Gha ta Wəshi 24

Wəme geva ta yɛ Izak le Rɛbɛka

1Nahe Abraham kehalenyɛ hwerejɛme jɛme, nahe Mahwətə kewəpikɛ ŋkɛ mbe yayata wəsə. 2Ma te kwete hɛ, ma ke Abraham sha wəndə nya nza va ta ŋkɛ kwele ma hwa ka mene slene nyi ki ghɛa ŋkɛ, nya te ghəa mcɛləa ŋkɛ: «Veyite dzeve ta ŋa yitea basa ta ɗa 3shɛ na zemete ɗa fela le Mahwətə, Shala nya pelɛ ghweme ba'a nya te hɛɗi kaɗema na kawəme nda wəzha ta ka Kanan nyi nza 'ya hwa hɛ ke wəzege ta ɗa. 4Ama te hɛɗia ɗa ba'a kwa yita ta ɗa telə na kawəme nda male ke wəzege ta ɗa Izak.» 5Ma ke nde mene slenea shɛ shɛ: «Nda kwete kateɗema malea shɛ katəkwə təkwə ɗa kase kadzete hɛɗi nya ne, wərə 'ya kakeleghe wəzege ta ŋa kadzete hɛɗi nya se na te na?» 6Ma ke Abraham zhɛnete nda: «Ewə, yagha na tekele wəzege ta ɗa kadzete. 7Nahe Shala Mahwətə nya pelɛ ghweme kekelemte ɗa shave ki ghɛa yiteyɛ ɗa ba'a se te hɛɗia mbelia ɗa. Ma ke gezete ɗa ghena ba'a zemete ɗa fela: ‹Kateve nda hɛɗi nya 'ya ke hwelefe ta ŋa.› Kateghwene nde ghwene ta ŋkɛ ŋkɛ mbe kema ta ŋa kezha wəme nda male na se mbe ke wəzege ta ɗa. 8Ma keɗema malea shɛ katəkwə təkwə ŋa ne, mba fela nya zemete ɗa na kwa ghəa ŋa we. Ama kelema wəzege ta ɗa na tɛape kadzete hɛɗia shɛ ma.» 9Pa nde mene slenea shɛ veyite dzeve ta ŋkɛ yitea basa ta nde sleke ŋkɛ Abraham, pa ŋkɛ zemete nda fela kezha mene kala nya 'yɛwe ŋkɛ ve. 10Pa ŋkɛ ŋkave zlegweməa lɛməa nde sleke ŋkɛ meŋe ba'a fəte wəshi ganji nyi ve. Cape ŋkɛ kwa hweŋkwa laka meleme ta Nahor, mbe Mɛzopotami nya pelɛghə.

11Ma kwa ntsehe ŋkɛ yitea ghwa nya pelɛ te ŋwela yitea melemea shɛ, pa ŋkɛ zhɛnakɛ nda mpi ke zlegweməa lɛmə. Nahe tɛhwɛɗi kemenete geva, mbe vəa shɛ se mi kagə yɛmə. 12Ntake ŋkɛ kasəkwə ghə, ma ke: «Shala Mahwətə ta nde sleke ɗa Abraham, yɛhwe yitea menete begeme geva nya le zlama 'ya ɓeshi. Ncɛte ganyɛa ŋa laka nde sleke ɗa Abraham. 13Wa nya 'ya terasle yitea ghwa, katese ŋwalea kwɛa mbeli nyi mbe meleme nya kagə yɛmə. 14Kate'yɛwe 'ya va kwete wəndəa nci kezha vereŋwe wəmbetea nta nde kezha sakɛ yɛmə 'ya. Ma kezhɛnete nde: ‹Sakɛ nda tesa nda 'ya ke zlegweməa lɛməa ŋa perə› ke sha 'ya ne, nahe 'ya keɗepe ghenta yantave na kaŋa nde mene slene ta ŋa Izak. Laka wəsə nya kala nyagha teɗepe 'ya nahe na kencɛte ganyɛa ŋa kaŋa nde sleke ɗa.» 15Ma tewə ŋkɛ kekeɗaŋemte ghena kageze, pɛkwe Rɛbɛka, wəzha ta Betəwɛl nya kawəzege ta Milka, male ta Nahor, wəza meghekɛa Abraham, dzeghwake nda dzeghwa. Wəmbetea nta ya te bazla ve. 16Kadegheli nya ndeɗe nde, degheli nya keghama le za nde. Cape nde kadzawa ghwa shɛ, pa nde viɗikɛ wəmbetea nta ba'a same nda.

17Tereŋe nde mene slene ta Abraham kalə shɛ le hwɛ, ma ke shɛ: «Təhwə təhwə ŋa 'ya, same ɗa yɛmə nya kwa wəmbetea ŋa gi!» 18Ma ke zhɛnete: «Sakɛ nde sleke ɗa yawe.» Pa nde kelakawa wəmbetea shɛ kahe kahe sawa te bazla ba'a ndeke nda kasa ŋkɛ. 19Ma kwa same nda nde, ma ke zhɛkwa: «'Ya kalə kagə nda ke zlegweməa lɛməa ŋa yitea sakɛ hɛ pɛtɛa nci behe behe perə.» 20Pa nde shekeyi nya kwa wəmbetea nta kahe kahe kwa kwambelə kesa yɛmə ta wəshi keseɗa, tereŋe nde te hwɛ kagə yɛmə zhɛkwa, pa nde gəke nda ke pɛtɛa zlegweməa lɛmə. 21Nda vereghe yavereghe ŋkɛ wəndə nyagha le nza bivə. Ma ke mbe ghəa ŋkɛ: «Mahwətə yipəyi ɗa dzeghwa ta ɗa kwa tse na?»

22Ma kwa sahwe yɛmə zlegweməa lɛmə, pa wəndə nyagha ndeke nda ŋgwedɛba mze kwa tere tere nya nza ɗaŋeɗa ta ŋkɛ gare ŋkwaŋe kwa slibə ta bela ta kiləwə ba'a takase nyi le mze kwa tere tere bake nyi ɗaŋeɗa ma ke gwəmsə kwa slibə ta bela ta kiləwə yayata ŋkɛ. 23Ma ke 'yɛwete ve: «Ŋa wa na wəzha wa? Gezete ɗa təhwə təhwə ŋa 'ya. Ŋkwa kehɛ ya shɛ ki ghɛa yiteyɛ ŋa kaŋ'wete 'ya le mbeli nyi kebeghe ɗa tse na?» 24Ma ke shɛ: «Wəzha ta Betəwɛl nya kawəzege ta yɛ Milka le Nahor 'ya.» 25Ma ke shɛ zhɛkwa: «Yɛ zhawa le gwəzəa ŋ'wene ya shɛ ki ghɛa n'yɛ kwele kwele. Ŋkwa kehɛ ya shɛ kaŋa ŋayɛ perə.»

26Gwəɗəŋə wəndə nyagha katsa nda hana ke Mahwətə. 27Ma ke: «Hana 'ya sha Shala ta nde sleke ɗa Abraham, nya kencɛte ganyɛa ŋkɛ nya kaganda laka nde sleke ɗa. Mbe dzeghwa ta ɗa nya pɛtɛ ne, nahe Mahwətə kebegheghe ɗa kadzehwa ka kesaka yiteyɛa nde sleke ɗa.»

28Tereŋe degheli nyagha te hwɛ kalə sha meghekɛ kageze nda wəsə nya kemenete geva. 29Kwete wəza ma ya shɛ va Rɛbɛka, Laban sləa ŋkɛ. Tereŋe Laban te hwɛ kalə sha wəndə nyagha mɛa ghwa. 30Ma kwa nakɛ ŋgwedɛba ba'a yɛ takase ŋkɛ kwa dzeve ve ba'a kwa fate wəzha ta meghekɛ Rɛbɛka ŋkɛ kageze ghena nya gezete nda ŋkɛ ne, cape ŋkɛ kalə sha wəndəa shɛ nya mɛa ghwa le zlegweməa lɛməa ŋkɛ. 31Ma ke Laban shɛ: «Mbara ɓə kalə ghɛa n'yɛ, gha nya wəpikɛ Mahwətə. Yitea wa nza na te ŋwela wa? Nahe 'ya kehite ŋayɛ ŋkwa ki ghɛ ba'a ke zlegweməa lɛməa ŋa.»

32Cape nde mene slene ta Abraham nyagha kadzeki ghɛa Laban, pa ŋkɛ pelemte wəshi sawa te zlegweməa lɛmə. Pa mbeli nta nda zhawa ba'a gwəzə ŋ'wene ke zlegweməa lɛməa shɛhɛ, pa mbeli gəave nda yɛmə ke wəndəa shɛ ba'a ke mbelia ŋkɛ kezha pɛ seɗa ta nci. 33Pa mbeli ndeke nda wəsə kezeme, ama ma ke: «Kazeme wəsə 'ya kaɗema 'ya kegezete ghena nya va 'ya kageze we.» -- «Gezete», ke Laban shɛ. 34Ma ke wəndəa shɛ: «Nde mene slene ta Abraham 'ya. 35Nahe Mahwətə kewəpikɛ nde sleke ɗa kwele kwele. Nahe ŋkɛ kezhɛrenyɛ kande mcɛlə nya wəba, kwa nza ŋkɛ nahe Mahwətə kendeke nda timɛti, kwi, yɛ sla, mze kwa tɛawetɛa ba'a mze kwa tere tere, ka mavashi ba'a kwaterashi, zlegweməa lɛmə ba'a kwara lɛmə. 36Nahe Sara, male ta nde sleke ɗa keyake nda wəzege teza ya kwela nza nde kehale hale. Nahe nde sleke ɗa kefəave nda wəshi nyi ve pɛtɛ ke wəzege shɛ. 37Nahe ŋkɛ kegezete ɗa kazeme fela yitea ɗema 'ya kawəme nda male ke wəzege ta ŋkɛ hwa ka Kanan nya nza ŋkɛ te hɛɗia nci. 38Ma ke sha 'ya: ‹Zemete ɗa fela kezha lə na laka hwelefe ta ɗa, kwa yita ta yiteyɛ ɗa kawəme nda male ke wəzege ta ɗa.› 39Ma 'ya shɛ: ‹Tsema keɗema male shɛ katəkwə təkwə ɗa gɛ?› 40Ma ke zhɛnete ɗa: ‹Ma Mahwətə nya se 'ya kanza kwa kema ta ŋkɛ ne, kateghwene ŋa nde ghwene ta ŋkɛ ba'a katehi dzeghwa ta ŋa ŋkɛ. Katekele nda male na ke wəzege ta ɗa se mbe hwelefe ta ɗa, shave ki ghɛa yiteyɛ ɗa. 41Ma kelə na kadzehwa hwelefe ta ɗa ya gha ŋ'wetema male ne, mba ghena kwa ghəa ŋa we, pələsə na va bezla ta ɗa.› 42Ma ɓeshi kwa ntsehe 'ya yitea ghwa ne, ma 'ya: ‹Shala Mahwətə ta nde sleke ɗa Abraham, yɛhwe yitea hite geva dzeghwa ta ɗa nya ganyɛke. 43Wa nya 'ya terasle yitea ghwa tsetsenya, kate'yɛwe 'ya va degheli nya ketese kagə yɛmə yitea same ɗa yɛmə nde same kwa wəmbetea nta.› 44Ma kezhɛnete nde: ‹Sakɛ nda same nda 'ya ke zlegweməa lɛməa ŋa perə›, a ke sha 'ya ne, nahe 'ya keɗepe ghenta yantave na kaŋa wəzege ta nde sleke ɗa. 45Ma tewə 'ya kekeɗaŋemte ghena kageze mbe ghəa ɗa, pɛkwe Rɛbɛka dzeghwake ɗa dzeghwa le wəmbete te bazla. Cape nde kadzawa ghwa, pa nde gəve yɛmə. Ma 'ya 'yɛwakɛ ve: Same ɗa yɛmə təhwə təhwə ŋa ga. 46Pa nde kelakawa wəmbetea nta kahe kahe sawa te bazla, ma ke sha 'ya: ‹Sakɛ nda same nda 'ya ke zlegweməa lɛməa ŋa perə.› Pa 'ya sakɛ, pa nde same nda ke zlegweməa lɛmə. 47Ma 'ya shɛ: ‹Ŋa wa na wəzha wa?› Ma ke sha 'ya: ‹Wəzha ta Betəwɛl nya kawəzege ta yɛ Milka le Nahor 'ya.› Pa 'ya vame nda ŋgwedɛba mbe ŋshia nta ba'a seɗeyi nda yɛ takase kwa dzeve. 48Gwəɗəŋə 'ya ntiŋə ghə mbe hɛɗi kahawe va Mahwətə. Pa 'ya tsate nda hana ke Mahwətə, Shala ta nde sleke ɗa Abraham kwa begheghe ɗa ŋkɛ tiɗiɗi mbe dzeghwa ta ɗa kadzeki ghɛa wəzha ta wəza meghekɛa nde sleke ɗa. 49Ma tsetsenya ne, gezete ɗa mə kenza nde kaɗe yɛ kanza ganyɛke fate fate laka nde sleke ɗa. Ma keɗema tsagha, gezete ɗa mə nda ɗepe dzeyi 'ya te kwete ŋkwa.»

50Ma ke yɛ Laban le Betəwɛl: «Va Mahwətə se ghena nyi. Ghena shɛ va ghen'yɛ kezha geze e'e keɗema ewə we. 51Wa nya Rɛbɛka nya mbe kema ta ŋa. Kele ŋkɛ, kwiɗi le. Nza nde kamale ta wəzege ta nde sleke ŋa kala nya gezete Mahwətə.» 52Ma kwa fate ghena shɛhɛ nde mene slene ta Abraham ne, gwəɗəŋə ŋkɛ ntiŋə ghə mbe hɛɗi kwa kema ta Mahwətə. 53Kwetere wəmbəa ŋkɛ, pa ŋkɛ fəakame wəshi nyi le mze kwa tɛawetɛa ba'a nyi le mze kwa tere tere, tsagha yɛ lekwesa kafə nda ke Rɛbɛka. Pa ŋkɛ fəave nda wəshi nyi nza zləvə te ke yɛ wəza meghekɛ le meghekɛa wəzha shɛ. 54Pa nde mene slene ta Abraham ba'a mbeli nyi kebeghe ŋkɛ zehwe wəshi kezeme ba'a sahwe wəshi kesa sa, pa hɛ hɛnji tagha.

Te hendɛ ta ŋkwa masheke kwa feɗeghe hɛ ne, ma ke nde mene slene ta Abraham sha wəza meghekɛa wəzha makwa ba'a meghekɛ: «Pelakɛ ɗa mə kalə sha ghɛa nde sleke ɗa.» 55Ma ke hɛ shɛ: «Teməakɛ temə wəzha shɛ le ghen'yɛ kahɛ meŋe, kwetere wəmbəa ŋkɛ, kateslə nde.» 56Ma ke nde mene slenea shɛ sha hɛ: «Derakɛma ɗa yɛ ma. Nahe Mahwətə keyipəyi ɗa dzeghwa ta ɗa kwa tsetsenya, pelakɛ ɗa mə kalə sha ghɛa nde sleke ɗa.» 57Ma ke hɛ: «Hekakɛ ɓəmə wəzha shɛ, shɛ mə fakɛ ghena ve.»

58Pa hɛ hekakɛ Rɛbɛka, ma ke hɛ shɛ: «Kaɗe na kaslə le wəndə nya na?» Ma ke sha hɛ: «E'e!» 59Pa hɛ pelakɛ Rɛbɛka, wəzha ta megheyɛa nci ba'a male nya kenewe ghweme te kaslə le nde mene slene ta Abraham ba'a mbelia ŋkɛ. 60Ma ke mbelia nci wəpikɛ Rɛbɛka:

«Gha gɛ wəzha ta meyɛ n'yɛ, yate ya kala repanja.

Kele hɛɗia ka jaga ta nci hwelefefi nyi ketesawa mbe gha.»

61Tarame yɛ Rɛbɛka le ka kwaterashia nta pelɛ zlegweməa lɛmə katəkwə təkwə nde mene slene ta Abraham, ntəŋə hɛ kwa zəɗə.

62Nahe Izak keslənyɛ mɛa ghwa ta Lahay-Roy. Te hɛɗia Nɛgɛv ŋkɛ le nza mbe vəa shɛ. 63Ma kwa tɛhwɛɗi yipə le pəkwə ta veci ne, cape ŋkɛ kashave kezha nteɗe seɗa ta ŋkɛ hwa gamba, newe ke ne, dəkwə ŋkɛ te zlegweməa lɛmə kase. 64Ma kwa nakɛ Izak Rɛbɛka ne, ɓereme nde sawa nda pelɛ zlegwemə, 65ma ke sha nde mene slene ta Abraham: «Wa wəndə nya keseyi nya hwa gamba sha gheɓəmə wa?» -- «Nde sleke ɗa ŋkɛ», ke wəndəa shɛ shɛ. Te ŋkwa shɛnyɛ, pa nde dəpəte kema ta nta le wəsə nya kənəa ghəa nta. 66Pa nde mene slene nyagha gezete nda wəshi nyi menete ŋkɛ pɛtɛ ke Izak. 67Kwetere wəmbəa ŋkɛ, pa Izak keleghe Rɛbɛka kadzembe cɛ lekwesa nya se Sara nya kameghekɛ mbe. Pa nde zhɛre nda kamale ta ŋkɛ. Pa Izak ɗehwe ŋkɛ ba'a pa nde gweɗakwete nda wənəa ŋkɛ va mte ta meghekɛ.

Currently Selected:

Gha ta Wəshi 24: BEK12

Highlight

Copy