Debtere ba'ad waa ba'ad voo nɔ 10
10
Piɛ́r vu̵ kan Kornéyyú̵
1Nán tóó ká dɨ kaa Sezaréelı̵́, yéé woo Kornéy. Ká ı̵́ nii hú' só̧ó̧ze nán Róma voo tóó ku̵u̵ beewu̵ só̧ó̧ze Italíi má nɔ. 2Nán yȩ, ká nán Tayɨɨ duulíi. 'Yɛ́ zó̧ó̧ woo Tayɨɨ woolı̵́, kan nán woolı̵́ kíilí vu̵ á̧ḿ. Baa pú̵ nán gíḿ zig Yúúdalı̵́ vu̵ hȩn, baa o̧d Tayɨɨ moo zá̧ga̧ 'waapád á̧ḿ.
3Mɛn tóólı̵́ zamndi ta̧a̧nɔ́ máa, ho̧ hȩn sa̧ga̧ tóó, ho̧ maleeka Tayɨɨ woo dɔ́ ya woolı̵́, ho̧go̧ kan nɔ́ɔ́ woo zu̵u̵ pə́lə́lə́, ma maleeka beewu̵: “Kornéy!”
4Sey Kornéy ka ho̧go̧ máa, dú̵ú̵ kɔ́gɔ, o̧d maleeka: “Ba'á, ví yaa ɓəə míílí̧ máalá̧!”
Maleeka hí̧i̧du̵: “Tayɨɨ ki moo káḿ o̧ddu̵ yȩ, ho̧ hȩn káḿ baa pú̵ nán gíḿ vu̵ yȩ á̧ḿ, ma duu taam wu̵lı̵́. 5'Ya̧'a̧ yɛ máa, a̧m ba' la nán tóó vu̵ kaa Yu̵péelı̵́, u̵u̵ beem nán tóó, yéé woo Simɔ́ŋ, vu̵ beewu̵ Piɛ́r á̧ḿ. 6Dɔ́ dɨ nán kó̧ó̧ yu̵u̵né tóó woolı̵́, yéé woo Simɔ́ŋ á̧ḿ. Kíi woo dɨ ya̧g mam gbo̧o̧lȩ́.”
7 Maleeka ka o̧ddu̵ moo 'waa, ka daa lúú máa, Kornéy bee ya nán ba'ad woo vu̵ idú, kan só̧ó̧ze tóó ı̵́ ka baa tu̵gu̵ máa. Só̧ó̧ze sú̵u̵ ká nán Tayɨɨ duulíi á̧ḿ. 8Kornéy pá'ad vu̵ moo yȩ 'waapád, ma ba' vu̵ la kaa Yu̵péelı̵́.
9Ya̧g ka̧'a̧mé máa, waa ba'ad pee vu̵ dɨ lá hi̧naalȩ́.
Ku̵u̵ séé la bə́' dáŋ́ kaa Yu̵péelı̵́ máa, Piɛ́r ɗáá dɔg dɨ woo lig ı̵́ yúba máalȩ́ zá̧ga̧ sa̧a̧mé, moo bi o̧d Tayɨɨ mooɨ. 10Ma go̧o̧m ya̧ga̧, hí̧í̧ hȩn lálı̵́ɨ.
Sey ku̵u̵ dɨddu̵ hȩn lálı̵́ dəəlı̵́ máa, Piɛ́r ho̧ hȩn sa̧ga̧ tóó. 11Ho̧ be' tú̵'ú̵, ma hȩn tóó sí zu̵u̵ wu̵lı̵́ kɔ́ ı̵́ píg gbo̧o̧ tóó wɔgɔ, baa sí zu̵u̵ hágá, vu̵ tíddu̵ ka' ndaddú̵ á̧ḿ. 12Hȩn doo ndaddú̵ ndaddú̵ vu̵ kə́dkə́d vu̵ dɨ tíŋ́ woolı̵́, kan hȩn ı̵́ ku̵u̵ wóó hágá máa vu̵ kə́dkə́d, kan nɔ́g waa tóó vu̵ kə́dkə́d 'waapád, vu̵ du̵u̵lı̵́.
13Pig woo máa, yɛ́g tóó o̧ddu̵: “Piɛ́r, a̧m lúú dɔg mɔ́ ma' tóó dágá, mɔ́ sə̧', mɔ́ lá la ú̵.”
14A̧máa Piɛ́r hí̧i̧du̵: “Áá'a, ı̵́ 'yɛ́lı̵́ míí! Hȩn kı̵́b míí vu̵u̵ yȩ nɔ. Mí lán hȩn ı̵́ yo̧go̧ né.”
15Yɛ́g pee duu o̧ddu̵ zu̵u̵: “Hȩn Tayɨɨ ka o̧ ba dȩ' sú̵'ú̵ máa, a̧m ho̧ vu̵ móó hȩn kı̵́b sá.”
16Hȩn yȩ kɔ́y do' ta̧a̧nɔ́, ma píg gbo̧o̧ pee daa ɗáá vȩ́' dɔg be"ı̵́.
17Ma Piɛ́r víń moo zó̧ó̧ woolı̵́ o̧ hȩn sa̧ga̧ yȩ, yúú woo ban vúd nɛ́nná?
A̧máa sey ka dɨ moo yȩ taalı̵́ máa, nán Kornéy ba ba' vu̵ pee, vu̵ baa vi lig Simɔ́ŋ woo, vu̵ ya̧ ya sı̵́ ya̧g dɔ́mmé ó̧. 18Vu̵ moo dɔg moo yúba, vu̵ vi: “Simɔ́ŋ ı̵́ ku̵u̵ beewu̵ Piɛ́r á̧ḿ máa, dɔ́ dɨ yɛláa?”
19Piɛ́r ka dɨ lá woo moo hȩn sa̧ga̧ pee taalı̵́ máa, yigid Tayɨɨ woo o̧ddu̵: “A̧m ki lée! Nán vu̵ ta̧a̧nɔ́ vu̵ dɨm soolı̵́ɨ. 20A̧m lúú dɔg yúba, mɔ́ sí zu̵u̵, mɔ́ ká̧ŋ́ laalı̵́ kan vu̵ á̧ḿ, moo míi ba' vu̵.”
21Piɛ́r ka sí zu̵u̵ nán pee voolı̵́ máa, vi vu̵: “Nán kíí soo yɛ, wu̵ míw. Ví yaa ȩná?”
22Ma vu̵ hí̧i̧du̵: “Ɨ́ nii só̧ó̧ze Kornéy wu̵ ba' vɔ́ ya. Kornéy sú̵u̵ kɔ́ hȩn hí̧í̧lí̧ Tayɨɨ woo ú̵, 'yɛ́ zó̧ó̧ woo Tayɨɨ woolı̵́ á̧ḿ. Nán Yúúda vu̵ 'waapád vu̵ o̧ hȩn du̵u̵ yúú woolı̵́ á̧ḿ. Ma maleeka Tayɨɨ woo o̧ddu̵ ba a ya beem laan woolı̵́, moo bi ki moo káḿ hí̧í̧ bi o̧ddu̵ má nɔ.”
23Ma Piɛ́r dɔd vu̵ la ligí, pú̵ vu̵ ya úud.
Ya̧g ka̧'a̧mé máa, daa laa kan vu̵. Nán sú̵ggı̵́ tóó vu̵ kaa Yu̵péelı̵́, vu̵ ba"u̵ la.
24Yɔ́gɔ́ woo máa, vu̵ ya̧ la kaa Sezaréelı̵́. Kornéy vu̵ kan nán woo vu̵ kan daga gboo ı̵́ ku̵u̵ to̧n na'a, ka béé vu̵ máa vu̵, vu̵ laa Piɛ́r.
25Sey Piɛ́r ka bi dɔ́ la wu̵lı̵́ máa, Kornéy vúd ya, kan kan vu̵, nə'əy zu̵u̵ hágá tíŋ́ Piɛ́r woolı̵́. 26A̧máa Piɛ́r kaga luu dɔg, o̧ddu̵: “A̧m lúú dɔggú̵. Mí nánánne á̧ḿ.”
27Ma vu̵ mba moo kan Kornéy, vu̵ sú̵g dɔ́ la ligí á̧ḿ. Piɛ́r la nuŋ nán pee vu̵ ɓu̵u̵lı̵́ na'a, vu̵ sú̵g mbaa wu̵lı̵́, 28ma o̧d vu̵: “Ví gaa ú̵, Tayɨɨ nán Yúúda voo há' nán Yúúda vu̵ mbaalı̵́ kan zig nán tóó vu̵ ú̵, há' vu̵ dɔ́lı̵́ lig voolı̵́ á̧ḿ. A̧máa Tayɨɨ tú'un míí ba a̧n ho̧ nánán tóó vu̵ kɔ́ ı̵́ hȩn kı̵́b, kóó hȩn ka dȩ'ȩ né máa wɔgɔ sá. 29Moo woo nɔ, kíí been ya máa, mí ká̧ŋ́ yaalı̵́ɨ. A̧máa mí hí̧í̧ bi gaa hȩn kíí been ya moo woo má nɔ.”
30Kornéy hí̧i̧du̵, o̧: “'Ya̧'a̧ yɛ máa, kɔ́ sı̵́ bá' ta̧a̧nɔ́ ó̧, mí dɨd Tayɨɨ moo o̧lȩ́ míílí̧ kíilí, mɛnné ı̵́ yɔgɔ, zamndi ta̧a̧nɔ́ woolı̵́. Ma nán tóó ya dii tíŋ́ míílí̧, sa̧a̧m woo gáá mbaa wəŋ. 31Nán yȩ o̧n: ‘Kornéy, Tayɨɨ ki moo káḿ o̧ddu̵ yȩ ó̧. Taa hȩn káḿ kɔ́d nán gíḿ vu̵ á̧ḿ. 32A̧m ba' la bee ya Simɔ́ŋ ı̵́ ku̵u̵ beewu̵ Piɛ́r máa á̧ḿ, kaa Yu̵péelı̵́. Dɔ́ dɨ kíi Simɔ́ŋ nán kó̧ó̧ yu̵u̵né woolı̵́; kíi woo dɨ ya̧g mam gbo̧o̧lȩ́.’ 33Ma káń há̧á̧ ba' la nán vu̵ u̵u̵ la beemɔ́, káḿ man né á̧ḿ yɛ nɔ. 'Ya̧'a̧ yɛ máa, ya vóó 'waapád, vɔ́ dɨ tíŋ́ Tayɨɨ woolı̵́ moo bi ki moo ı̵́ 'yɛ́lı̵́ ka ba'am ya a̧m o̧ má nɔ.”
Moo Piɛ́r ka o̧ kíi Kornéy woolı̵́ má nɔ
34Ma Piɛ́r ka moo o̧: “'Ya̧'a̧ yɛ máa, mí ho̧ moo yȩ́ńná, Tayɨɨ səgən nánán vu̵ né. 35Nán 'waapád, kóó a zig woo tɛ́lá, a duu Tayɨɨ, a kɔ́ hȩn hí̧í̧lí̧ woo tée, to̧o̧d Tayɨɨ sú̵'ú̵. 36Ví gaa moo to̧o̧ 'maŋ Tayɨɨ ka ba'ad zig Izraɛ́l vu̵ máa ó̧. Tayɨɨ o̧d ba ví ban nuŋ ví to̧nné kan bi sú̵'ú̵. Yesu Krístu ı̵́ 'yɛ́lı̵́ nánán voo 'waapád, pú̵ ba ví to̧nné yȩ sú̵'ú̵. 37Sey Yoohá̧na ka moo moo, ka woo nánán vu̵ mam Tayɨɨ á̧ḿ máa, ví gaa hȩn ka ya̧a̧ hág Gáliléelı̵́ ú̵, ka duu kɔ́y hág Yúúdalı̵́ á̧ḿ 'waapáddú̵. 38Ví gaa Tayɨɨ ba' néélȩ́ yigid woo Yesu nán Naazaréd woolı̵́, ma Yesu baa 'yȩ́ḿ ya̧a̧ daa hág woo 'waapád, kɔ́ hȩn du̵u̵ vu̵, baa za̧a̧ nán ı̵́ Seeɗán ka fígi vu̵ máa vu̵, moo Tayɨɨ ká mbaa kan Yesu ı̵́ yo̧go̧. 39Hȩn ka kɔ́ hág Yúúdalı̵́ kan Yerúsalemmé 'waapád yȩ, vɔ́ ho̧ kan nɔ́ɔ́ vóó á̧ḿ. Pig woo máa, vu̵ ga"u̵ la' vbagadı̵́, vu̵ nɔɔwo̧. 40A̧máa bá' idú, ta̧a̧nɔ́ woo máa, Tayɨɨ nim Yesu nɔmmé, ma duu hí̧í̧ Yesu a tú' fó̧ó̧ woo á̧ḿ. 41A̧máa tú'un zig yȩ vu̵ 'waapád né. Ɨ́ vóó, Tayɨɨ ka yee vɔ́ yɛ, Tayɨɨ tú'ud vɔ́ Yesu, moo oo du̵ ya̧g yúú woolı̵́. Pig Tayɨɨ ka nimmɔ nɔmmé máa, vɔ́ sú̵g lá hȩn, vɔ́ zɔ hȩn kannɔ á̧ḿ. 42Yesu o̧d vɔ́ oo la pad nán Yúúda vu̵ moo to̧o̧ 'maŋ, oo o̧d vu̵ ba bin nán Tayɨɨ ba ka 'yɛ́gɛ moo a sə̧' moo yúú nán zá̧a̧d voolı̵́ kan ı̵́ nɔm vu̵ má nɔ. 43Anábi vu̵ 'waapád vu̵ o̧ moo yúú woolı̵́ sú̵'ú̵ á̧ḿ. Vu̵ o̧ nán 'waapád ba u̵u̵ 'yɛ́ zó̧ó̧ Yesu woolı̵́ tée, Tayɨɨ ban kéé hȩn ɓı̵́d voo gbɔ, kan yɛ́g Yesu woo nɔ.”
Nán ı̵́ tóó ku̵u̵ nán Yúúda pɛ́lı̵́ máa, vu̵ nuŋ yigid Tayɨɨ woo á̧ḿ
44Piɛ́r ka dɨ lá moo moolȩ́ máa, yigid Tayɨɨ woo sí zu̵u̵, dɔ́ nán ku̵u̵ ki moo yȩ voolı̵́ 'waapád.
45Nán sú̵ggı̵́ ı̵́ zig Yúúda vu̵n yaa kan Piɛ́r á̧ḿ pee, ku̵u̵ ho̧ Tayɨɨ ka ba'ad zig ı̵́ tóó yȩ vu̵ yigid woo á̧ḿ máa, la' vu̵ la fid. 46Nán vu̵ ki nánán Kornéy woo vu̵ moo ya̧g ı̵́ ku̵u̵ moo ná see né máa á̧ḿ, vu̵ na' hȩn gbo̧o̧ kɔ́lı̵́ Tayɨɨ woo yȩ.
Pig Piɛ́r ka ho̧ ná' máa, o̧: 47“Nán yɛ vu̵ nuŋ sı̵́ yigid Tayɨɨ woo kɔ́ ı̵́ ba ví wɔgɔ á̧ḿ. Nán tóó wú̵ń duu há' vu̵ mam Tayɨɨ woolı̵́ áa?”
48Ma Piɛ́r o̧d vu̵ u̵u̵ woo vu̵ mam Tayɨɨ kan yɛ́g Yesu Krístu woo la ú̵.
Pig woo máa, nán yȩ vu̵ vi Piɛ́r a səə kan bi bá' waaná' pȩ́ń.
Currently Selected:
Debtere ba'ad waa ba'ad voo nɔ 10: DIINT
Highlight
Share
Copy
Want to have your highlights saved across all your devices? Sign up or sign in
Nouveau Testament en Dii © Bible Society of Cameroon, 2001.
