Mateo 19

So Jesús i'axat da lataxac ca nalate' aca lhua

(Marcos 10.1-12; Lucas 16.18)

1Qaq co'ollaq imat da i'axattac de'eda so Jesús, nachi ca'ai yi Galilea da nqo'ona yim 'alhua mayi huaigui yi Judea, yim pa'aigue da yi'oxoñi so tala Jordán. 2Nachi ÿataqta qalota na shiÿaxauapi na ca'attague' somayi. Huaña, nachi nataden 'enauac so sa no'onpi.

3Nachi huo'o na fariseopi na nqochineu'a so Jesús da ÿauotaique da huo'o ca ÿachigoxotchigui da lasouaxashit naq'en somayi. Nachi inattac, 'eeta':

–¿Peta'a ishit da qaÿashiitem ca shiÿaxaua da nalate' aca lhua da huo'otaq huo'o ca camachicague't lasouaxashit?

4Nachi so Jesús 'enapeco':

–¿Sa ishito' peta'a da qautaxaÿaxañi qami' naua ñiyigui'shi l'aqtaqa ñi Dios dam 'eetec ñimayi co'ollaq chita'ague da do'onataxan, nachi “i'ot so shiÿaxaua qataq aso 'alo”? 5Ñi mayi nataq'en 'enapeco': “Ÿoqo'oyi ca shiÿaxaua ca'ai ca lta'a qataq aca late'e, da yaqto' lmayaxaua aca lhua. Huaña, nachi caamayi 'eeta'am ca 'oonolec shiÿaxaua.” 6Nachi caamayi sa ishit da 'ico' dos. Chaqdata da 'eeta'am ca 'oonolec. Qaq ÿoqo'oyi ca shiÿaxaua sa ishit da isoguilo caua ÿadonaxanaxana't ñi Dios.

7Nachi qainat somayi, qoÿiita':

–¿Tá'ainco' qone' so Moisés yi damaxasoxoolec da qoÿami' aca nhua aca lmalate da qaÿalat, ime, nachi qaÿamaqhuec?

8Qalaxayi so Jesús 'enapeco':

–Qomyi souaxat da qami' ÿataqta qadamchiguilo naua qadquiyaqchilli', ÿoqo'oyi qami' ÿashiitema da qaualachi aca qadhuai. Qalaxayi so hua'auchiguiñi co'ollaxa sa ishit da nachi 'eetec de'eda. 9Qaq ÿoqo'oyi aÿim qami' shinapegalo da ca nalate' aca lhua, da huo'otaq sa ishit da huasoilec da nquishishaxac acamayi, nachi camayi da huo'otaq huadon, nachi ishit da qaÿamata'ac huadonaxaic. Qataq cam huadonguet aca 'alo mayi qaÿalat, nataq'en camayi qaÿamata'ac da huadonaxaic.

10Nachi soua lapaxaguenataqa 'ena'po':

–Da nachi 'eetec de'eda da lataxac ca shiÿaxaua qataq aca lhua, qaq sa ÿaÿamaxañi qone' da huadon ca shiÿaxaua.

11Nachi so Jesús 'enapeco':

–Sa ishit da 'enauac na shiÿaxauapi da ÿaÿaten de'eda sa'axattac, chaqnata nam ÿami' ñi Dios da ÿaÿaten ca lataxac de'eda. 12Ÿotta'a't na lataxacpi mayi i'ot da sa ishit da deco'o naq'en ca shiÿaxaua. Cha'ayi huo'o na chigoqteuo da sa ishit da deco'o, qataq huo'o na chochi n'onatac da sa ishit da deco'o, qataq huo'o na maichi chigoqchigui da sa huadon, souaxat da l'onataxanaxac ñi Dios mayi neta'ague da piguem. Qaq ÿoqo'oyi cam ishit da i'ot de'eda sa'axattac, qaq no'on da i'ot.

So Jesús ÿanem da no'on lliquiaxac so ñaqpiolec

(Marcos 10.13-16; Lucas 18.15-17)

13Nachi huo'o so qanauegueu'a ñaqpiolec so Jesús, da yaqto' somayi ishit da ÿashil-lec qataq da natameelec. Qalaxayi soua lapaxaguenataqa nachi nlaqtrega nam nauectapegueuo na ñaqpiolec. 14Qalaxayi so Jesús 'enapeco':

–Qauaqaita'a na ñaqpiolec da aÿim nau'a. Sa ishit da qauquiyoqoitapeeguet namayipi, cha'ayi ca huetaigui da l'onataxanaxac ñi Dios mayi neta'ague da piguem, camayi 'eeta'am ca 'oonolec namayipi.

15Nachi ÿashil-lec ñi 'oonolec somayipi. Ime, nachi ca'ai se'eso 'alhua.

So nsoq sallaxanec mayi detaqtapegue' so Jesús

(Marcos 10.17-31; Lucas 18.18-30)

16Nachi anac so nsoq da nau'a so Jesús. Nachi inat, 'eeta':

–'Am soxodaic mayi 'auapaxaguenataxaatac, ¿négue't cam so'ot ÿaÿamaqchiguiñi, da yaqto' huo'o ca ica'alaxa mayi chochaq tateec?

17Nachi so Jesús 'enapeco':

–¿Tá'ainco' yi qonetega da aÿim soxodaic? Yi qaica cam lÿa ñim soxodaic, 'oonolec Dios. Qalaxayi da 'am 'anshitaique da 'aunoxoneu'a da nca'alaxa, qaq no'on da 'am ÿataqta 'aualaxalec nam lamaxasoxonaxacpi ñi Dios.

18Nachi so nsoq 'enapeco':

–¿Chaq négue't camaxa?

Nachi so Jesús 'enapeco':

–Qomyi sa ishit da 'aualaataxan; sa 'ancachiÿa'ai' aca sa 'adhua; sa 'aucachi; sa ishit da 'au'axat ca saq 'en; 19qataq 'aualaxalec ca 'adta'a qataq aca 'adate'e; qataq ÿataqta 'auauotec ca 'adÿa, 'eeta'am 'anqa'en da maichi 'anauojla't.

20Nachi so nsoq 'enapeco':

–Aja', 'enauac namayipi ÿataqta salaxalec, chigoqta'a co'ollaq ñaq aÿim nogotolec. Qaq ¿négue't cam lÿa seuen?

21Nachi so Jesús 'enapeco':

–Da 'anshitaique da ÿataqta nalochiguiñi da 'adataxac, qaq no'on da qojec, nachi 'aumen 'enauac na 'am hueto'ot, qataq 'ai'anoigui na choxodaqpi, qaq yaqto' huo'o ca 'adsallaxa hueta'ague da piguem. Qaq da ime, nachi 'auanac, aÿim 'auca'ategue.

22Qalaxayi co'ollaq hua'axaÿa de'eda so nsoq, nachi ÿataqta daquico, cha'ayi somayi ÿataqta sallaxanec.

23Nachi so Jesús 'enapegalo soua lapaxaguenataqa, 'eeta':

–Ÿataqta 'eesa de'eda qami' sa'axatema, da ÿataqta huo'o da lqalaic na sallaxanecpi da inoxoneu'a da l'onataxanaxac ñi Dios mayi neta'ague da piguem. 24Qaq aÿim shi'iguelaxalec da qami' sa'aqtaxanema, da ÿataqta huo'o da lqalaic aca shiguiÿac l'enaxat camello da taigui qanqoÿin ca lauac ana qana. Qalaxayi ÿapacteec da lqalaic ca sallaxanec da inoxoneu'a da l'onataxanaxac ñi Dios da ilo'ogue 'enauacna.

25Qaq co'ollaq hua'axaÿa de'eda soua lapaxaguenataqa, nachi ÿataqta lta'adaic da l'aalaqa'. Nachi nnattega't, 'eeta':

–Da nachi 'eetec de'eda, nachi ¿négue'to' ca ishit da qanca'alaxateec?

26Nachi so Jesús ÿamataiguilo soomayi, nachi 'enapeco':

–Na shiÿaxauapi sa ishit da ÿañoxot de'eda. Qalaxayi ñi Dios mayi sa ishit da huo'o ca ÿaqalanapec.

27Nachi so Pedro 'enapeco':

–'Am qadataxala', qomi' ñi'onaxataqchigui 'enauac nam qomi' hueto'oto, ime, nachi 'am seca'ataxague, qaq ¿chaq négue't qome ca qomi' qoÿanema?

28Nachi so Jesús 'enapeco':

–Ÿataqta 'eesa de'eda qami' sa'axatema da que'eca na'a'q, qom mashi qanadalaxat 'enauacna, qom mashi ivita ca laloqo' da na shiÿaxaua llalec nso'oongui aca nso'onaxaqui mayi qaica ca 'en'am da lli'oxoyic da nta'a, nachi qami' mayi aÿim qauca'achiitague' nataq'en qanso'oñiinguilo caua doce nso'onaxaqui' na nta'a, da yaqto' qanmichi na llalaqpi soua doce llalqa so Israel. 29Nachi 'enauac nam n'onaxatchigui na lma'pi, huo'otaq ca lqaÿañicpi qataq lqaÿanpi 'alpi, huo'otaq lta'a qataq aca late'e, huo'otaq lhua qataq ca llalaqpi huo'otaq na n'alhuapi, souaxat aÿim, nachi camayi ivi' qome ca cien nam qoÿami'pi. Nataq'en qoÿami' dam nca'alaxa mayi chochaq tateec. 30Qalaxayi ÿataqta qalota qome nam nagui l'auaxanecpi nam pa'ateec qome qanqoÿin, qataq ÿataqta qalota qome nam nagui pa'ateec nam l'auaxanecpi qome qanqoÿin.

Currently Selected:

Mateo 19: TBSNT

Highlight

Copy