Lucas 15

Ri parábola pa ruwiꞌ ri yuqꞌunel ri ndiril ri rukarneꞌl

(Mt. 18:10-14)

1Konojel ri ngemolo méra pa rubꞌiꞌ ri rey, y keriꞌ chuqaꞌ ri wineq ri ndibꞌix chikij chi eꞌaj mak, xejel apu apeꞌ kꞌo ri Jesús chin ndikakꞌaxaj ri ndubꞌij.#Ez. 18:23; 1Ti. 1:15 2Pero ri fariseos y ri tijonelaꞌ chin ri ley xyoꞌox chare ri Moisés, ngechꞌaꞌa chirij ri Jesús, y kereꞌ ndikibꞌilaꞌ chikiwech: La achi laꞌ ndukꞌen apu kiwech aj mak teq wineq y ndiwaꞌ kikꞌin.

3Romariꞌ ri Jesús xubꞌij re parábola reꞌ chake: 4Si jun chiwech rix ekꞌo 100 rukarneꞌl y ndisach e jun, ¿la ma ngeruyaꞌ ta kꞌa kan jubꞌaꞌ ri 99 pa qꞌas y nderukanoj ri sachineq,#Mt. 18:12; 1P. 2:25 hasta kꞌa ndiril na? 5Y atoq nderilaꞌ pe, santienta ndikikot nduyaꞌ pe chirij ruwiꞌ.#Is. 40:11 6Y atoq ndeqaqa chirachoch, ngeroyoj ri ramígos y ri ru-vecinos, y kereꞌ ndubꞌij chake: Kixkikot wikꞌin, porque ri nukarneꞌl sachineq e, ja xinwil. 7Kin qetzij nibꞌij chiwa chi ri ekꞌo chikaj más ngekikot roma jun aj mak ri nditzolij pe ránima rikꞌin ri Dios, ke koma 99 wineq ri pa kiwech rejeꞌ chojmilej chik kꞌaslen kikꞌuan y ma ndikꞌatzin ta nditzolij pe kánima rikꞌin ri Dios.

Ri parábola pa ruwiꞌ ri ixaq ri ndiril ri ruméra sachineq

8Si jun ixaq kꞌo lajuj monedas rikꞌin y ndusech qa jun, ¿ma ndutzij ta kami jun lámpara y ndumes rupan rachoch chukanoxik utz-utz ri moneda, hasta kꞌa tiril na? 9Y atoq ndiril ri moneda, ngeroyoj ri ramígas y ri ru-vecinas y ndubꞌij chake: Kixkikot wikꞌin, porque ri méra nusachon, ja xinwil, ndichajeꞌ ri ixaq. 10Ri Jesús xubꞌij chuqaꞌ: Riyin nibꞌij chiwa chi keriꞌ chuqaꞌ santienta ngekikot ri ángeles chin ri Dios, roma jun aj mak ri nditzolij pe ránima rikꞌin ri Dios.

Ri parábola pa ruwiꞌ ri tataꞌatz ri ndukꞌen chi apu ruwech ri rukꞌajol

11Y ri Jesús xubꞌij chuqaꞌ: Kꞌo jun tataꞌatz ekꞌo kaꞌiꞌ rukꞌajol, 12y ri chaqꞌilaꞌtz kereꞌ xubꞌij chare ri rutataꞌ: Táta, tayaꞌ chuwa ri verencia, xchajeꞌ. Y ri rutataꞌ xujech ri herencia chikiwech ri ekaꞌiꞌ rukꞌajol. 13Xqꞌax jubꞌaꞌ teq qꞌij, ri chaqꞌilaꞌtz ja xukꞌayilaꞌ nojel ri herencia, xumal e ruchiꞌ ri méra y xbꞌa pa jun rochꞌulew nej. Chiriꞌ xa apux rukꞌisik xubꞌanalaꞌ chare ri méra roma ri itzel kꞌaslen xukꞌuaj. 14Pero atoq rukꞌison chik nojel ri méra, xtiker pe jun nim wayijal chupan ri rochꞌulew apeꞌ kꞌo wi, y roma ri kꞌajol riꞌ maneq chik méra pa ruqꞌaꞌ, xutij wayijal. 15Y chare jun achi aj chiriꞌ xbꞌerukꞌutuj rusamaj, y ri achi xuteq pa rulew chin xebꞌeruyuqꞌuj aq. 16Bꞌaláta ndukꞌux kiway ri aq ndirajoꞌ, pero nixta jun ndiyoꞌon chare. 17Re kꞌajol reꞌ xtzolij kꞌa pe runoꞌoj pa seq y xubꞌij: Chirachoch ri nataꞌ riꞌ… kꞌiy samajelaꞌ ekꞌo y kꞌiy achike ndikikꞌux, jakꞌa riyin ngiken chi ruchꞌumunik nupan chireꞌ. 18Más utz nibꞌen e nukꞌojlen y ngitzolij chirachoch ri nataꞌ y nibꞌij chare: Táta, riyin xinbꞌen mak#1R. 8:47, 48; Lm. 3:40 chuwech ri Dios, y chawech rat. 19Ma yin rukꞌulun ta chin ndibꞌix chi yin akꞌajol. Maske achel jun asamajel tabꞌanaꞌ chuwa, pero takꞌamaꞌ ok apu nuwech. 20Y ri kꞌajol riꞌ ja xutzꞌen bꞌey chin xtzolij chirachoch ri rutataꞌ.

Atoq kꞌa nej jubꞌaꞌ kꞌo wi, ri rutataꞌ xutzꞌet pe y santienta xupoqonaj ruwech, juꞌanin paqiꞌ xbꞌa chukꞌulik ri rukꞌajol, xuqꞌetej y xutzꞌubꞌaj ruqꞌoꞌtz. 21Y ri kꞌajol kereꞌ xubꞌij chare ri rutataꞌ: Táta, riyin xinbꞌen mak chuwech ri Dios y chawech rat,#Sal. 51:4 romariꞌ ma rukꞌulun ta ndibꞌix chi riyin akꞌajol. 22Pero ri tataꞌatz xubꞌij chake ri rusamajelaꞌ: ¡Chaꞌanin! Tikꞌamaꞌ pe ri tzieq más jabꞌel y tiweqaꞌ#Gá. 3:27 la nukꞌajol, tiyaꞌ anillo chi ruwiꞌ ruqꞌaꞌ y tiyaꞌ chuqaꞌ xajabꞌ chiraqen. 23¡Tikꞌamaꞌ pe ri wakx tiojrisan, tikamisaj, qojwaꞌ y tiqabꞌanaꞌ nimaqꞌij!#Is. 35:10 24Porque re jun nukꞌajol reꞌ xa achel kamineq chik, y wokami achel xkꞌojeꞌ chik rukꞌaslen; sachineq y wokami xilitej,#Ef. 2:1; Col. 1:13 xchajeꞌ ri rutataꞌ. Y keriꞌ, ja xkitzꞌuk qa ri nimaqꞌij.

25Pero ri nimalaꞌtz kꞌajol bꞌaneq pa qꞌas atoq riꞌ, y atoq xtzolij y xuqaqa chunaqaj rachoch ri rutataꞌ, xrakꞌaxaj chi ndajin qꞌojon y ri wineq ngexaja. 26Xroyoj kꞌa apu jun rusamajel ri rutataꞌ y xukꞌutuj razón chare achike ri ndajin chiriꞌ. 27Y ri samajel xubꞌij chare: Ri achaqꞌ xtzolij pe chiꞌawachoch, y ri atataꞌ xubꞌij chi tikamisex ri wakx tiojrisan y tibꞌan nimaqꞌij chuqaꞌ, porque ri achaqꞌ tzꞌaqet ruqꞌa-raqen xuqaqa, y romariꞌ ndikikot xukꞌen apu ruwech. 28Atoq xrakꞌaxaj keriꞌ, ri kꞌajol nimalaꞌtz xyakatej royowal y ma ndirajoꞌ ta ndok apu chirachoch, romariꞌ xbꞌeꞌel pe ri rutataꞌ y ndubꞌochilaꞌ chin ndok apu. 29Ri kꞌajol nimalaꞌtz xubꞌij chare ri rutataꞌ: Rat awetaman chi santienta junaꞌ nubꞌanun pe asamaj y nixta jumbꞌey nuqꞌajon ruwiꞌ atzij, y rat nixta jun chꞌuti cabra ayoꞌon chuwa chin ta nubꞌanun jun nimaqꞌij kikꞌin wachibꞌil. 30Pero xuqaqa ri chaqꞌilaꞌtz akꞌajol xa apux rukꞌisik xubꞌen chare ri améra kikꞌin ixoqiꞌ ri ndikikꞌayilaꞌ kiꞌ chake achiꞌaꞌ, y rat xateq rukamisaxik ri wakx tiojrisan chin ndabꞌen nimaqꞌij roma rijaꞌ, xchajeꞌ.

31Pero ri rutataꞌ xubꞌij chare: Nukꞌajol, rat jumul ratkꞌo wikꞌin, y nojel ri nuchajin kin pa aqꞌaꞌ chuqaꞌ rat kꞌo wi. 32Pero kin ndikꞌatzin chi wokami ndiqabꞌen nimaqꞌij, porque ri achaqꞌ xa achel kamineq chik y wokami achel xkꞌojeꞌ chik rukꞌaslen; sachineq y wokami xilitej,#Is. 35:10 xchajeꞌ ri tataꞌatz.

Currently Selected:

Lucas 15: cakX

Highlight

Copy