2 Timautes 3

Lub Sijhawm Kawg

1Ncontsoov tias thaum lub sijhawm uas ntiajteb yuav kawg, yuav muaj kev ntxhovsiab heev. 2Neeg yuav hlub lawv tuskheej lawm xwb, lawv ntshaw nyiajtxiag, ua neeg khavtheeb, thiab muabhlob; lawv yuav txobthuam, tsis mloog niamtxiv lus, mom luag txheej, thiab tsis muaj kev dawbhuv li lawm; 3tsis sibhlub, tsis sib zamtxim, nyiam taugxaiv, tsis muaj kev tswj lawv tuskheej, ua neeg siab nruj siab tsiv, thiab ntxub tej yam zoo, 4ua neeg ntxeevsiab, siab heev, lawv saib lawv tsimtxiaj dua lwmtus, lawv nyiam kev lomzem heev dua li nyiam Vajtswv; 5lawv uatxuj hais tias lawv yog cov muaj kev ntseeg, tiamsis lawv yeej tsis kam lees Vajtswv lub hwjchim li. Koj tsis txhob nrog cov neeg ntawd uake kiag li.

6Cov neeg ntawd muaj qeeleej pheej mus hauv luag tej tsev, mus tswj tej pojniam uas tsis tshua muaj tswvyim uas pheej nyuajsiab rau lawv tej kev txhaum thiab lawv lub siab uas pheej xav mus ua txhua yam kev phem; 7cov pojniam ntawd yeej niajhnub kawm li ntag, tiamsis lawv yeej tsis muaj peevxwm paub qhov tseeb kiag li. 8Cov neeg uas mus tswj cov pojniam ntawd, lawv tawmtsam qhov tseeb ib yam nkaus li thaum ub Yanes thiab Yanpeles nkawd tawmtsam Mauxes ntag. Lawv lub hlwb twb tsis ua haujlwm thiab lawv twb tsis ntseeg Vajtswv lawm. #Khiav 7:11 9Lawv yuav ua tsis tau haujlwm mus deb ntxiv lawm, rauqhov sawvdaws yuav pom tias lawv ruam npaum licas tiag.

Tej Lus Qhia Thaum Kawg

10Tiamsis koj twb ua rawsli kuv tej lus qhia, kuv lub neej, kuv lub homphiaj, kuv txoj kev ntseeg, kuv lub siabntev, kuv txoj kev hlub, kuv txoj kev ua siabntev tiv, 11kuv txoj kev raug tsimtxom thiab kuv txoj kev txomnyem. Koj twb paub txhua yam uas kuv raug nyob hauv lub nroog Ati-aukias, hauv lub nroog Ikaunius, thiab hauv lub nroog Lixathas lawm hais tias kuv tiv tej kev tsimtxom ntawd npaum licas. Txawm li ntawd los tus Tswv Yexus tau cawm kuv dim ntawm txhua yam ntawd huv tibsi. #Teshl 13:14-52; Teshl 14:1-7; Teshl 14:8-20 12Tseeb tiag, txhua tus uas xav ua lub neej dawbhuv nyob rau hauv Yexus Khetos yeej yuav raug kev tsimtxom. 13Tiamsis cov neeg phem thiab cov neeg uas txawj-txawj dag-ntxias lwmtus, lawv tseem yuav hajyam ua phem heev dua qub ntxiv, lawv txawj mus dag-ntxias lwmtus kawg li, tiamsis lawv kuj raug lwmtus dag-ntxias thiab.

14Tiamsis ntawm koj tuskheej, ces kavtsij rausiab ua rawsli Txojlus tseeb uas koj tau kawm thiab ntseeg ruaj lawm. Rauqhov koj twb paub lawm hais tias cov neeg uas koj tau mus kawm ntawm lawv los yog leejtwg. 15Thiab koj nco hais tias txij thaum koj tseem yau los, koj yeej paub Vajtswv tej Lus lawm. Txojlus ntawd muaj peevxwm pab tau kom koj muaj tswvyim totaub txog txoj kev cawmdim uas los ntawm kev ntseeg Yexus Khetos. 16Vajtswv Txojlus txhua nqe yog Vajtswv tshuab pa rau thiab muaj nujnqis heev#3:16: Vajtswv txojlus txhua nqe yog Vajtswv tshuab pa rau thiab muaj nujnqis heev; lossis Vajtswv txojlus txhua nqe uas tawm hauv Vajtswv lub qhovncauj los kuj muajnqis heev. rau kev qhia, kev qhuabntuas, kho qhov uas ua tsis yog, thiab cobqhia rau txoj kev ncajncees, 17kom tus uas ua Vajtswv haujlwm thiaj paub txhij-txhua thiab npaj txaus uas yuav ua txhua yam haujlwm zoo.

Currently Selected:

2 Timautes 3: MWW2022

Highlight

Copy