1 Tesalonicenses 2

Ri samaj xubꞌen ri apóstol Pablo chikikajal ri hermanos aj Tesalónica

1Hermanos, rix iwetaman chi atoq xixbꞌeqatzꞌetaꞌ, kin kꞌo utz xukꞌen pe chiwa ri xojkꞌojeꞌ chiꞌikajal.#1Ts. 1:9 2Iwetaman chuqaꞌ chi xqaqꞌasaj kꞌayew#Hch. 16:22-24 y xbꞌan itzel chaqe pa tinamit Filipos atoq kꞌajani qojbꞌeqaqa pa itinamit, pero ri Dios xuyaꞌ ruchuqꞌaꞌ qánima chin xbꞌeqatzijoj chiwa rix ri utzulej teq tzij chin kolotajik ri pataneq rikꞌin rijaꞌ, maske santienta wineq xeyakatej chiqij pa itinamit. 3Porque atoq xqatzijoj kan chiwa chi ndikꞌatzin nditaqij ri utzulej teq tzij chin kolotajik, ruyon ri qetzij xqabꞌij chiwa, ma jun itzel kꞌo pa qánima chin xqabꞌij, y chuqaꞌ ma chin ta xixqachꞌakatij. 4Pa rukꞌexel riꞌ, ngojchꞌaꞌa porque ri Dios nabꞌey chi xuyaꞌ re samaj reꞌ pa qaqꞌaꞌ, xunikꞌoj#Pr. 17:3 ri kꞌo pa qánima, kꞌateriꞌ xuchilabꞌej#Tit. 1:3 chaqe chi ndiqayaꞌ rutzijol ri utzulej teq tzij chin kolotajik, y kin ja wi riꞌ ri ndiqatzijoj. Y ma ja ta ri ndiqaꞌ chikiwech ri wineq ri ndiqatij qaqꞌij chin ndiqatzijoj, xa kin ja ri ndiqaꞌ chuwech ri Dios ri ndinikꞌon ri kꞌo pa qánima. 5Porque rix iwetaman, chi atoq xbꞌeqatzijoj ri rutzij ri Dios chiwa, ma xqayaꞌ ta iqꞌij rikꞌin jabꞌel teq tzij chin ta xqaqasaj ijolon, nixta xixqachꞌakatij chin ta xqelesaj méra chiꞌiqꞌaꞌ. Ri Dios kin retaman wi chi qetzij nojel ri ngojtajin chubꞌixik. 6Nixta ndiqakanoj chi ri wineq utz ngechꞌaꞌa chiqij; nixta rix, nixta chꞌaqa chik. 7Roj kꞌo ta cheꞌel xqabꞌen mandar chiwa chi kin nim qeqalen qojitzꞌetaꞌ, porque roj apóstoles#1Co. 9:1 chin ri Cristo, pero pa rukꞌexel riꞌ, xa kin xqabꞌen chare ri qánima achel ránima jun akꞌual chiꞌikajal, xixqajoꞌ achel jun teꞌej ri ngerilij y ngerukꞌiytisaj ri ral. 8Y roma tzꞌan ngixqajoꞌ, jabꞌel xqanaꞌ chi xqatzijoj chiwa ri utzulej teq tzij chin kolotajik ri pataneq rikꞌin ri Dios, y ma xe ta riꞌ, porque xa ta xkꞌatzin chi xqajech ri qakꞌaslen pa i-cuenta, keriꞌ ta xqabꞌen porque santienta ngixqajoꞌ. 9Keriꞌ nibꞌij chiwa hermanos, porque rix ndikꞌuxlaꞌaj chi xojsamej chi chaqꞌaꞌ chi paqꞌij, xojkos chuchꞌakik ri ndikꞌatzin chaqe pa qakꞌaslen, chin keriꞌ ma xojok ta jun eqaꞌ#1Co. 9:18 chiwa atoq xqatzijoj chiwa ri utzulej teq tzij chin kolotajik ri pataneq rikꞌin ri Dios.

10Ri Dios y rix iwetaman chi xqakꞌuaj jun loqꞌolej kꞌaslen, iwetaman chuqaꞌ chi nojel ri xqabꞌen kin pa ruchojmil, y ma jun itzel xitzꞌet pa qakꞌaslen atoq xojkꞌojeꞌ chiꞌikajal#2Co. 1:12 rix ri itaqin ri Cristo. 11-12Iwetaman chuqaꞌ chi xqayaꞌ ruchuqꞌaꞌ ri iwánima y xixqabꞌochiꞌij chiꞌijununal, achel ndubꞌen jun tataꞌatz chake ri eralkꞌuaꞌl. Xixqapixabꞌaj chi tikꞌuaj jun utzulej kꞌaslen,#Ef. 4:1; 1P. 1:15 achel rukꞌulun chi ndikꞌuaj chuwech ri Dios ri xoyon iwichin chin ngixok pa ru-reino y ngixkꞌojeꞌ chupan ri nimalej ruqꞌij.

13Rix roma xikꞌen qa pa iwánima ri rutzij ri Dios ri xqatzijoj kan chiwa, romariꞌ roj jutaqil ngojmatioxin chare ri Dios iwoma, porque ma xibꞌij ta chi xa relik kitzij wineq, xa kin xiyaꞌ pa iwánima chi qetzij rutzij ri Dios ri xqatzijoj chiwa. Y kin qetzij chi ri rutzij ri Dios ndubꞌen samaj pa ikꞌaslen#He. 4:12 rix ri itaqin ri Cristo. 14Porque rix hermanos aj Tesalónica, roma xitaqij ri Cristo Jesús, xiqꞌasaj kꞌayew pa kiqꞌaꞌ ri iwinaqul, achel xkiqꞌasaj ri hermanos ri kitaqin ri Cristo Jesús pa rochꞌulew Judea, porque xetzeqlebꞌex chin xbꞌan itzel chake koma ri kiwinaqul israelitas. 15Kin keriꞌ wi kinoꞌoj ri israelitas ri ma kitaqin ta ri Ajaw, porque israelitas xebꞌiꞌin chi xkamisex ri Ajaw Jesús y israelitas ri xekamisan kichin ri profetas ojer. Y chupan re tiempo rojkꞌo, israelitas chuqaꞌ ri xeꞌoqotan pe qichin. Kin ma ndikibꞌen ta ri ndirajoꞌ ri Dios, y xa eyakatajneq chikij konojel wineq. 16Keriꞌ nibꞌij porque atoq ndiqajoꞌ ndiqatzijoj ri utzulej teq tzij chin kolotajik chake ri ma israelitas ta, ri israelitas ndikiqꞌet chiqawech,#Lc. 11:52 y roma kin keriꞌ jumul kibꞌanun pe, kimolon pe kimak chikij, y ri Dios rutaqon pe santienta castigo pa kiwiꞌ.

Ri Pablo ndirajoꞌ ngebꞌerutzꞌetaꞌ chik jumbꞌey ri hermanos aj Tesalónica

17Hermanos, kin jumul rix qakꞌuan pa qánima, y rikꞌin ri xojoqotex pe pa itinamit y kꞌo chik jubꞌaꞌ qꞌij ma qatzꞌeton ta iwech, kin tzꞌan ndiqajoꞌ ngixbꞌeqatzꞌetaꞌ. 18Romariꞌ qatijon qaqꞌij chi ngojbꞌa chiꞌitzꞌetik, y riyin Pablo kaꞌi-oxiꞌ mul nutijon nuqꞌij chi nibꞌen keriꞌ, pero ja ri Satanás okuneq chupan. 19Porque, ¿la ma ja ta kami rix ri achoq roma ngojkikot y qoyobꞌen ri utzulej rajel-rukꞌexel roma ri samaj qabꞌanun chiꞌikajal? Y, ¿la ma iwoma ta kami rix ndikꞌojeꞌ qaqꞌij chuwech ri Dios atoq nditzolij pe ri Ajaw Jesús? 20Porque ja rix ri achoq roma ndikꞌojeꞌ qaqꞌij#2Co. 1:14 y ja chuqaꞌ rix ri ngixbꞌanun chi ndikikot ri qánima.

Currently Selected:

1 Tesalonicenses 2: cakX

Highlight

Copy