Marcos 16

Da 'eetec co'ollaq nca'aleec qanqoÿin so Jesús

(Mateo 28.1-10; Lucas 24.1-12; Juan 20.1-10)

1Qaq co'ollaq mashi inoxoneec so na'a'q mataxaqui, nachi aso María mayi lashi yi Magdala qataq aso lÿa María mayi late'e so Santiago, qataq aso Salomé, soomayi deshijnaxaada so codaxat da nqo'oodeuga da icoyiguilo da l'oquiaxac so Jesús. 2Qaq ña nte'etom som l'auaxanec na'a'q co'ollaq tadeuga aso huachiqui, qaq mashi nnoxotchiguem aso nala' co'ollaq ivildeec. 3Qaq maichi detaqtega't soomayi, 'ena'po':

–¿Chaq negue'to' qome ca nqat ñi coma' mayi lapoxot añi huachiqui?

4Qalaxayi co'ollaq qaÿamatau'a se'eso coma' lta'adaic mayi lapoxot aso huachiqui, nachi mashi qaica. 5Nachi qainoxonoigui aso huachiqui. Huaña, nachi qaila'a so nsoq nso'ootañi, hueta'ague na aloic, logodaiqa soua alogo lapagaxaiqa. Nachi soomayi ÿataqta ñi'i'. 6Qalaxayi somayi 'enapegalo' soomayi, 'eeta':

–Sa ishit da qayi'ii; qami' qanmichiitaique so Jesús mayi Nazaret l'ec, som qaiuaxaneuo co'ollaxa. Qalaxayi somayi ÿoltaq nca'aleec qanqoÿin, qaq mashi sa ishit da hueta'a ne'ena. Ña qamijñi nam qaÿachaña co'ollaxa. 7Qauesomiÿa qome, qau'aqtaxañiim cam lapaxaguenatacpi, qataq ca Pedro, qoñiita': “Somayi mashi hua'auta'ague da Galilea. Huaña qome yimayi, nachi qanauañi', qaq ipacchigui dam l'aqtac mayi qami' ÿanema co'ollaxa.”

8Nachi se'esoua 'alo queda'ai aso huachiqui, datadeec, cha'ayi ÿataqta iviloxolaqchi't da lcolanqa'. Nachi ÿataqta qaica ca da'aqtaxaadem, souaxat da ÿataqta ñi'i'.

So Jesús nachaxana aso María mayi lashi yi Magdala

(Juan 20.11-18)

9Qaq co'ollaq mashi qaltaq qanca'alaxateec so Jesús se'eso l'auaxanec na'a'q, nachi somayi hua'auchiguiñi da nachaxana aso María mayi lashi yi Magdala, asom i'odauec co'ollaxa so siete l'ecpi leguemaxaicpi. 10Nachi asomayi jec da ÿauo'o da l'axaÿaxa'c soua nnaigaxa'u so Jesús, qaq soomayi ÿataqta daquicote' qataq noÿiita'pe. 11Qaq soomayi co'ollaq hua'axaida da mashi qaltaq nca'aleec so Jesús, qataq da mashi nauane' asomayi, nachi ÿoqoleguetta'pe de'eda.

So Jesús nachaxanalo soua dos lapaxaguenataqa

(Lucas 24.13-35)

12Qaq co'ollaq ime de'eda, nachi so Jesús qaltaq ÿoxosa'a da 'eetec co'ollaq nachaxanalo soua dos somayipi co'ollaq taidauga ca n'onaxa. 13Nachi soomayi co'ollaxa ÿi'iguelaxadeuo da ÿauo'o da l'axaÿaxac so laÿipi, qalaxayi ñaqaiyita sa ishit da qai'amaqte'n soomayi.

Da lqataxac so Jesús mayi ÿanema soua lamaxa'shi

(Mateo 28.16-20; Lucas 24.36-49; Juan 20.19-23)

14Qaq co'ollaq qaÿata'ague de'eda, nachi so Jesús nachaxanalo soua once lapaxaguenataqa, co'ollaq soomayi nso'ootrañi, datatalguete ca nqui'axala'. Nachi somayi nlaxaiguilo soomayi, souaxat da qaica ca lpi'iÿaxa'c qataq da ÿataqta qadamchiguilo naua lquiyaqte, cha'ayi sa ishit da i'amaqte'n nam nauane' somayi da mashi qaltaq qanca'alaxateec. 15Nachi somayi 'enapegalo soomayi, 'eeta':

–Qanqo'oñiÿa qome 'enauac na shiÿaxauapi mayi huetalec ana 'alhua, nachi qau'aqtaxañiim dam n'aqtac mayi chigaqaigui da nca'alaxa. 16Qaq ca da'amqajnataxan, nachi qanachilaxan, qaq nachica qome ca qanca'alaxateec; qaq cam sa ishit da da'amqajnataxan, nachi camayi nachi 'eetai' qome da netagui da lasouaxashit. 17Qaq cam hueta'ague ca da'amqajnataxan, camayi i'ot qome na n'anecpi mayi 'eeta': qai'onataxana da i'enaxat da qai'odauec na n'ecpi leguemaxaic, qataq da qai'aqtaxanguilo naua ÿaqa'alo n'aqtaqa, 18qataq da qaÿacongui ca n'adaxanaq, qataq da huo'otaq qanÿomgui ca deshinataxan, qalaq sa ishit da huo'o ca 'enec; qataq da qaÿashil-lec na sa no'onpi, nachi no'oita.

So Jesús taigue da piguem

(Lucas 24.50-53)

19Qaq co'ollaq imat da da'aqtaxaatapeguema soomayi, nachi so qadataxala' Jesús naÿoxotchiguem qanqoÿin da taigue da piguem, nachi nso'ongue da aloic ñi Dios. 20Nachi soomayi je'c da i'axa't da n'aqtac mayi chigaqaigui da nca'alaxa 'enauaque naua laÿil. Qaq som qadataxala' itauaata'pe soomayi da ÿataqta ipacchiguilo naq'en naua l'aqtaxanaxaco, qataq da ÿachaxan na n'anecpi mayi sa qaÿauanapigui. Aja', nachi 'eetec de'eda.

Currently Selected:

Marcos 16: TBSNT

Highlight

Copy