3 Yauhas 1
1
1Los ntawm tus Txwjlaug:
Xa mus rau Nkai-us tus uas kuv hlub tiag-tiag. #Teshl 19:29; Loos 16:23; 1Klt 1:14
2Tus phoojywg uas kuv hlub, kuv ciasiab hais tias txhua yam haujlwm puavleej mus zoo thiab koj los yuav ntsib kev nojqab nyobzoo, ib yam li kuv paub meej tias koj lub siab lub ntsws los kuj nojqab nyobzoo thiab. 3Muaj tus puav kwvtij uas yog cov ntseeg tuaj txog ntawm no thiab qhia rau kuv txog koj txoj kev ncajncees rauqhov tseeb, hais tias koj yeej niajhnub ua lub neej nyob rau hauv qhov tseeb, mas ua rau kuv zoosiab kawg li. 4Tsis muaj ib yam dabtsi uas yuav ua rau kuv zoosiab tshaj qhov uas kuv hnov tias kuv cov menyuam ua lawv lub neej nyob rau hauv qhov tseeb.
Qhuas Nkai-us
5Tus phoojywg uas kuv hlub, koj mas ncajncees rau tes haujlwm uas koj ua pab lwmtus ntseeg kawg li, txawm koj twb tsis paub lawv los koj tseem pab huvsi thiab. 6Lawv tau tuaj hais txog koj txoj kev hlub rau cov ntseeg uas nyob ntawm no paub. Thaum lawv yuav mus lwmqhov, thov koj pab lawv kom tsimnyog rawsli Vajtswv lub siab nyiam. 7Rauqhov thaum lawv tawm mus ua Khetos tes haujlwm, lawv yeej tsis tau txais kev pabcuam los ntawm cov neeg uas tsis paub Vajtswv li. 8Yogli ntawd, peb cov uas ntseeg Yexus, yuavtsum pab lawv kom peb thiaj tau koom nrog lawv ua tes haujlwm uas yog qhov tseeb.
Di-autefes Thiab Demetius
9Kuv tau sau ib tsab ntawv xa mus rau pawg ntseeg lawm; tiamsis Di-autefes tus uas ntshaw ua cov ntseeg tus thawj yeej tsis quavntsej tej lus uas kuv hais ntawd li. 10Yogli ntawd, yog tias kuv tuaj txog, kuv yuav nthuav txhua yam uas nws ua rau nej paub: xwsli, tej uas nws xyav tsis zoo txog peb thiab tej uas nws dag txog peb! Txawm li ntawd los tseem tsis tau txaus nws lub siab thiab, thaum cov kwvtij uas ntseeg tuaj saib nws pawg ntseeg, nws yeej tsis kam tostxais lawv kiag li, nws tseem txwv cov uas xav tostxais cov kwvtij ntseeg ntawd huvsi; yog leejtwg tseem tostxais, nws tseem yuav muab lawv ntiab tawm hauv pawg ntseeg mus thiab.
11Tus phoojywg uas kuv hlub, tsis txhob xyaum ua li tus neeg phem ua, tiamsis yuavtsum xyaum ua li tus neeg zoo ua. Tus uas ua zoo, tus ntawd yog los ntawm Vajtswv los; tus uas ua phem, tus ntawd yeej tsis tau pom dua Vajtswv li.
12Sawvdaws puavleej qhuas txog Demetius; thiab nws los yeej ua nws lub neej rawsli qhov tseeb xwb. Peb los kuj ua tau timkhawv hais tias nws yeej yog neeg zoo tiag, nej yeej paub tias tej lus uas peb hais no yog lus tseeb xwb.
Lus Xa Xov Thaum Xaus
13Muaj ntau yam uas kuv xav sau tuaj rau nej, tiamsis kuv tsis xav siv cwjmem thiab kua mem sau tuaj. 14Kuv ciasiab hais tias tsis ntev saum no kuv yuav tuaj saib nej, thaum ntawd peb mamli sibtham timntsej timmuag.
15Thov kom koj tau zoo nyob kajsiab lug.
Cov ntseeg sawvdaws puavleej hais nojqab nyobzoo rau koj. Thov pab hais kev nojqab nyobzoo rau peb cov phoojywg txhua tus huv tibsi.
Currently Selected:
3 Yauhas 1: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.