Filipenses 4

1Romariꞌ, nu-hermanos ri tzꞌan ngixinwojoꞌ y tzꞌan nurayin ngixbꞌentzꞌetaꞌ, rix ri ngixbꞌanun chuqaꞌ chi santienta ngikikot, y rix rajel-rukꞌexel ri nusamaj,#1Ts. 2:19 tiwakꞌaxaj ri nibꞌij chiwa rix ri kin ngixinwojoꞌ: Kaw kixkꞌojeꞌ chiraqen ri Ajaw, achel ri nutzꞌibꞌan pe chiwa, y chin kaw ngixkꞌojeꞌ, kereꞌ kꞌa tibꞌanaꞌ:

Ri Pablo ngerupixabꞌaj jujun hermanos aj Filipos

2Rat hermana Evodia y rat hermana Síntique, xe jun ruwech itzij tibꞌanaꞌ,#Fil. 2:2 porque xe jun ibꞌanun rikꞌin ri Ajaw. 3Y rat ri rat wachibꞌil chubꞌanik rusamaj ri Dios, ri kin kuqul nukꞌuꞌx awikꞌin chi ndabꞌen ri nibꞌij, nikꞌutuj chawa chi kaꞌatoꞌ ri hermanas riꞌ, ri kin xkitij kiqꞌij junan wikꞌin chutzijoxik ri utzulej teq tzij chin kolotajik, junan rikꞌin ri hermano Clemente y ri chꞌaqa chik ri xinkitoꞌ chupan rusamaj ri Ajaw. Ri kibꞌiꞌ rejeꞌ tzꞌibꞌan chik chupan ri wuj apeꞌ tzꞌibꞌan kibꞌiꞌ ri ndiyoꞌox ri kꞌaslen ma ndikꞌis ta chake.

Ri Pablo ngeruyaꞌ jujun chik pixabꞌanik chake konojel

4Jumul kixkikot#Ro. 12:12; 1Ts. 5:16 roma xe jun ibꞌanun rikꞌin ri Ajaw. Y nibꞌij chik jumbꞌey chiwa: ¡Kixkikot! 5Kin ta nditzꞌetetej koma konojel wineq chi kin utz inoꞌoj. Ri Ajaw naqaj chik kꞌo.#Stg. 5:8, 9

6Man ta jun roma ndichꞌujrisaj iwiꞌ, xa kin tiyaꞌ nojel#Sal. 55:22; Pr. 16:3 pa ruqꞌaꞌ ri Dios pa oración, tikꞌutuj chare ri achike ndikꞌatzin chiwa, y kixmatioxin chuqaꞌ chare. 7Si keriꞌ xtibꞌen, ri uxlanen#Is. 26:3; Jn. 14:27; Col. 3:15 ri nduyaꞌ ri Dios kin xtikꞌojeꞌ pa iwánima, y ri uxlanen riꞌ más nim chuwech ri janipeꞌ nditiker ndunojij jun wineq. Y ri uxlanen riꞌ kin xtuchajij ri iwánima y ri achike ngeꞌinojij, roma xe jun ibꞌanun rikꞌin ri Cristo Jesús.

8Hermanos, ri jun chik achike niwojoꞌ nibꞌij chiwa, jareꞌ: Kixnojin pa ruwiꞌ ri qetzij, pa ruwiꞌ nojel ri utz chi ndinimrisex rubꞌiꞌ, pa ruwiꞌ nojel ri kin chojmilej chuwech ri Dios, pa ruwiꞌ nojel ri ndukꞌen pe chꞌajchꞌaj kꞌaslen, pa ruwiꞌ chuqaꞌ nojel ri achike utz chi ndibꞌa iwánima chirij, pa ruwiꞌ nojel ri kꞌo utz rutzijol, pa ruwiꞌ ri kꞌo utz ndukꞌen pe chare ri iwánima, y pa ruwiꞌ nojel ri utz chi ndiyoꞌox ruqꞌij.

9Y nojel ri tijonik nuyoꞌon chiwa, nojel ri xiwakꞌaxaj chi yin xinbꞌij, y nojel ri xitzꞌet chi yin xinbꞌen,#Fil. 3:17 nojel riꞌ tibꞌanaꞌ. Si keriꞌ xtibꞌen, ri Dios ri ndiyoꞌon uxlanen pa qánima kin xtikꞌojeꞌ iwikꞌin.

Ri Pablo ndumatioxij ri rutoꞌik kitaqon ri aj Filipos

10Tzꞌan ngikikot rikꞌin ri Ajaw, porque xinikꞌuxlaꞌaj chi pe rikꞌin ri ndikꞌatzin chuwa. Ma nibꞌij ta chiwa chi yin imestan. Ma ke ta riꞌ. Porque riyin wetaman chi ma yin itoꞌon ta pe, roma maneq modo itaqon pe nutoꞌik. 11Y atoq nibꞌij keriꞌ chiwa, ma roma ta chi riyin maneq nikusaj chin niqꞌasaj nukꞌaslen. Porque riyin kin rukꞌamon wi chuwa chi ngikikot, si kꞌo nikusaj pa nukꞌaslen o maneq.#1Ti. 6:6; He. 13:5 12Wetaman ngikikot niqꞌasaj nukꞌaslen atoq ma jun ax kꞌo wikꞌin, y wetaman chuqaꞌ ngikikot niqꞌasaj nukꞌaslen atoq kꞌo kꞌiy achike wikꞌin. Wetaman ngikikot chupan xa achike na ri niqꞌasaj pa nukꞌaslen, si nojneq nupan o ndichꞌumu, si kꞌo kꞌiy achike wikꞌin o ma jun.#1Co. 4:11; 2Co. 11:27 13Chupan nojel ri niqꞌasaj pa nukꞌaslen ngitiker ngikikot, porque xe jun nubꞌanun rikꞌin ri Cristo ri ndiyoꞌon wuchuqꞌaꞌ.#Jn. 15:5; 2Co. 12:9 14Pero kin utz ri xibꞌen chi xinitoꞌ pe rikꞌin ri ndikꞌatzin chuwa, porque riꞌ ndubꞌij tzij chi junan iwánima ibꞌanun wikꞌin#Fil. 1:7 chupan ri kꞌayew niqꞌasaj.

15Rix aj Filipos iwetaman chi pa nabꞌey atoq xintzijoj ri utzulej teq tzij chin kolotajik chiꞌikajal, kin xe wi rix xinitoꞌ pe atoq xinel pe pa irochꞌulew Macedonia, y nixta jun chik bꞌotzaj hermanos xetoꞌon pe wichin rikꞌin ri achike xkꞌatzin chuwa pa rusamaj ri Ajaw. 16Y ma xe ta riꞌ xibꞌen, porque atoq yinkꞌo chik pa tinamit Tesalónica, rix ma xe ta jumbꞌey xiteq pe ri achike xkꞌatzin chuwa. 17Pero riyin ma nitzꞌibꞌaj ta e reꞌ chiwa chin ta nditeq pe más nutoꞌik. Ri niwojoꞌ riyin, ja ta chi ndikꞌiyer ruwech ri jarupeꞌ rajel-rukꞌexel nduyaꞌ ri Dios chiwa. 18Wokami kꞌo chik wikꞌin nojel ri ndikꞌatzin chuwa, y hasta más chuwech ri ndikꞌatzin chuwa kꞌo wikꞌin roma ri achike xeꞌiteq pe chirij ri hermano Epafrodito.#Fil. 2:25 Y ri xiteq pe chuwa, jun ofrenda ndikikot ri Dios rikꞌin y kin ndiqaꞌ chuwech, kin achel jun ofrenda ri ndiporox chuwech rijaꞌ, jun ofrenda ri kin ndijubꞌubꞌ ruxlaꞌ. 19Y ri nu-Dios ri kin nimalej rubꞌeyomal, kin xtuyaꞌ nojel ri ndikꞌatzin chiwa#Sal. 23:1; 2Co. 9:8 rix ri xe jun ibꞌanun rikꞌin ri Cristo Jesús. 20¡Kin ta jumul ndiyoꞌox ruqꞌij ri Qatataꞌ Dios!#Ro. 11:36 Amén.

Ri Pablo nduteq ri rukꞌisibꞌel teq ruxunaqil kiwech ri hermanos aj Filipos

21Tiyaꞌ ruxunaqil kiwech konojel ri loqꞌolej hermanos ri xe jun kibꞌanun rikꞌin ri Cristo Jesús. Ri hermanos ekꞌo wikꞌin waweꞌ ndikiteq chuqaꞌ ruxunaqil iwech rix. 22Konojel ri loqꞌolej hermanos ndikiteq ruxunaqil iwech. Pero ri más ngetaqo e ruxunaqil iwech, ja ri erusamajelaꞌ ri rey César.

23Ri favor ri nduyaꞌ ri Ajaw Jesucristo, kin ta xtikꞌojeꞌ pa iwánima.

Currently Selected:

Filipenses 4: cakX

Highlight

Copy