Marcos 15

Ri Jesús ndukꞌuꞌex chuwech ri Pilato

(Mt. 27:1, 2, 11-14; Lc. 23:1-5; Jn. 18:28-38)

1Y xe xseqresan pe, xkimal kiꞌ ri sacerdotes israelitas más kꞌo ruchuqꞌaꞌ kitzij, ri intéra teq achiꞌaꞌ kꞌo kiqꞌij, ri tijonelaꞌ chin ri ley xyoꞌox chare ri Moisés, y konojel ri chꞌaqa chik achiꞌaꞌ israelitas kꞌo uchuqꞌaꞌ pa kiqꞌaꞌ.#Lc. 22:66 Atoq xkibꞌij yan chikiwech achike ri ndikibꞌen chare ri Jesús, xkiyut, xkikꞌuaj y xbꞌekijachaꞌ pa ruqꞌaꞌ ri Pilato.#Hch. 3:13 2Ri Pilato kereꞌ xukꞌutuj razón chare: ¿Ja rat ri ki-Rey ri israelitas? Y ri Jesús xubꞌij: Ja rat ri ngabꞌiꞌin keriꞌ.

3Y ri sacerdotes israelitas más kꞌo ruchuqꞌaꞌ kitzij, kꞌiy achike ndikibꞌilaꞌ apu chirij ri Jesús chin ndikisujuj. 4Ri Pilato xukꞌutuj chik razón chare: ¿Ma jun achike ndabꞌij chin ndatoꞌ awiꞌ? Tayaꞌ cuenta chare ri janipeꞌ chi sujunik ndikibꞌij chawij.

5Pero ri Jesús ma jun achike xubꞌij,#Is. 53:7 romariꞌ ri Pilato xsach rukꞌuꞌx chirij.

Ri Pilato ndujech e ri Jesús chin ndikamisex

(Mt. 27:15-31; Lc. 23:13-25; Jn. 18:38–19:16)

6Y juna-junaꞌ pa nimaqꞌij Pascua, ri Pilato ndusoqꞌopij e jun ri tzꞌapel pa cheꞌ, jun ri ndichaꞌox koma ri wineq. 7Chupan ri tiempo riꞌ, tzꞌapel pa cheꞌ jun achi rubꞌiniꞌan Barrabás, junan kikꞌin chꞌaqa chik rachibꞌil, porque xkibꞌen jun kamik atoq xeyakatej chirij ri rey. 8Y atoq xebꞌeqaqa ri wineq chuwech ri Pilato, xkitzꞌen rukꞌutuxik chare chi ndusoqꞌopij e jun ri tzꞌapel pa cheꞌ, achel rukꞌamon chare chi ndubꞌen. 9Y ri Pilato xubꞌij chake: ¿La ndiwojoꞌ rix chi nisoqꞌopij e ri ndibꞌix chare: Rey kichin ri israelitas?

10Keriꞌ xubꞌij ri Pilato chake, porque retaman chi ri sacerdotes israelitas ri más kꞌo ruchuqꞌaꞌ kitzij, xkijech ri Jesús pa ruqꞌaꞌ roma ndiququt kánima chirij. 11Pero ri sacerdotes israelitas más kꞌo ruchuqꞌaꞌ kitzij, xkiyaꞌ tzij pa kixikin ri santienta wineq chi tikikꞌutuj chare ri Pilato chi ja ri Barrabás tusoqꞌopij e.#Hch. 3:14 12Y ri Pilato xubꞌij chik jumbꞌey chake ri israelitas: Y, ¿achike ndiwojoꞌ chi nibꞌen chare ri ndibꞌix chare Rey kichin ri israelitas?

13Y rejeꞌ xesikꞌin chi apu y kereꞌ xkibꞌij: ¡Tabꞌajij cho cruz!

14Jakꞌa ri Pilato xubꞌij chake: ¿Achike mak rubꞌanun? Pero rejeꞌ más kaw ngesikꞌin apu chubꞌixik: ¡Tabꞌajij cho cruz!

15Y ri Pilato roma ndirajoꞌ chi utz nditzꞌat koma ri wineq,#Pr. 29:25 xusoqꞌopij e ri Barrabás, y atoq xubꞌij yan chi tiroq ri Jesús, xujech e chin ndebꞌajix cho cruz.

16Ri soldados xkikꞌuaj apu ri Jesús chojay chin ri palacio, ri ndibꞌix pretorio chare, y xekoyoj konojel ri chꞌaqa chik soldados. 17Xkiyaꞌ jun kꞌul morado chirij ri Jesús, xkipachꞌuj raqen teq kꞌix chin xkibꞌen jun corona ri xkiyaꞌ pa rujolon, 18ngetzeꞌen chirij, y ndikibꞌilaꞌ chare: ¡Nim aqꞌij rat ri ki-Rey ri israelitas! ngechajeꞌ.

19Y ndikijichꞌalaꞌ rujolon rikꞌin jun aj, ndikichubꞌalaꞌ, ngexukuyaj chuwech, y ndikibꞌanalaꞌ kiqꞌaꞌ achel kin ta ndikiyaꞌ ruqꞌij keriꞌ. 20Atoq xetzeꞌen yan chirij, xkelesaj e ri kꞌul morado chirij, xkiyaꞌ chi e ri rutziaq, y xkikꞌuaj chin ndikibꞌajij cho cruz.

Ri Jesús ndibꞌajix cho cruz

(Mt. 27:32-44; Lc. 23:26-43; Jn. 19:17-27)

21Atoq kikꞌuan ri Jesús, xkikꞌul jun achi aj Cirene rubꞌiniꞌan Simón, ri tzolijneq pe pa qꞌas. Ri achi riꞌ, kitataꞌ ri Alejandro y ri Rufo, y ri soldados xkibꞌen chare chi xukꞌuaj ri cruz rukꞌuan ri Jesús.

22Y xkikꞌuaj ri Jesús pa jun lugar ri pa chꞌabꞌel hebreo rubꞌiniꞌan Gólgota, y Gólgota ndubꞌij tzij: Juyuꞌ ri achel rubꞌaqil jolomaj nditzuꞌun. 23Y ri soldados xkiyaꞌ vino xolon rikꞌin ruyiꞌal jun qꞌayis rubꞌiniꞌan mirra chare ri Jesús, pero rijaꞌ ma xutij ta. 24Xkibꞌajij ri Jesús cho cruz, y xkiyaꞌ pa etzꞌanin ri rutziaq, chin ndikitzꞌet achike ndikichꞌek e chikijununal.#Sal. 22:18

25Y pa bꞌelejeꞌ hora chin tisaqer xkibꞌajij ri Jesús cho cruz. 26Y chutzaꞌ e ri cruz xkibꞌajij jun tzꞌalen apeꞌ tzꞌibꞌan ri achike roma ndikamisex, y kereꞌ ndubꞌij: Ki-Rey ri israelitas. 27Junan rikꞌin ri Jesús xebꞌan crucificar chuqaꞌ ekaꞌiꞌ eleqꞌomaꞌ, jun xyoꞌox pa rikiqꞌaꞌ y jun pa ruxakan. 28Y keriꞌ xbꞌanatej ri tzꞌibꞌan kan chupan ri rutzij ri Dios ri ndubꞌij: Jajun rijaꞌ xbꞌan chare chi achel machꞌikilik,#Is. 53:12; Lc. 22:37 chikikajal ri emachꞌikilik.#15:28 Ri tzij ngeqil chupan re versículo reꞌ, ma chupan ta konojel ri ojer teq manuscritos más kꞌo keqalen ekꞌo wi.

29Y ri ngeꞌeqꞌax chiriꞌ, ndikiyoqꞌolaꞌ ri Jesús, ndikiselolaꞌ kijolon#Sal. 22:7; 35:16 y kereꞌ ndikibꞌilaꞌ kan chare: ¡Rat ri ndabꞌij chi ndawulij ri rachoch ri Dios y pa oxiꞌ qꞌij ndapabꞌaꞌ chik jumbꞌey,#Mr. 14:58; Jn. 2:19 30takoloꞌ awiꞌ ayon chawech y kaqaqa pe chuwech la cruz!

31Keriꞌ chuqaꞌ ri sacerdotes israelitas más kꞌo ruchuqꞌaꞌ kitzij ngetzeꞌen chirij, junan kikꞌin ri tijonelaꞌ chin ri ley xyoꞌox chare ri Moisés y kereꞌ ndikibꞌilaꞌ: Rijaꞌ ekꞌo wineq xerukal, pero ma nditiker ta ndukal riꞌ ruyon chuwech. 32¡Si ja rijaꞌ ki-rey ri israelitas ri taqon pe roma ri Dios chukolik ri rutinamit, tiqaqa kꞌa pe chuwech la cruz chin ndiqatzꞌet y ndiqataqij! ngechajeꞌ.

Y jajun ri ekaꞌiꞌ eleqꞌomaꞌ ri ebꞌajin cho cruz chunaqaj, ndikibꞌilaꞌ apu tzij chupalej ri Jesús.#He. 12:3

Ri rukamik ri Jesús

(Mt. 27:45-56; Lc. 23:44-49; Jn. 19:28-30)

33Y atoq xnikꞌajer ri qꞌij, qꞌequꞌ xubꞌen qa nojel ri rochꞌulew, y ri qꞌequꞌ xkꞌis e hasta pa rox hora chin tiqaqꞌij. 34Y pa rox hora chin tiqaqꞌij, ri Jesús xsikꞌin chubꞌixik: Eloí, Eloí, ¿lemá sabactani? xchajeꞌ. Y riꞌ ndubꞌij tzij: ¡Nu-Dios, nu-Dios! ¿Achike roma xanayaꞌ kan nuyon?#Sal. 22:1

35Y jujun chikikajal ri ekꞌo apu chiriꞌ, atoq xkakꞌaxaj ri xubꞌij ri Jesús, ndikibꞌilaꞌ: Tiyaꞌ cuenta chare ri ndubꞌij. Ja ri profeta Elías ndiroyoj, ngechajeꞌ.

36Ja atoq riꞌ jun chikikajal ri wineq xbꞌa paqiꞌ y xbꞌerumubꞌaꞌ pe jun esponja pa vinagre, xuyaꞌ chutzaꞌ jun aj y xuyaꞌ e chare ri Jesús chin ndutzꞌuꞌ,#Sal. 69:21 y kereꞌ xubꞌij: Tiqoyobꞌej na kꞌa, qꞌalej wi riꞌ si xtuqaqa ri Elías chin xturuqasaj, xchajeꞌ.

37Pero ri Jesús rikꞌin nojel ruchuqꞌaꞌ xsikꞌin y ja xken. 38Ri kꞌul jachayon rupan rachoch ri Dios,#Ex. 26:31-33; He. 10:19, 20 xel pa kaꞌiꞌ, xretzetej pe pariꞌ y xukꞌis qa hasta pa xulan. 39Y ri ki-jefe 100 soldados ri peꞌel apu chuwech ri cruz, atoq xutzꞌet chi ri Jesús xken, kereꞌ xubꞌij: Kin qetzij chi re achi reꞌ Rukꞌajol ri Dios.

40Chiriꞌ ekꞌo apu chuqaꞌ jujun ixoqiꞌ ngetzuꞌun apu chi nej. Chikikajal ri ixoqiꞌ riꞌ, kꞌo ri María Magdalena, ri María ruteꞌ ri José y ruteꞌ chuqaꞌ ri Santiago ri más kꞌa akꞌual na, y kꞌo chuqaꞌ ri Salomé. 41Ri ixoqiꞌ riꞌ koqan pe ri Jesús, y xe jampeꞌ xkꞌojeꞌ rijaꞌ pa rochꞌulew Galilea, ndikilij. Ekꞌo chuqaꞌ ekꞌiy ixoqiꞌ ri koqan pe ri Jesús atoq xbꞌeqaqa e pa tinamit Jerusalén.

Ri Jesús ndimuq

(Mt. 27:57-61; Lc. 23:50-56; Jn. 19:38-42)

42Atoq xqaqꞌij qa ri qꞌij riꞌ, roma ja nduqaqa ri uxlanibꞌel qꞌij, y ri israelitas ndikibꞌanalaꞌ rukꞌojlen nojel ri ndikꞌatzin chake chin ri nimaqꞌij Pascua, 43xbꞌeqaqa jun achi rubꞌiniꞌan José aj tinamit Arimatea. Ri achi riꞌ kꞌo ruchuqꞌaꞌ rutzij chikikajal ri achiꞌaꞌ israelitas kꞌo uchuqꞌaꞌ pa kiqꞌaꞌ, y royobꞌen chuqaꞌ chi nduqaqa ru-reino ri Dios. Rijaꞌ xukowij riꞌ xok apu chuwech ri Pilato, y xukꞌutuj chare ri ru-cuerpo ri Jesús chin ndumuq. 44Pero ri Pilato ma ndutaqij ta chi ri Jesús xken yan, romariꞌ xroyoj ri ki-jefe 100 soldados y xukꞌutuj razón chare si qetzij chi ri Jesús xken yan. 45Ri ki-jefe ri soldados xubꞌij chare chi ri Jesús xken yan, y ja atoq riꞌ ri Pilato xuyaꞌ qꞌij chare ri José chi nderumuquꞌ ru-cuerpo ri Jesús. 46Ri José xulaqꞌ jun kꞌul nim ruwech, xuqasaj ru-cuerpo ri Jesús cho cruz, xupis chupan ri kꞌul, xbꞌerumuquꞌ pa jun jul kꞌoton apu chuwech jun xeq juyuꞌ,#Is. 53:9 y xusirirej jun abꞌej chuchiꞌ ri jul chin xutzꞌapij kan. 47Ri María Magdalena y ri María ri ruteꞌ ri José, ndikitzutzaꞌ apeꞌ xmuq kan ri Jesús.

Currently Selected:

Marcos 15: cakX

Highlight

Copy