2 Petus 1
1
1Los ntawm Ximoos Petus, uas yog Yexus Khetos ib tug tubtxib thiab ib tug timthawj.
Xa mus rau cov uas tau txais txoj kev ntseeg uas zoo kawg nkaus ib yam li peb li thiab, uas yog los ntawm peb tus Vajtswv thiab Cawmseej Yexus Khetos uas ncajncees:
2Thov kom Vajtswv txoj hmoovhlub thiab kev nyabxeeb muaj puvnpo nyob rau hauv nej txhua tus los ntawm qhov uas nej paub Vajtswv thiab paub peb tus Tswv Yexus Khetos.
Cov Uas Vajtswv Xaiv Thiab Hu
3Vajtswv lub hwjchim uas loj kawg nkaus tau pub txhua yam uas peb cheemtsum rau peb, kom peb ua tau lub neej dawbhuv los ntawm qhov peb paub tus uas hu peb los koom nrog Nws tus#1:3: los koom nrog Nws tus; tej phau ntawv qub uas xuas tes sau, muaj los ntawm Nws tus. tshwjchim uas ci ntsa-iab thiab txoj kev zoo. 4Los ntawm tej ntawd, Vajtswv tau pub tej uas Nws tau coglus tseg uas yog txoj koobhmoov zoo kawg nkaus rau peb, kom los ntawm tej koobhmoov ntawd nej thiaj yuav khiav dhau ntawm tej kev phem kev qias uas yuav puastsuaj nyob rau hauv lub ntiajteb no, thiab nej thiaj yuav muaj lub neej zoo ib yam li Vajtswv lub.
5Twb yog vimli no ntag, nej yuavtsum ua txhua yam txhua tsav kom ntxiv tau txoj kev ua zoo rau nej txoj kev ntseeg; ntxiv kev paub rau nej txoj kev ua zoo; 6ntxiv txoj kev tswj nej tuskheej rau nej txoj kev paub, ntxiv txoj kev ua taus siabntev tiv rau nej txoj kev tswj nej tuskheej; ntxiv txoj kev dawbhuv rau nej txoj kev ua taus siabntev tiv; 7ntxiv kev sibhlub li kwvtij rau nej txoj kev dawbhuv; thiab ntxiv txoj kev hlub rau nej txoj kev sibhlub li kwvtij. 8Yog nej muaj tej uas hais no nyob rau hauv nej thiab tej ntawd lojhlob zujzus tuaj, ces yuav ua rau nej kubsiab thiab tawgpaj txitxiv rau hauv txoj kev paub peb tus Tswv Yexus Khetos heev ntxiv. 9Tiamsis tus uas tsis muaj tej ntawd, ces yog nws lub qhovmuag yeej pom tsis deb thiab nws digmuag lawm xwb, thiab nws tsis ncoqab lawm hais tias nws tej kev txhaum yav tas los twb raug ntxuav huv tibsi lawm.
10Yogli ntawd, cov kwvtij, nej yuavtsum muab siab rau heev dua li yav tas los kom thiaj qhia tau hais tias nej yog cov uas Vajtswv tau hu thiab xaiv cia lawm tiag. Yog nej ua li ntawd, nej yeej yuav tsis ntog ib zaug li,#1:10: nej yeej yuav tsis ntog ib zaug li; lossis nej yeej yuav tsis poob rau txoj kev txhaum ib zaug li. 11thiab Vajtswv thiaj yuav pub nej muaj feem mus rau hauv peb tus Tswv thiab Cawmseej Yexus Khetos lub tebchaws uas nyob mus ibtxhis li.
12Yogli ntawd, txawm yog nej twb paub tej ntawd thiab yeej nyob ruaj-khov rau hauv qhov tseeb lawm los, kuv yeej yuav niajhnub hais kom nej ncontsoov txog tej uas nej muaj ntawd. 13Thaum kuv tseem muaj txojsia nyob no, kuv xav tias tsimnyog kuv yuavtsum hais kom nej ncontsoov tej ntawd, 14rauqhov kuv paub tias tshuav tsis ntev lawm kuv twb yuav tso kuv lub cev uas txawj tuag no tseg, rawsli peb tus Tswv Yexus Khetos tau qhia meej rau kuv lawm. 15Yogli ntawd, kuv yuav ua txhua yam txhua tsav kom nej nco tej ntawd cia, thaum dua kuv lawm los nej thiaj yuav ncontsoov mus li.
Cov Uas Pom Khetos Tus Tshwjchim
16Thaum peb qhia zaj uas hais txog peb tus Tswv Yexus Khetos lub hwjchim thiab zaj uas Nws yuav rovqab los rau nej; peb tsis tau qhia rawsli tej dabneeg uas cov neeg txawjntse hais, tiamsis peb lub qhovmuag yeej pom kiag Nws lub hwjchim lawm. 17Thaum Vajtswv tus uas yog Leejtxiv pub koobmeej thiab pub tus tshwjchim uas ci ntsa-iab rau Nws, thaum ntawd peb yeej nrog Nws nyob uake, thiab muaj lub suab uas hais hauv tus Tshwjchim ci ntsa-iab uas Loj Kawg Nkaus tuaj rau Nws hais tias, “No yog kuv tus Tub uas kuv hlub, kuv txaussiab rau Nws heev.”#Math 17:1-5; Malak 9:2-7; Lukas 9:28-35 18Thaum peb nrog Nws nyob saum lub roob dawbhuv, peb puavleej hnov lub suab no hais saum ntuj tuaj rau Nws.
19Yogli ntawd, peb hajyam ciasiab rau tej uas cov xibhwb cev Vajtswv lus tau qhia tseg lawm. Nej ua tibzoo khaws tej lus ntawd cia rau hauv nej lub siab, rauqhov tej lus ntawd zoo li lub teeb uas ci hauv qhov tsausntuj mus txog thaum kajntug, thiab lub hnubqub uas ci thaum yuav kajntug yuav ci rau hauv nej lub siab. 20Qhov tseemceeb tshajplaws, nej yuavtsum totaub tias peb yeej tsis muaj ib tug uas yuav muaj tswvyim txhais tau tej lus qhiatshwm uas nyob hauv Vajtswv tej Lus li. 21Rauqhov tej lus qhiatshwm ntawd tsis yog los ntawm neeg los, tiamsis yog Vaj Ntsujplig tus Dawbhuv ua tus tshoov neeg lub siab kom lawv qhia rawsli Vajtswv qhia rau lawv xwb.
Currently Selected:
2 Petus 1: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
