2 Kauleethaus 12

Tej Uas Paulus Ua Yogtoog Pom

1Txawm yog tej uas kuv khav tsis muaj qabhau los kuv yeej khav mus ntxiv. Tiamsis kuv yuav hais txog tej uas peb tus Tswv qhia rau kuv thiab ua rau kuv ua yogtoog pom. 2Kuv paub ib tug txivneej ntseeg Vajtswv uas kaum-plaub xyoos dhau los, Vajtswv tau coj nws mus rau saum ntuj ceebtsheej tshooj thib peb. (Xyov nws mus hlo lub cev lossis ua yogtoog pom xwb, kuv tsis paub, tsuas yog Vajtswv thiaj paub xwb.) 3Kuv paub tias Vajtswv tau coj tus txivneej ntawd mus rau saum qhov chaw uas tau zoo nyob kajsiab lug lawm (tiamsis ua li kuv nyuamqhuav hais ntawd, xyov nws mus kiag lub cev lossis ua yogtoog pom xwb, kuv tsis paub, tsuas yog Vajtswv thiaj paub xwb), 4thaum nws nyob saud, nws hnov tej uas tsis muaj leejtwg yuav muaj cuabkav piav tau, tej uas txwv tsis pub neeg qhia tawm.

5Yogli ntawd, kuv yuav khav txog tus txivneej no, tiamsis kuv yuav tsis khav txog kuv tuskheej; kuv tsuas khav txog kuv txoj kev tsaugmuag xwb. 6Txawm yog kuv xav khav los kuv yeej tsis yog neeg ruam, rauqhov kuv tsuas hais qhov tseeb xwb. Tiamsis kuv yuav tsis khav, kom thiaj yuav tsis muaj leejtwg qhuas kuv tshaj li nej qhuas vim nej tau pom kuv ua lossis hnov kuv hais los lawm.

7Tiamsis Vajtswv tsis xav kom kuv khavtheeb vim qhov uas Nws tau ua ntau yam zoo rau kuv pom, Nws thiaj muab ib tug pos los chob kuv lub cev, qhov ntawd zooli Xatas ib tug tubtxib, los tsimtxom kuv kom kuv tsis txhob khav. 8Kuv twb thov tus Tswv peb zaug kom Nws muab rho tawm ntawm kuv mus. 9Tiamsis Nws teb tias, “Kuv txoj hmoovhlub yeej muaj txaus nkaus rau koj, rauqhov txoj kev tsaugmuag nyob qhovtwg, Kuv lub hwjchim yuav muaj puvnpo nyob rau qhov ntawd.” Yogli ntawd, kuv yuav zoosiab hlo khav txog kuv txoj kev tsaugmuag, kom Khetos lub hwjchim thiaj yuav muaj nyob rau hauv kuv. 10Vim kuv saib rau saum Khetos, kuv thiaj txaussiab rau txoj kev tsaugmuag, txoj kev raug txobthuam, raug teebmeem, raug tsimtxom, thiab muaj kev tuncua. Rauqhov thaum kuv tsaugmuag, thaum ntawd kuv muajzog.

Paulus Txoj Kev Txhawjxeeb Txog Cov Kauleethaus

11Kuv ua li tus neeg ruam ua, tiamsis twb yog vim nej kuv thiaj ua li ntawd. Twb tsimnyog uas nej yuavtsum qhuas kuv. Txawm yog kuv tsis muajnqis dabtsi li los kuv yeej tsis qis dua nej cov “timthawj qibsiab” ntawd. 12Kuv ua siabntev ua ntau yam txujci tseemceeb kom nej pom tseeb hais tias kuv yog ib tug timthawj. 13Kuv puas tau saib nej qis dua lwm pawg ntseeg, tshwj qhov uas kuv tsis thov nej pab nyiaj rau kuv? Yog kuv ua li ntawd txhaum lawm los thov nej zamtxim rau kuv!

14Zaumno yog zaum thib peb uas kuv npaj txhij yuav tuaj saib nej, thiab kuv yuav tsis thov txog nej ib yam dabtsi li. Qhov uas kuv xav tau yog nej, tsis yog nej tej nyiajtxiag. Rauqhov tsis yog tej menyuam yuav txhawm rau niamtxiv, tsuas muaj niamtxiv thiajli yuav txhawm rau tej menyuam xwb. 15Kuv zoosiab uas yuav siv txhua yam kuv muaj thiab siv kuv tus dag tus zog huv tibsi pab nej. Yog kuv hlub nej ntau npaum li no, nej tseem yuav hlub kuv tsawg dua no thiab lov?

16Nej yeej pom tias kuv tsis yog ib lub nra uas hnyav rau nej, tiamsis muaj qeeleej hais tias kuv yog neeg muaj lub siabphem heev, kuv tuaj ntxias nej los ntawm kuv tej lus dag. 17Kuv ntxias tau nej licas? Qhov uas kuv txib ib cov neeg tuaj saib nej, qhov ntawd yog kuv ntxias nej no lov? 18Kuv thov Titus tuaj saib nej thiab txib peb ib tug kwvtij nrog nws tuaj. Puas yog Titus dag-ntxias nej ib yam dabtsi los yuav lawm? Titus yeej tsis lam ua li ntawd! Wb yeej koom ib lub siab, taug ib txojkev, thiab ua haujlwm zoo ib yam nkaus.

19Tejzaum nej yuav xav tias, peb tsuas yog niajhnub hais daws peb zaj xwb. Tsis yog li ntawd! Peb tsuas hais rawsli Khetos kom peb hais timntsej timmuag ntawm Vajtswv xwb. Cov kwvtij uas peb hlub 'e, txhua yam uas peb ua yeej yog peb ua pab nej kom lojhlob xwb. 20Kuv ntshai nyobtsam thaum kuv tuaj txog ntawm nej, kuv yuav pom nej txawv li qhov uas kuv lub siab xav, thiab nej los yuav pom kuv txawv li nej lub siab xav. Kuv ntshai nyobtsam kuv yuav pom txoj kev sibcav sibceg, sibkhib, npautaws, siabhlob, sibthuam, taugxaiv, khavtheeb thiab tsim kev kubntxhov. 21Kuv ntshai nyobtsam lwm zaus thaum kuv tuaj saib nej, Vajtswv yuav ua rau kuv txajmuag tabmeeg nej, thiab kuv yuav quajntsuag rau coob leej uas yav tas los tau ua kev txhaum thiab lawv tseem tsis tau tso tej kev phem kev qias, kev ntshaw luag tug, thiab kev nkauj kev nraug uas lawv niajhnub ua ntawd tseg.

Currently Selected:

2 Kauleethaus 12: MWW2022

Highlight

Copy