1 Petus 2
2
Lub Pobzeb Uas Muaj Sia Thiab Haivneeg Uas Dawbhuv
1Yogli ntawd, nej yuavtsum tso txhua yam kev phem tseg; tsis txhob dag, tsis txhob ua ntsejmuag ncaj siabnkhaus, tsis txhob khib, thiab tsis txhob haislus txobthuam lwmtus. 2Nej yuavtsum ua li tej menyuam mosliab uas nyuamqhuav yug, uas tshaib nqhis txog cov kua mis dawbhuv ntawm sab ntsujplig, kom los ntawm cov kua mis ntawd nej thiaj yuav lojhlob zoo thiab dim nej lub txim. 3Vajtswv Txojlus hais tias, “Nej twb tau saj lawm hais tias tus Tswv zoo npaum licas tiag.” #Nnkauj 34:8
4Ciali los cuag tus Tswv, Nws yog lub pobzeb ciajsia uas neeg tsis kam lees yuav, tiamsis Vajtswv xaiv lub ntawd rauqhov lub ntawd yog lub uas muajnqis heev. 5Nej los kuj zooli cov pobzeb ciajsia, uas Vajtswv tabtom muab los ua lub tuamtsev ntawm sab ntsujplig, nej yog cov povthawj hlob uas dawbhuv, sawvcev ntawm Yexus Khetos fij tej khoom ntawm sab ntsujplig uas ua rau Vajtswv txaussiab. 6Rauqhov Vajtswv Txojlus hais tias:
“Saib maj, Kuv xaiv ib lub pobzeb uas muajnqis heev,
Kuv muab lub pobzeb ntawd mus teeb ua lub thawj rau hauv lub nroog Xi-oos;
tus uas ntseeg Nws, tus ntawd yuav tsis poob ntsejmuag.” #Yaxaya 28:16
7Lub pobzeb no muajnqis heev rau nej cov uas ntseeg, tiamsis rau cov uas tsis ntseeg:
“Lub pobzeb uas cov neeg ua tsev muab povtseg lawm,
tau dhau los ua lub thawj.”
8Thiab ib qho hais ntxiv hais tias,
“Lub pobzeb ntawd yog lub uas yuav ua rau neeg dawm,
thiab yuav ua rau lawv ntog.”
Qhov uas lawv dawm ntawd twb yog vim lawv tsis ntseeg Vajtswv Txojlus; qhov ntawd yeej yog rawsli Vajtswv tus dejsiab rau lawv.
9Tiamsis nej yog haivneeg uas Vajtswv tau xaiv cia lawm, nej yog Vajntxwv cov povthawj hlob uas ua Nws tes haujlwm, nej yog haivneeg uas dawbhuv, nej yog Vajtswv li neeg, yog cov uas raug xaiv mus qhia txog tej haujlwm zoo uas Vajtswv ua; Vajtswv yog tus uas hu nej tawm hauv qhov tsausntuj los nyob rau hauv Nws qhov kaj. #Khiav 19:5-6; Yaxaya 43:20; Khiav 19:5; 2Kev 4:20; 7:6; 14:2; Titus 2:14; Yaxaya 43:21; Yaxaya 9:2 10Yav tas los nej tsis yog Vajtswv haivneeg, tiamsis nimno nej yog Vajtswv haivneeg lawm; yav tas los nej tsis tau txais Vajtswv txoj kev tabncuab, tiamsis nimno nej tau txais Nws txoj kev tabncuab lawm. #Hauxe 2:23
Vajtswv Cov Tubtxib
11Cov kwvtij 'e, kuv thov nquahu nej ib yam li nej yog neeg tsis muaj teb muaj chaw nyob hauv ntiajteb no, kom nej tsis txhob cia tej kev phem kev qias ntawm sab nqaijtawv uas niajhnub uarog tawmtsam nej lub siab kav tau nej kiag li. 12Nej yuavtsum ua nej lub neej kom zoo kawg nkaus, kom thaum cov neeg tsis ntseeg Vajtswv uas nrog nej koom zej koom zos nyob uake komtxim hais tias nej ua phem los lawv yuav pom tes haujlwm zoo uas nej ua, thaum txog hnub uas Yexus rovqab los lawv yuav qhuas Vajtswv.
13Vim nej yog cov uas ntseeg tus Tswv, nej yuavtsum mloog tej nomtswv uas muaj hwjchim lus: yuavtsum mloog Huabtais lus, vim nws yog tus uas muaj hwjchim loj dua ntais huv tibsi, 14yuavtsum mloog cov tswvxeev lus, vim Huabtais tau tsa lawv ua cov rautxim rau cov neeg uas ua txhaum thiab qhuas cov neeg uas ua zoo. 15Rauqhov Vajtswv xav kom nej ua tej haujlwm zoo, cov neeg uas tsis muaj tswvyim uas pheej lam tau lam hais tej zaj uas tsis muaj hauvpaus hauvntsis, lawv thiaj yuav tsis muaj lus hais lawm. 16Nej yuavtsum nyob li cov neeg uas muaj kev ywjpheej; tiamsis tsis txhob siv nej txoj kev ywjpheej ntawd rau nej tau kev mus ua txhaum; yuavtsum ua nej lub neej zooli nej yog Vajtswv cov tubtxib. 17Nej yuavtsum hwm txhua tus, hlub cov ntseeg, paub ntshai Vajtswv, thiab hwm Huabtais.
Khetos Tus Yamntxwv Txog Kev Txomnyem
18Nej cov uas yog tubqhe, nej yuavtsum mloog nej cov tswv lus thiab hwm lawv kawg siab kawg ntsws, tsis yog nej yuav mloog cov tswv uas hlub nej thiab ua siabntev rau nej lus xwb, tiamsis nej yuavtsum mloog cov uas ua limhiam rau nej thiab. 19Yog nej tsis tau ua txhaum tiamsis luag tsimtxom nej thiab nej ua siabntev nyiaj, rauqhov nej paub tias Vajtswv xav kom nej ua li ntawd, Vajtswv yuav foom koobhmoov rau nej. 20Yog nej raug ntaus vim nej ua txhaum, txawm yog nej ua siabntev nyiaj los yeej tsis muaj leejtwg qhuas nej. Tiamsis yog nej raug tsimtxom vim nej ua zoo, thiab nej ua siabntev nyiaj, Vajtswv yuav foom koobhmoov rau nej.
21Vajtswv hu nej los twb yog vim qhov no ntag, rauqhov Khetos tau raug kev tsimtxom pub rau nej thiab tau ua yamntxwv rau nej xyaum, kom nej thiaj yuav taug tau Nws tus hneevtaw. 22Yexus yeej tsis tau ua ib qho txhaum, thiab Nws lub qhovncauj yeej tsis tau hais ib lolus dag li. #Yaxaya 53:9 23Thaum luag txobthuam Nws, los Nws yeej tsis teb ib lolus uas yuav txobthuam luag rovqab; thaum Nws raug tsimtxom, los Nws yeej tsis tig rov tsimtxom luag, tiamsis Nws muab kiag tej ntawd tso rau Vajtswv tus uas txiavtxim ncajncees. #Yaxaya 53:7
24Khetos yog tus uas ris peb lub txim rau ntawm Nws lub cev nyob saum tus ntoo khaublig, kom peb thiajli tuag rau txoj kev txhaum thiab ciajsia rau txoj kev ncajncees. Los ntawm Nws tej qhovtxhab uas raug luag nplawm, nej thiajli zoo tas lawm. #Yaxaya 53:5-6 25Yav tas los nej zooli pab yaj uas yuamkev lawm, tiamsis nimno Vajtswv twb coj nej rovqab los cuag tus Tswv yug yaj thiab tus uas Tsomkwm nej tus ntsujplig lawm.
Currently Selected:
1 Petus 2: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
