Marcos 3
3
So shiÿaxaua mayi daqaqta na lhuaq
(Mateo 12.9-14; Lucas 6.6-11)
1So Jesús qaltaq inoxoneu'a aso laponaxaqui na judiopi, qaq ÿalectauo so shiÿaxaua mayi daqaqta na lhuaq. 2Qaq huo'o na ÿalectauo na chochi nauaatac so Jesús da huo'otaq datannataxañigui se'eso na'a'q mataxaqui, da nataden se'eso shiÿaxaua, da yaqto' ishit da qaÿauo'o ca lasouaxashit qanqoÿin somayi. 3Nachi so Jesús 'enapego' se'eso shiÿaxaua mayi daqaqta na lhuaq, 'eeta':
–Ña qoñishiguem, 'anachajñigui na laiñi.
4Ime, nachi inat so shiÿaxauapi, 'eeta':
–¿Chaq négue't ca qaÿashiita da qai'ot yi na'a'q mataxaqui, peta'a ca ÿaÿamaqchiguiñi, huo'otaq ca qauem? ¿Da qanca'alaxateec ca shiÿaxaua, qalqo' qaÿalauat?
Qalaxayi somayipi ÿataqta ÿi'imaqtom. 5Nachi so Jesús ÿataqta denogui co'ollaq ÿamataigui somayipi, qataq ÿataqta daquico. Cha'ayi somayipi sa ishit da qaÿapaxaguenai'. Nachi 'enapego' so shiÿaxaua mayi daqaqta na lhuaq, 'eeta':
–'Anchinnaxaneec na 'adhuaq.
Nachi somayi nchinnaxaneec na lhuaq, nachi no'oita. 6Huaña, nachi so fariseopi jec da nqo'ona nam quetague'pi so Herodes da qaitaxaÿapigui ca lataxac da qaÿalauat so Jesús.
Qalota so shiÿaxauapi hueto'ot na loigue aso lapel
7Qalaxayi so Jesús jec, nnaicapegueto soua lapaxaguenataqa da tadaxaama ca loigue aso lapel. Nachi ÿataqta qalota na shiÿaxauapi na ca'ategue somayi, chigoqchiguiña yi Galilea. 8Qaq co'ollaq qai'axaÿapeguelec da l'amaqchic nam i'otpi somayi, nachi ÿataqta qalota na anaÿa somayi, mayi chigaqa'a yi Judea, qataq Jerusalén, qataq yi Idumea, qataq da le'ego so tala Jordán mayi pa'aigue da yi'oxoñi, qataq yi 'alhua Tiro qataq Sidón. 9Qaq ÿoqo'oyi so Jesús huaqajleguete soua lapaxaguenataqa, da yaqto' ÿaqataxaatrai' aca nnotaxaqui somayi, yaqto' som qalota shiÿaxauapi sa ishit da npataxagui somayi. 10Cha'ayi somayi ÿataqta qalota na nataden, nachi 'enauac na sa no'onpi ÿataqta namaxa't, nasoneu'a so Jesús da huotaique da ipoteu'a. 11Nachi na n'ecpi co'ollaq ilo'ot somayi, nachi i'adoto naua l-llicte, qataq i'alaxalec, 'eeta':
–¡'Am nachi'am llalec ñi Dios!
12Qalaxayi so Jesús ÿataqta sa ÿala'ac da huaqattega na n'ecpi da sa ishit da i'axat somayi.
So Jesús ÿaconeu'alo soua doce lamaxa'shi
(Mateo 10.1-4; Lucas 6.12-16)
13Qaq co'ollaq ime de'eda, nachi so Jesús tashiguemec aso qasoxonaxa, nachi huaña co'ollaq ÿauo'oi soua iÿaxanalo, som lca'agui'shi. Nachi soomayi naÿalo somayi. 14Nachi ÿauaxaÿaxana't soua doce somayipi, da yaqto' nachi 'eetai' da hueta'agueta somayi, qataq da yaqto' ÿama'q soomayi da i'axa't da n'aqtac. 15Qataq ÿanema soomayi da l'añaxa'c da natade'n na dalolaxaic qataq da i'oldaue'c na n'ec leguemaxaicpi. 16Qaq 'enaua naua l'enqa'te soua doce, 'eeta': so Simón som ilonec so Jesús da Pedro; 17qataq so Santiago qataq so lqaÿa Juan, llalqa so Zebedeo, som ilonque so Jesús da Boanerges, da mayi naigui da 'añaxaiqa, 'eeta'ama na nalataxa; 18qataq so Andrés, Felipe, Bartolomé, Mateo, Tomás, Santiago som llalec so Alfeo; Tadeo, Simón mayi chigaqaigui na cananista, 19qataq so Judas Iscariote, mayi ÿaneuo co'ollaxa so Jesús.
So Jesús qoÿiitega huo'o ca l'ec leguemaxaic
(Mateo 12.22-32; Lucas 11.14-23; 12.10)
Qaq co'ollaq ime, nachi so Jesús inoxonoigui ca noÿic, nataq'en soua lapaxaguenataqa. 20Nachi qaltaq qalota so laponeu'a shiÿaxauapi, ivitta'a da sa ishit da chochi deque'e somayipi. 21Qaq co'ollaq hua'axaÿapeguelec de'eda so lauo' l'ecpi so Jesús, nachi anaÿa da ÿauotaique da ÿauec somayi. Cha'ayi mashi qoÿiitega da huo'o da aloic.
22Nataq'en huo'o na anac na dapaxaguenataxaatapeguec na nqataxacpi mayi chigaqa'a yi Jerusalén. Nachi namayipi 'eeta':
–De'eda shiÿaxaua, da mayi netaigui ñi Beelzebú ñim lataxala' nam n'ecpi leguemaxaic, qaq nachiñi ñim do'otaxaatega da l'añaxac da i'odauec ne'ena n'ecpi.
23Nachi so Jesús iÿaxanoigui so shiÿaxauapi, nachi ÿauo'o so daloqnaxana, 'eeta':
–¿Huá'ago' ca 'eetec ca lataxac da so Satanás maichi n'odela't? 24Ca nta'a da huo'otaq nÿodacachi nam quetague'pi, nachi maichi deloguiÿa't, nachi que'eca nta'a, camayi sa ishit da 'eetai'. 25Qataq ca maichi nhuo' l'ecpi da huo'otaq maichi npa'aguena't, nachi camayipi nataq'en sa ishit da 'eetai'. 26Qaq nachi 'eetec nataq'en so Satanás da huo'otaq maichi npa'agueela't, qataq da colaqapigui da l'añaxac, nachi somayi sa ishit da 'eetai'. Huaña, nachi ishit da imeuo.
27Qaica ca ishit da inoxoneu'a ca lma' ca shiÿaxaua 'añaxaic da ÿacona na logoxoshitpi, da huo'otaq saxanaxa da icoñidai'. Da nachi 'eetec de'eda, mayi ishit da deuotaxanec na logoxoshitpi.
28Qaq ÿataqta 'eesa de'eda qami' sa'axatema nagui, da 'enauac na shiÿaxauapi ishit da qaÿapalaxat na lasouaxashitpi, qataq 'enauac nam qauem l'aqtacpi mayi nasaxauec. 29Qalaxayi ca sa iyacna'pe naua l'aqtaqa da detaxaÿa so Espíritu Santo, nachi camayi ÿataqta sa ishit da huo'o ca nchoxonnataguec. Chaqdata da nachi 'eetai' da huetalec qanqoÿin ca lasouaxashit.
30Qaq 'eda da 'eetec da l'aqtac so Jesús, cha'ayi somayipi 'eetega da somayi huo'o ca l'ec leguemaxaic.
Aso late'e qataq soua lqaÿa't so Jesús
(Mateo 12.46-50; Lucas 8.19-21)
31Huaña, nachi nvideuo aso late'e so Jesús qataq soua lqaÿa't, qalaxayi soomayi nachi pa'atrauec, nachi qaÿamaxasoxoneu'a somayi. 32Nachi nam nso'ootañipi mayi datato'ot so Jesús 'enapego' somayi, 'eeta':
–Ada 'adate'e qataq daua 'adqaÿa't, daamayi pa'atrauec, 'am nmittapigui.
33Qalaxayi somayi 'enapeco':
–¿Négue't acam ÿate'e, qataq ca ÿaqaÿañicpi?
34Ime, nachi ÿamataigui nam nso'ootañi mayi datato'ot somayi, nachi 'enapeco':
–'Ena nam 'eeta'am aca ÿate'e, qataq ÿaqaÿañicpi. 35Cha'ayi ca i'ot ca 'eetapeguec ñi Dios, qaq nachica ca 'eeta'am ca ÿaqaÿa, qataq aca ÿate'e.
Currently Selected:
Marcos 3: TBSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
