Marcos 4
4
Qaÿaloqnaxana ca danaxaatac
(Mateo 13.1-9; Lucas 8.4-8)
1So Jesús qaltaq huetaxaama na loigue aso lapel da dapaxaguenataxaatac, nachi ÿataqta qalota so anac shiÿaxauapi da anaÿa somayi. Qaq co'ollaq ÿapacteec da qalota somayipi, nachi somayi huenojñigui aso barco mayi neto'ot na loigue aso lapel, qaq 'enauac so shiÿaxauapi hueto'ot so loigue. 2Nachi somayi ÿataqta qalota na dapaxaguenataxanec, ÿauota'a na laloqnaxanaxatpi, 'eeta':
3–Ña qan'axaÿaxañiÿa da sa'axat, 'eeta': Huo'o so shiÿaxaua jec da danaxan. 4Qaq co'ollaq mashi danaxaatac, nachi huo'o aso languishi ala tajlec so nqa'aic, nachi anac na qoÿopi, nachi chic. 5Qaq aso lÿa languishi tajlec so 'alhua mayi ÿalliigui na coma', qaq asomayi saqaÿaloq da ñaxat, cha'ayi na 'alhua sa qaÿañi. 6Qalaxayi co'ollaq nnoxooshiguem aso nala', nachi asomayi ÿavic, cha'ayi souaxat da sa qaÿangui na lpa'a'q. 7Qataq aso lÿa languishi tajlec so 'alhua mayi lesat, qaq asa'aso ÿaxat ÿataqta sa nlauashiguemgue da lañaxataxa, nachi asomayi ÿataqta ÿapolec asa'aso nanguishi, nachi sa ishit da huo'o naq'en aca ala. 8Qataq aso lÿa languishi tajlec so 'alhua mayi ÿataqta 'onaxaic, nachi asomayi ñaxat, ÿataqta no'on da lañaxataxa. Nachi huo'o ana ivi' ana treinta ana alapi añi 'oonole, qataq huo'o ana ivi' sesenta, qataq cien.
9Nachi so Jesús 'enapeco':
–Ca ÿaÿaten da n'axaÿaxanaxac, qaq no'on da n'axaÿaxaachiguiñi.
Da 'eetec da huo'o mshi qaÿauo'o na naloqnaxanaxatpi
(Mateo 13.10-17; Lucas 8.9-10)
10Qaq co'ollaq nda'ai' nam nachi 'eetai' da sa iÿoteec so Jesús qataq soua lapaxaguenataqa, nachi qainattac somayi da chaq 'eetec ca naigui dam daloqnaxaatega. 11Nachi somayi 'enapeco':
–Ñi Dios qami' ÿaÿajnaxanaxanque nam lataxacpi saq cha'a da l'onataxanaxac da ilo'ogue 'enauacna. Qaq nam laÿipi mayi pa'atauec, qalaq qaÿauota'a na naloqnaxanaxat da qai'aqtaxanem; 12yaqto' da demejnaxaatac, qalaq 'eeta'am da sa ishit da nauaañi, qataq da huo'otaq hua'aqtega, qalaq sa ishit da ÿaÿaten, qataq yaqto' namayipi sa ishit da nadalaxajla't, qataq sa ishit da qaÿapalaxat na lasouaxashitpi.
So Jesús i'axat da llic so danaxaatac
(Mateo 13.18-23; Lucas 8.11-15)
13So Jesús nataq'en 'enapeco':
–¿Qachi sa qauaÿajñiÿo' qami' de'eda ÿaloqnaxanaxat? Qaq ¿huá'ago' qone' da qauaÿajñi na laÿi naloqnaxanaxatpi? 14Ca ÿaatapiguiñi aca languishi ala, camayi 'eeta'am cam i'axattac da n'aqtac. 15Qaq huo'o na shiÿaxauapi mayi 'eeta'am aso nanguishi mayi tajlec so nqa'aic. Namayipi n'axaÿaxaatega da n'aqtac. Qalaxayi da qaÿata'ague da hua'axaÿa, nachi anac so Satanás, nachi deuotaxanec na n'aqtacpi mayi qoÿanoigui añi lquiyaqte. 16Qataq huo'o na laÿi shiÿaxauapi mayi 'eeta'am aso nanguishi mayi tajlec so 'alhua mayi ÿalliigui na coma'. Namayi da hua'axaÿa da n'aqtac, nachi ÿaconguet, qataq huo'o da lamanaxanaxa. 17Qalaxayi sa qaÿangui na lpa'a'q, nachi sa ishit da 'eetai'. Cha'ayi da ivita da anac da ñi'iguenataguec, huo'otaq da ncanaguec souaxat da n'aqtac, nachi camayi qoshiuec. 18Qataq huo'o na laÿipi 'eeta'am aso nanguishi mayi tajlec so 'alhua mayi lesat. Namayipi n'axaÿaxana da n'aqtac. 19Qalaxayi ÿapacteec da ime'eguet na chochina huetalec ana 'alhua, qataq anac da nsallaxa ÿatenachit, ivitta'a da nqopita 'enauac na chochinasat. Nachi 'enauac ne'enapi ÿapolec da n'aqtac, nachi sa ishit da ÿauo'o ca alaÿaxac naq'en que'eca shiÿaxaua. 20Qalaxayi huo'o na hua'axaÿa da n'aqtac, nachi ÿaconguet, nachi ÿataqta huo'o da alaÿaxac, 'eeta'am aso nanguishi mayi tajlec so no'on 'alhua. Huo'o na 'eeta'am aso nanguishi mayi ivi' ana treinta ana alapi añi 'oonole, qataq huo'o ana ivi' sesenta, qataq cien.
Qaÿaloqnaxana aso ncoÿadaxanaxaqui
(Lucas 8.16-18)
21So Jesús nataq'en 'enapeco':
–¿Peta'a ishito' da qandouo aca ncoÿadaxanaxaqui, nachi qoÿano'ot aca cajón, huo'otaq ca mala'? 'A'i, sa ishit. Nda'a't da acamayi qoÿanashiguem, yaqto' yi'oqchiguiñi. 22Cha'ayi sa ishit da huo'o ca qoÿoxottapiguiñi da huo'otaq sa yi'oq, qataq sa ishit da huo'o ca saq cha'a da huo'otaq sa qaÿaÿaten. 23Qaq ca ÿaÿaten da n'axaÿaxanaxac, qaq no'on da n'axaÿaxaachiguiñi.
24So Jesús nataq'en 'enapeco':
–Ÿataqta qauloitelec qome ca qau'aqaichigui. Cha'ayi cam qadaloqnaxanaxaquii da huo'o ca qai'añiiuec, camayi nachica ca ipagaqchiichigui ñi Dios, da huo'o ca qami' ÿanema. Qataq ÿataqta nquicteec ca qami' ÿanema, qami' mayi qan'axaÿaxañiitac. 25Cha'ayi cam huo'o ca hueto'ot, camayi qanquigaxatteec ca qoÿanem; qaq cam qaica ca hueto'ot, qalaq camayi qanhuo', ivida'a cam saq 'amaqtoqolec mayi hueto'ot.
Qaÿaloqnaxana aso nanguishi mayi ñaxatshiguem
26So Jesús nataq'en 'enapeco':
–Da l'onataxanaxac ñi Dios da ilo'ogue 'enauacna, da mayi 'eeta'am ca shiÿaxaua mayi ÿanoigui na 'alhua aca languishi. 27Ime, nachi somayi jec da do'ochi, qaq ca lÿa na'a'q nachi ñishiguem, nachi quetot de'eda naua na'axa'tesa'chi qataq pesa'chi. Qaq aso languishi nnoxooshiguem, qataq jec da lañaxataxa, qalaxayi somayi sa ishit da ÿaÿaten ca 'eetec ca lañaxataxa asomayi. 28Cha'ayi nam 'alhua maichi i'ot naq'en da lañaxataxa asomayi; hua'auñi da nnoxooshiguem aso llaxataxa, qaq da lcopa'ague qataq huo'o ana lauoxo, qataq jec ana alapi. 29Qaq asomayi da ivita da ÿi ana ala, nachi qanqo'oneuga da qanqat, cha'ayi mashi ivita yi laloqo'.
Qaÿaloqnaxana aso ala ana mostaza
(Mateo 13.31-32; Lucas 13.18-19)
30So Jesús nataq'en 'enapeco':
–¿Negue'tom ca 'eeta'am ñaq'enaq da l'onataxanaxac ñi Dios da ilo'ogue 'enauacna? qataq ¿negue'tom ca ishit da saloqnaxanaxa? 31Damayi 'eeta'am aca ala ana mostaza mayi qoÿanoigui na 'alhua. Acamayi ÿataqta qapi'ole aca ala, saq 'en'am 'enauac ana laÿi nanguishi mayi huetalec ana 'alhua. 32Qalaxayi acamayi da mashi qoÿaañi, nachi ñaxat, nachi anac da lañaxataxa, ivitta'a da ÿataqta late'edai, napacalec ana laÿipi nanguishipi. Ana lcouepi ÿataqta late'edai, ÿoqo'oyi na qoÿopi ishit da anac, nachi taiguilo naua lcouel da nmateec.
Da 'eetec da huo'o mshi ÿauota'a na laloqnaxanaxatpi so Jesús
(Mateo 13.34-35)
33Qaq 'eda da 'eetec da lapaxaguenataxanaxac so Jesús da i'axattac da n'aqtac, ÿataqta qalota na daloqnaxana 'eeta'am de'eda, ÿataqta cam tachiguiña ca qaÿañoxot da qaÿaÿaten. 34Qaq sa ishit da saq huota'a na laloqnaxanaxatpi da da'aqtaxaatac. Qalaxayi naxa da ndoteto soua lapaxaguenataqa, nachi ÿataqta da'aqtaxaatema.
So Jesús vi'iiguet naq'en so l'at qataq aso lapaxa
(Mateo 8.23-27; Lucas 8.22-25)
35Qaq se'eso na'a'q co'ollaq mashi pe, nachi so Jesús 'enapegalo' soua lapaxaguenataqa, 'eeta':
–Saxatague qome da le'ego ana lapel.
36Nachi soomayi queda'ai so shiÿaxauapi da qaÿauec so Jesús, qanayiitangui aso notaxaqui mayi nachi 'eetai' da netangui somayi. Nataq'en huo'oi soua lÿa't notaxaqui' qannaictagueto. 37Nachi anac so l'at lta'adaic, nachi ana lapaxa na 'etaxat tangui aso notaxaqui, nachi nquictashiguem na 'etaxat na lauel asomayi. 38Qaq so Jesús do'ochita, hueta'aguet ana nate' aso notaxaqui, huota'a so n'axanaxat. Nachi somayi qanquetoxonalec, qoÿiita':
–¡'Am mayi 'auapaxaguenataxaatac! ¿Sa ishito' da huo'o ca taÿapigui yi 'adhuel, yi mashi huotaique da qomi' iyiiyiñi?
39Nachi so Jesús ñishiguem, nachi nlaxa so l'at, qataq 'enapega na 'etaxat, 'eeta':
–¡'Auañaxaañi! ¡'Au'enaxaatai'!
Nachi so l'at vi'iteguet, qataq ntochiguiñi 'enauac so 'etaxat. 40Nachi 'enapegalo' soua lapaxaguenataqa, 'eeta':
–¿Tá'ainco' yi qayi'ii? ¿Saqco' peta'a ca qadpi'iÿaxaquii?
41Qaq soomayi ÿataqta lta'adaic da lcolanqa', nachi detaqtega't, 'eetra':
–¿Négue't dam da' shiÿaxaua, yi ivida'a na l'at ishit da ÿalaxaguet qataq na 'etaxat?
Currently Selected:
Marcos 4: TBSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
