2 Kauleethaus 11

Paulus Thiab Cov Timthawj Cuav

1Txawm yog kuv haislus zooli tus ruam mentsis los thov nej ua siabntev mloog kuv tej lus. 2Kuv khib txog nej ib yam li Vajtswv khib; nej zoo ib yam li tus nkaujxwb dawbhuv uas kuv twb qhaib cia rau ib tug txivneej lawm, tus ntawd yog Khetos. 3Tiamsis kuv ntshai hais tias nab tau dag-ntxias Evas los ntawm lub tswvyim phem licas, nej lub siab yuav raug muab hloov kom phem ua rau nej tsis muab siab npuab Khetos ib yam li ntawd thiab. #Chiv 3:1-13 4Vim nej ciali txaussiab yeem mloog cov neeg uas tuaj qhia dua ib tug Yexus uas txawv li tus peb qhia; thiab nej ciali txais yuav ib tug ntsujplig thiab txoj moo zoo uas txawv hlo li Vajtswv tus Ntsujplig thiab Txoj Moo Zoo uas nej tau hnov peb qhia rau nej lawm!

5Kuv xav tias kuv yeej tsis yog tus uas qis dua cov uas nej suav hais tias yog cov “timthawj qibsiab” ntawd li. 6Txawm yog kuv tsis muaj peevxwm rau sab kev haislus pestsawg los kuv kuj muaj kev txawjntse thiab. Peb twb ua txhua yam txhua tsav lus qhia tej no meej kawg li rau nej huv tibsi lawm.

7Kuv tsis suav nqi dabtsi li thaum kuv tuaj qhia Txoj Moo Zoo uas hais txog Vajtswv zaj rau nej; kuv txo hwjchim kom nej yog cov tseemceeb, qhov ntawd yog kuv ua txhaum lawm lov? 8Thaum kuv tseem ua haujlwm pab nej, yog lwm pawg ntseeg xa nyiaj tuaj yug kuv. Yog muab hais los ces cuag li kuv nyiag lawv li nyiaj, kom kuv thiaj pab tau nej.

9Lub sijhawm uas kuv nrog nej nyob, txawm kuv muaj kev tuncua, los kuv yeej tsis ua ib lub nra rau leejtwg; rauqhov cov kwvtij uas tuaj pem Makedaunias tuaj, lawv twb nqa txhua yam uas kuv tuncua tuaj rau kuv lawm. Yav tas los, kuv yeej ceevfaj tsis tau ua ib lub nra rau nej, txawm yog yav tomntej los kuv tseem yuav ceevfaj tsis ua ntxiv thiab. #Filipi 4:15-18 10Kuv paub tias Khetos tej lus tseeb nyob rau hauv kuv licas, tej uas kuv khav no yuav nrov-ncha mus thoobplaws hauv lub xeev Akhayas li ntawd, tsis muaj leejtwg yuav txwv tau. 11Vim licas kuv thiaj hais li no? Vim yog kuv tsis hlub nej lov? Vajtswv yeej paub tias kuv hlub nej!

12Tej uas nimno kuv ua, kuv yeej tseem yuav ua ntxiv mus li, kom lawv cov uas hais tias yog cov “timthawj qibsiab” ntawd thiaj tsis muaj lus khav hais tias lawv ua lawv tes haujlwm ib yam li peb ua. 13Lawv cov ntawd tsis yog timthawj tseeb, lawv yog timthawj cuav. Lawv ua haujlwm dag-ntxias lwmtus thiab lawv uatxuj ua zooli lawv yog Khetos cov tseem timthawj. 14Tej ntawd tsis yog tej yam uas sawvdaws yuav xav tsis thoob! Txawm yog Xatas kiag los nws twb txia tau ua li ib tug timtswv ceebtsheej uas muaj hwjchim ci ntsa-iab. 15Yogli ntawd, txawm nws cov tubtxib yuav txia ua li cov tubtxib uas ncajncees los yeej tsis nyuaj hlo li. Tiamsis thaum kawg lawv yeej yuav tau txais yam uas tsimnyog rau tej uas lawv tau ua los lawm.

Paulus Raug Kev Txomnyem Vim Nws Yog Ib Tug Timthawj

16Kuv rov hais dua hais tias: nej txhob xav tias kuv yog ib tug neeg ruam. Tiamsis yog nej ho xav li ntawd los, thov kom nej txais yuav kuv tam li ib tug ruam, kom kuv thiaj zoo khav mentsis txog kuv. 17Tej lus khav uas kuv hais no tsis yog tej uas tus Tswv kom kuv hais, tiamsis kuv hais li tus ruam hais. 18Vim muaj neeg coob-coob, nyias taus nyias khav li neeg ntiajteb khav, yogli ntawd kuv yuav khav li lawv thiab. 19Nej cov uas ntse heev, nej thiaj ua siabntev mloog tej neeg ruam hais! 20Nej uv taus cia rau luag yuam nej ua qhev, lossis ntxo nej, lossis cuab hlua tos nej kev, lossis ua saib tsis taus nej, lossis xuas tawgncuav rau nej ntsejmuag. 21Kuv txajmuag lees hais tias peb tsis muajzog txaus ua taus li ntawd!

Tiamsis yog lwmtus muaj cuabkav khav li ub li no, kuv yuav hais li kuv yog neeg ruam, hais tias kuv los yeej muaj cuabkav khav thiab. 22Lawv yog neeg Henplais no lov? Kuv los kuj yog thiab. Lawv yog neeg Yixalayees no lov? Kuv los kuj yog thiab. Lawv yog Anplahas li cajces no lov? Kuv los kuj yog thiab. 23Lawv yog Khetos cov tubtxib no lov? Yog kuv yuav hais li ib tug neeg vwm hais, kuv tseem yog ib tug tubtxib uas zoo dua lawv! Kuv tseem ua haujlwm khwv dua lawv, kuv tseem raug kaw hauv tsev lojcuj ntau dua lawv, kuv tseem raug luag nplawm ntau dua lawv, thiab kuv twb yuavluag tuag ntau zaug dua lawv. #Teshl 16:23

24Cov Yudais muab kuv nplawm tsib zaug, ib zaug twg yog pebcaug-cuaj nplawm; #2Kev 25:3 25kuv raug cov neeg Loos nplawm peb zaug thiab raug muab pobzeb ntaus ib zaug. Kuv ntsib qhov uas nkoj tawg tag peb zaug, thiab muaj ib zaug kuv poob rau hauv hiavtxwv tau ib hnub ib hmos. #Teshl 16:22; Teshl 14:19 26Kuv taug kev mus rau ub rau no, kuv ntsib teebmeem los ntawm dej nyab, los ntawm tubsab, los ntawm kuv haivneeg, los ntawm Lwm Haivneeg; ntsib teebmeem hauv nroog, hauv havzoov havtsuag, hauv hiavtxwv, thiab ntawm tej phoojywg cuav. #Teshl 9:23; Teshl 14:5 27Kuv tau ua haujlwm hnyav thiab sab heev, ntau zaug yeej yoo dabntub, tshaib plab, nqhis dej, tiv no, thiab liabqab. 28Tsis tag li ntawd xwb, kuv niajhnub niajhmo ntxhovsiab vim kuv txhawj txog txhua pawg ntseeg. 29Thaum ib tug tsaugmuag, los kuv nrog nws tsaugmuag, thaum ib tug poob rau kev txhaum, los mob kuv lub siab kawg nkaus.

30Yog kuv yuavtsum khav xwb, ces kuv yuav khav txog tej uas qhia hais tias kuv tsaugmuag npaum licas. 31Vajtswv tus uas yog Yexus Khetos Leejtxiv, Nws yog tus uas tsimnyog peb qhuas mus ibtxhis, Nws yeej paub tias kuv tsis hais dag. 32Thaum kuv nyob hauv lub nroog Damaxakas, tus tswvxeev uas ua haujlwm rau Vajntxwv Aletas tau txib tubrog mus zov tej roojvag tos ntes kuv. #Teshl 9:23-25 33Tiamsis muaj neeg muab ib lub tawb ntim kuv thiab muab kuv tso dauv ntawm ib lub qhovrais raws tus ntsayeej mus rau sabnraud, kuv thiaj khiav tawm tau ntawm tus tswvxeev txhais tes mus.

Currently Selected:

2 Kauleethaus 11: MWW2022

Highlight

Copy