Лука 20
20
Глава 20
Иисус Христос дявучинмайён улгимин
1Өмнэкэн Иисус Хэвки Дюлан бэилбу хупкучиддэкэн, Өрэлдэм Мэтум тэлэӈэддэкэн, Ноӈантакин дюлэгэл хиргэчимӈэл попал, Итум-да хупкучимӈэл, каганкар-да дагамритан, 2нян Ноӈантакин гөнитэн:
– Мунтэки гөли, ӈи гөнэкэн Хи тачимур некэнри? Ӈи Хинду эрэв дявучинмайгас бөрин, тачимур нектэс?
3Ноӈан ноӈартакитан барагрин:
– Би-дэ нян хуну өмэм улгэм улгэмдэку, Минтэки гөлрэ, 4Иоанн хэвкигчэн няниндук эмрин, эв бэилдук-ку?
5Ноӈартан мэр доливур эчин укчэнмэттитэн: «Гөнэкун: „Няниндук“, таракам Ноӈан барагдин: „Ями-си ноӈман эчилсэн тэдеттэ?“ 6Тарбач гөнэкун: „Бэилдук“, бэил чэлэдюр дӫлач муну кусидир, ноӈартан хар, Иоанн мэтумӈэ бисивэн». 7Нян ноӈартан барагритан этывур хар, ядук-та тарак бисивэн.
8Иисус ноӈартакитан барагрин:
– Таракам Би-дэ хунтэки этэм гөн, ями-да эчин Мэн некрий.
Усалбу тэвтэмӈэлбу тэлэӈ
9Тадук Иисус бэилтэки эррөчим тэлэӈу тэлэӈэдилрин:
– Өмэн бэй тэвтэ виноград исудэн тэгукэнин, тарбач тарав винограду исувкэчэки тэвтэмӈэлду бөрин, мэнкэн тэгэлэ гору бидэй хөррин. 10Тэвтэ ирэдекэн одни, бэй мэн кэлмэй тэвтэмӈэлтэки хөрукэнин, исучэдук тэвтэв тарал бөдэтэн. Тарбач тэвтэмӈэл, тарав кэлмэв кусиридюр, ач ялач амаски хөрукэнитэн. 11Таракам бэй гяв кэлмэй хөрукэнин. Тэвтэмӈэл тарав-да, кусиридюр, хадаририв амаски хөрукэнитэн. 12Бэй нян-да укал иливутан кэлмэй хөрукэнин. Тэвтэмӈэл тарав, гуюмридюр, эрэсситэн. 13Тарак тэвтэ исувкэчэк хунӈин гөнин: «Яв некчим? Мэн аяврий няруди хөрукэндэку, тарав хадарилдир». 14Тарбач тэвтэмӈэл, няруддён иттыдюр, мэр доливур укчэнмэттитэн: «Эрэк амми эӈэевэн дюлэски ганна! Ноӈман мадакун, эӈэен-дэ мутӈи один!» 15Тэвтэв исувкэчэктук эрэссидюр, ноӈман маритан. Исувкэчэк хунӈин ноӈарбутан яв некчин? 16Ноӈан мучудин, тэвтэмӈэлбу мадин, тадук-нян тэвтэв исувкэчэку хөнтэлду бөдин.
Долчиччал гөнитэн:
– Эдэн тачин бис.
17Нян Иисус, ноӈартакитан ичисниди, улгэмрин:
– Хэвки Дукундулан якав-нян эчин дукуттан: «Очимӈал улэчэтэн дӫл онмай хатан одни». 18Ӈи, бодэлди хөрдин, тикчин, мабдин, ӈилэ-ккэ эрэк дӫл тыкчин, тарич тынивдин.
19Итум хупкучимӈэл, дюлэгэл хиргэчимӈэл попал Иисусу хэпкэндэвур некритэн. Ноӈартан унуритан, Иисус ноӈарбутан гөнивэн, тарбач бэилбу ӈэлэлритэн.
Тэгэмэрду таман
20Теми ноӈартан Иисусу хипкачидилритан, бэилбу-дэ Ноӈантакин дагамуканитан, аил бисэсэн бидэтэн, тачин Иисусу төрэндун хипкаттитан, нян тадук усалтавкандавур, римскайду бэгэнду итудяктакин бөдэвур. 21Тарал Иисусу улгэмритэн:
– Хупкучимӈэ, бу хару, Хин Төрэнси, Хупкучинси-дэ айдитал бисивутэн, ӈив-дэ Мэнкэн эсэнри аявулкаваччӫтта, Хи айдиту гөвэчинри, он-да Хэвкидыч бидэтэн хупкутчӫчинри, 22тарбач гөли, бу тэгэмэрду тамам бөннэвун-гу, яннавун-гу?
23Иисус, хавкалдаривутан унуриди, ноӈартакитан гөнин:
– Ядавур Мину гэинэс? 24Мэӈэм Минду ичукэлрэ, – ӈи итын тала оняттан, ӈи-дэ гэрбэн дукаттан?
Тарал барагритан:
– Тэгэмэр.
25Иисус ноӈартакитан гөнин:
– Тарбач таракам тэгэмэрӈив тэгэмэрду бөӈэсэн, нян Хэвкиӈив – Хэвкиду.
26Бэил бисидутэн тарал Иисусу төрэндун туркуритэн усалтавӈа. Барагман мянидюр, ноӈартан яв-да гөӈэ туркуритэн.
Арадяку унувканмай
27Таракам саддукеил, аранмаю этыл тэдеттэ, Иисусу улгэмритэн:
28– Хупкучимӈэ, Моисей мунтэки Итундула дукрин, ӈи-ккэ аканни көкэдин, ач-та хутлэ бичэ, тарбач көкэчэ нөн акми атыкаӈӈон атыкаӈгай ганна, хурэлгэн-дэ хутэлбэннэ. 29Надан акнил биситэн. Дюлэг, атыкалбариди, ач хутлэ биникэн көкэрин. 30Тарак атыкаӈӈон гя нөн атыкаӈай гадын, тарак-та ач хутлэ биникэн көкэрин. 31Илитан-нян тарич атыкаӈтарин, тарбач эйдучэндюр надан атыкаӈнаттытан, эйдучэндюр көкэритэн, ач хутлэр биситэн. 32Амардадутан атыкаӈатан көкэрин. 33Тарбач, арадякла-нян ӈи ноӈандин атыкаӈнатчин? Тарбач эйдучэндюр надан ноӈандин атыкаӈнатытан.
34Иисус ноӈартакитан барагрин:
– Тек эйду бэил бисил атыкалбаватта, мерроттэ, 35тарбач ӈи-ккэ дюлэски аранна, дюлэски-дэ иннэ, этэр олдаграр, этэр мергэрэр, 36көкэдэвур-дэ туркудир, ангелалгачир оградир, – ноӈартан Хэвки хурэлни бис, арадяк хурэлни бис. 37Тарбач көкэчэл араннавутан, тарав Моисей мэнкэн гөвэттэн, эты мудна дуррий хятакаг анчиндун илатми, таракам Хунӈивут ноӈан Авраам Хэвкидин, Исаак Хэвкидин, Иаков Хэвкидин, гэрбуччӫттэн. 38Тарбач Хэвкиду көкэчэл ачча, Хэвки инил Хэвкитэн. Ноӈандун эйду инил бис.
39– Хупкучимӈэ! Хи аич гөнэнри, – тарав гөнчэвэн хан Итум хупкучимӈэл барагритан. 40Тарбач Ноӈман яв-да улгэмдэвур туркучилритэн.
Иисус Христос ӈи Хутэн?
41Нян Иисус ноӈартакитан гөнин:
– Он-нян бэил тачин гөвэттэ, Давид Мессияч хутлэттывэн? 42Мэнкэн-дэ Давид Хэвкиды Икэл книгалатан гөнчэн дукуттан: «Хунӈи Мин Хунӈиткив гөнни: „Ангидалив ӈаллив тэгэтли, 43Хин баргакалбус мариклаву, хин ӈиӈтэлэс тыктэтэн“». 44Тарбач, Давид Ноӈман Мэн Хунӈиди гэрбуттэн, он-нян Давид Ноӈандин хутлэтчин?
45Таракам, чэлэн бэил Ноӈман долчиддакатан, Иисус Мэн хупкуттыӈэлтэкий гөнин:
46– Итум Хупкучимӈэлбэн төгэӈчиӈрэлрэ, хэргили бисив ойлаттылбу, ноӈарбутан город толлин эскэдэтэн, нэӈэдекэлдулэ дюлэгэч тэгэттэвур, тоинэчэкту-дэ малду тагэттэвур аяврилбу. 47Ноӈартан навур эӈэевутэн маннотта, нян чэлэн коеридутэн гору нэӈэдӫттэ! Ноӈартан эгдем итунӈавур баккарадир!
Currently Selected:
Лука 20: eve
Highlight
Share
Copy
Want to have your highlights saved across all your devices? Sign up or sign in
© Библияв тулмачин Институт
Москва, 2001
ISBN 5-93943-008-2
ISBN 91-89122-50-X
