2 Timautes 4

1Timautes, kuv hais cov lus no rau koj timntsej timmuag ntawm Vajtswv thiab Yexus Khetos, tus uas yuav los txiavtxim rau cov neeg ciaj thiab cov neeg tuag, thiab vim Nws yuav rov los ua Vajntxwv kav lub qabntuj no, hais tias koj yuavtsum 2qhuabqhia Vajtswv Txojlus, rausiab ntso qhia (txawm yog sijhawm thiab tsis yog sijhawm los xij); koj yuavtsum ua siabntev qhia thiab kho sawvdaws, qhuabntuas sawvdaws, thiab txhawb sawvdaws lub zog. 3Rauqhov muaj ib hnub neeg yuav tsis mloog Vajtswv Txojlus lawm, tiamsis lawv yuav mus ua rawsli lawv lub siab ntshaw thiab mus nrhiav ntau tus xibhwb kom los qhia txog tej zaj uas lawv xav mloog kom zoo khaus lawv lub pobntseg lawm xwb. 4Lawv yuav khiav tawm thiab tsis mloog qhov tseeb lawm, lawv yuav mus mloog tej dabneeg lawm xwb. 5Tiamsis txawm yuav zoo licas los xij, koj yuavtsum tswj kom tau koj tuskheej, ua siabntev tiv tej kev txomnyem, kavtsij ua tes haujlwm uas qhia Txoj Moo Zoo, thiab rausiab ntso ua koj tej haujlwm kom phim li yog Vajtswv ib tug tubtxib tiag.

6Nimno ces kuv twb raug muab hliv li tej dej uas ua khoom fij rau Vajtswv lawm, thiab twb txog lub sijhawm uas kuv yuav tso lub ntiajteb no tseg lawm. 7Kuv yeej ua zoo kawg kuv lub zog li lawm, kuv twb khiav mus txog tus ciam tom kawg lawm, thiab kuv tseem tuav rawv txoj kev ntseeg.#4:7: tuav rawv txoj kev ntseeg; lossis ua ncaj rawsli kuv tau coglus tseg lawm. 8Nimno tus Tswv, uas yog tus txiavtxim ncajncees, twb npaj lub kausmom kev ncajncees tseg cia rau kuv lawm, thaum txog Hnub ntawd tus Tswv yuav muab rau kuv. Tsis yog yuav muab rau kuv tibleeg xwb, tiamsis Nws yuav muab rau txhua tus uas tosntsoov hnub uas Nws rovqab los.

Xaus Lus

9Koj ciali npaj tiag-tiag kom koj tau tuaj saib kuv sai-sai, 10rauqhov Demas ciali qaug rau kev ntiajteb lawm, ces nws tau muab kuv tsotseg thiab khiav mus rau tim lub nroog Thexalaunikes lawm. Khexees mus rau tim lub xeev Kalatias, thiab Titus mus rau tim lub nroog Dalematias lawm. #Kaulx 4:14; Filem 24; 2Klt 8:23; Kalat 2:3; Titus 1:4 11Tsuas tshuav Lukas tibleeg nrog kuv nyob lawm xwb. Koj ciali mus coj Malakaus nrog koj tuaj, rauqhov nws yuav pab tau kuv ua kuv tes haujlwm. #Kaulx 4:14; Filem 24; Teshl 12:12, 25; 13:13; 15:37-39; Kaulx 4:10; Filem 24 12Kuv txib Tikhikus mus rau tim lub nroog Efexaus lawm. #Teshl 20:4; Efex 6:21-22; Kaulx 4:7-8 13Thaum koj tuaj, thov koj pab nqa kuv lub tsho loj ntev uas kuv tso rau hauv Kalapus tsev pem lub nroog Rhau-as tuaj; thiab nqa kuv cov ntawv tuaj rau kuv, tshwjxeeb yog cov uas sau rau ntawm daim tawv. #Teshl 20:6

14Alexadaws tus uas yog kws nchuav tooj liab, ua phem kawg li rau kuv; tus Tswv mam rautxim rau nws rawsli tej uas nws tau ua rau kuv lawm. #1Tim 1:20; Nnkauj 62:12; Loos 2:6 15Koj yuavtsum ceevfaj zoo txog nws, rauqhov nws yog tus uas tawmtsam peb tej lus qhia kawg nkaus li.

16Thawjzaug uas kuv hais daws kuv tuskheej, yeej tsis muaj leejtwg pab kuv li; sawvdaws puavleej tso kuv tseg. Thov Vajtswv tsis txhob muab tej ntawd los rautxim rau lawv! 17Tiamsis tus Tswv yeej nrognraim kuv thiab Nws pub dagzog rau kuv, kuv thiaj muaj cuabkav mus qhia Vajtswv Txojlus puvntoob rau txhua tus uas yog Lwm Haivneeg tau hnov. Vajtswv tau cawm kuv dim ntawm tsov ntxhuav lub qhovncauj los. 18Tus Tswv yuav cawm kuv kom dim txhua yam kev phem thiab yuav coj kuv mus txog saum ntuj ceebtsheej uas tsis txhawj txog dabtsi li. Thov kom Vajtswv tau koobmeej mus ibtxhis li! Amees.

Lus Xa Xov Thaum Xaus

19Thov hais nojqab nyobzoo rau Pixilas thiab Akhilas, thiab rau Aunexifaulus tsev neeg. #Teshl 18:2; 2Tim 1:16-17 20Elatus nyob tim lub nroog Kauleethaus, thiab kuv tso Rhaufimus rau tim lub nroog Miletus lawm, vim nws mob. #Teshl 19:22; Loos 16:23; Teshl 20:4; 21:29 21Koj ciali npaj tiag-tiag kom koj tau tuaj uantej lub caij ntuj no.

Yunpulus, Pudees, Linas, Klhaudias thiab tagnrho cov kwvtij ntseeg sawvdaws kuj hais nojqab nyobzoo rau koj thiab.

22Thov tus Tswv nrognraim koj thiab thov Nws txoj hmoovhlub nyob nrog nej sawvdaws.

Currently Selected:

2 Timautes 4: MWW2022

Highlight

Copy