2 Petus 2

Cov Xibhwb Cuav

1Yav tas los tau muaj cov xibhwb cevlus cuav tshwm nyob nruabnrab hauv Vajtswv haivneeg, nimno los yeej yuav muaj cov xibhwb uas qhia tsis tseeb tshwm nyob nruabnrab ntawm nej ib yam nkaus thiab. Lawv yuav nyiag qhia tej kev ntseeg tsis tseeb uas yuav coj nej mus raug kev puastsuaj, thiab lawv yuav tsis lees paub tus Tswv uas tau txhiv lawv; tib ntsais muag xwb lawv yuav raug kev puastsuaj. 2Txawm yogli ntawd los tseem muaj ntau leej yuav xyaum ua phem ua qias rawsli cov neeg ntawd ua; twb yog vim lawv coj li ntawd, neeg thiajli thuam txojkev uas yog txoj tseeb. 3Cov xibhwb cuav ntawd, lawv muabhlob, lawv qhia tej zaj uas tsis muaj hauvpaus hauvntsis ntxias nej kom lawv tsam xwb. Tus Txiavtxim rau lawv twb npaj txhij thaum ntxov los lawm, thiab tus uas Rhuav kom lawv puastsuaj yeej tseem tsis tsaugzog kiag li!

4Rauqhov yog Vajtswv twb tsis zamtxim rau cov timtswv ceebtsheej uas tau ua txhaum, es Nws muab lawv pov rau hauv ntujtawg, muab lawv khi rau hauv qhov chaw uas tsausntuj nti,#2:4: hauv qhov chaw uas tsausntuj nti; tej phau ntawv qub uas xuas tes sau, muaj hauv cov qhov uas tsausntuj nti. tos txog hnub uas Vajtswv txiavtxim rau lawv. 5Thaum ub uas Vajtswv tso dej los nyab lub ntiajteb no vim neeg ua phem ua qias, es Nws twb tsis cawm lub ntiajteb no li, Nws tsuas cawm Nau-as tus uas qhia txoj kev ncajncees, thiab cawm xya leej uas nrog Nau-as xwb. #Chiv 6:1—7:24 6Yog Vajtswv rautxim rau lub nroog Xaudoos thiab Kaumaulas los ntawm qhov uas Nws tso hluavtaws los hlawv ob lub nroog ntawd kom kubhnyiab ua tshauv tag huv tibsi, Nws muab ob lub nroog ntawd ua yamntxwv qhia hais tias cov neeg uas ua txhaum yuav raug puastsuaj ib yam nkaus li ntawd. #Chiv 19:24 7Yog Vajtswv cawm Lauj tus uas yog neeg ncajncees, vim Lauj nyuajsiab rau cov neeg uas ua kev phem kev qias, #Chiv 19:1-16 8rauqhov Lauj yog neeg ncajncees, nws niajhnub nrog cov neeg ntawd nyob uake, nws pom tej kev phem uas lawv ua thiab hnov tej lus phem uas lawv hais, mas ua rau nws ntxhovsiab kawg li.

9Yogli ntawd, Vajtswv yeej paub tias yuav cawm cov neeg uas ncajncees kom lawv dim lawv tej kev nyuajsiab licas thiab yuav ceev cov neeg uas ua txhaum tseg cia txog hnub uas Vajtswv txiavtxim, 10tshwjxeeb yog cov uas ntshaw ua phem ua qias ntawm sab nqaijtawv thiab saib tsis taus Vajtswv lub hwjchim.

Cov xibhwb cuav no muaj lub siab tawv thiab nyiam ua li lawv lub siab xwb, txawm lawv yuav haislus txobthuam cov uas muaj hwjchim saum nruabntug los lawv yeej tsis ntshai kiag li. 11Txawm yog cov timtswv ceebtsheej tseem muajzog thiab muaj hwjchim tshaj cov xibhwb cuav no los lawv twb tsis komtxim thiab txobthuam cov xibhwb cuav no tabmeeg Vajtswv.

12Tiamsis cov xibhwb cuav no coj zooli tej tsiaj uas tsis paub xav thiab tsis muaj hlwb; lawv zooli tej tsiaj qus uas yug los rau luag ntes thiab luag tua, yam twg uas lawv tsis totaub ces lawv tsuas tawmtsam thiab txobthuam xwb. Lawv yuav raug puastsuaj ib yam li tej tsiaj qus, 13thiab lawv yuav raug kev txomnyem los ntawm tej uas lawv tau ua rau lwmtus raug txomnyem. Lawv suav hais tias tej kev lomzem uas lawv ua thaum nruabhnub nrig mas txaus lawv siab kawg li. Thaum lawv nrog nej noj mov uake, lawv ua phem ua qias kom rhuav nej ntsejmuag; lawv ua li ntawd, rauqhov lawv nyiam tej kev phem kev qias ntawd heev. 14Lawv ob lub qhovmuag tsuas ntsiantsoov txoj kev ua nkauj ua nraug xwb, txawm ua txhaum npaumtwg los yeej tsis txaus li. Lawv ntxias cov neeg uas lub siab nyob tsis tiaj tsis tus mus ua txhaum. Lawv cob lawv lub siab ntshaw luag tug. Lawv yog cov menyuam uas twb raug foom phem lawm! 15Lawv tso txoj kev ua ncaj tseg, lawv thiaj yuamkev mus taug tau Npe-aus tus tub Npala-as txojkev, Npala-as ntshaw nyiaj heev los ntawm tej kev uas ua txhaum, #Teev 22:4-35 16tiamsis nws tus nees uas yeej ibtxwm hais tsis tau lus txawm haislus li neeg hais rau nws, tau cem nws thiab txwv tsis pub nws mus ua-dog ua-dig li tej neeg vwm ua.

17Cov neeg ntawd zoo li cov qhovdej uas dej twb nqhuab tag thiab zoo li tej huab uas cuadaj cuadub ntsawj ya tag; Vajtswv twb npaj qhov chaw uas tsausntuj nti cia rau lawv lawm. 18Lawv nyiam khav txog lawv, tiamsis tej uas lawv khav ntawd yeej tsis muaj qabhau dabtsi li, lawv siv txoj kev ua phem ua qias ntawm sab nqaijtawv los ntxias cov neeg uas nyuamqhuav tso txoj kev txhaum tseg, kom cov neeg ntawd rovqab yuamkev mus ua txhaum. 19Lawv coglus rau cov neeg ntawd hais tias lawv yuav pab kom cov neeg ntawd muaj kev ywjpheej, tiamsis lawv tuskheej kiag los lawv tseem ua txoj kev puastsuaj qhev; rauqhov yam twg tswj koj, ces koj yog yam ntawd tus qhev.

20Yog lawv twb khiav dim ntawm tej kev phem kev qias hauv lub ntiajteb no los ntawm qhov uas lawv paub peb tus Tswv thiab Cawmseej Yexus Khetos lawm, tiamsis tseem cia tej kev phem ntawd rovqab khi tau lawv thiab tseem kovyeej lawv thiab, mas thaum kawg lawv tseem yuav hajyam phem dua thaum chivthawj. 21Yog lawv yeej tsis paub txoj kev ncajncees kiag li mas tseem zoo dua qhov uas lawv paub lawm, tiamsis lawv txhobtxwm tig nrobqaum rau tej lus qhia dawbhuv uas Vajtswv twb muab cob rau lawv lawm. 22Tej uas lawv raug ntawd qhia tau hais tias yeej muaj tseeb rawsli zaj pajlug uas hais tias, “Dev rovqab mus noj dev cov ntuav” thiab “Tus npua uas luag twb muab dej ntxuav huv lawm, tseem rovqab mus da pas av dua.”#Paj 26:11

Currently Selected:

2 Petus 2: MWW2022

Highlight

Copy