Mateo 17

So Jesús qanadalaxat da nmejnaguec

(Marcos 9.2-13; Lucas 9.28-36)

1Qaq co'ollaq mashi inoxoodeec soua seis na'axa'te, nachi so Jesús ÿauec so Pedro qataq soua nqaÿa't Santiago qataq Juan. Nachi ndotreec soomayi, nnaicapegueto da nqo'ooshiguemque aso saqaÿoqotchiguemec 'alhua. 2Huaña, nachi qanadalaxat da nmejnaguec, ÿauaachiguilo soomayi. Na lashic co'ollaxa ÿataqta 'edoigui, 'eeta'am na l'edaxa aso nala'. Qaq soua alogo, qalaq ÿataqta ÿapaga'q, 'eeta'ama na n'edaxa. 3Nachi soomayi saqaÿaloq da qaila'a so Moisés qataq so Elías, qan'aqtaxaatague' so Jesús. 4Nachi so Pedro 'enapega so Jesús, 'eeta':

–'Am qadataxala', ¡'onaxáictaxa da nachi souaqta'a ne'ena! Da 'am 'auaÿamaxadeeta, nachi so'ota'q caua tres qayi'axaquilli', 'am 'oonolec ca 'adma', qataq da Moisés, qataq da Elías.

5Qaq co'ollaq ña detaqtac so Pedro, nachi anac so l'oc mayi ÿataqta 'edoigui. Somayi ipelteelguete soomayi. Nachi se'eso l'oc chimaqtoigui so n'aqtac, 'eeta':

–'Eda dam ÿalec mayi ÿataqta ÿauotaxat, damayi ÿataqta ñitootapeguec. Qaq damayi qan'axaÿaxañiÿa qome.

6Qaq co'ollaq qai'axaÿa de'eda, nachi soua lapaxaguenataqa ÿataqta nqapaxangueta na 'alhua, qataq ÿataqta huo'o da lcolanqa'. 7Nachi so Jesús nqo'onalo soomayi, nachi ipoteu'alo, nachi 'enapegalo, 'eeta':

–Qoñiishiguem, sa ishit da qayi'ii.

8Qaq soomayi co'ollaq namatrashigue'm, nachi sa ishit da huo'o ca iloda'a, chaqsota so Jesús 'oonolec.

9Qaq co'ollaq mashi huenotreeguesop aso saqaÿoqotchiguemec 'alhua, nachi so Jesús huaqattegalo, 'eeta':

–Sa ishit qome da huo'o ca qau'axachiim de'eda qadauanaqchiqui, to' qom mashi qaltaq nca'aleec ne'ena shiÿaxaua llalec.

10Nachi soua lapaxaguenataqa inatta'pe somayi, 'eeta':

–¿Tá'ainco' qone' yi na dapaxaguenataxaatapeguec na lqataxacpi so Moisés yi 'eetega da hua'auñi qome da nvi' ca Elías?

11Nachi so Jesús 'enapeco':

–Aja', 'eesa da so Elías ñi'iguelaq qome, qataq da ÿaÿamaxajñi 'enauac na huetalec ana 'alhua. 12Qalaxayi aÿim qami' shinapegalo da so Elías mashi sogote da nvi'. Qalaxayi namayipi sa ishit da ÿauatton, chaqdata da namayipi maichi qoÿoiqueetac cam qoÿiita'ac somayi. Qaq nachi 'eetec qome nataq'en na shiÿaxaua llalec da ÿataqta huo'o da nque'ejnaxac souaxat namayipi.

13Huaña, nachi soua lapaxaguenataqa ÿaÿate'n da so Jesús detaqtega so Juan mayi nachilaxanataxanaq.

So Jesús nataden so nsoq mayi copchaxaic

(Marcos 9.14-29; Lucas 9.37-43)

14Qaq co'ollaq mashi ivitra so hueta'a so shiÿaxauapi, nachi huo'o so shiÿaxaua nqochineu'a so Jesús. Nachi i'adoto naua l-llicte, nachi 'eeta':

15–'Am ÿataxala', ÿataqta 'auchoxoden qome da ÿalec, cha'ayi damayi copchaxaic qataq ÿataqta lta'adaic da nque'ejnaxac. Cha'ayi qalota naxa da tangui na nodec, huo'otaq na 'etaxat. 16Qaq damayi ñauegueu'alo naua 'adapaxaguenataqa, qalaxayi sa ishit da natade'n damayi.

17Nachi so Jesús 'enapeco':

–¡Aicoue qami' mayi sa qau'amqajnataxañi, qataq qami' qauemaiqa! Mashi huo'oi soua na'axa'te da qami' sootaiguilo, qataq mashi huo'oi soua na'axa'te da qami' ñiualaxaueetapegueto. Ña qanaviquiicna'a da nsoq.

18Nachi so Jesús nlaxa se'eso n'ec leguemaxaic, nachi ca'ai naq'en so nsoq. Huaña, nachi no'oita somayi.

19Qaq co'ollaq ime, nachi soua lapaxaguenataqa iÿotrauga so Jesús. Nachi inattrac, 'eeta':

–¿Tá'ainco' yi qomi' sa ishit da so'odaqhuec se'eso n'ec leguemaxaic?

20Nachi so Jesús 'enapeco':

–Cha'ayi qami' ÿataqta qapi'olec da qadpi'iÿaxaqui. Qaq ÿataqta 'eesa de'eda qami' shinapegalo nagui da huo'otaq qami' huo'o ca qadpi'iÿaxaqui, nai'ctaxa da lcata'amolec aca ala ana nanguishi l'enaxat mostaza, qalaq ishit da qoñiÿapega aca qasoxonaxa, qoñiita': “Qoca'ai ne'ena qoueta'a, 'anqo'ona ca lÿa 'alhua;” nachi acamayi ishit da ÿalaq. Qaq qami' ÿataqta qaica ca qauqalañiÿapec, da ÿoqta 'eesa da huo'o ca qadpi'iÿaxaqui. 21Qalaxayi ne'ena 'eeta'am se'eso n'ec leguemaxaic, da qai'odauec, qalaq iuen da nqouagaxauen qataq nqouaqchit ca shiÿaxaua.

So Jesús qaltaq i'axata'a da nalaataguec

(Marcos 9.30-32; Lucas 9.43-45)

22Qaq co'ollaq ñaq huetra'a yi 'alhua Galilea, nachi so Jesús 'enapegalo' soua lapaxaguenataqa, 'eeta':

–Ne'ena shiÿaxaua llalec, namayi qoÿanoigui qome na shiÿaxauapi, 23nachi qaÿalauat. Qalaxayi qom inoxoodeec caua tres na'axa'te, nachi qaltaq nca'aleec.

Nachi de'eda l'aqtac ÿataqta ÿaquicoqchi't soomayi.

Aso nshiitenaqte da qaishiiten aso n'onaxanaxaqui late'edai

24Qaq so Jesús qataq soua lapaxaguenataqa co'ollaq mashi ivitra yi pueblo Capernaum, nachi nam ÿacootapeeguet ana nshiitenaxanaqte da qaishiiten aso n'onaxanaxaqui, namayipi nau'a so Pedro, nachi inattac, 'eeta':

–¿Ñi qami' ÿapaxagueeta'pe peta'a sa ishit da ishiiten añi n'onaxanaxaqui?

25Nachi so Pedro 'enapeco':

–Aja', ishiiten.

Nachi somayi co'ollaq pa'aigui ca noÿic, nachi so Jesús hua'aulec da 'enapega somayi, 'eeta':

–¿Chaq huá'ague ca 'eetec ca 'ad'aqtac, 'am Simón? ¿Chaq négue't cam qaiÿaxanot da ishiiten aca nshiitenaqte na nta'alpi mayi ilotague' nam huetalec ana 'alhua, peta'a nachina nam lalamaxatpi, huo'otaq nam ÿaqa'a ca chigaqa'ague?

26Nachi so Pedro 'enapeco':

–Qomyi nam chigaqauecpi.

Nachi so Jesús 'enapeco':

–Nachi nam lalamaxatpi sa ishit da deshiitenaxan. 27Qalaxayi da yaqto' sa ishit da huo'o ca qadasouaxashit, qaq no'on da 'anqo'onaxaama qome aso auaxai. Ime, nachi 'auasaxañi aca 'adqoina. Qaq ca hua'auchiguiñi 'adqoishic nÿaq, camayi huetaigui na alap aca anom lcatole. Qaq nachaca qome nalotañi da 'angui aca ishiitenaxanaqte qataq aca 'adshiitenaxanaqte. Ime, qaq 'audouo qome, 'aushiitenaxana.

Currently Selected:

Mateo 17: TBSNT

Highlight

Copy