Efesios 3

Ri rusamaj ri Pablo chikikajal ri eralkꞌuaꞌl ri Dios

1Riyin Pablo, yin tzꞌapel pa cheꞌ roma niyaꞌ rutzijol ri utzulej rutzij ri Cristo Jesús chiwa rix, ri ma rix israelitas ta. 2Y riyin ninaꞌ pa wánima chi rix iwakꞌaxan chi ri Dios pa nuqꞌaꞌ ruyoꞌon chi nitzijoj ri utzulej rutzij chiwa, chin ndiwil ri favor nduyaꞌ. 3Achel xintzꞌibꞌaj yan jubꞌaꞌ chiwa, chi ri Dios xuqꞌalajrisaj chinuwech ri rubꞌanun pe ruwech pa iwiꞌ, ri ewan rubꞌeyal ojer kan, pero wokami xqꞌalajrisex. 4Y atoq rix ndibꞌen leer ri nutzꞌibꞌan e chiwa, ndikꞌoxomaj chi qetzij qꞌalajrisan chinuwech ri ewan rubꞌeyal ojer kan pa ruwiꞌ ri xurubꞌanaꞌ ri Cristo chochꞌulew. 5Reꞌ ma xqꞌalajrisex ta chikiwech ri tzaq teq wineq ri xekꞌojeꞌ chochꞌulew ojer. Pero wokami ri Espíritu Santo ruqꞌalajrisan chikiwech ri loqꞌolej teq apóstoles y profetas. 6Y ri ruqꞌalajrisan ri Espíritu Santo jareꞌ: Rix ri ma rix israelitas ta, itaqin ri utzulej teq tzij chin kolotajik, y romariꞌ kꞌo favor ndiyoꞌox chiwa junan qikꞌin roj israelitas, y junan roj okuneq ruwachinel ruqꞌa-raqen ri Cristo y junan chuqaꞌ ndiyoꞌox chaqe ri rusujun ri Dios chi nduyaꞌ, porque xe jun qabꞌanun qonojel rikꞌin ri Cristo Jesús.

7Y roma ri favor rusipan ri Dios chuwa rikꞌin ri nimalej ruchuqꞌaꞌ ri ndisamej pa nukꞌaslen, yin okuneq rusamajel chin nitzijoj ri utzulej teq tzij chin kolotajik. 8Y riyin maske maneq ok weqalen ke chuwech ri más maneq ok ruqꞌij chikikajal ri loqꞌolej rutinamit rijaꞌ, chuwa riyin yoꞌon ri favor chi nitzijoj chake ri ma israelitas ta ri utzulej teq tzij chin kolotajik ri kin jun bꞌeyomal#Col. 1:27 rukꞌamon pe ri Cristo, jun bꞌeyomal ri ma ngojtiker ta ndiqakꞌoxomaj janipeꞌ reqalen. 9Xyoꞌox chuqaꞌ qꞌij chuwa chi nitzijoj chake konojel ri rubꞌeyal ri favor ri rubꞌanun pe ruwech chi nduyaꞌ ri Dios, favor ri xe ojer kan tiempo ewan rubꞌeyal y wokami xqꞌalajrisex roma rijaꞌ ri bꞌanayon nojel.#Sal. 33:6; Jn. 1:3; Col. 1:16 10Chin keriꞌ, rikꞌin ri rubꞌanun rijaꞌ chiqakajal roj ri roj rutinamit, ndiqꞌalajin ri jalajaj ruwech retamabꞌel chikiwech konojel ri kꞌo uchuqꞌaꞌ pa kiqꞌaꞌ y ri qꞌatoy teq tzij ri ma ngetzꞌetetej ta ekꞌo chikaj. 11Keriꞌ xubꞌen ri Dios, kin achel ri rubꞌanun pe ruwech chi ndubꞌen xe ojer kan.#Ef. 1:11 Y ri rubꞌanun pe ruwech xbꞌanatej roma ri xurubꞌanaꞌ ri Cristo Jesús ri Qajaw. 12Y roj roma xe jun qabꞌanun rikꞌin ri Cristo Jesús, kuqul qakꞌuꞌx ngojjel apu chuwech ri Dios y ma ndiqaxibꞌij ta qiꞌ ngojchꞌaꞌa chare roma qataqin rijaꞌ.#Ef. 2:18 13Romariꞌ nikꞌutuj kamelal chiwa chi ma tipoꞌ ikꞌuꞌx roma ri kꞌayew niqꞌasaj riyin iwoma. Porque ri kꞌayew niqꞌasaj, xa kin chin ndikꞌojeꞌ iqꞌij rix.

Ri Pablo ndubꞌen orar y nduyaꞌ ruqꞌij ri Dios

14Romariꞌ riyin ngixukeꞌ chin nibꞌen orar chuwech ri Tataꞌaj Dios, 15ri achoq ikꞌin pataneq kikꞌaslen konojel ri ekꞌo chikaj y ri ekꞌo chochꞌulew. 16Y nikꞌutuj chare rijaꞌ ri kꞌo nimalej ruqꞌij ri kin achel jun bꞌeyomal, chi nduyaꞌ santienta ruchuqꞌaꞌ iwánima roma ri Espíritu Santo. 17Nikꞌutuj chuqaꞌ chare chi ri Cristo ndikꞌojeꞌ jumul pa iwánima,#Jn. 14:23 roma kuqul ikꞌuꞌx rikꞌin, y chi ndikꞌojeꞌ chuqaꞌ ruxeꞌ ri ikꞌaslen chupan ri ajowabꞌel, 18chin ndikꞌoxomaj junan kikꞌin konojel ri loqꞌolej ralkꞌuaꞌl, ri janipeꞌ ruwech, janipeꞌ raqen, janipeꞌ rujotolen y janipeꞌ qa rupan ri rajowabꞌel rijaꞌ. 19Y keriꞌ ndikꞌoxomaj janipeꞌ ngixrajoꞌ ri Cristo, maske ri rajowabꞌel rijaꞌ más nim ke chuwech ri ngojtiker ndiqakꞌoxomaj. Keriꞌ nikꞌutuj pa iwiꞌ chare ri Tataꞌaj Dios, chin keriꞌ ri inoꞌoj rix nderubꞌanaꞌ achel ri utzulej runoꞌoj rijaꞌ.

20Tiqayaꞌ ruqꞌij ri Dios ri nditiker ndubꞌen más chuwech ri achike ndiqakꞌutuj o ndiqanojij, rikꞌin ri nimalej ruchuqꞌaꞌ ri ndisamej pa qánima. 21Kin ta ndiqayaꞌ nimalej ruqꞌij ri Tataꞌaj Dios,#1Ti. 1:17 roj ri roj rutinamit, roma xe jun qabꞌanun rikꞌin ri Cristo Jesús. Kin ta ndiyoꞌox ruqꞌij koma nojel tzaq teq wineq ri ngetuꞌalex chochꞌulew chupan nojel ri tiempo pataneq más apu chiqawech y chin jumul. Amén.

Currently Selected:

Efesios 3: cakX

Highlight

Copy