Gha ta Wəshi 25

Mte ta Abraham. Kweci hwelefefia ŋkɛ

1Pa Abraham wəmeve kwete male, Kɛtəwra sləa nta. 2Pa nde yake nda ŋwale tezhili: Zimran, Yoksan, Mɛdan, Madiyan, Ishebak ba'a Shəwa. 3Yoksan nde yake yɛ Saba le Dɛdan. Ma hwelefefi nyi kesawa mbe Dɛdan ne, ka Ashəwr, ka Lɛtəwsh ba'a ka Lewəm. 4Ma ŋwale tezhili nyi yake Madiyan ne, Ɛfa, Ɛfɛr, Hanok, Abida ba'a Ɛlda. Pɛtɛa nci kaŋwale tezhili nyi yake Kɛtəwra.

5Pa Abraham fəave nda pɛtɛa wəshia ŋkɛ ke Izak. 6Ma kwa nza ŋkɛ mba teghweme ne, nahe Abraham keɗave nda wəshi ke ŋwale tezhilia kweci mia ŋkɛ nda teŋkamte hɛ ŋkɛ cakeɗake le wəzege ta ŋkɛ Izak, laka ŋkwa kesame ta veci. 7Va ta Abraham gwəmsə ba'a mberefaŋemsə mcɛfeghəmbe 8nda mte ŋkɛ. Mbe meha nya le zeɗe nza ba'a mbe galɛpi mtenyɛ ŋkɛ. Pa ŋkɛ lənyɛ sha ka shihɛnyɛ nyi kempə. 9Pa ŋwale tezhilia ŋkɛ Izak ba'a Ismayɛl lamte ŋkɛ mbe zlera ta Makpɛla nya mbe wəvea Ɛfron, wəzege ta Sowar, nde Hɛt terasle yitea Mamrɛ. 10Va hwelefe ta ka Hɛt pave wəvea shɛ Abraham. Pa mbeli lamte ŋkɛ tagha yitea male ta ŋkɛ Sara. 11Ma kwa sebe ta mte ta Abraham ne, pa Shala wəpikɛ wəzege ta ŋkɛ Izak. Terasle yitea ghwa ta Lahay-Roy se Izak kanza.

12Wa nyi sləa ŋwale tezhilia Ismayɛl nya yake nda Agar, wəzha ta ka Ɛzhipte nya kakwatera ta Sara ke Abraham nyi. 13Wa nyi sləa ŋwalea Ismayɛl kekwele kekwele nyi: Nebayot, Kɛdar, Adbɛyɛl, Mibsam, 14Mishema, Dəwma, Masa, 15Hadad, Tɛma, Yetəwr, Nafish ba'a Kɛdma. 16Tsetse se ŋwale tezhilia Ismayɛl nyi meŋe bakeghəmbe. Yayata wəndə kawəndə nya te ghəa pelə, pa hɛ ndeke nda sləa nci ke meleme ta nci ba'a ghedəkwəa nci. 17Va ta Ismayɛl gwəmsə ba'a mahekenemsə mberefaŋeghəmbe nda mtenyɛ. 18Ma hwelefefia Ismayɛl ne, te hɛɗi nya kwelɛ yɛ Havila le Shəwr se hɛ. Dekwede Shəwr yitea Ɛzhipte laka Ashəwr. Pa hɛ nzanji cakeɗake le kweci hwelefefia Abraham.

ZHAKOB

25: 19–36

Ya ta yɛ Ɛzawə le Zhakob

19Wa nya ghena ta Izak nya:

Abraham nde yake Izak. 20Kwa nza va ta Izak wəfaɗemsə ne, pa ŋkɛ kelete Rɛbɛka, wəzha ta Betəwɛl kamale ta ŋkɛ, wəzha ta meghekɛa Laban nya kande Aram nde. 21Ntake Izak kasəkwə Mahwətə te ghəa male ta ŋkɛ kwa nza nde kajɛŋa. Pa Mahwətə zhɛakɛ heli yite, zlivə Rɛbɛka dzawa hwə. 22Ama ntake kwalegha nyi kwa hwəa nta kandendəkwə ghəa nci, ma ke lewela: «Ma nda tsetse ŋkɛ ne, wa ganyɛ nya mbe dzawa ghwə wa?» Cape nde kalə ka'yɛwe ghena va Mahwətə. 23Ma ke Mahwətə shɛ:

«Hwelefe bake ya kwa hwəa ŋa,

bake teya mama ta mbeli na.

Berete ma tenza kwete ke kwete,

nya kwele nde temene nda slene ke nya ɓɛhwɛ!»

24Ma kwa senyɛ və keya ta nta ne, kwalegha ya kwa hwəa Rɛbɛka. 25Ma nya keghate kasawa ne, gheme ŋkɛ, bətə ŋkɛ mbe shinti kala wəshi keseɗa: pa mbeli ndeke nda slə kaƐzawə. 26Pa wəza meghekɛ sawa kwa sebe ta ŋkɛ, hecape te tetərəa Ɛzawə le dzeve: pa mbeli ndeke nda slə kaZhakob. Va ŋkwaŋemsə menete Izak nda yake geva hɛ.

27Pa ŋwale tezhilia shɛhɛ kelenji. Kande zlɛaŋezlɛa ganyɛ nya kedzeghwa gamba Ɛzawə. Ma Zhakob le ŋa ŋkɛ ne, bivə ŋkɛ ki ghɛ. 28Kwele ma ɗehwe Ɛzawə Izak, va nya nza ŋkɛ slia wəshi nyi hwa gamba ya zeɗe ma shɛ. Ama Rɛbɛka ne, za ma Zhakob ɗe nde.

29Ma te kwete hɛ kata nɗeli Zhakob ne, pɛkwe Ɛzawə sheke kwamte, leɓakwe ŋkɛ kwele kwele. 30Ma ke sha Zhakob: «Pelakɛ ɗa kazeme nɗelia ŋa nya gheme nya, va nya nza 'ya leɓakwe.» Vatse hekate nda kwete slə mbeli kaƐdom, geze ta ŋkɛ, nya gheme. 31Ma ke Zhakob zhɛnete: «Pahwe ɗa nza ta ŋa kawəndə kwele kaba.» 32Ma ke Ɛzawə: «Katemte 'ya va ma ne, wa kwete wəsə nya teve ɗa nza ta ɗa kawəndə kwele wa?» 33Ma ke Zhakob zhɛnete: «Zemete ɗa fela kaba.» Pa Ɛzawə zemete nda fela ba'a pamte nda nza ta ŋkɛ kawəndə kwele ke Zhakob. 34Pa Zhakob ndeke nda ɗafa ba'a mzave nda ghazlə tsə kwa gheme. Ma kwa zehwe Ɛzawə ba'a kwa sakɛ yɛmə ŋkɛ ne, pelɛhetɛme sate, pa ŋkɛ dzeghwanyɛ. Kese ŋkɛ kaɓela nza ta ŋkɛ kawəndə kwele we.

Currently Selected:

Gha ta Wəshi 25: BEK12

Highlight

Copy