Gálatas 6

Ri ndikꞌatzin ndikibꞌen ri kitaqin ri Cristo

1Hermanos, si ndilitej jun ri ndajin rikꞌin mak, rix ri ukꞌuan ri ikꞌaslen roma ri Espíritu Santo, rikꞌin loqꞌ iwánima tibꞌochiꞌij ránima ri jun riꞌ chin nduyaꞌ kan ri mak y nditzolij ránima rikꞌin ri Ajaw.#Stg. 5:19, 20 Pero tibꞌanaꞌ cuenta iwiꞌ, ma kꞌateꞌ kixtzaq chuqaꞌ rix pa mak. 2Titolaꞌ iwiꞌ chukꞌuaxik ri kꞌayew ndiqꞌasaj ri kin eꞌachel al teq eqaꞌ keriꞌ, porque si keriꞌ ndibꞌen, kin ndibꞌen ri ndubꞌij ri ley ruyoꞌon kan ri Cristo ri ndubꞌij chi tiqajoꞌ qiꞌ chiqawech.#Jn. 15:12, 17; 1Jn. 3:23

3Porque si jun ndunaꞌ chi kin kꞌo ruqꞌij y romariꞌ ma ngerutoꞌ ta chꞌaqa chik, xa ruyon chuwech nduchꞌakatij qa riꞌ.#1Co. 8:2 4Roma kꞌa riꞌ, chiqajununal tiqatzꞌetaꞌ si utz ri ngojtajin rikꞌin.#2Co. 13:5 Si utz, kꞌo cheꞌel ndikikot qánima, y ma ndikꞌatzin ta ndiqajunumaj ri qasamaj rikꞌin ri samaj rubꞌanun jun chik. 5Porque chiqajununal ndikꞌatzin ndiqakꞌuaj ralal ri achike ngeqabꞌanalaꞌ pa qakꞌaslen.

6Rix ri ngixtijox rikꞌin rutzij ri Dios, keꞌitoꞌ ri ngetijon iwichin rikꞌin nojel ri ndikꞌatzin chake chin ndikiqꞌasaj ri kikꞌaslen.#1Co. 9:14

7Ma tichꞌakatij qa iwiꞌ iyon.#1Co. 6:9, 10 Ri Dios ma jun ndichꞌakatin richin,#Job 13:9 porque ri achike ndutik jun wineq pa rukꞌaslen, jariꞌ ri nderutzꞌetaꞌ pa rukꞌaslen más apu chuwech. 8Si jun wineq ngerubꞌanalaꞌ ri itzel teq rayinik chin ri ru-cuerpo, ri jun riꞌ ndajin rikꞌin jun tikoꞌ ri xa kamik ndukꞌen pe chare. Pero ri ukꞌuan rukꞌaslen roma ri Espíritu Santo, ri jun riꞌ ndajin rikꞌin jun tikoꞌ ri ndukꞌen pe ri kꞌaslen ma ndikꞌis ta chare. 9Roma kꞌa riꞌ, ma qojkos chin ndiqabꞌen ri utz,#2Ts. 3:13 porque nduqaqa jun qꞌij atoq ndiyoꞌox rajel-rukꞌexel chaqe, si ma ndiqamalij ta kan chi ndiqabꞌen ri utz. 10Romariꞌ, janipeꞌ na mul ngojtiker, tiqabꞌanaꞌ ri utz chake konojel, pero más chake ri kitaqin chik ri Cristo.

Ri rukꞌisibꞌel teq achike nduchilabꞌej e ri Pablo

11Tiyaꞌ cuenta chare ri nimaꞌq teq letras xentzꞌibꞌaj rikꞌin nuqꞌaꞌ#1Co. 16:21 chupan re wuj reꞌ. 12Ri ndikajoꞌ chi por fuerza ndibꞌen circuncidar iwiꞌ, keriꞌ ndikibꞌen xe chin utz ngetzꞌat koma ri israelitas ri ma kitaqin ta ri Cristo, chin keriꞌ ma ngetzeqlebꞌex ta chin ndibꞌan itzel chake roma ndikitzijoj chi ri wineq ngekolotej roma rukamik ri Cristo cho cruz. 13Porque nixta ri ndikibꞌen circuncidar kiꞌ ndikinimaj nojel ri ndubꞌij ri ley ri xyoꞌox chare ri Moisés. Pero rejeꞌ ndikajoꞌ chi rix ndibꞌen circuncidar iwiꞌ, xe chin ndikinimrisaj kiꞌ chi rix ikꞌuan ri etal riꞌ pa i-cuerpo. 14Pero riyin ma ninimrisaj ta wiꞌ roma ri achike nubꞌanaloꞌon, xa kin ja ri rukamik ri Qajaw Jesucristo cho cruz ri ninimrisaj. Porque ri rukamik ri Cristo xubꞌen chuwa chi maneq chik reqalen chinuwech ri achike ndusuj ri rochꞌulew. Keriꞌ chuqaꞌ ri wineq ri ma kitaqin ta ri Jesucristo maneq reqalen chikiwech ri kin kꞌo wi reqalen chinuwech riyin. 15Ma jun ndubꞌen si qabꞌanun circuncidar qiꞌ o naq, ri ndikꞌatzin y kin kꞌo wi reqalen, ja ri kꞌakꞌakꞌ kꞌaslen#2Co. 5:17; Ef. 4:23, 24 yoꞌon chaqe. 16Rix ri ikꞌuan ikꞌaslen achel ndirajoꞌ ri kꞌakꞌakꞌ kꞌaslen riꞌ, kin ta xtikꞌojeꞌ pa iwánima ri uxlanen y ri rujoyowaxik iwech nduyaꞌ pe ri Dios, junan kikꞌin ri eqetzij israelitas pa ruwech ri Dios.

17Wokami y ri más chiqawech apu, niwojoꞌ chi nixta jun chik xtiyoꞌon kꞌayew chuwa, porque riyin nukꞌuan pa nu-cuerpo ri retal ri kꞌayew nuqꞌasan roma yin rusamajel ri Jesús.

18Hermanos, ri favor nduyaꞌ ri Qajaw Jesucristo kin ta xtikꞌojeꞌ pa iwánima rix iwonojel. Amén.

Currently Selected:

Gálatas 6: cakX

Highlight

Copy