1 Kauleethaus 11

1Nej xyaum ua rawsli kuv tus yamntxwv, ib yam li kuv xyaum ua rawsli Khetos tus yamntxwv. #1Klt 4:16; Filipi 3:17

Ntoo Phuam Thaum Pehawm Vajtswv

2Kuv thov qhuas nej vim nej yeej ncontsoov kuv thiab ua rawsli tej lus qhia uas kuv tau muab pub rau nej lawm. 3Tiamsis kuv xav kom nej totaub hais tias Khetos yog txhua tus txivneej lub taubhau, thiab tus txiv yog tus pojniam lub taubhau, thiab Vajtswv yog Khetos lub taubhau. 4Yogli ntawd, tus txivneej uas kauv nws lub taubhau thov Vajtswv lossis cev Vajtswv Txojlus, yog nws ua saib tsis taus Khetos uas yog nws lub taubhau. 5Tus pojniam uas tsis kauv nws lub taubhau thov Vajtswv lossis cev Vajtswv Txojlus, yog nws ua saib tsis taus nws tus txiv uas yog nws lub taubhau. Nws zoo ib yam li tus pojniam uas muab plaubhau chais tag lawm. 6Yog tus pojniam tsis kauv nws lub taubhau, nws yuavtsum muab nws cov plaubhau txiav povtseg. Tiamsis tus pojniam uas txiav nws cov plaubhau lossis chais nws cov plaubhau yuav poob ntsejmuag, yogli ntawd tsimnyog nws yuavtsum kauv nws lub taubhau.

7Ib tug txivneej twg tsis tag yuav kauv nws lub taubhau los tau, vim nws yog Vajtswv lub hwvxyeej thiab tus tshwjchim. Tiamsis pojniam yog txivneej tus tshwjchim; #Chiv 1:26-27 8rauqhov Vajtswv tsis tau tsim txivneej los ntawm pojniam, tiamsis tsim pojniam los ntawm txivneej. 9Lossis tsis tau tsim txivneej rau pojniam, tiamsis tsim pojniam rau txivneej. #Chiv 2:18-23 10Vim saib rau cov timtswv ceebtsheej, tus pojniam yuavtsum kauv nws lub taubhau kom thiaj qhia tau hais tias nws nyob hauvqab nws tus txiv lub hwjchim. 11Txawm li ntawd los peb lub neej uas nyob rau hauv tus Tswv lawm, tus pojniam yeej vam tus txivneej thiab tus txivneej yeej vam tus pojniam. 12Pojniam yog tsim los ntawm txivneej, thiab txivneej yog yug los ntawm pojniam; tiamsis txhua yam puavleej yog Vajtswv tsim.

13Nej sim ua tibzoo xav seb, thaum sawvdaws tuaj pehawm Vajtswv, puas tsimnyog ib tug pojniam los thov Vajtswv es tsis kauv nws lub taubhau? 14Rawsli ibtxwm, nej yeej paub tias tus txivneej uas tseg plaubhau ntev, yog ib qhov kev txajmuag, 15tiamsis tus pojniam uas tseg plaubhau ntev yog ib yam uas zoonkauj rau nws. Nws cov plaubhau uas ntev ntawd yog Vajtswv muab rau nws los npog nws lub taubhau. 16Tiamsis yog leejtwg xav cam txog zaj no, kuv tsuas hais tias nyob rau hauv txoj kev pehawm Vajtswv ces peb lossis Vajtswv cov pawg ntseeg yeej tsis muaj lwm txojcai coj li lawm.

Tus Tswv Rooj Mov

(Mathais 26:26-29; Malakaus 14:22-25; Lukas 22:14-20)

17Tej uas kuv yuav qhia nej no, kuv tsis qhuas nej lawm, rauqhov nej tej kev tuaj nyob uake pehawm Vajtswv ntawd tsis yog ua rau nej zoo zujzus tuaj, tiamsis tseem ua rau nej phem dua qub ntxiv. 18Thawj qhov, kuv hnov tias thaum nej pawg ntseeg tuaj sibsau uake, mas muaj kev sibfaib ua pab ua pawg; zaj no kuv ntseeg tias yeej muaj tseeb li ntawd tiag thiab. ( 19Ua licas los yuavtsum muaj kev sibfaib nyob nruabnrab hauv nej kom sawvdaws thiaj paub meej tias pab twg thiaj yog pab yog.)

20Thaum nej tuaj txoos uake, tsis yog nej tuaj noj tus Tswv Rooj Mov. 21Rauqhov hais tias thaum nej noj, nej ciali nyias taus nyias noj tsis tos lwmtus li, yogli ntawd muaj ibtxhia tseem tshaib plab tiamsis ibtxhia twb noj tsau haus qaug lawm. 22Tsis muaj tsev rau nej mus noj mus haus lov? Lossis nej txhobtxwm ua saib tsis taus Vajtswv pawg ntseeg thiab ua kom cov neeg pluag txajmuag no lov? Nej tseem yuav kom kuv hais licas rau nej txog zaj no thiab? Kuv yuav qhuas nej no lov? Kuv yeej tsis qhuas nej kiag li!

23Tej lus qhia uas kuv tau txais ntawm tus Tswv los, kuv muab qhia rau nej: hmo uas luag ntxeevsiab rau tus Tswv Yexus, Nws muab ib lub ncuav los, 24ua Vajtswv tsaug, muab ntais thiab hais tias, “No yog Kuv lub cev, uas yog muab rau nej. Nej ua li no, ua kev nco txog Kuv.” 25Thaum noj hmo tag Nws muab ib lub khob los ua ib yam nkaus li ntawd thiab, Nws hais tias, “Lub khob no yog Vajtswv tej lus cogtseg tshiab uas muab Kuv cov ntshav ua lub cim nias rau. Thaum twg nej haus lub khob no, nej haus ua kev nco txog Kuv.” #Khiav 24:8; Yelemi 31:31-34; Khiav 24:6-8 26Rauqhov txhua zaus uas nej noj lub ncuav no thiab haus lub khob no, yog nej qhia tus Tswv txoj kev tuag mus txog hnub uas Nws rovqab los.

27Yogli ntawd, tus uas lam ciali noj tus Tswv lub ncuav lossis haus tus Tswv lub khob yam tsis tsimnyog, tus ntawd muaj txim, vim nws ua txhaum tus Tswv lub cev thiab tus Tswv cov ntshav. 28Txhua tus nyias yuavtsum sojntsuam nyias tuskheej tso, mamli noj lub ncuav thiab haus lub khob. 29Rauqhov tus uas ciali noj lub ncuav thiab haus lub khob tiamsis tsis paub meej-meej txog tus Tswv lub cev, ces yog nws noj thiab haus txoj kev txiavtxim los rau nws tuskheej. 30Twb yog vimli ntawd nej cov muaj coob leej thiaj tsaugmuag thiab muaj mob, thiab muaj ibtxhia thiajli tau tsaugzog lawm. 31Yog peb xub sojntsuam peb tuskheej, ces peb yuav tsis raug Vajtswv rautxim. 32Tiamsis thaum tus Tswv rautxim rau peb, yog Nws qhuabntuas peb, kom peb thiaj yuav tsis raug teemtxim nrog lub ntiajteb no.

33Yogli ntawd, cov kwvtij, thaum nej tuaj uake noj tus Tswv Rooj Mov, nej ib leeg yuavtsum tos ib leeg. 34Yog leejtwg tshaib plab, nws yuavtsum noj tom tsev tso, kom thaum nej tuaj sablaj uake, Vajtswv thiaj yuav tsis rautxim rau nej. Hais txog lwmyam ces cia thaum kuv tuaj tso kuv mamli qhia rau nej.

Currently Selected:

1 Kauleethaus 11: MWW2022

Highlight

Copy