1 Kauleethaus 9

Tus Timthawj Txojcai Thiab Nws Tes Haujlwm

1Kuv tsis muaj kev ywjpheej no lov? Kuv tsis yog ib tug timthawj no lov? Kuv tsis tau pom Yexus uas yog peb tus Tswv no lov? Nej tsis yog qhov nqizog los ntawm tes haujlwm uas kuv ua rau tus Tswv no lov? 2Txawm yog lwmtus tsis suav hais tias kuv yog ib tug timthawj los xij, nej yeej suav hais tias kuv yog ib tug timthawj rau nej! Rauqhov nej yog lub cim uas qhia txog kuv txoj kev ua timthawj nyob rau hauv tus Tswv.

3Thaum muaj neeg thuam kuv, kuv hais daws kuv zaj li no: 4Wb txawm tsis muaj cai uas tau txais kev noj kev haus los ntawm tes haujlwm uas wb ua li lov? 5Wb txawm tsis muaj cai coj ib tug pojniam uas ntseeg Vajtswv nrog wb uake, ib yam li lwmtus timthawj lossis ib yam li tus Tswv cov kwvtij thiab Petus lawv ua li lov? 6Lossis tsuas yog Npananpas thiab kuv thiaj yuavtsum tau khwv los yug wb xwb lov? 7Leejtwg mus ua tubrog es nws tseem rov them nws tej nujnqis? Leejtwg ua vaj cog txivhmab es nws tseem noj tsis tau cov txivhmab ntawd? Leejtwg yug tsiaj es nws tseem tsis muaj cai tso cov tsiaj ntawd tej kua mis los haus?

8Kuv hais li no yog hais rawsli noobneej hais xwb lov? Puas yog txoj Kevcai hais ib yam li no thiab? 9Muaj lus sau tseg rau hauv Mauxes txoj Kevcai hais tias, “Nej tsis txhob looj nyuj qhovncauj thaum nej tseem tabtom siv nyuj tsuj nplej.” Puas yog Vajtswv txhawj txog tus nyuj? #2Kev 25:4; 1Tim 5:18 10Vajtswv hais li ntawd, tsis yog Vajtswv hais txog peb lov? Twb yog Vajtswv hais txog peb ntag, rauqhov tus uas laij teb thiab tus uas ntaus nplej, nkawd yeej ua haujlwm nrog txoj kev ciasiab hais tias nkawd muaj feem yuav tau txais tej qoobloo uas nkawd tau cog. 11Yog peb twb tseb tej noob uas yog sab ntsujplig rau hauv nej lub siab lawm, qhov uas peb tau sau nej tej kev pab ntawm sab nqaijtawv ntawd, nej xav tias peb sau ntau dhau lawm no lov? #Loos 15:27 12Yog lwmtus twb muaj cai kom nej yug lawv, peb tseem tsis muaj cai kom nej yug peb tshaj qhov ntawd thiab lov?

Txawm yogli ntawd los peb twb tsis siv txojcai no li. Peb tseem ua siabntev nyiaj txhua yam kev txomnyem kom tsis txhob muaj ib yam dabtsi los tabkaum Txoj Moo Zoo uas hais txog Khetos. 13Tseeb tiag nej twb paub lawm hais tias cov uas ua haujlwm hauv lub Tuamtsev, yeej tau noj tau haus los ntawm lub Tuamtsev, thiab cov uas hlawv tej khoom fij ntawm lub thaj, yeej tau noj tej khoom uas fij ntawm lub thaj ntawd thiab. #2Kev 18:1 14Ib yam nkaus li ntawd, tus Tswv tau hais tseg hais tias cov neeg uas qhia Txoj Moo Zoo yuavtsum tau noj tau haus los ntawm Txoj Moo Zoo. #Math 10:10; Lukas 10:7

15Tiamsis kuv twb tsis tau siv tej cai no ib nyuag qhov li, lossis qhov uas kuv sau tsab ntawv no tuaj rau nej tsis yog kuv xav kom nej ua tej ntawd rau kuv. Yog kuv yuav thov nej yug kuv, kuv yeem tuag zoo dua! Yeej tsis muaj leejtwg uas yuav rhuav tau tej lus uas kuv khav no hlo li! 16Kuv yog tus qhia Txoj Moo Zoo los kuv yeej tsis muaj cai khav vim Vajtswv yog tus uas hais kom kuv qhia. Yog kuv tseem tsis qhia Txoj Moo Zoo, ces kuv yeej yuav raug kev puastsuaj! 17Yog tias kuv yeej txaussiab hlo ua tes haujlwm ntawd, ces kuv yuavtsum tau txais nqizog. Tiamsis tes haujlwm ntawd yeej yog kuv tes haujlwm, vim Vajtswv yog tus muab tes haujlwm ntawd cob rau kuv ua. 18Yogli ntawd, kuv qhov nqizog yog dabtsi? Qhov ntawd yog qhov uas kuv tau qhia Txoj Moo Zoo uas yeej tsis suav nqi hlo li; yogli ntawd, thaum kuv qhia Txoj Moo Zoo, kuv thiaj tsis siv txojcai los hais kom sawvdaws yuavtsum yug kuv.

19Txawm kuv tsis yog ib leeg twg li tubqhe los kuv txaussiab hlo ua sawvdaws qhev, kom kuv thiaj yuav coj tau neeg coob leej los ntseeg. 20Thaum kuv nrog cov neeg Yudais ua haujlwm, kuv coj zooli cov Yudais, kom kuv thiaj coj tau cov Yudais los ntseeg. Txawm yog kuv tsis nyob hauvqab Mauxes txoj Kevcai lawm los, thaum kuv nrog cov neeg uas tseem coj txoj kevcai ntawd ua haujlwm uake, kuv yeej ua kuv lub neej zooli kuv tseem nyob hauvqab txoj kevcai ntawd, kom kuv thiaj coj tau lawv los ntseeg. 21Ib yam nkaus li ntawd, thaum kuv nrog Lwm Haivneeg ua haujlwm uake, kuv coj zooli Lwm Haivneeg uas tsis coj Yudais txoj kevcai, kom kuv thiaj coj tau Lwm Haivneeg los ntseeg. Qhov no tsis tau txhais hais tias kuv tsis coj rawsli Vajtswv txoj kevcai; tiamsis kuv twb yeej nyob hauvqab Khetos txoj kevcai lawm. 22Thaum kuv nrog cov neeg uas txoj kev ntseeg tsis tshua khov pestsawg, kuv coj zooli cov uas txoj kev ntseeg tsis tshua khov ntawd thiab, kom kuv thiaj coj tau lawv los ntseeg. Yogli ntawd, kuv tuajyeem ua txhua yam rau txhua haivneeg, kom kuv thiaj yuav nrhiav tau txojkev los cawm kom tau lawv qeeleej.

23Kuv ua txhua yam no vim saib rau Txoj Moo Zoo xwb, kom kuv thiaj muaj feem tau txais tej koobhmoov nyob rau hauv Txoj Moo Zoo ntawd. 24Nej twb yeej paub lawm hais tias nyob rau hauv kev sibtw khiav, txhua tus puavleej sibtw khiav, tiamsis tsuas muaj tibtug thiaj tau qhov nqizog xwb. Yogli ntawd, nej ciali rausiab ntso khiav tiag kom nej tau qhov nqizog ntawd. 25Txhua tus uas sibtw khiav yeej tswj nws tuskheej rawsli txojcai khiav tiag-tiag. Lawv ua li ntawd kom lawv tau lub mom uas nyob tsis ntev; tiamsis peb sibtw khiav kom peb tau lub mom uas nyob mus ibtxhis. 26Twb yog vimli no kuv thiajli tsis khiav zooli tus neeg uas tsis muaj homphiaj; lossis kuv thiaj tsis zooli tus neeg ntaus nrig uas lam ntaus cua xwb. 27Kuv niajhnub ntaus kuv lub cev kom khov thiab tswj kom tau kuv tuskheej, kom tomqab uas kuv qhia rau lwmtus tag lawm kuv thiajli tsis yog tus uas siv tsis tau nyob rau hauv txoj kev sibtw khiav.

Currently Selected:

1 Kauleethaus 9: MWW2022

Highlight

Copy