Lucas 2

Ri ralaxik ri Jesús

(Mt. 1:18-25)

1Chupan ri tiempo atoq xalex ri Juan, ri rey Augusto César xuteq rubꞌixik chake konojel wineq ri achoq pa kiwiꞌ ndubꞌen reinar chi tekitzꞌibꞌaj kibꞌiꞌ pa teq kitinamit chin ngeꞌajilex. 2Ri nabꞌey tzꞌibꞌaxik bꞌiꞌaj riꞌ, xbꞌan atoq ri Quirinio ndubꞌen gobernar pa rochꞌulew Siria. 3Y konojel wineq xebꞌa pa teq kitinamit chin xbꞌekitzꞌibꞌaj kibꞌiꞌ.

4Y keriꞌ chuqaꞌ xubꞌen jun achi rubꞌiniꞌan José, xel pe pa tinamit Nazaret chin ri rochꞌulew Galilea, y xbꞌa e pa tinamit Belén chin ri rochꞌulew Judea ri rutinamit ri rey David, porque ri José jun riy-rumam kan ri David. 5Ri José xbꞌa e pa tinamit Belén chin xbꞌerutzꞌibꞌaj rubꞌiꞌ junan rikꞌin ri María. Ri María ruyoꞌon chik rutzij chare chi ndikꞌuleꞌ rikꞌin, y pataneq chik alanik chirij. 6Y atoq ekꞌo pa tinamit Belén, xuqaqa ri qꞌij chi ri María ndalan. 7Y roma maneq chik apeꞌ ngekꞌojeꞌ chupan ri posada, ri José y ri María xekꞌojeꞌ pa jun jay bꞌanun chin ngekꞌojeꞌ awej chupan, y chiriꞌ xalex ri nabꞌey ral ri María, jun chꞌuti alaꞌ,#Gá. 4:4 y xubꞌatz pa ruchiꞌ teq kꞌul y xulibꞌaꞌ pa jun kiwayibꞌal awej.

Ekꞌo ángeles ndikikꞌut kiꞌ chikiwech jujun yuqꞌunelaꞌ kichin karneꞌl

8Chupan teq ri qꞌij riꞌ chunaqaj ri tinamit Belén, ekꞌo yuqꞌunelaꞌ pa qꞌas, ngekichajij ri bꞌotzaj teq kikarneꞌl chaqꞌaꞌ. 9Y xukꞌut kꞌa riꞌ jun ángel chikiwech, y ri nimalej ruqꞌij ri Ajaw xyikꞌan pa ruwiꞌ ri apeꞌ ekꞌo, y ri yuqꞌunelaꞌ santienta xkixibꞌij kiꞌ. 10Pero ri ángel xubꞌij chake: Ma tixibꞌij iwiꞌ, porque riyin nukꞌamon pe utzulej teq tzij ri kꞌo utz ndukꞌen pe chiwa, ri ndubꞌen chi santienta ndikikot kánima konojel wineq. 11Porque chupan re qꞌij reꞌ, pa rutinamit ri rey David, xalex#Is. 9:6; 1Jn. 4:14 jun Kolonel, y riꞌ ja ri Ajaw ri taqon pe roma ri Dios chukolik ri rutinamit. 12Y jareꞌ ri etal chin ndiwetamaj chi ja xiwil ri akꞌual: Ndeꞌiwilaꞌ chi bꞌotzon pa kꞌul y libꞌan pa jun kiwayibꞌal awej.

13Y kꞌateꞌ ruwech rikꞌin ri ángel xeqꞌalajin pe santienta ángeles ri ndikiyaꞌ ruqꞌij ri Dios y ndikibꞌilaꞌ:#Sal. 103:20

14¡Kin tiyoꞌox ruqꞌij ri nimalej Dios chikaj!

¡Y chochꞌulew tikꞌojeꞌ uxlanen pa kánima ri wineq ri kꞌo ri favor nduyaꞌ ri Dios pa kiwiꞌ!

15Atoq ri ángeles xetzolij e chikaj, ri yuqꞌunelaꞌ xkibꞌilaꞌ chikiwech: Joꞌ pa tinamit Belén chin ndeqatzꞌetaꞌ ri xbꞌanatej, ri xuyoꞌox rutzijol chaqe roma ri ángel taqon pe roma ri Ajaw.

16Y chimanchiꞌ xebꞌa, y xebꞌekilaꞌ ri María y ri José, y chuqaꞌ ri chꞌuti akꞌual libꞌan pa jun kiwayibꞌal awej. 17Y atoq xkitzꞌet ri akꞌual, ja xkitzꞌen apu rubꞌixik ri xbꞌix kan chake roma ri ángel pa ruwiꞌ ri chꞌuti akꞌual. 18Y konojel ri xeꞌakꞌaxan ri ndikibꞌilaꞌ ri yuqꞌunelaꞌ, xsach kikꞌuꞌx. 19Pero ri María xuyek pa ránima nojel ri xkibꞌij, y ndunojilaꞌ achike ndubꞌij tzij. 20Y ri yuqꞌunelaꞌ xetzolij e pa qꞌas, ndikiyalaꞌ ruqꞌij ri Dios y ndikinimrisalaꞌ ri rubꞌiꞌ roma nojel ri xkakꞌaxaj y xkitzꞌet, porque kin ja wi achel xbꞌix chake, keriꞌ xbꞌanatej.

Ri rukꞌaslen ri akꞌual Jesús ndijach pa ruqꞌaꞌ ri Dios

21Atoq xtzꞌaqet waqxaqiꞌ ruqꞌij ri chꞌuti alaꞌ, xkꞌatzin xbꞌan circuncidar,#Gn. 17:12; Lv. 12:3 y Jesús xkibꞌen chare ri rubꞌiꞌ, kin achel xbꞌix chare ri María roma ri ángel, atoq ri María kꞌajani tiroyobꞌej qa akꞌual.

22Atoq xtzꞌaqet ri janipeꞌ qꞌij ndubꞌij ri ley xyoꞌox chare ri Moisés chi tikoyobꞌej ri teꞌej-tataꞌatz ri ndalex jun kalkꞌuaꞌl chin ndekichꞌajchꞌojrisaj kiꞌ chuwech ri Dios,#Lv. 12:2-8 ri José y ri María xkikꞌuaj chuqaꞌ ri chꞌuti alaꞌ pa tinamit Jerusalén chin ndikijech rukꞌaslen pa ruqꞌaꞌ ri Ajaw. 23Keriꞌ xkibꞌen porque chupan ri ley xyoꞌox roma ri Ajaw, ndubꞌij: Ri nabꞌey ral jun ixaq ndalex, si chꞌuti alaꞌ, kin richin ri Ajaw.#Ex. 13:2; 22:29; Nm. 3:13 Keriꞌ tzꞌibꞌan kan. 24Y xbꞌekiyaꞌ pa ruqꞌaꞌ ri sacerdote israelita ri chikap ngekamisex chuwech ri Ajaw, achel ndubꞌij ri ley: Kaꞌiꞌ chꞌuteq muxkuraꞌ o kaꞌiꞌ palomas ndasuj chuwech ri Dios chin ndachꞌajchꞌojrisaj awiꞌ.#Lv. 12:8 Keriꞌ tzꞌibꞌan kan.

25Chupan ri tiempo riꞌ pa tinamit Jerusalén kꞌo jun achi rubꞌiniꞌan Simeón. Rijaꞌ kin kꞌo ri Espíritu Santo pa ruwiꞌ, chojmilej rukꞌaslen y kin nduyaꞌ wi ruqꞌij ri Dios. Rijaꞌ royobꞌen ri qꞌij chin nduqaqa ri Jun nditaq pe roma ri Dios chukolik ri rutinamit. 26Y ri Espíritu Santo ruqꞌalajrisan chare chi ma ndiken yan ta e, hasta kꞌa xtutzꞌet na kan ri Jun nditaq pe roma ri Ajaw chukolik ri rutinamit. 27Atoq ri José y ri María xkikꞌuaj apu ri chꞌuti alaꞌ Jesús pa rachoch ri Dios, chin ndikibꞌen achel ndubꞌij ri ley, ri Simeón xyoꞌox pa ránima roma ri Espíritu Santo chi xbꞌa pa rachoch ri Dios. 28Y ri Simeón xuchꞌelej ri chꞌuti alaꞌ, y kereꞌ xubꞌij chin xuyaꞌ ruqꞌij ri Dios:

29Rat Ajaw ri ratkꞌo pa ruwiꞌ nojel,

Xayaꞌ uxlanen pa wánima riyin ri asamajel, y utz chin nganawelesaj e chochꞌulew,

Porque ri asujun chuwa, kin xbꞌanatej wokami.

30Porque rikꞌin nuwech xintzꞌet ri Jun ri nduyaꞌ ri kolotajik chake ri atinamit,

31Kolotajik ri nduyaꞌ chuqaꞌ chake nojel kiwech wineq.

32Rijaꞌ kin xtuyikꞌaj kikꞌaslen ri ma israelitas ta,#Is. 9:2; Jn. 8:12

Y roma rijaꞌ ndikꞌojeꞌ qaqꞌij roj israelitas,

xchajeꞌ ri Simeón.

33Y roma keriꞌ ngerubꞌilaꞌ ri Simeón pa ruwiꞌ ri chꞌuti alaꞌ, ri José y ri María sachineq kikꞌuꞌx. 34Ri Simeón xerubꞌen bendecir y kereꞌ chuqaꞌ xubꞌij chare ri María ri ruteꞌ ri akꞌual: Tawakꞌaxaj re nibꞌij chawa: Re jun akꞌual reꞌ xtubꞌen chi ekꞌo israelitas ndikiyaꞌ kan ri Dios#Is. 8:13-15; Ro. 9:32, 33; 1P. 2:7, 8 y xtubꞌen chuqaꞌ chi ekꞌo ri nditzolij pe kánima rikꞌin ri Dios. Rijaꞌ ndok jun etal chikiwech, pero ekꞌiy ngeyakatej chirij, 35chin keriꞌ ekꞌiy chuqaꞌ ndeqꞌalajin pe ri kꞌo pa kánima. Y nojel reꞌ santienta bꞌis ndukꞌen pe chawa, xchajeꞌ ri Simeón.

36Chiriꞌ pa rachoch ri Dios kꞌo apu chuqaꞌ jun rijilej ixaq rubꞌiniꞌan Ana, rumiꞌal kan jun achi xubꞌiniꞌaj Penuel. Ri Penuel riꞌ riy-rumam kan ri Aser, jun chikiwech ri kabꞌlajuj tataꞌatz pa ruwiꞌ ri tinamit Israel ojer kan. Re Ana reꞌ jun ixaq ri nduqꞌalajrisaj ri ndubꞌij pe ri Dios pa ránima. Rijaꞌ xkꞌuleꞌ, pero xe ok wuquꞌ junaꞌ xkikꞌuaj kiꞌ rikꞌin ri rachijil, 37y ja 84 junaꞌ tok kan malkaꞌ, y jumul kꞌo apu pa rachoch ri Dios. Chi chaqꞌaꞌ chi paqꞌij ndubꞌen orar y ndubꞌen ayunar chin nduyaꞌ ruqꞌij ri Dios.#1Ti. 5:5 38Re ixaq reꞌ xbꞌeqaqa chuqaꞌ apeꞌ kꞌo ri akꞌual Jesús, y ndumatioxilaꞌ chare ri Dios roma ri akꞌual Jesús y ndichꞌaꞌa pa ruwiꞌ chake ri wineq ri koyobꞌen ri qꞌij chi ri aj Jerusalén ngeꞌelesex pa kiqꞌaꞌ ri etzꞌamayon kichin.

Ri José y ri María ngetzolij pa tinamit Nazaret

39Atoq ri José y ri María xkichꞌajchꞌojrisaj yan kiꞌ achel ndubꞌij ri ley chin ri Ajaw, xetzolij chikachoch pa tinamit Nazaret ri kꞌo pa rochꞌulew Galilea. 40Ri akꞌual bꞌaneq rukꞌiyik rupalen, y ruchuqꞌaꞌ chuqaꞌ, y ndikꞌojeꞌ pe más nojibꞌel pa ránima, y ri ru-favor ri Dios kꞌo pa ruwiꞌ.

Ri akꞌual Jesús ndilitej pa rachoch ri Dios

41Juna-junaꞌ ri rute-rutataꞌ ri Jesús ngebꞌa pa tinamit Jerusalén roma ri nimaqꞌij rubꞌiniꞌan Pascua.#Ex. 12:14 42Y atoq ri Jesús kabꞌlajuj rujunaꞌ, xebꞌa e pa tinamit Jerusalén achel ndikibꞌen juna-junaꞌ roma ri nimaqꞌij. 43Atoq xqꞌax yan ri nimaqꞌij y ja ngetzolij chikachoch, ri Jesús xkꞌojeꞌ kan pa tinamit Jerusalén, pero ri rute-rutataꞌ ma xkiyaꞌ ta cuenta chare chi xkanej kan. 44Pa kitzij rejeꞌ, ri Jesús bꞌaneq chikikajal ri wineq, y keriꞌ xebꞌiyin jun qꞌij. Pero atoq xkikanoj chikikajal ri koxpochel y ri kiwinaqul, 45ma xkil ta, romariꞌ xetzolij pa Jerusalén chukanoxik.

46Y ja rox qꞌij tikikanoj atoq xbꞌekilaꞌ pe ri Jesús pa rachoch ri Dios, tzꞌuyul chikikajal ri tijonelaꞌ chin ri ley. Ri Jesús ma xe ta ngerakꞌaxaj apu, xa kin kꞌo achike ndukꞌutuj razón chake. 47Y konojel ri ngeꞌakꞌaxan richin, ndisach kikꞌuꞌx chirij, roma kin kꞌes rujolon, y pa rubꞌeyal ndutzolij kitzij ri kꞌo achike ndikikꞌutuj razón chare. 48Atoq ri rute-rutataꞌ xkitzꞌet, xsach kikꞌuꞌx, y ri ruteꞌ xubꞌij chare: ¡Alaꞌ! ¿Achike roma kereꞌ xabꞌen chaqe? Ri atataꞌ y riyin santienta ngojbꞌison ngatiqakanolaꞌ.

49Ri Jesús xubꞌij chake: ¿Achike roma ngixel chꞌuꞌj chinukanoxik? ¿Ma iwetaman ta kꞌa chi ja ri ndirajoꞌ ri Nataꞌ Dios, ri ndikꞌatzin chi nibꞌen?

50Pero ri rute-rutataꞌ ma xkikꞌoxomaj ta ri xubꞌij ri Jesús chake.

51Ja atoq riꞌ ri Jesús xeroqaj pe ri rute-rutataꞌ y xetzolij qa pa tinamit Nazaret. Y ri Jesús kin ngerunimaj ri rute-rutataꞌ. Y ri María nojel ri ndibꞌanatej rikꞌin ri Jesús, kin nduyek pa ránima. 52Y ri Jesús bꞌaneq rukꞌiyik rupalen, keriꞌ chuqaꞌ ri runojibꞌal, y ri favor nduyaꞌ ri Dios kꞌo pa ruwiꞌ y ri wineq kin utz runoꞌoj ndikitzꞌet.

Currently Selected:

Lucas 2: cakX

Highlight

Copy