, rauqhov feem coob yeej tsis paub tias qhov uas lawv tuaj ntawd yog tuaj ua dabtsi. 33Cov Yudais txawm muab Alexadaws thawb mus rau tom hauvntej thiab kom nws qhia rau sawvdaws paub txog qhov teebmeem. Alexadaws thiaj co tes kom sawvdaws nyob twjywm, nws yuav hais ib cov lus daws txog zaj ntawd. 34Tiamsis thaum lawv pom tias Alexadaws yog neeg Yudais, tagnrho lawv sawvdaws qw tau ob txoosteev hais tias, “Cov neeg Efexaus tus mlom Atemis yog tus loj kawg!”
35Thaum kawg tus teevntawv hauv lub nroog thiaj hais tau kom sawvdaws nyob twjywm. Nws hais tias, “Cov neeg Efexaus, sawvdaws puavleej paub tias lub nroog Efexaus no yog lub nroog uas saib thiab tu lub tsev teev tus mlom Atemis uas muaj hwjchim loj thiab nws tus hwvxyeej uas poob saum ntuj los. 36Yeej tsis muaj ib tug twg uas yuav tsis lees paub txog tej no. Yogli ntawd, nej ciali tswmseeb thiab tsis txhob lam tau lam ua ub ua no. 37Nej coj ob tug txivneej los rau ntawm no, tiamsis nkawd twb tsis tau mus nyiag ib yam dabtsi hauv tej tsev teev mlom lossis thuam peb tus mlom los sav.
38“Yog Demetius thiab nws cov neeg ntaus-nyiaj ntawd muaj plaub rau leejtwg, peb muaj cov neeg hais plaub thiab tej tsev hais plaub los yeej qhib lug tos; kom lawv mus sibhais lawm tod. 39Tiamsis yog nej ho muaj dua lwmyam ntxiv, yuavtsum yog coj mus hais hauv tej pejxeem lub chaw sablaj rawsli txojcai. 40Yog peb tsis ua li no, nyobtsam nomtswv yuav hais tias tej kev kubntxhov hnubno yog peb ua, ces peb yuav tsis muaj lus teb lawv, rauqhov tej kev kubntxhov no tsis muaj hauvpaus hauvntsis dabtsi.” 41Thaum nws hais li ntawd tag, ces nws txawm kom sawvdaws mus tsev.

Currently Selected:

Tes Haujlwm 19: MWW2022

Highlight

Share

Copy

None

Want to have your highlights saved across all your devices? Sign up or sign in