Maqkul 9

1Al ovqtavq, Yeiqsul gaoq ge nail: “Ngal nul juq bhai mal dil dai, ge lavq bhel. Niilniai thul phaol-nvq thaq nail tsaol-aq teevq pav ga nav juq, Miqyail Milkhaoq nail bhaqaoq teevq bhee kev lee nail bhai maq ya moel-u kev dai, maq ya sil ail” dai, ge bhiq-a nail ngaol.

Yeiqsul nail aqmaol phal lal-a nail ganl

2Kovq n jel ail-u phao, Yeiqsul neq, Bheiqtuvluv, Yaqkov khi Yaol haq bhai taivq-ail hevq khi, tsaol-aq maq jaol nail gaoqjaoq daqmoe teevq jaoq bha dav lai-a nail ngaol. Aq-u phao, Yeiqsul aqyu juq nail sivtavq nee aqmaol phal lal-a nail ngaol. 3Aivq nail aqgaq aqdoi phulleq dai, pevq lal khi aqbhaq bhaq dee dee nail ngaol. Miltsaq kovtavq bhai aqgaq aqdoi laiqtsiq nail khul gaq maqkhaiq, aqdai dai ail maq laiqtsiq haol nia-ail. 4Eillilya khi Maolseiq iqsanl aqyu juq nail sivtavq bhai dov lee khi, Yeiqsul bhai daoq ge tsaoq thail thaiq nail ngaol.

5Aq-u phao, Bheiqtuvluv ge nail: “Saq laq-ol, ngadao niai jaol nail neq, aqmeeq nial. Nv juq yavqtsoel hail tsoel cov naol. Naoq nail haqbhoil teevq tsoel, Maolseiq nail haqbhoil teevq tsoel khi, Eillilya nail haqbhoil teevq tsoel cov naol” dai, Bheiqtuvluv Yeiqsul bhai ge bhiq-a nail ngaol. 6Aqyu juq gee sil dee dee nail ngel-i mail, Bheiqtuvluv maq noeq maq mav ail ge nail ngaol.

7Aq-u phao, nqdil aqyu juq bhai uv thaiq-ai thaq nail ngaol. “Tsaol-aq niil gaq, ngal mail ma-ail gaiq-a nail ngaq nail Yaqyov ngaol. Aivq nail daoq nal daiq yaoq” dai, nqdil al nail lavqkhoel nee aqthel meel dov-ai leevq-a nail ngaol.

8Aqyu juq teevq pov taivq-ail jaoq jaoq-ai hel daiq-u phao, teevq gaq bhai iqsanl maq moel-al. Yeiqsul taivq-ail aqyu juq nee mail jaol nail bhai ya moel-a nail ngaol.

9Aqyu juq gaoqjaoq al jaoq nee mail yavq kha lee thail thaiq-u phao, Yeiqsul ge nail: “Tsaol-aq nail Yaqyov maq doevq kovq lal-u phao kev dai, nul juq-i mail ya moel-a nail ganl niil, teevq gaq bhai iqsanl, thaq ge bhiq dei-eiq” dai, aqyu juq bhai daoq bivq-a nail ngaol. 10Aqyu juq daoq al daoq bhai noeq thaq-ai thaq nail ngaol. “Gaoq doevq kovq lal nail dai, ge nail neq, khul bhai ge movq nail meeq” dai, aqyu juq nail gaiqlaq bhai ge pheel jaq nail ngaol.

11Aq-u phao, “Eillilya neq, Khali nail iqmoeq lee nail ngaol dai, khul khi mail aoldaoq kovqdaoq cavq nail cov nail juq ge nail-aiq” dai, yaq laol juq Yeiqsul bhai nal daiq-a nail ngaol.

12Yeiqsul ge nail: “Tsaq naol. Eillilya iqmoeq lee khi, iqsanl bhai aqmeeq-ai lav sav thaq-ai lee nail ngaol. Thail hai ngaol-aoq, Tsaol-aq nail Yaqyov neq, mee nia phaq bhai ya daq khi thaqtheq nail bhai ya daq nail ngaol dai, Jal liq lavqkhoel bhai, khul khi mail gevq-ai thaq nail-aiq. 13Ngal nul juq bhai ge lavq bhel. Eillilya lee khi ngaol-aoq, aivq nail ganl Jal liq lavqkhoel bhai gevq-ai thaq nail khe-ai, tsaol-aq yaq juq aivq bhai khal nl movq nail khe-ai, nl bhiq-a nail ngaol” dai, ge bhiq-a nail ngaol.

Neivq aol nail yaqyov teevq gaq bhai lav meeq bhiq-a nail ganl

14Yeiqsul khi mail yaq laol al hail gaq, yaq laol juq jaol nail bha kovq kev lee-u phao, tsaol-aq munl munl ma yaq laol al juq bhai jaoljaoq-ai thaq khi, aoldaoq kovqdaoq cavq nail cov nail juq, yaq laol juq nee mail jil pheel jaq nail bhai, ya moel-a nail ngaol. 15Tsaol-aq munl munl lao ail Yeiqsul bhai ya moel-u phao, teevq pov taivq-ail, noeq-u maq dov dai pevq-ail khi, tsaol-aivq khi hav-a nail ngaol.

16“Nul juq aqyu juq nee mail khul nail ganl nee jil pheel jaq thail thaiq nail-aiq” dai, Yeiqsul nal daiq bhiq-a nail ngaol.

17Aq-u phao, tsaol-aq munl munl ma nail lavqkhoel khe teevq gaq aivq bhai ge bhiq-a nail: “Saq laq-ol, ngaq nail yaqyov naol jaol nail bha hel lavq-a nail ngaol. Yaq jaoq bhi jaoq ail nail neivq aivq nail lavqkhoel bhai aol nail ngaol. 18Neivq al maol aivq bhai khal nieivq-u phao, miltsaq bhai nieivq thaoq nieivq tuv bhiq nail ngaol. A bhai nee ngal-aq, moeqthaoq nee khaq mevq bhulmevq dov lal khi, haoq gil keivq keivq ail, aqmaol gaol li cevq dai, pevq-ail nail ngaol. Neivq al maol the dov lavq yaoq dai, naoq nail yaq laol juq bhai ngal hal khi ngaol-aoq, aqyu juq maq the dov nia-ail” dai, ge bhiq-a nail ngaol.

19Aq-u phao, Yeiqsul ge nail: “Niil yeel nail tsaol-aq juq-ol, nul juq neq, neema thaq tsaol nail neema maq aol-il. Ngal nul juq nee mail khaq mao kev dai ya jaol-ai haq nail-aiq. Ngal nul juq bhai khaq mao kev dai, ya ol-ai haq nail-aiq. Yaqyov al gaq, ngal jaol nail bha hel lavq yaoq” dai, ge bhiq-a nail ngaol.

20Aqyu juq yaqyov al gaq bhai, Yeiqsul jaol nail bha hel lavq-a nail ngaol. Neivq al maol Yeiqsul bhai ya moel-u phao, yaqyov al gaq bhai bhi bhaoq bhi ga-a nail ngaol. Yaqyov al gaq miltsaq bhai ga tsuq ail khi, moeqthaoq lavqkhoel nee khaq mevq bhulmevq laiv laiv dai, tev nail ngaol.

21“Naoq nail yaqyov niail hai pevq lal-a nail, khaq mao nee ngel-aoq nail-aiq” dai, Yeiqsul aqbhu gaq bhai nal daiq-u phao, “Yaq noil ail jiav-u phao nee niail hai pevq nail ngaol” dai, ge kovq bhiq-a nail ngaol. 22“Aivq bhai bhi sil nail dai khi, miqjaq bhai maqkhaiq, ulcuvq bhai maqkhaiq, neivq aivq bhai mee nia pov doeq puvq bhiq-a nail ngaol. Naol teevq phaq ga nav nl kivq haq neq, nv-nvq phaq yaq bhai gaoq haq lavq yaoq” dai, aqbhu gaq ge bhiq-a nail ngaol.

23Aq-u phao, Yeiqsul ge kovq bhiq-a nail: “Nl kivq haq neq dai, naol ge nail laiq. Neema thaq tsaol nail tsaol-aq nail haqbhoil yaoq phaq yaoq-ao nee nl kivq nail ngaol” dai, aivq bhai ge bhiq-a nail ngaol.

24Aq-u phao, aqbhu al gaq nioil nioil ail khi ge nail: “Ngal neema thaq tsaol naol. Neema thaq tsaol nail phaq aol lal dai, tsao jao-ai lavq yaoq” dai, ge bhiq-a nail ngaol.

25Tsaol-aq munl munl ma aqyu juq jaol nail bha tsaol lavq thail thaiq nail bhai, Yeiqsul ya moel-u phao, neivq aq cavq al maol bhai khaq khaq ail, “Yaq jaoq bhi jaoq ail khi naqthaoq bhiq thaoq ail nail neivq-ol, aivq nail lavqkhoel nee dov-ail yaoq. Yaq hao teevq pov iqsanl, aivq nail lavqkhoel bhai thaq gaoq aol lal dai, ngal naoq bhai daoq bivq nail ngaol” dai, ge bhiq-a nail ngaol.

26Aq-u phao, neivq al maol aqthel mail ma-ail gul gul ail, yaqyov al gaq bhai bhi bhaoq bhi ga dee dee khi mail, dov ail-a nail ngaol. Yaqyov al gaq sil-aoq thaq nail khe-ai dul nail ngel-i mail, “Aivq sil-aoq thaq nial” dai, tsaol-aq mee nia gaq ge nail ngaol. 27Thail hai ngaol-aoq, Yeiqsul aivq nail aqlavq bhai nieivq thaiq khi he thul bhiq-a nail ngel-i mail, aivq thul lal-a nail ngaol.

28Yeiqsul ilkhaol bha aol lai khi, aivq teevq gaq taivq-ail jaol-u phao, aivq nail yaq laol juq neq, “Khul khi mail nv juq neivq al maol bhai maq the dov kivq nail-aiq” dai, nal daiq bhiq-a nail ngaol.

29“Geeq laoq hal nail phaq maq ngel nail neq, neivq al phaq bhai maq the dov kivq ail” dai, Yeiqsul aqyu juq bhai ge bhiq-a nail ngaol.

“Ngal ya sil naol” dai, Yeiqsul teevq pov gaoq ge nail ganl

30Aqyu juq a bhai nee dov-ail khi, Gaq liq lail milkhaoq phao ail-a nail ngaol. Aqyu juq ail thail thaiq nail ganl, Yeiqsul tsaol-aq teevq gaq bhai iqsanl maq bhi heeq kivq movq-ail. 31Khul khi mail dai ngal-aq neq, aivq yaq laol juq bhai niail hai cavq bhiq thail thaiq nail ngaol: “Tsaol-aq nail Yaqyov neq, tsaol-aq yaq nail aqlavq lavqkhoel bhai av bhiq nail bhai ya daq nail ngaol. Aqyu juq aivq bhai tavq heivq nail ngaol. Tavq heivq khi hail n kev lal haq neq, aivq gaoq doevq kovq lal nail ngaol” dai, aqyu juq bhai ge bhiq-a nail ngaol. 32Aqyu juq daoq al daoq bhai maq gov heeq nia khi ngaol-aoq, aivq bhai maq nal daiq tseq-ai bhiq-ail.

Khul gaq yu nee maq tsil eeq nail ganl

33A bhai nee ngal-aq, aqyu juq Gaq bheiq neiq oq meenq bhai ail kev-a nail ngaol. Yeiqsul ilkhaol lavqkhoel bhai jaol-u phao, “Nul juq gail phail bhai lee-u phao khul nail ganl nee jil pheel jaq lao nail-aiq” dai, aivq yaq laol juq bhai nal daiq bhiq-a nail ngaol. 34Thail hai ngaol-aoq, aqyu juq aq tsi tsu dai, jaol nail ngaol. Khul khi mail dai ngal-aq neq, “Ngadao juq nail lavqkhoel bhai khul gaq eeq jaiq nail-aiq” dai, aqyu juq gail phail lail ma bhai teevq gaq nee teevq gaq jil pheel jaq-a nail ngaol.

35A bhai nee ngal-aq, Yeiqsul jaol deel khi, yaq laol tsel-nvq gaq bhai khul khi ge bhiq-a nail: “Yu nail iqmoeq bhai jaol movq nail tsaol-aq neq, yu nail haoqnao ya jaol khi, iqsanl nail yaqkav iqmoeq ya jiovq nail ngaol” dai, ge bhiq-a nail ngaol.

36Al ovqtavq, aqyu juq nail gaoltsi bhai aivq yaqnoil teevq gaq hevq thaq-ai thaq nail ngaol. Yaq al gaq bhai aivq tsiq khi, aqyu juq bhai niail hai ge bhiq-a nail ngaol: 37“Ngaq nail aqmil kov-uvq nee, niil heel nail yaqnoil teevq gaq bhai hav-a nail tsaol-aq khul gaq maqkhaiq, ngaq bhai hav-a nail khe-ai dul nail ngaol. Ngaq bhai hav-a nail tsaol-aq neq, ngaq bhai khoel-ai leevq-a nail gaq bhai iqsanl hav-a nail khe-ai dul nail ngaol” dai, ge bhiq-a nail ngaol.

Ngadao bhai neejiav jiav nail phao maq jaol nail tsaol-aq, ngadao phao jaol nail ngaol

38Aq-u phao, Yaol haq ge nail: “Saq laq-ol, tsaol-aq teevq gaq naoq nail aqmil bhai juq juq ail, neivq bhai the dov nail bhai, nv juq ya moel-a nail ngaol. Aivq neq, ngadao juq nail munl lavqkhoel bhai maq aol nail ngel-i mail, nv juq aivq bhai lav tsoiq-a nail ngaol” dai, Yeiqsul bhai ge bhiq-a nail ngaol.

39Yeiqsul ge nail: “Aivq bhai thaq lav tsoiq. Khul khi mail dai ngal-aq neq, ngaq nail aqmil bhai juq khi bhaqaoq eeq nail phaq nl daiq bhiq nail tsaol-aq khul gaq maqkhaiq, ngaq bhai lavqtsail mail, maq ge doil-ail. 40Ngadao bhai neejiav jiav nail phao maq jaol nail tsaol-aq, ngadao phao jaol nail ngaol. 41Ngal nul juq bhai mal dil dai, ge lavq bhel. Nul juq Khali nail tsaol-aq niil dai, heeq nia khi, nul juq bhai ulcuvq teevq khaoqanq khal bhi daol lavq-a nail tsaol-aq khul gaq maqkhaiq, tsaol-aq al gaq nail geeqlaoq teevq thal-iq maq peivq ail nia-ail dai” dai, ge bhiq-a nail ngaol.

Yu nl laiq dai, hevq bheeq nail ganl

42Yeiqsul gaoq ge nail: “Ngaq bhai neema thaq tsaol nail yaqnoil teevq gaq bhai bhi nl laiq nail khul gaq maqkhaiq, aivq nail leelkhaol bhai lovmav heeq ma pheethaiq khi, iqyaq iqma bhai bavqpuvq ail nail neq, aivq nail haqbhoil meeq jaiq nail ngaol. 43Naoq nail aqlavq teevq lavq naoq bhai bhi nl laiq lavq haq neq, dev ha pivq yaoq. Aqlavq nvq lavq nvq lavq ail covq khi, maq miv ail dai miqjaq tovq nail daq ovq lao ma eel tsul bhai ya daq nail nee maq tsil, aqlavq teevq lavq maq covq dai aqdoevq doevq nail neq, naoq nail haqbhoil meeq jaiq nail ngaol.

44[Daqovq laoma eeltsul lavqkhoel bhai neq, aqyu juq bhai keivq nail lovthaoq teevq thal-iq maq sil nail nee ovqtavq, miqjaq iqsanl teevq thal-iq maq miv lai-ail.]

45Naoq nail aqkhil teevq khaoq naoq bhai bhi tsao laiq lavq haq neq, devq ceiv pivq yaoq. Aq khil nvq khaoq nvq khaoq ail covq khi, daq ovq lao ma eel tsul bhai bavq poiv lavq nail bhai ya daq nail nee maq tsil, aqkhil teevq khaoq devq ceiv khi aqdoevq ya doevq nail neq, naoq nail haqbhoil meeq jaiq nail ngaol.

46[Daqovq laoma eeltsul lavqkhoel bhai neq, aqyu juq bhai keivq nail lovthaoq teevq thal-iq maq sil nail nee ovqtavq, miqjaq iqsanl teevq thal-iq maq miv lai-ail.]

47Naoq nail maivneev teevq neev hel daiq khi naoq bhai bhi nl laiq lavq haq neq, kevq dov ha yaoq. Maiv neev nvq neev nvq neev ail covq khi, daq ovq lao ma eel tsul bhai bavq bhoel lavq nail bhai ya daq nail nee maq tsil, maivneev teevq neev taivq-ail covq khi Miqyail Milkhaoq lavqkhoel bhai ya aol lai nail neq, naoq nail haqbhoil meeq jaiq nail ngaol. 48Daqovq laoma eeltsul lavqkhoel bhai neq, aqyu juq bhai keivq nail lovthaoq teevq thal-iq maq sil nail nee ovqtavq, miqjaq iqsanl teevq thal-iq maq miv lai-ail. 49Laol bhiq nail phaq bhai cavq devq hoel dav khi, bhi haol lal nail khe-ai, tsaol-aq iqsanl bhai miqjaq-i mail laonq daiq khi, bhi haol lal nail ngaol. 50Cavq devq neq, ganl tsoiq nail ngaol. Thail hai ngaol-aoq, cavq devq niail nail phaq deq ail haq neq, khal hai khi gaoq bhi niail lal nia nail-aiq. Nul juq nail lavqkhoel bhai cavq devq bhi aol khi, teevq gaq nee teevq gaq tsaq lai jil lai khi jaol yaoq” dai, ge bhiq-a nail ngaol.

Currently Selected:

Maqkul 9: aeu

Highlight

Copy