1 Yauhas 5

Peb Txoj Kev Kovyeej Lub Ntiajteb

1Tus uas ntseeg tias Yexus yog tus Mexiyas, tus ntawd yog yug los ntawm Vajtswv; thiab tus uas hlub leejtxiv, nws yeej hlub leejtxiv cov menyuam ib yam nkaus thiab. 2Qhov uas peb paub tias peb hlub Vajtswv cov menyuam yogli no: yog qhov uas peb hlub Vajtswv thiab ua rawsli Vajtswv tej lus qhia. 3Qhov uas peb hlub Vajtswv yog peb ua rawsli tej lus uas Nws hais. Thiab Nws tej lus ntawd yeej tsis ua ib lub nra hnyav rau peb, #Yauh 14:15 4rauqhov txhua tus uas yug los ntawm Nws twb kovyeej lub ntiajteb lawm. Qhov uas peb kovyeej lub ntiajteb twb yog vim peb txoj kev ntseeg. 5Leejtwg thiaj yuav kovyeej lub ntiajteb? Tsuas yog tus uas ntseeg tias Yexus yog Vajtswv tus Tub xwb.

Ua Timkhawv Hais Txog Yexus Khetos

6Yexus Khetos yog tus uas los ntawm dej thiab ntshav. Tsis yog Nws los nrog dej nkaus xwb, tiamsis yog nrog dej thiab ntshav huv tibsi. Thiab Vaj Ntsujplig yog tus uas ua timkhawv hais tias yeej muaj tseeb li ntawd tiag, rauqhov Vaj Ntsujplig yog qhov tseeb. 7Muaj peb yam ua timkhawv, xwsli: 8Vaj Ntsujplig, dej thiab ntshav; peb yam no puavleej hais ib yam nkaus. 9Peb yeej ntseeg neeg tej lus timkhawv uas lawv hais, tiamsis Vajtswv tej lus timkhawv uas Nws hais txog Nws tus Tub tseem hajyam tseemceeb dua vim tej lus ntawd yog Vajtswv tej lus timkhawv. 10Tus uas ntseeg Vajtswv tus Tub, tus ntawd yeej muaj Vajtswv lolus timkhawv no nyob rau hauv nws lub siab; tiamsis tus uas tsis ntseeg Vajtswv, tus ntawd suav hais tias Vajtswv yog tus dag, rauqhov nws tsis ntseeg txog tej lus timkhawv uas Vajtswv hais txog Vajtswv tus Tub. 11Lolus timkhawv ntawd yogli no: Vajtswv tau pub txojsia ntev dhawv mus ibtxhis rau peb lawm, thiab txojsia ntawd yog nyob rau hauv Nws tus Tub. #Yauh 3:36 12Tus uas muaj Leejtub, tus ntawd muaj txojsia; tus uas tsis muaj Vajtswv Leejtub, tus ntawd tsis muaj txojsia.

Txojsia Ntev Dhawv Mus Ibtxhis

13Kuv sau tej no tuaj rau nej cov uas ntseeg Vajtswv tus Tub lub npe, kom nej thiaj paub tias nej muaj txojsia ntev dhawv mus ibtxhis. 14No yog txoj kev ruajsiab uas peb muaj nyob rau hauv Vajtswv: yog peb thov ib yam dabtsi uas rawsli Nws lub siab nyiam, Nws yeej hnov peb tej lus thov. 15Yog peb paub tias Vajtswv hnov peb tej lus thov, ces peb yeej paub tias Nws yuav muab yam uas peb thov rau peb.

16Yog leejtwg pom nws ib tug kwvtij ua txhaum uas yuav tsis coj mus txog rau txoj kev tuag, nws yuavtsum thov Vajtswv, mas Vajtswv thiaj yuav pub kom tus ntawd muaj txojsia. Qhov no yog hais txog cov uas lawv tej kev txhaum yuav tsis coj lawv mus txog rau txoj kev tuag xwb. Tiamsis kuj muaj qhov kev txhaum uas coj tau mus txog rau txoj kev tuag thiab, kuv tsis tau hais kom nej thov Vajtswv rau qhov ntawd. 17Txhua yam kev phem puavleej yog kev txhaum huv tibsi, tiamsis tej kev txhaum ntawd muaj qeeyam kuj tsis coj mus rau txoj kev tuag thiab.

18Peb paub tias tus uas yug los ntawm Vajtswv, tus ntawd yeej tsis niajhnub ua txhaum, rauqhov Vajtswv tus Tub twb tsomkwm nws lawm, thiab dab ntxwgnyoog yuav ua tsis tau phem rau nws.

19Peb paub tias txawm dab ntxwgnyoog yog tus kav tagnrho lub ntiajteb no, los peb yeej tseem yog Vajtswv cov menyuam.

20Peb paub tias Vajtswv tus Tub tau los rau hauv ntiajteb no, thiab tau pub txoj kev totaub rau peb, kom peb paub Vajtswv uas yog tus tseeb tiag. Peb nyob rau hauv tus Vajtswv uas yog tus tseeb, vim peb nyob rau hauv Nws tus Tub Yexus Khetos. Nws yog tus Vajtswv tseeb tiag thiab yog txojsia ntev dhawv mus ibtxhis.

21Cov menyuam 'e, ceev nej tuskheej kom zoo, tsis txhob mus pe tej nyuag vajtswv cuav!

Currently Selected:

1 Yauhas 5: MWW2022

Highlight

Copy