Debtere ba'ad waa ba'ad voo nɔ 12
12
Vu̵ nɔɔ Yaakúbu, vu̵ ma' Piɛ́r dɔd lig púúsinalȩ́
1Sey woo gbanaa Heeród#12:1 Heeród Ɨ́ yɛ Heeród Agrípa dágá woo nɔ; i duu záŋ́ga moo təəlı̵́ vu̵lı̵́ á̧ḿ. bé' nán sú̵ggı̵́ tóó vu̵ dunní kan moo. 2Nɔɔ Yaakúbu Yoohá̧na daa nii kan pag naa.
3Ka ho̧ hȩn woo ka to̧o̧d nán Yúúda vu̵ na'a máa, duu ma' Piɛ́r, sey woo ká zá̧ga̧ mam vúnní 'yɛ́ wág sáɨ.
4Ka ma' Piɛ́r máa, tú̵"u̵ lig púúsinalȩ́, gbɔd hú' tóó vu̵ ndaddú̵, ká hú' só̧ó̧ze vu̵ yu̵, vu̵ baa pínnɔ tu̵lı̵́, fó̧ó̧ ndaddú̵ ndaddú̵. Heeród taa Páska a ya̧a̧ tée, bi pa̧ŋ Piɛ́r yaan ya moo sə̧"ȩ́lȩ́ dúú voolı̵́ tíŋ́. 5Só̧ó̧ze pee vu̵ tu̵ Piɛ́r mbaa voo lig púúsinalȩ́ wu̵lı̵́, a̧máa nán sú̵ggı̵́ vu̵ pin voo Tayɨɨ kan moo o̧lȩ́ yu̵yu̵u̵yu̵g.
Maleeka tóó vud Piɛ́r lig púúsinalȩ́
6Yɔ́gɔ́ Heeród kan pa̧ŋ Piɛ́r laan sı̵́ tíŋ́ dúú voolı̵́ ú̵ máa, vid woo Piɛ́r dɨ nəm sa̧a̧m só̧ó̧ze idú voolı̵́. Vu̵ ga"u̵ kan ɗág idú, só̧ó̧ze tóó vu̵ dii mbaa voo ya diilí voolı̵́, ya̧g dɔ́mmé. 7Vaŋná maleeka ı̵́ 'yɛ́lı̵́ woo gbɔ vúd ya, ya tú la lig púúsinalȩ́ za̧y. Maleeka za' zu̵u̵ Piɛ́r ka' waagı̵́, nimmɔ dɔg, o̧ddu̵: “A̧m lúú dɔg vaŋná.”
Vaŋná ɗág woolı̵́ nagá pee vu̵ yo̧ŋ zu̵u̵. 8Maleeka o̧ddu̵: “A̧m ta kandá móó, mɔ́ dɔd tɛ́gɛ́ móó á̧ḿ.”
Piɛ́r ka kɔ́ hȩn yȩ vu̵ 'waa máa, maleeka duu o̧ddu̵: “A̧m dɔ́ sa̧a̧m móó, mɔ́ duun ya ú̵.”
9Ma Piɛ́r vúd ya lig púúsinalȩ́ duu maleeka pee. Taan woo hȩn maleeka ka kɔ́ yȩ ba hȩn yȩ́ńne né, o̧ woo ba bin nə́d nə́nnée. 10Vu̵ dəŋ ya̧a̧ ya diilí só̧ó̧ze voo dágá, vu̵ duu la ı̵́ idú woolı̵́, vu̵ la ya̧ ya̧g dɔ́m ka vúd la kaalı̵́ máalȩ́. A̧máa vu̵ tú̵' kan hɨɨɨ. Ya̧g dɔ́m pee aga tú̵'ú̵ kan fó̧ó̧ woo, ma vu̵ vúd. Vu̵ ka hi̧naa tóó duu, ma maleeka pee há̧á̧ tigi zu̵u̵ vbı̵́d.
11Piɛ́r ka duu taa hȩn yȩ máa, o̧: “'Ya̧'a̧ yɛ máa, mí ho̧ hȩn yɛ sı̵́ moo yȩ́ńne. Ɨ́ 'yɛ́lı̵́ Yesu wu̵ ba' maleeka woo yaan moo a ya sən nag Heeród woo yɛlı̵́, kan hȩn si̧'i̧ní zig nán Yúúda woo ka hí̧í̧ bi si̧'i̧n yɛlı̵́ á̧ḿ.”
12Piɛ́r ka gaa sı̵́ mbaalı̵́ woo du̵u̵ na'a ú̵ máa, daa laa lig Maaríi woolı̵́, Yoohá̧na ı̵́ ku̵u̵ beewu̵ Márkus máa na' woo nɔ; nán ɓu̵u̵lı̵́ na'a ká vu̵ dɨ sú̵ggı̵́ wu̵lı̵́, vu̵ dɨd Tayɨɨ moo o̧lȩ́ȩ. 13Piɛ́r wa̧a̧ hȩn ya̧g dɔ́mmé. Wakȩ́ȩ́ ba'ad tóó yéé woo Róódə, yaa bi ki ba nɔ́nná.
14Sey ka ki yɛ́g Piɛ́r woo gaa máa, zó̧ó̧ dȩ"o̧, ma ya a tu̵'u̵ dɔ́mme máa pɛ́lı̵́, tii kɛ ɗug vȩ́' la o̧d nán vu̵: “Piɛ́r dɨ dɔ́mmé!”
15A̧máa vu̵ haawu̵: “Mɔ́ ya̧ŋŋɨ.”
Duu faa o̧: “Moo yȩ́ńne.”
Ma nán pee vu̵ duu o̧ voo: “Wú̵ń yigid woo nɔ.”
16A̧máa Piɛ́r dɨ woo hȩn wa̧a̧lȩ́ wu̵lı̵́. Vu̵ ya tu̵'u̵ la ya̧g dɔ́m ná', ma vu̵ ho̧go̧ sı̵́ yɔ, kɔ́ vu̵ la hígigi. 17A̧máa Piɛ́r gbɔd vu̵ nag ba u̵u̵ mbaa simná, pá'ad vu̵ hȩn ı̵́ 'yɛ́lı̵́ ka kɔ́ ma ka vuddu̵ lig púúsinalȩ́ yȩ. Duu o̧d vu̵: “Tée i o̧d Yaakúbu#12:17 Yaakúbu Ɨ́ 'yɛ́lı̵́ Yesu daa sá̧ŋ́ŋɨ. kan da ba ví kirtȩ́n tóó vu̵ á̧ḿ.”
Pig woo máa, daa lúú ka la ya tóólı̵́.
18Ya̧g ka̧'a̧m ka tú sú̵'ú̵ máa, só̧ó̧ze vu̵ kɔ́ moo gbo̧o̧ ba'a ya voolı̵́, vu̵ víń: “Yee Piɛ́r dəŋ née ka vúd yɛlá?”
19 Heeród ka ba' nán vu̵ máa, vu̵ soowu̵, a̧máa vu̵ nugunɔ sı̵́ né. Vu̵ la ví só̧ó̧ze pee vu̵ moo, ma Heeród o̧ ba u̵u̵ la nɔɔ vu̵ ú̵.
Pig woolı̵́ máa, Heeród lúú hág Yúúdalı̵́, daa zu̵u̵ kaa Sezaréelı̵́, la səə wu̵lı̵́ bá' waaná'.
Nɔm Heeród woo nɔ
20 Heeród ká kɔ́d nán Tír vu̵ zó̧ó̧ yȩ́ȩ́ kan nán Sidɔ́ŋ vu̵ á̧ḿ. Ma nán yȩ vu̵ mbɔ́g moo ya voolı̵́ moo bi laa Heeród woolı̵́. Vu̵ pa̧ŋ moo woo la maan Balás, ı̵́ nii só̧ó̧ze ká mbaa dii ya̧gníim gbanaa woolı̵́ má nɔ. Ma vu̵ la soo to̧o̧g gbanaa voolı̵́, moo vu̵ baa nuŋ hȩn lálı̵́ hág Heeród woolı̵́.
21Ku̵u̵ 'yɛ́ zá̧ga̧ moo mbɔ́ggı̵́ woo máa, zá̧ga̧ woo Heeród ɓɛ sa̧a̧m gbaŋ woo dɔ́. Ɗáá mbaa láan woolı̵́, mbad vu̵ moo la zo"ı̵́.
22Dúú ku̵u̵ ki máa, vu̵ moo dɔg moo yúba, vu̵ o̧: “Yɛ́g yȩ, yɛ́g nánánne pɛ́lı̵́, a̧máa Tayɨɨɨ.”
23Ma maleeka ı̵́ 'yɛ́lı̵́ woo ba' ga'ad tóó ya nɔŋ Heeród silí, ma nɔɔ daa, moo ka ɓɛ na"ȩ́ Tayɨɨ woo 'yɛ́ fó̧ó̧ woolı̵́ má nɔ.
24A̧máa moo Tayɨɨ dɨ woo kiyní laa tíŋ́ tíŋ́.
25Sey Baanábas ku̵u̵ 'waa ba'ad voo kan Sól Yerúsalemmé sú̵'ú̵ máa, vu̵ vȩ́' la ya̧g ba'ad voolı̵́, vu̵ ɓɛ Yoohá̧na ı̵́ ku̵u̵ beewu̵ Márkus máa laan kan vu̵ á̧ḿ.
Currently Selected:
Debtere ba'ad waa ba'ad voo nɔ 12: DIINT
Highlight
Share
Copy
Want to have your highlights saved across all your devices? Sign up or sign in
Nouveau Testament en Dii © Bible Society of Cameroon, 2001.
