Mateo 18

¿Négue't ca ÿoqta ÿacteec da l'amaqchic?

(Marcos 9.33-37; Lucas 9.46-48)

1Nachi se'eso na'a'q soua lapaxaguenataqa so Jesús nquiguedeuo, nachi qainattac somayi, qoÿiita':

–¿Chaq négue't ca ÿoqta ÿacteec da l'amaqchic nam huetaigui da l'onataxanaxac ñi Dios mayi neta'ague da piguem?

2Nachi so Jesús iÿaxana so nogotolec, nachi nachaalataxangui na laiñi soomayi. 3Nachi 'enapeco':

–Ÿoqta 'eesa de'eda qami' shinapegalo da huo'otaq qami' sa ishit da qavi'iguelaqÿa da qau'enaxachi ca nogotolec, nachi qami' sa ishit da qaunoxoñiu'a da l'onataxanaxac ñi Dios mayi neta'ague da piguem. 4Qaq ÿoqo'oyi cam ÿoqta ÿacteec da l'amaqchic da huetaigui da l'onataxanaxac ñi Dios mayi neta'ague da piguem, nachica cam sa ishit da n'amaqchin qataq ÿi'iguelaxa da 'eeta'am ne'ena nogotolec. 5Qataq ca souaxat da aÿim quetague' da ÿaconguet ca 'oonolec ne'ena nogotolec, qaq nachaÿim mayi aÿim ÿaconguet.

Da lchic ca shiÿaxaua da huo'o ca ÿasouaxat

(Marcos 9.42-48; Lucas 17.1-2)

6Camachicague't shiÿaxaua da huo'otaq ÿasouaxateguet ca lasouaxashit ca 'oonolec ne'ena qaica ca l'amaqchic mayi aÿim i'amaqteetac, nachi camayi no'on da ÿataqta qaÿasaxangui na laiñi aca auaxai, qoÿaxatot na lqosot ca namaicnaxanaxat coma'. 7Qaq ¡ÿataqta sa ÿaÿamaxañi da huo'o nam shiÿaxauapi mayi i'oteguet ca lasouaxashit ca lÿa ana 'alhua! Qaq damayi nachi 'eetai' qome da huo'o. Qalaxayi ÿataqta ¡choxodaxaso' qome ca shiÿaxaua mayi chigoqchigui ne'ena nasouaxashitpi!

8Qaq ÿoqo'oyi na 'adhuaq huo'otaq na 'adchi da ÿauo'o ca 'adasouaxashit, qaq no'on da 'auchigueec, nachi 'auasaxauec. Cha'ayi ÿaÿamaqchiguiñi da 'aunoxoneu'a da nca'alaxa, nai'ctaxa da 'oonolec na 'adhuaq qataq na 'adchi, qalaxayi saq 'en'am da 'am qaÿasaxangui ca nodec da 'adÿaueeguelo naua 'adhua'q qataq naua 'adchil. 9Qataq añi 'ad'aite, da huo'otaq nachañi i'ot ca 'adasouaxashit, qaq no'on da 'anqat, nachi 'auasaxauec. Cha'ayi ÿaÿamaqchiguiñi da 'aunoxoneu'a da nca'alaxa, da 'oonole ana 'ad'aite, qalaxayi saq 'en'am da 'am 'adÿadauec naua 'ad'ai'te, da 'am qaÿasaxangui ca nodec mayi huaña da ÿauo'o da nhuaxanaguec ñi Dios na 'itaxaloxoicpi.

Qaÿaloqnaxana aso qagueta mayi isomapec

(Lucas 15.3-7)

10Sa ishit qome da qau'otañi ca 'oonolec nam saqca ca l'amaqchic. Cha'ayi aÿim qami' shinapegalo da na nhuataxauapi mayi lamaxashicpi ñi Dios, namayipi nachi 'eetai' da datato'ot ñi ita'a mayi neta'ague da piguem. 11Cha'ayi ne'ena shiÿaxaua llalec, namayi anaga da nca'alaxateec na shiÿaxauapi mayi daqat.

12Qami' ¿huá'ague ca 'eetec ca qadhuennataqai? Da huo'otaq huo'o ca shiÿaxaua da huo'o aca cien lalo qaguetapi, qaq da huo'otaq isomapec aca 'oonole, qaq ¿peta'a sa ishito' da n'onaxatalec aca saqaÿoqotchiguemec 'alhua aca noventa y nueve qaguetapi, ime, nachi jec da nmitaique aca 'oonole mayi isomapec? 13Qaq da huo'otaq mashi ÿanata, nachi camayi ÿataqta lta'adaic da ntootapeguec aso 'oonole qagueta, qa saq 'en'am da ntootapeguec aso noventa y nueve mayi sa ishit da isomapec. 14Qaq 'eda da 'eetec nataq'en ñi qadta'ai mayi neta'ague da piguem, da sa ÿaÿamaxaden da daqat ca 'oonolec ne'ena qaica ca l'amaqchicpi.

Da 'eetec da qaichoxoden ca nqaÿa

(Lucas 17.3)

15Ca 'adqaÿa da huo'otaq huo'o ca 'am i'otec sa ÿaÿamaxañi, qaq no'on da 'andote' camayi da 'au'aqtaxanem ca lsomaxac. Qaq camayi da huo'otaq 'am ÿalaxaguet, nachi 'am 'adaueguec camayi da qaichoxoden. 16Qalaxayi camayi da sa ishit da 'am ÿalaxaguet, nachi 'am 'auÿaxana ca 'oonolec, huo'otaq caua lÿa't dos, yaqto' 'enauac nam 'ad'aqtaxanaxac ishit da nateeteguet da l'aqtaxanaxa'c caua dos huo'otaq caua tres mayi 'ad'aqtaxanaxa'u. 17Qaq da huo'otaq sa ishit da ÿalaxalguete caamayi, nachi 'am ishit da 'au'aqtaxanoigui na lapoota'a't 'amqajnataxanaxaicpi. Qaq da sa ishit da ÿalaxaguet namayipi, nachi camayi ishit da 'eeta'am qanqoÿin ca sa ishit da i'amaqten ñi Dios, huo'otaq cam ÿacootapeeguet ana nshiitenaqte ca nta'a.

18Qaq ÿataqta 'eesa de'eda qami' sa'axatema, da ca qami' sa qauashiñi ana 'alhua, qalaq nataq'en da piguem sa ishit da qaÿashin. Qataq cam qami' qauashiñiita ana 'alhua, qalaq nataq'en da piguem qaÿashiita.

19Nataq'en qami' shinapegalo da huo'otaq huo'oi caua dos da qoñiita nagui da ñaq huetra'a ana 'alhua da huo'otaq ÿataqta qan'aqtaxaachigui ca qaiÿaxanaique da natame'n, nachi ñi ita'a mayi neta'ague da piguem, ñimayi ÿan cam qaiÿaxanaique. 20Cha'ayi cam huetra'ague caua dos, huo'otaq tres, da lapootega't souaxat da aÿim i'amaqteetrac, nachi aÿim sootanguilo caamayi.

21Nachi so Pedro inat so Jesús, 'eeta':

–'Am ÿataxala', ¿chaxan lcate' da shi'iguelaxalec da sechoxoden ca i'amqajnataxanaxaua da huo'otaq huo'o ca aÿim i'otec sa ÿaÿamaxañi, peta'a siete da shi'iguelaxalec da sechoxoden?

22Nachi so Jesús 'enapeco':

–Aÿim 'am shinapega da sa ishit da siete da 'avi'iguelaxalec da 'auchoxoden. Mayi ivi' setenta da 'avi'iguelaxalec na siete.

Qaÿaloqnaxana so namaxashic mayi sa ishit da dechoxonnataxan

23Qaq ÿoqo'oyi de'eda l'onataxanaxac ñi Dios mayi neta'ague da piguem, damayi 'eeta'am ca nta'a mayi huotaique da naloqna't aca lavigaxaiste ca lamaxashicpi. 24Qaq co'ollaq mashi naloqteetega't aso navigaxaiste, nachi qanauegueu'a so 'oonolec mayi ÿataqta qaÿoqtegue aso lavigaxaiste. 25Qaq se'eso namaxashic, somayi qaica ca deshiitenaxana. Nachi se'eso n'aco' damaxasoxoolec somayi da qaimen da chochi nlatac, lÿauegue' aso lhua, qataq so llalaqpi, qataq 'enauac na logoxoshitpi, da yaqto' ishit da qaishiiten aso lavigaxaiste. 26Nachi se'eso namaxashic, somayi i'adoto naua l-llicte so n'aco'. Nachi nachoxodeetot, 'eeta': “'Am ÿataxala', aÿim 'anhualaxaune' qome, yaqto' aÿim ishit da seshiiten 'enauac añi ÿavigaxaiste.” 27Nachi se'eso 'aco' ÿataqta huo'o da lchoxonnataxanaxa somayi. Nachi ichoxoden da chochi ÿapalaxat aso lavigaxaiste. Ime, nachi ÿaxaneec. 28Qalaxayi co'ollaq chochi huenoxoneec se'eso namaxashic, nachi ilalec so lÿa mayi l'onataxanaxaua mayi neto'ot aso saq 'amaqtaq lavigaxaiste somayi. Nachi nquemoxonot na lqosot, nachi ivigoqto'ot. Nachi 'eetega, 'eeta': “¡'Aushiiten qome añi 'adavigaxaiste!” 29Nachi se'eso lÿa, somayi i'alyiñi naua l-llicte, nachi nachoxodeetot somayi, 'eeta': “Aÿim 'anhualaxaune' qome, yaqto' ishit da seshiiten 'enauac añi ÿavigaxaiste.” 30Qalaxayi se'eso namaxashic sa ishit da ÿasateguet. Chaqdata da jec. Nachi ÿamaxaigui aso ncoñitaxanaxaqui, chochi ivitta'a da ishiiten 'enauac aso lavigaxaiste. 31Nachi so laÿi l'onataxanaxauapi co'ollaq ÿauaachigui de'eda, nachi ÿataqta qalota da nqui'ic. Nachi jec somayipi da da'aqtaxaneu'a so n'aco' 'enauac de'eda qai'ot. 32Nachi se'eso 'aco' damaxasoxoneuga som lamaxashic. Nachi 'enapega, 'eeta': “¡'Am namaxashic qauemaic! Aÿim 'am sechoxoden da sapalaxat 'enauac aso 'adavigaxaiste, cha'ayi ÿataqta aÿim 'anachoxodeetot. 33Qaq 'amctaxa nataq'en ishit da 'auchoxoden so 'adÿa, qoneta'am da shiitec da 'am sechoxoden.” 34Nachi se'eso 'aco', somayi ÿataqta dalemata. Nachi damaxasoxoolec da qaÿauo'o da nhuaxanaguec somayi, chochi ivitta'a da ishit da ishiiten 'enauac aso lavigaxaiste.

35Nachi so Jesús 'enapeco':

–Qaq 'eda qome da 'eetec naq'en da qoñiita ñi ita'a mayi neta'ague da piguem, da huo'otaq ñi 'oonolec sa ishit da ÿoqta lquiyaqteÿaxac da ichoxoden ca lqaÿa.

Currently Selected:

Mateo 18: TBSNT

Highlight

Copy