Debtere ba'ad waa ba'ad voo nɔ 9

Zó̧ó̧ tiiní Sól woo nɔ

(Debtere ba'ad waa ba'ad voo nɔ 22:6-16; 26:12-18)

1A̧máa Sól gbɔn ná woo waa duulí ı̵́ 'yɛ́lı̵́ Yesu woo vu̵ dunní kan moo né. Hí̧í̧ bi nɔɔ vu̵ ú̵. La maa ı̵́ nii hȩn ha"ı̵́, 2vigi a pú̵ bi ɗerwəl dɔ́lı̵́ lig sú̵ggı̵́ nán Yúúda voo vu̵lı̵́ kaa Damásdı̵́, moo bi nuŋ nán ku̵u̵ duu hi̧naa Yesu woo máa vu̵ wu̵lı̵́ tée, bi má'a vu̵ yaan Yerúsalemmé, wayée kan wakȩ́ȩ́ vu̵ á̧ḿ.

3Sey Sól ka dɨ sı̵́ laalı̵́ hi̧naa Damásdı̵́, ka séé la bə́' dáŋ́ kaalı̵́ máa, zag zaa pɛ́lı̵́, túlí tóó zu̵u̵ be"ı̵́ za̧y, tú gbɔ kannɔ daa. 4Sól wá̧á̧ zu̵u̵ hágá, ki yɛ́g tóó vigi: “Sól, Sól, moo ȩn mɔ́ duun mí kan moolá?”

5Ma Sól vi: “Ɨ́ 'yɛ́lı̵́ míí, ví nɔ́nná?”

Yɛ́g pee hí̧i̧du̵: “Mí Yesu wu̵, mɔ́ duun míw kan moo yȩ nɔ. 6A̧máa a̧m lúú dɔg, mɔ́ dɔ́ la kaalı̵́, tée vú̵ń o̧m hȩn a̧m kɔ́ máa wu̵lı̵́.”

7Wayée vu̵n sú̵g laa kan Sól á̧ḿ pee vu̵ dii, vu̵ o̧n moo tóó yə̧ŋ dágá aga né. Vu̵ ki yɛ́g yȩ, a̧máa vu̵ ho̧n nán woo né. 8Sól lúú dɔg, kuu nɔ́ɔ́, a̧máa ho̧n sı̵́ nɔ́ɔ́ né sá̧ḿ. Vu̵ teewu̵ dɔ́nna kaa Damásdı̵́. 9Ho̧n nɔ́ɔ́ né, lán hȩn né, zɔn hȩn né á̧ḿ bá' ta̧a̧nɔ́.

10 Waa duulí Yesu woo tóó ká dɨ Damásdı̵́, yéé woo Ananía. Ho̧ hȩn sa̧ga̧. Ɨ́ 'yɛ́lı̵́ vúd maawo̧, beewu̵: “Ananía!”

Ma Ananía hí̧í̧: “Kəə zee.”

11Ɨ́ 'yɛ́lı̵́ o̧ddu̵: “A̧m lúú, mɔ́ duu la hi̧naa ku̵u̵ beewu̵ ‘Líiní’ yȩlȩ́, mɔ́ laa kíi Yúúdas woolı̵́, mɔ́ vi nán kaa Társə tóó du̵u̵lı̵́, yéé woo Sól, dɨd Tayɨɨ moo o̧lȩ́ȩ. 12Sól sú̵u̵ ho̧ hȩn sa̧ga̧ á̧ḿ, ho̧ nán tóó ba yaa biilí, yéé woo ba Ananía, ba ha'ad bi nag yúlí ma bin ho̧ nɔ́ɔ́.”

13Ma Ananía hí̧i̧du̵: “Ɨ́ 'yɛ́lı̵́ míí, nán yȩ, nán ɓu̵u̵lı̵́ na'a vu̵ o̧n moo yúú woolı̵́, kan hȩn ka kɔ́ nán móó vu̵ Yerúsalemmé máa vu̵ á̧ḿ. 14Yaa yɛlı̵́ kan ɗerwəl ka nuŋ gbanaa hȩn ha"ı̵́ voolı̵́ máa dɨ nagá, moo bi má'a nán ku̵u̵ duum máa vu̵ yu̵.”

15A̧máa ı̵́ 'yɛ́lı̵́ o̧ddu̵: “A̧m laa la ú̵, moo mí yeewu̵ sú̵'ú̵. Míń ɓɛ kɔ́ńnɔ ba'ad moo a tú'ud zig nán tóó vu̵ yɛ́g míí, kan gbanii vu̵, kan zig Izraɛ́l á̧ḿ. 16Aga míńnɔ tú'udu̵ hȩn ndɔ́gɔné a nuŋ moo míílí̧ máa 'waapád.”

17Ma Ananía daa laa lig peelı̵́, ha'ad Sól nag yúlí, o̧ddu̵: “Dan sá̧ŋ́ Sól, ı̵́ 'yɛ́lı̵́ Yesu ka vúd maam hi̧naalȩ́ yȩ, wu̵ la been ya moo a̧m ho̧ nɔ́ɔ́e, moo yigid Tayɨɨ woo a dɔ́ hi̧' zó̧ó̧ móólȩ́ á̧ḿ.”

18Vaŋná hȩn tóó vu̵ pee zu̵u̵ Sól woolı̵́ nɔ́lȩ́ kɔ́ ı̵́ fɛ́d ze' wɔgɔ, ma daa ho̧ nɔ́ɔ́. Lúú dɔg, vu̵ woowu̵ mam Tayɨɨ.

19Pig woo máa, lá hȩn, ma néélȩ́ duu yaa fó̧ó̧ woolı̵́.

Sól pa moo Tayɨɨ kaa Damásdı̵́

Sól səə kan waa duulí Yesu woo vu̵ bá' waaná' kaa Damásdı̵́. 20Vaŋná bé' moo Tayɨɨ palı̵́ lig sú̵ggı̵́ nán Yúúda voolı̵́, vud o̧ Yesu máa, ba Waa Tayɨɨ woo nɔ.

21Nán 'waapád ku̵u̵ ki moo woo máa, la' vu̵ la fid, vu̵ vi: “Nán yȩ wu̵ duun nán ku̵u̵ duu yɛ́g Yesu woo máa vu̵ kan moo Yerúsalemmé má nɔ náa? Yaa yɛlı̵́ moo bi má'a vu̵ pa̧n dɔg gbanaa hȩn ha"ı̵́ vu̵ yu̵. Ɨ́ yo̧go̧ pɛ́láa?”

22A̧máa Sól nuŋ woo néélȩ́ tóó, pa moo Tayɨɨ laan tíŋ́ tíŋ́. Nán Yúúda ı̵́ ku̵u̵ mbaa kaa Damásdı̵́, ku̵u̵ ki Sól ka tú' moo Yesu ba wu̵ ı̵́ nán sənné máa, vu̵ gaan hȩn tóó u̵u̵ duu kɔ́n sı̵́ né sá̧ḿ.

23Zá̧ga̧ tóólı̵́ máa, nán Yúúda vu̵ sú̵g mbɔ́g moo, bi nɔɔ Sóllú̵. 24Vu̵ pí̧í̧wo̧ ya̧g dɔ́m dɔ́lı̵́ la kaa voolı̵́ vid kan zá̧ga̧ moo bi nɔɔwo̧ pȩ́ń. A̧máa Sól ki ya̧g talı̵́ voo yȩ. 25Ma waa duulí Sól woo vu̵ paggu̵ ɓaalı̵́ gaŋ ya̧a̧ duun yúú dəəlı̵́, vu̵ siddu̵ zu̵u̵ hágá.

Sól fíí la Yerúsalemmé

26Sól ka ya̧ sı̵́ Yerúsalemmé ú̵ máa, gu̵g laalı̵́ waa duulí Yesu woo voolı̵́, a̧máa dú̵ú̵ kɔ́ vu̵ 'waapád, moo vu̵ taan ba tii sı̵́ waa duulí Yesu woo ú̵ né. 27Ma Baanábas ɓɛ pa̧ŋŋɔ la waa ba'ad Yesu woo voolı̵́. Pá'ad vu̵ moo, o̧ Sól ba ho̧ ı̵́ 'yɛ́lı̵́ hi̧naa Damásdı̵́, kan hȩn ka o̧ddu̵ á̧ḿ. Duu o̧d vu̵ Sól ba pa moo Tayɨɨ kan yɛ́g Yesu woo kan néélȩ́ kaa Damásdı̵́ á̧ḿ. 28Dəŋ sı̵́ bá' yȩlȩ́, Sól mbaa kan vu̵ Yerúsalemmé, dəŋ sı̵́ ba'ad kɔ́lı̵́ kan vu̵ wu̵lı̵́, baa pa moo Tayɨɨ kan yɛ́g ı̵́ 'yɛ́lı̵́ woo kan néélȩ́. 29Baa laa nán Yúúda ı̵́ ku̵u̵ moo ya̧g gɛrɛ́g máa voolı̵́, mbad vu̵ moo, a̧máa ı̵́ voo, vu̵ soowu̵ voo moo bi nɔɔwo̧ ó̧.

30Sey nán sú̵ggı̵́ ku̵u̵ ki moo yȩ máa, vu̵ daa pa̧ŋ Sól laan kaa Sezaréelı̵́ moo a ya̧a̧ laa kaa Társəlı̵́.

31Nán sú̵ggı̵́ hág Yúúdalı̵́ vu̵ nuŋ mbaalı̵́ ká̧'a̧d ya 'waapád kan hág Gálilée kan Samaríi á̧ḿ. Vu̵ 'yɛ́ zó̧ó̧ ı̵́ 'yɛ́lı̵́ woolı̵́, vu̵ kiddu̵ tɔ́g laa tíŋ́ tíŋ́. Yigid Tayɨɨ woo maa vu̵ ba'ad kɔ́lı̵́, ma dúú vu̵ duu há'ay nán sú̵ggı̵́ voolı̵́ ɓu̵u̵lı̵́ na'a á̧ḿ.

Ho̧o̧ ka̧' Eenée

32Sey woolı̵́ Piɛ́r ka 'yȩ́ḿ ya̧ daa hág Yúúdalı̵́ 'waapád máa, zá̧ga̧ tóó máa daa laa nán Tayɨɨ woo voolı̵́ ku̵u̵ dɨ kaa Líídalı̵́. 33Nuŋ wayée tóó wu̵lı̵́, yéé woo Eenée, ká nán kpeeɨ, ká ka̧a̧ mbaa dɨ hágá ve' ka'andaddú̵. 34Ma Piɛ́r o̧ddu̵: “Eenée, Yesu Krístu za̧a̧m sú̵'ú̵. A̧m lúú dɔg, mɔ́ ka píg móó la ú̵.”

Ma Eenée daa lúú dɔg vaŋná.

35Nán ku̵u̵ mbaa kaa Líídalı̵́ kan ı̵́ ku̵u̵ mbaa mbu̵u̵g Sarɔ́ŋŋı̵́, ku̵u̵ ho̧ hȩn yȩ máa, vu̵ tii zó̧ó̧ duu ı̵́ 'yɛ́lı̵́ Yesu.

Dookás níḿ nɔmmé

36Wakȩ́ȩ́ tóó ká dɨ kaa Yu̵péelı̵́, 'yɛ́ zó̧ó̧ woo Tayɨɨ woolı̵́, yéé woo Tabíta. Vu̵ tii beewu̵ “Dookás” ya̧g gɛrɛ́ggı̵́. Yéé woo tú' “Nabu̵u̵g.” Wakȩ́ȩ́ yȩ dii woo də́ń hȩn du̵u̵ wu̵ kɔ́lı̵́ kəd, baa pú̵ nán gíḿ vu̵ hȩn.

37Sey Piɛ́r ka dɨ kaa Líídalı̵́ máa, wakȩ́ȩ́ pee ud ho̧o̧, nɔɔ. Nán vu̵ woowu̵ mam nɔm, vu̵ hu̵u̵ 'yɛ́gɛ lig ı̵́ tóólı̵́ yúba. 38Waa duulí Yesu woo kaa Yu̵péelı̵́ pee vu̵ ki Piɛ́r ba dɨ kaa Líídalı̵́ dáŋ́ Yu̵péelı̵́. Vu̵ ba' la nán vu̵ idú, vu̵ la o̧ddu̵: “Vɔ́ beem a̧m yaa vaŋná, a̧m di̧' sá, vɔ́ dȩm naggɨ.”

39Ma Piɛ́r lúú dɔg, daa laa kan vu̵.

Ku̵u̵ ya̧ la ná' máa, vu̵ pa̧ŋŋɔ ɗaa dɔg lig ı̵́ yúba peelı̵́. Wakȩ́ȩ́ nɔm ká̧né#9:39 wakȩ́ȩ́ nɔm ká̧né nán Yúúda voolı̵́ máa, wakȩ́ȩ́ yɛd vu̵u̵ baa sú̵g lig nɔmmé, vu̵ ká̧ŋ́. vu̵ séé ya tíŋ́ woolı̵́ 'waapád, vu̵ ká̧ŋ́, vu̵ tú'udu̵ sa̧a̧m woo ka va̧a̧ gbɔ máa vu̵. 40Piɛ́r o̧d nán vu̵ u̵u̵ vúd 'waa la pád, ma gu zu̵u̵ doo núug hágá, ɓá' Tayɨɨ.

Pig woolı̵́ máa, tii daa nɔm woolı̵́, beewu̵: “Tabíta, a̧m lúú dɔggú̵.”

Ma nɔm kuu nɔ́ɔ́, ho̧ Piɛ́r, tii mbaa daa hágá. 41Piɛ́r kaga nagá luu dɔg.

Ma béé nán Tayɨɨ woo pee vu̵ kan wakȩ́ȩ́ nɔm ká̧né pee vu̵, dii Tabíta tíŋ́ voolı̵́ zá̧a̧dná. 42Moo woo kiy kaa Yu̵péelı̵́ 'waapád; nán ɓu̵u̵lı̵́ na'a vu̵ 'yɛ́ zó̧ó̧ voo ı̵́ 'yɛ́lı̵́ woolı̵́. 43Piɛ́r səə Yu̵péelı̵́ bá' waaná' nán kó̧ó̧ yu̵u̵né tóó woolı̵́ kíilí, yéé woo Simɔ́ŋ á̧ḿ.

Currently Selected:

Debtere ba'ad waa ba'ad voo nɔ 9: DIINT

Highlight

Copy