Debtere ba'ad waa ba'ad voo nɔ 7
7
Moo moolȩ́ Itȩ́n woo nɔ
1 Ɨ́ nii hȩn ha"ı̵́ vi Itȩ́n: “Moo yȩ́ńna?”
2Ma Itȩ́n o̧: “Nán míí vu̵, ba'á vu̵, i ki sú̵m! Tayɨɨ ı̵́ ka mba hȩn 'waapád na"ȩ́ máa, vúd maa a ba ví yée Ibrahí̧í̧ma sey ka dɨ hág Mezopotamíilí̧ máalȩ́. Pig woolı̵́ máa, Ibrahí̧í̧ma la mbaa hág Haráŋŋı̵́. 3Tayɨɨ o̧ddu̵: ‘A̧m lúú hág móó gbɔ kan nán móó vu̵, mɔ́ laa hág káń tú'um yȩlȩ́.’
4“Ma Ibrahí̧í̧ma lúú hág nán Kaldée voo gbɔ, daa dɔg la mbaa hág Haráŋŋı̵́. Pig nɔm ba' woo woolı̵́ máa, lúú Haráŋŋı̵́. Tayɨɨ daa ɓɛ yaanɔ woo hág kíí mbaa wu̵lı̵́ yɛlı̵́. 5Tayɨɨ ká pú̵nnɔ lá hág dáń woo né, kóó doo lú̵gú̵d dágá aga á̧ḿ pɛ́lı̵́. A̧máa Tayɨɨ taddu̵ ya̧g ba bíń pú̵gu̵ hág yɛ ú̵, zig woo ba vú̵ń mbaa wu̵lı̵́ pig woolı̵́ á̧ḿ, a̧máa Ibrahí̧í̧ma ká kan waa pɛ́lı̵́ á̧ḿ. 6Hȩn Tayɨɨ ka dəŋ vud o̧ddu̵ máa, wu̵ yɛ nɔ: ‘Zig móó vú̵ń mbaa hág tóólı̵́ gááná, vú̵ń tii gba'a, vú̵ń pin vu̵ há̧á̧ ve' tȩmɛre ndaddú̵. 7A̧máa míń sə̧' moo yúú nán ku̵u̵ buu vu̵ yȩ voolı̵́. Pig woolı̵́ tée, vú̵ń vúd hág yȩlȩ́, vú̵ń ya kɔ́n ba'ad hág yɛlı̵́.’ Tayɨɨ o̧ ı̵́ yo̧go̧.
8“Pig woolı̵́ máa, Tayɨɨ duu tad Ibrahí̧í̧ma ya̧g, hȩn ka tú' ya̧g talı̵́ woo yȩ máa, wu̵ do̧ŋ dɔlı̵́ɨ. Ibrahí̧í̧ma ka ha̧a̧ Iizág máa, dɔddu̵ do̧ŋ bá' ka'andaddú̵ woolı̵́ á̧ḿ. Iizág duu dɔd waa woo Yaakúbu do̧ŋ. Yaakúbu duu dɔd aa yée ı̵́ wa̧nɓó' zu̵u̵ idú yȩ vu̵ do̧ŋ á̧ḿ.
9“A ba ví yée vu̵ mood Yu̵u̵séfu sɨg, vu̵ hɨ gbɔgɔ la hág Mísiralı̵́, a̧máa Tayɨɨ ka mbaa kannɔ máa, 10səddu̵ ya hȩn píím yȩ vu̵lı̵́ 'waapád. Duu pú̵gu̵ mɛm to̧o̧, kan moo gaalı̵́, ma gbanii Faarɔ́ŋ ɓɛ 'yɛ́gɛ guvɛrnə́ər hág Mísiralı̵́ kan woolı̵́ kíilí á̧ḿ. 11Go̧o̧m ka yaa hág Mísiralı̵́ kan hág Kanánné 'waapád máa, a ba ví yée vu̵ ho̧n hȩn lálı̵́ né, go̧o̧m woo ká go̧o̧m gbo̧o̧ȩ. 12Sey Yaakúbu ka ki tú̵d ba dɨ hág Mísiralı̵́ máa, dəŋ ba' a ba ví yée vu̵ la wu̵lı̵́. 13Ku̵u̵ ya laa do' idú woo máa, Yu̵u̵séfu tú'ud daa nii vu̵ fó̧ó̧ wu̵lı̵́. Moo woo nɔ Faarɔ́ŋ ki nán Yu̵u̵séfu woo ká vu̵n dɨlı̵́. 14Ma Yu̵u̵séfu ba' la ɓɛ ba' woo Yaakúbu yaan kan nán woo vu̵ 'waapád, vu̵ dɨ fó̧ó̧ vo' gúndɛm zu̵u̵ nɔ́nɔ́. 15Yaakúbu la mbaa hág Mísiralı̵́, há̧á̧ nɔɔ wu̵lı̵́, a ba ví yée vu̵ nɔɔ 'waa wu̵lı̵́ á̧ḿ. 16Vu̵ gaŋ fó̧ó̧ voo vu̵ ya dɔd kaa Sikɛ́mmé yɛlı̵́, bɛ́ɛ́g Ibrahí̧í̧ma woo ká fȩȩ kan sɨɨde nag Emɔ́r waa voolı̵́ Sikɛ́mmé máalȩ́.
17“Bá' ka ya̧ moo Tayɨɨ a kɔ́ hȩn ka tad Ibrahí̧í̧ma ya̧g wu̵lı̵́ pee nɔ máa, zig baa ví vu̵ ha̧a̧ waa ɓu̵u̵ du̵u̵n də́ń né hág Mísiralı̵́. 18Pig woo gbanii 'maŋ tóó ka fȩȩ gbaŋ waa hág Mísiralı̵́ máa, gaan sı̵́ Yu̵u̵séfu né. 19Yá̧ḿ zig baa ví yɛ vu̵, kɔ́d vu̵ hȩn ɓı̵́d, yú vu̵ kɔɔgná, ba u̵u̵ gaŋ waa vu̵ gbóo, u̵u̵ nɔɔ la ú̵. 20Sey woo vu̵ ha̧a̧ Múúsa wu̵lı̵́. Múúsa to̧o̧d Tayɨɨ mbaa ná'. Ku̵u̵ a̧a̧wo̧ sȩȩ ta̧a̧nɔ́ kíi ba"oo woolı̵́ máa, 21vu̵ gaŋŋɔ la gbɔ. Ya ku̵u̵ la gbɔgɔ wu̵lı̵́ yȩ, wakȩ́ȩ́ waa Faarɔ́ŋ woo la gaŋŋɔ wu̵lı̵́, ya yaawu̵. Múúsa na' mbaa kɔ́ ı̵́ waa woo wɔgɔ. 22Pig woo Múúsa kɔ́ zaŋde, kúgú hȩn hág Mísiralı̵́ 'waapád. Mbaa nán hȩn mbalı̵́ kan moo woolı̵́ ya̧gá̧ kan ba'ad woo á̧ḿ.
23“Ve' Múúsa woo ka ya̧ vo' ndaddú̵ máa, hí̧í̧ bi la ho̧ mbaalı̵́ zig bii, Izraɛ́l vu̵ yu̵. 24La maa nán Mísira dɨ nán Izraɛ́l tóó gbɔ́lı̵́ɨ, ma sɨɨwu̵. Ma daa tii nɔɔ nán Mísira pee. 25Múúsa taa zig bii ba vú̵ń ho̧ gaa ú̵, tóó tée ba vú̵ń o̧: ‘Tayɨɨ wú̵ń pú̵ Múúsa néélȩ́ wú̵ń vud vɔ́ zaŋ gba'alı̵́ ú̵,’ a̧máa vu̵ ho̧ gaa né.
26“Ya̧g ka̧'a̧m woo máa, duu kan kan waa Izraɛ́l tóó vu̵ dɨ gbɔ́ńné ya voolı̵́, ma hí̧í̧ bi mbɔ́gɔ́n vu̵ ú̵, o̧d vu̵: ‘Dan gboo vu̵, zig víí dágá náa? Moo ȩn ví gbɔ́ńná?’ 27A̧máa nán ı̵́ ba gbɔ́ daga pee ndaa Múúsa gbɔ la zulí, o̧ddu̵: ‘Nóo 'yɛ́m gbanaa, tóó tée ı̵́ moo sə̧"ȩ́ yúú vóólı̵́lá? 28Mɔ́ hí̧í̧ bi nɔɔn kɔ́ ı̵́ ká bán káḿ nɔɔ nán Mísira pee wɔgaa?’ 29Sey Múúsa ka ki moo yȩ ı̵́ yo̧go̧ máa, daa lúú ɗug la səə mbaa hág Madyáŋŋı̵́. Ma la nuŋ wayée waa vu̵ wu̵lı̵́ idú.
30“Ve' ka ya̧a̧ sı̵́ vo' ndaddú̵ ú̵ máa, Múúsa mbaa hó̧g tíŋ́ dáŋ́ gu̵u̵ Sináyyȩ́. Maleeka tóó vúd maawo̧ vee nɔ́ɔ́ tóó ka ya̧a̧ mbaa kúdugulí máalȩ́. 31Múúsa ka ho̧ vee yȩ máa, kɔ́gɔ la ɓá'. A̧máa ka bi séé la bə́' pȩ́ń bi la ho̧ máa, ki yɛ́g ı̵́ 'yɛ́lı̵́ Tayɨɨ woo o̧ddu̵: 32‘Míi Tayɨɨ am yée gbo̧o̧ voo, Tayɨɨ Ibrahí̧í̧ma woo, kan Iizág kan Yaakúbu voo.’ Múúsa ka ki ná' máa, bé' tu̵u̵lı̵́, kuun nɔ́ɔ́ dɔg yúba né sá̧ḿ. 33Ɨ́ 'yɛ́lı̵́ duu o̧ddu̵: ‘A̧m sid tɛ́gɛ́ móó la ú̵, moo ya káḿ dii wu̵lı̵́ yȩ, ya Tayɨɨ woo nɔ. 34Mí ho̧ hȩn píím zig míí woo hág Mísiralı̵́ sú̵'ú̵, mí ki ndɛlı̵́ woo á̧ḿ, ma mí sí zu̵u̵ moo bi səddu̵ ú̵. A̧m yaa, mí ba'am la hág Mísiralı̵́ 'ya̧'a̧ yɛ nɔ.’
35“Múúsa ı̵́ waa Izraɛ́l ku̵u̵ maga, ku̵u̵ o̧ddu̵: ‘Nóo 'yɛ́m gbanaa, tóó tée ı̵́ moo sə̧"ȩ́ yúú vóólı̵́lá?’ pee, Tayɨɨ ba' wu̵ yu̵ kɔ́ ı̵́ gbanaa wɔgɔ, wu̵ səd vu̵ á̧ḿ. Maleeka ba vúd maawo̧ kúdugu waalı̵́ pee, maawo̧ ba'ad. 36Múúsa sú̵u̵ kɔ́ hȩn zálı̵́ vu̵ kan hȩn sa̧ga̧ vu̵ kə́dkə́d hág Mísiralı̵́, ma vud waa Izraɛ́l vu̵ hág yȩlȩ́, duu pa̧ŋ vu̵ ya̧a̧n mam yȩ́ȩ́lȩ́ kan hó̧g kȩŋŋı̵́ á̧ḿ há̧á̧ ve' vo' ndaddú̵. 37Múúsa sú̵u̵ á̧ḿ, ká wu̵ o̧d waa Izraɛ́l vu̵: ‘Tayɨɨ wú̵ń ba'ad ví anábi tóó kɔ́ ı̵́ mí wɔgɔ zig víí yɛlı̵́.’ 38Múúsa dágá yȩ, ká wu̵ mbaa kan a ba ví yée vu̵ hó̧g kȩŋŋı̵́ kan maleeka á̧ḿ, maleeka ka o̧ddu̵ moo gu̵u̵ Sináyyȩ́ má nɔ, wu̵ nun ba ví moo vágád káákáá Tayɨɨ woolı̵́.
39“Kóó ı̵́ yo̧go̧ si̧', a ba ví yée vu̵ kinnɔ tɔ́g né, vu̵ ma moo woo. Zó̧ó̧ voolı̵́ vu̵ hí̧í̧ bi vȩ́' la hág Mísiralı̵́. 40Moo woo nɔ vu̵ o̧d Múúsa daa nii Harúna: ‘A̧m mbɔ́g tayɨɨ u̵u̵ ɓə́əd ba ví tíŋ́ má nɔ, moo ba gaan ví hȩn ka kɔ́n Múúsa ı̵́ ka vun ba ví ya hág Mísiralı̵́ yȩ né.’ 41Ma vu̵ pɛ do̧' kɔ́ ı̵́ ndaa waa wɔgɔ, vu̵ ha'adu̵ hȩn, vu̵ dȩ' zó̧ó̧ yúú hȩn ku̵u̵ mbɔ́g kan nag voo yȩlȩ́. 42Ku̵u̵ kɔ́ hȩn yȩ máa, Tayɨɨ tiid vu̵ pig, u̵u̵ na' zoo waa vu̵ be"ı̵́ kɔ́ ı̵́ anábi kú̵u̵ bíńda debtere voolı̵́ máa wɔgɔ, o̧:
‘Zig Izraɛ́l vu̵, yee ká ví ha'ad míw hȩn ha"ı̵́ mbee kan hȩn ha"ı̵́ tóó vu̵
ve' vo' ndaddú̵ hó̧g kȩŋŋı̵́ má naa?
43Áá'a. A̧máa ká ví gaŋ lig sa̧a̧m tayɨɨ Mɔlóg woo;
ví gaŋ fóto Refáŋ, tayɨɨ zu̵u̵ víí woo.
Tayɨɨ lee yȩ vu̵, ká ví mbɔ́g vu̵ moo bi na' vu̵ ú̵.
Moo woo nɔ, míń pa̧ŋ ví laan ya ɗiilílí, há̧á̧ pig hág Baabilónné zulí.’
44“Hó̧g kȩŋŋı̵́ máa, a ba ví yée ká vu̵ dɨ kan lig ku̵u̵ 'yɛ́ aluwa ya̧g talı̵́ Tayɨɨ woo wu̵lı̵́ máa á̧ḿ. Vu̵ mbɔ́ggu̵ kɔ́ ı̵́ fóto Tayɨɨ ká tú'ud Múúsa máa wɔgɔ. 45A ba ví yée vu̵ pú̵ lig yȩ waa voolı̵́ kan Yuusúwa. Pig woo Tayɨɨ nɛŋ zig tóó vu̵ luu hág yɛlı̵́. A ba ví yée vu̵ kan Yuusúwa vu̵ fȩȩ hág yɛ, vu̵ gaŋ lig yȩ pa̧ŋ ya wu̵lı̵́. Lig yȩ mbaa há̧á̧ ya̧ ve' Daavíd woolı̵́. 46Daavíd ku̵u̵ to̧n kan Tayɨɨ máa, hí̧í̧ bi yo̧o̧du̵ lig hág Izraɛ́llı̵́ á̧ḿ. 47A̧máa Súlemáánu wu̵ yo̧o̧d Tayɨɨ lig.
48“A̧máa Tayɨɨ ı̵́ be"ı̵́ mbaan woo lig nán ku̵u̵ yo̧o̧n kan nag máalȩ́ né. Ya̧g anábi tóó woolı̵́, 49Tayɨɨ o̧:
‘Be' máa, láan míí nu.
Hág máa, ya doo diiní míí nu.
Lig woo ȩn víń yo̧o̧ná?
Míń nəə ka' woo tɛ́lá?
50Míi mbɔ́gɔn hȩn yȩ vu̵ 'waapád náa?’
51“Ɨ́ víí, nán ki tɔ́g sá yȩ víw, ví mbaa mbaalı̵́ nán gaa Tayɨɨ sá voo nɔ. Ví há' zó̧ó̧ víí bi kin Tayɨɨ tɔ́g né sá̧ḿ. Ví baa nda doo bi kɔ́ ya̧g kan yigid Tayɨɨ woo kɔ́ ı̵́ a ví yée vu̵ wɔgɔ á̧ḿ. 52A ví yée kú̵u̵ duun anábi tóó vu̵ kan moo; vu̵ nɔɔ nán ı̵́ ku̵u̵ moo moo yaalı̵́ ı̵́ to̧o̧g Tayɨɨ woo yȩ máa vu̵. Ma 'ya̧'a̧ yɛ ví duu moo moo vbád yúú woolı̵́, ví nɔɔwo̧ sú̵'ú̵. 53Ɨ́ kíí nuŋ dooká Tayɨɨ woo maleeka woolı̵́ pee, ví duun sı̵́ moo woo né á̧ḿ.”
Nɔm Itȩ́n woo nɔ
54 Ɨ́ nii moo sə̧"ȩ́ pee ku̵u̵ ki la moo yȩ ná' máa, vu̵ kɔ́ zó̧ó̧ yȩ́ȩ́, vu̵ sə́ŋ́ nú' laan Itȩ́n woolı̵́. 55A̧máa ı̵́ woo, yigid Tayɨɨ woo ka hi̧' woolı̵́ máa, tə́g dɔg nɔ́ɔ́ be"ı̵́, ho̧ gáálı̵́ Tayɨɨ woo, ho̧ Yesu dii mbaa nag nán Tayɨɨ woolı̵́ á̧ḿ. 56Ma Itȩ́n o̧: “I ki lée, mí ho̧ be' tú̵'ú̵, ma ı̵́ Tayɨɨ ka ba"u̵ ya yɛ dii mbaa dɨ nag nán woolı̵́.”
57 Ɨ́ nii moo sə̧"ȩ́ pee ku̵u̵ ki moo woo máa, vu̵ wá̧á̧ wa̧ya̧g, vu̵ yú tɔ́g voo vu̵, vu̵ zə'əy laa Itȩ́n woolı̵́ 'waapád. 58Vu̵ woowu̵ laan kaa pigim, vu̵ gbóowu̵ kan 'yɛgɛ nɔɔ wu̵lı̵́. Nán ya̧g du̵lı̵́ vu̵ sid sa̧a̧m voo, vu̵ gbɔd náásaa waa tóó yéé woo Sól.
59Sey ku̵u̵ dɨ Itȩ́n nɔɔné máa, Itȩ́n o̧d Tayɨɨ moo yɛ: “Ɨ́ 'yɛ́lı̵́ míí, Yesu, a̧m ɓɛnnɔ́.”
60Pig woolı̵́ máa, gu zu̵u̵ doo núug hágá, o̧ dɔg moo yúba, o̧: “Ɨ́ 'yɛ́lı̵́ míí, a̧m ho̧ hȩn ɓı̵́d voo yȩ sá.”
Sey ka moo moo yȩ máa, nɔɔ wu̵lı̵́.
Currently Selected:
Debtere ba'ad waa ba'ad voo nɔ 7: DIINT
Highlight
Share
Copy
Want to have your highlights saved across all your devices? Sign up or sign in
Nouveau Testament en Dii © Bible Society of Cameroon, 2001.
