1 Kauleethaus 13

Kev Hlub

1Txawm yog kuv hais tau neeg tej lus thiab timtswv ceebtsheej tej lus los, yog kuv tsis muaj kev hlub, ces tej uas kuv hais ntawd zooli tej suab tswb tooj tswb hlau uas nrov-nrov xwb. 2Txawm yog kuv tau qhov khoomplig uas muaj cuabkav cev Vajtswv lus, thiab muaj txhua yam kev txawjntse thiab totaub txog txhua yam uas tsis muaj neeg paub; thiab txawm yog kuv muaj txoj kev ntseeg uas muab tau tej tojroob hauvpes txav mus rau lwmqhov los, yog kuv tsis muaj kev hlub, ces kuv yeej tsis muajnqis dabtsi hlo li. #Math 17:20; 21:21; Malak 11:23 3Txawm yog kuv yuav muab txhua yam uas kuv muaj pub rau lwmtus, thiab tuajyeem muab kuv lub cev rau luag hlawv#13:3: rau luag hlawv; tej phau ntawv qub uas xuas tes sau, muaj kom muaj chaw khavtheeb tau. los, yog kuv tsis muaj kev hlub, ces tej no yeej tsis muajnqis dabtsi rau kuv hlo li.

4Kev hlub yog kev ua siabntev thiab muaj lub siabzoo; kev hlub tsis muaj khib, tsis khavtheeb lossis tsis muabhlob; 5kev hlub tsis yog kev uanruj uatsiv, tsis yog xam pom yus tuskheej xwb, tsis lam npautaws yoojyim; tsis cimntsoov luag tej kev txhaum; 6kev hlub yeej tsis zoosiab rau txoj kev phem, tiamsis zoosiab rau txoj kev tseeb. 7Kev hlub tiv tas mus li, ntseeg tas mus li, ciasiab tas mus li, thiab siabntev tas mus li.

8Kev hlub yuav nyob mus ibtxhis. Tiamsis kev cev Vajtswv Txojlus yuav txawj xaus mus; kev haislus txawv-txawv yuav txawj tsum tsis hais ntxiv lawm; thiab tej kev txawjntse yuav txawj ploj mus. 9Rauqhov peb txoj kev paub thiab kev cev Vajtswv Txojlus los yeej cev tsis txhij-txhua, 10tiamsis thaum yam uas zoo kawg nkaus los txog lawm, ces tej uas zoo tsis txhij-txhua ntawd yuav ploj mus.

11Thaum kuv tseem yog ib tug menyuam yaus, kuv tej kev haislus, kev xav, thiab kev coj tseem zooli menyuam yaus; tiamsis thaum kuv hlob tiav txiv lawm, kuv tsis ua li menyuam yaus ua lawm. 12Tej uas nimno peb pom, ces tsuas pom zemzuag li hauv daim iav xwb; tiamsis muaj ib hnub peb yuav pom timntsej timmuag. Tej uas nimno kuv paub yeej paub tsis txhij-txhua, tiamsis muaj ib hnub kuv yuav paub txhij-txhua; ib yam li Vajtswv paub kuv txhij-txhua.

13Nimno muaj peb yam uas tseem muaj nyob: kev ntseeg, kev ciasiab, thiab kev hlub; tiamsis yam uas loj tshajplaws huv tibsi yog kev hlub.

Currently Selected:

1 Kauleethaus 13: MWW2022

Highlight

Copy