Romanos 7

Xojelesex yan chuxeꞌ ruchuqꞌaꞌ ri ley

1Hermanos, rix ri iwetaman ri ndubꞌij ri ley, ¿la ma iwetaman ta kꞌa chi jun wineq kꞌo chuxeꞌ ruchuqꞌaꞌ ri ley, xe atoq kꞌa kꞌes? 2Jun ejemplo chin reꞌ niyaꞌ pa ruwiꞌ jun ixaq kꞌulan. Ri ixaq maneq cheꞌel ndujech riꞌ rikꞌin ri rachijil atoq kꞌa kꞌes ri rachijil,#1Co. 7:39 pero si ri achi ndiken e, ri ixaq ma kꞌo chi ta chuxeꞌ ruchuqꞌaꞌ ri ley ri ximiyon richin rikꞌin ri rachijil. 3Romariꞌ, si jun ixaq kꞌa kꞌes ri rachijil, y ndibꞌa chik rikꞌin jun achi, ndibꞌix chirij chi xa kanoy rukꞌexel rachijil.#Mr. 10:12; He. 13:4 Pero si ri rachijil kamineq chik, ri ixaq ma kꞌo chi ta chuxeꞌ ruchuqꞌaꞌ ri ley ri ximiyon richin rikꞌin ri rachijil, y si ndikꞌuleꞌ chik jumbꞌey, ma kanoy ta rukꞌexel rachijil.

4Keriꞌ chuqaꞌ ibꞌanun rix, nu-hermanos, xixken yan chuwech ri ley roma rukamik ri Cristo, y riꞌ ndubꞌij tzij chi xixelesex yan chuxeꞌ ruchuqꞌaꞌ ri ley,#Gá. 5:18 chin keriꞌ xixok yan chik richin rijaꞌ ri xkꞌastajbꞌex pe chikikajal ri animaꞌiꞌ. Y keriꞌ bꞌanatajneq qikꞌin roj qonojel ri qataqin, chin keriꞌ ndiwachin ri qakꞌaslen#Ef. 2:10 y ndukꞌen pe runimrisaxik rubꞌiꞌ ri Dios. 5Atoq kꞌa rojkꞌo chuxeꞌ ruchuqꞌaꞌ ri itzel teq rurayinik ri qa-cuerpo, ri ley xukꞌasoj ri itzel teq rayinik riꞌ chin xukusaj ri jalajaj ruwachinel ruqꞌa-raqen ri qa-cuerpo chin xqabꞌen mak, y riꞌ xojrukꞌuaj chupan ri bꞌey chin ri kamik.#Stg. 1:15 6Pero wokami xojelesex yan pe chuxeꞌ ruchuqꞌaꞌ ri ley ri tzꞌamayon qichin rubꞌanun kan, y xojken yan chuwech, y keriꞌ xbꞌanatej chin ndiqabꞌen rusamaj ri Dios rikꞌin ri kꞌakꞌakꞌ kꞌaslen nduyaꞌ ri Dios chaqe roma ri Espíritu Santo, y ma rikꞌin chi ta ri ndiqanimaj nojel ri ndubꞌij ri ley ri xyoꞌox ojer kan.

Ri ley xuyaꞌ ri Dios xuqꞌalajrisaj chi roj aj mak

7¿Rikꞌin ri qabꞌiꞌin pe, ndubꞌij kami tzij chi ri ley ndukꞌen pe mak? ¡Ma ke ta riꞌ! Porque man ta ri ley, man ta xinwetamaj achike ri mak,#Ro. 3:20 y man ta xinwetamaj chi mak ri ndarayij ri ruchajin jun chik, porque ri ley ndubꞌij: Ma tarayij ri ruchajin jun chik.#Ex. 20:17; Dt. 5:21 8Pero ri mak xukusaj ri mandamiento riꞌ y xukꞌasoj pa wánima chi nirayij nojel teq achike ri kichajin chꞌaqa chik.#1Co. 15:56 Porque si man ta kꞌo ri ley, ri mak ma jun ta ruchuqꞌaꞌ y xa achel kamineq keriꞌ. 9Rubꞌanun kan atoq kꞌajani tinwetamaj utz-utz rubꞌeyal ri ley, riyin xinnaꞌ chi kin chaj wi ri nukꞌaslen chuwech ri Dios, pero atoq xinkꞌoxomaj utz-utz achike ndubꞌij tzij chi ma tinrayij ri ruchajin jun chik achel ndubꞌij ri mandamiento, kin xkꞌastej pe ri mak pa wánima y xinyaꞌ cuenta chare chi chuwech ri Dios xa yin kamineq chupan ri numak. 10Y xinyaꞌ chuqaꞌ cuenta chare chi ri mandamiento riꞌ, ri kin chin wi ndilitej kꞌaslen rikꞌin ri Dios,#Lv. 18:5 xa kamik xukꞌen pe chuwa.#Ez. 20:13 11Porque ri mak ri rewan riꞌ pa wánima xukusaj ri mandamiento riꞌ chin xiruchꞌakatij, porque xinnaꞌ chi ngitiker niqꞌet wiꞌ chuwech ri mak, y roma keriꞌ xinnaꞌ, ri mak xukusaj ri mandamiento chin xirukamisaj.

12Romariꞌ, ri rukꞌuꞌx ri qabꞌiꞌin pe jareꞌ: Ri ley kin loqꞌolej wi y ri mandamiento kin loqꞌolej, utz y chojmilej wi.#Sal. 19:8; 1Ti. 1:8 13Pero, ¿la ndubꞌij kami tzij chi ja ri ley ri kin utz wi ri xkꞌamo pe kamik chuwa? ¡Ma ke ta riꞌ! Xa ja ri mak ri kꞌo pa wánima xkꞌamo pe ri kamik, pero xukusaj ri utz chin xukꞌen pe y keriꞌ xqꞌalajin chi mak ri ngitajin rikꞌin y xukusaj chuqaꞌ ri mandamiento chin xqꞌalajin pe chi ri mak kin itzel wi.

Ri itzel teq rayinik ekꞌo pa ránima jun wineq ma nduyaꞌ ta qꞌij chare chi ndubꞌen ri utz

14Qetaman chi ri ley rikꞌin ri Dios pataneq wi, jakꞌa riyin xa yin ok aj rochꞌulew, ri yin ximil chuxeꞌ ruchuqꞌaꞌ ri mak#1R. 21:20, 25 chin nibꞌen ri rurayibꞌel. 15Riyin ma nikꞌoxomaj ta ri ndibꞌanatej pa nukꞌaslen, porque ma nibꞌen ta ri niwojoꞌ,#Gá. 5:17 xa ja ri itzel teq achike ri ma niwojoꞌ ta, jariꞌ ri ngenbꞌanalaꞌ. 16Y si ja ri ma niwojoꞌ ta, jariꞌ ri ngitajin chubꞌanik, chiriꞌ nitzꞌet chi ri ley kin utz wi, porque ma ja ta ri ley ndinimo wichin chi nibꞌen. 17Romariꞌ, ri itzel nibꞌen riyin, ma riyin chi ta ri ngirayin ngibꞌanun, xa ja ri mak ri kꞌo pa wánima ri nditaqchiꞌin wichin chin nibꞌen. 18Riyin wetaman chi ma jun utz kꞌo pa nukꞌaslen, ndubꞌij tzij chi ri itzel teq rayinik kꞌo pa wánima ma ndikiyaꞌ ta qꞌij chin nibꞌen ri utz, y romariꞌ maske riyin niwojoꞌ nibꞌen ri utz, xa ma nibꞌen ta. 19Porque ri utz ri niwojoꞌ nibꞌen, xa ma nibꞌen ta, y ja ri ma utz ta ri ma niwojoꞌ ta nibꞌen, jariꞌ ri nibꞌen. 20Y si ja ri ma niwojoꞌ ta nibꞌen ri ngitajin chubꞌanik, ma riyin chi ta ri ngirayin ngibꞌanun, xa ja ri mak ri kꞌo pa wánima ri nditaqchiꞌin wichin chi nibꞌen.

21Y riyin niyaꞌ cuenta chare chi ri jumul keriꞌ ndibꞌanatej, xa kin achel chik ley keriꞌ, porque atoq niwojoꞌ nibꞌen ri utz, ja paqiꞌ ndiqꞌalajin pe ri ma utz ta kꞌo pa wánima. 22Keriꞌ nibꞌij porque riyin pa wánima tzꞌan ngikikot rikꞌin ri ley xuyaꞌ ri Dios,#Sal. 1:2; 119:16, 24, 35 23pero nitzꞌet chi pa nu-cuerpo kꞌo chik jun ley ri ngerutaqchiꞌij ri jalajaj ruwachinel nuqꞌa-waqen, y ri ley riꞌ ndiyakatej chirij ri utz nirayij nibꞌen. Xa yin ruximon chuxeꞌ ruchuqꞌaꞌ ri itzel teq rayinik#Gá. 5:17; Stg. 4:1 kꞌo pa wánima y ngerukusaj ri ruwachinel ruqꞌa-raqen ri nu-cuerpo chin nibꞌen mak.

24¡Juyo ok nuwech riyin! ¿Kꞌo kami jun ngikolo e chuwech ri itzel teq rayinik chin ri nu-cuerpo#Ro. 6:6; 8:2 ri xa kamik ndukꞌen pe chuwa? 25Ri ngikolo chuwech nojel reꞌ, xa kin xe ri Dios, romariꞌ nimatioxij chare roma ri Qajaw Jesucristo. Ri rukꞌuꞌx ri nubꞌiꞌin pe jareꞌ: Ri wánima ndurayij ndubꞌen ri utz ri ndubꞌij ri ley xuyaꞌ ri Dios, pero pa nu-cuerpo kꞌa kꞌo ri itzel teq rayinik, ri ndubꞌen chuwa chi kꞌa yinkꞌo chuxeꞌ ruchuqꞌaꞌ ri mak ri nditaqchiꞌin pa nu-cuerpo.

Currently Selected:

Romanos 7: cakX

Highlight

Copy