Maqkul 4

Aqiq haiq nail ganl daoqma uqhuq daoq

1Yeiqsul ngaqkha daolbhaq bhai teevq pov gaoq cavq gaoq cov bhiq-u phao, tsaol-aq munl munl ma jil lal-a nail ngel-i mail, aivq ngaqkha lavqkhoel bhai jiav nail laovq bhai jaol deel ail-a nail ngaol. Tsaol-aq munl munl ma juq neq, ngaqkha daolbhaq bhai jaol nail ngaol. 2Aq-u phao, aivq daoqma uqhuq daoq nee mail ganl mee nia phaq cavq bhiq cov bhiq-a nail ngaol. Aivq cavq thail cov thail thaiq-u phao, niail hai ge nail ngaol: 3“Aq-u phao, aqiq haiq nail tsaol-aq teevq gaq jaol laoq thaq nail ngaol. Teevq n kev lee-u phao, aivq aqiq haiq ail-a nail ngaol. 4Aivq aqiq haiq-u phao, aqiq teevq pav ga nav juq neq, gailkhaol kovtavq bhai ga ail-a nail ngaol. A bhai nee ngal-aq, keivq-avq lee khi, aqiq al juq bhai gov jaq gil-a nail ngaol. 5Aqiq teevq pav ga nav juq neq, miltsaq bhaq nail lovmav lovyal bhai ga ail-a nail ngaol. Miltsaq aqbhaq ngel-i mail, lavqtsail mail aq jiiv jiiv dol lavq-a nail ngaol. 6Thail hai ngaol-aoq, daoqtsail maq kha navq ail-a nail ngel-i mail, nlma dov lal-u phao, nltsal mail ma-ail kav nail bhaq da nee, khuq ail kov ail-a nail ngaol. 7Aqiq teevq pav ga nav juq neq, aqgoe goeyal bhai ga ail-a nail ngaol. Aq goe jiavbuv eeq lal khi, aq jiiv al bhai uv thaiq-ai thaq nail ngel-i mail, aqheeq maq heeq lee-ail. 8Thail hai ngaol-aoq, aqiq teevq pav ga nav juq neq, miltsaq mil meeq bhai ga ail-a nail ngaol. Aqjiiv jiiv lal meeq lal khi, aqheeq mao dai heeq lee-a nail ngaol. Aq heeq hail tsel bhoil, kovq tsel bhoil khi, teevq yal bhoil mao lal-a nail ngaol.

9Naqkhaol khal covq nail tsaol-aq, nal daiq yaoq” dai, ge bhiq-a nail ngaol.

Khul khi mail daoqma uqhuq daoq nee ya cavq bhiq nail ganl

10Aq-u phao, tsaol-aq munl munl ma al juq kovq lai gil-u phao, aivq nail haoqnao tsao the nail tsaol-aq juq khi yaq laol tsel-nvq gaq, daoqma uqhuq daoq al juq nail ganl Yeiqsul bhai nal daiq-a nail ngaol. 11Yeiqsul ge kovq bhiq-a nail: “Miqyail Milkhaoq nail ganl oiltsail-ai thaq nail juq bhai, nul juq heeq nia lal-aoq nail ngaol. Thail hai ngaol-aoq, yu bhai neq, daoqma uqhuq daoq nee mail ya cavq ya cov bhiq nail ngaol. 12Khul khi mail daiq ngal-aq neq, Jal liq lavqkhoel bhai gevq-ai thaq nail khe-ai,

‘Aqyu juq hel daiq

khi ngaol-aoq,

maq hel daiq moel nia-ail,

nal daiq khi ngaol-aoq,

maq gaiq nia nail

nee ovqtavq,

maq gov heeq nia-ail.

Al heelmaq ngel ail

nul neq,

aqyu juq ngal jaol nail

bha kovq lal khi,

ngal aqyu juq nail

oeqbal phaiq bhiq naol’ ” dai,

ge bhiq-a nail ngaol.

Aqiq haiq nail ganl nail daoq ceevq ge daiq bhiq nail ganl

13Aq-u phao, Yeiqsul aqyu juq bhai gaoq ge bhiq-a nail: “Nul juq daoqma uqhuq daoq niil daoq bhai maq gov heeq kivq ail laiq. Maq gov heeq kivq haq neq, daoqma uqhuq daoq yaoq juq yaoq bhai khal hai khi gov heeq kivq nail-aiq. 14Aqiq haiq nail gaq neq, Miqyail nail daoq haiq-a nail ngaol. 15Gailkhaol kovtavq bhai haiq-a nail neq, niail hai ngaol; Miqyail nail daoq yaq gaiq-u phao, teevq pov taivq-ail neivq Saq daq lal khi, aqyu juq nail lavqkhoel-ai haiq-ai thaq nail daoq juq bhai gov ha nail bhai ge nail ngaol. 16Lovmav lovyal bhai ga ail-a nail neq, niail hai ngaol; Miqyail nail daoq ya gaiq-u phao, teevq pov taivq-ail lavqkhiq tsail nail lavqkhoel nee hav bhoel-a nail tsaol-aq bhai ge movq nail ngaol. 17Thail hai ngaol-aoq, aqyu juq daoqtsail maq kha ivq ail-a nail ngel-i mail, teevq yanq maq ngel nail neq, maq doevq nia-ail. Daoq al daoq bhaq da nee, haq nail aoq nail phaq khi mail khoeq nail jiovq nail phaq kev lee-u phao, aqyu juq teevq pov taivq-ail khaonq ha gai aivq nail ngaol. 18Tsaol-aq teevq pav ga nav juq neq, aqgoe goeyal bhai ga ail-a nail aqiq khe-ai dul nail ngaol. Aqyu juq neq, Miqyail nail daoq ya gaiq-a nail juq ngaol. 19Thail hai ngaol-aoq, miltsaq bhai jaol-u phao, khaoqlaol nail phaq, phul heel ildaoq maoqgaiq bhai lavqkhiq tsail nail phaq khi, yaoq juq yaoq bhai neekhaol jiav nail phaq neq, daoq al daoq bhai uv thaiq-ai thaq nail ngel-i mail, aqheeq maq heeq lee nia nail bhai, ge movq nail ngaol. 20Thail hai ngaol-aoq, tsaol-aq teevq pav ga nav juq neq, miltsaq mil meeq bhai ga ail-a nail aqiq khe-ai dul nail ngaol. Miqyail nail daoq ya gaiq khi hav bhoel-a nail ngel-i mail, aqheeq hail tsel bhoil, kovq tsel bhoil, teevq yal bhoil heeq lee-a nail tsaol-aq bhai ge nail ngaol” dai, ge bhiq-a nail ngaol.

Phalmanq tovq nail ganl daoqma uqhuq daoq

21Yeiqsul aqyu juq bhai gaoq ge bhiq-a nail: “Phalmanq tovq khi pheeq deel-i mail movq tsaoq-ai naol laiq. Maq ngel haq neq, jiovtsiq iqgovq bhai tsiq thaq-ai naol laiq. Phalmanq tovq khi, daqmoe bha tsiq thaq nail, maq ngel ail laiq. 22Khal oil tsail-ai thaq nail yaoq phaq yaoq-ao nee bhaq laoq kheq dai dov lal nail ngaol. Yu bhai maq bhi heeq kivq nail phaq iqsanl, phao daiq lavq nail ngaol. 23Naqkhaol khal covq nail tsaol-aq, nal daiq yaoq” dai, ge bhiq-a nail ngaol.

24Yeiqsul aqyu juq bhai gaoq ge bhiq-a nail: “Nul juq-i mail khal ya gaiq nail phaq bhai yaol phaol yaoq. Nul juq yu bhai phaiq bhiq hav bhiq-a nail khe-ai, nul juq bhai iqsanl phaiq kovq hav kovq lavq nail nee ovqtavq, al jaiq iqsanl bivq lavq nail ngaol. 25Khul khi mail dai ngal-aq neq, jiav nail tsaol-aq bhai gaoq bivq laoq nail ngaol. Maq jiav nail tsaol-aq bhai, aqyu juq-i mail khal jiav nail juq bhai, oil dov gil nail ngaol” dai, ge bhiq-a nail ngaol.

Aqiq doevq dov lal-a nail ganl daoqma uqhuq daoq

26Yeiqsul niail hai gaoq ge nail: “Miqyail Milkhaoq neq, niail hai dul nail ngaol. Tsaol-aq teevq gaq daiyal bhai aqiq haiq-a nail ngaol. 27Nvq kivq kivq lee haq neq, iq thaiq, bhaq lal haq neq, thul thul ail jaol-u phao, aqiq al aq jiiv jiiv lal eeq lal thail thaiq nail ngaol. Thail hai ngaol-aoq, aqiq al khal hai khi aq jiiv jiiv lal eeq lal nail bhai aivq maq heeq nia-ail. 28Miltsaq bhaq da nee, gov meeq lal nail ngaol. Iqmoeq gov bhoiq gov dov dov lal khi, gov nail nail lee gaq-u phao, gov nail mal lal khi, ga govq ail nail ngaol. 29Gov mi lal-u phao, tsaol-aq al gaq gaiqaoq oil khi, gov gaiq nail ngaol. Khul khi mail dai ngal-aq, gov gaiq nail yanq tsaq lal-aoq nail ngaol” dai, ge bhiq-a nail ngaol.

Gaoqpavq aq neev nail ganl daoqma uqhuq daoq

30Yeiqsul gaoq ge nail: “Miqyail Milkhaoq bhai khul phaq nee tsiqceiv daiq heeq meeq. Daoq ma uqhuq daoq khul phaq bhai juq khi, ge daiq bhiq heeq. 31Miqyail Milkhaoq neq, gaoqpavq nail aq neev khe-ai dul nail ngaol. Gaoqpavq aq neev al bhai miltsaq bhai haiq-u phao, aqiq iqsanl nail lavqkhoel nee yu nee maq tsil nil nail phaq, pevq nail ngaol. 32Thail hai ngaol-aoq, doevq lal khi moe lal-u phao, heeqlaoq gaoqjal iqsanl nee maq tsil eeq nail ngaol. Lavqmeiv meiv lee khi eeq lal-u phao, nqtavq phao bhail nail keivq-avq juq aq haiq bhai aq kheel kheel lee nail ngaol” dai, ge bhiq-a nail ngaol.

Yeiqsul daoqma uqhuq daoq yuq-a nail ganl

33Aqyu juq gov heeq nia nail khe-ai taivq-ail, Yeiqsul al heel nail daoqma uqhuq daoq mao dai yuq yuq ail, aqyu juq bhai Miqyail nail daoq cavq bhiq cov bhiq-a nail ngaol. 34Daoq ma uqhuq daoq nee maq ngel nail neq, aivq aqyu juq bhai maq cavq maq cov bhiq-al. Thail hai ngaol-aoq, aivq nail yaq laol juq taivq-ail jaol-u phao, ganl al iqsanl mail aqyu juq bhai ge daiq bhiq-a nail ngaol.

Yeiqsul lilmoel bhai bhiq naq lai-a nail ganl

35Aq-u n-gaol, nqkivq kivq lee-u phao, “Ngaq kha a phao lel khel bha ceiv ail bhel” dai, Yeiqsul aivq nail yaq laol juq bhai ge bhiq-a nail ngaol. 36Aqyu juq tsaol-aq munl munl ma nee pav ail khi, aivq jaol deel-nvq thaq nail laovq al laovq nee mail yaq laol juq aivq bhai hel aivq-a nail ngaol. Laovq yaoq juq yaoq iqsanl, aqyu juq nee mail ail-a nail ngaol. 37Aq-u phao, lilmoel lil ma bhoe lal khi, ulcuvq eel khaol thaoq dee dee nail ngel-i mail, laovq lavqkhoel bhai ulcuvq bhee lal thail thaiq nail ngaol. 38Yeiqsul neq, laovq nail daoqthaoq phao iq goiq goiq khi iq thaiq kov-ai thaq nail ngaol. Yaq laol juq aivq bhai lav noeq khi, ge bhiq-a nail: “Saq laq-ol, nv juq ga nevq heivq gil nail kev lal aivq nail ngaol. Naoq bhai neq, khaoq maq laol ail laiq” dai, ge bhiq-a nail ngaol.

39Yeiqsul thul lal khi, lilmoel bhai “Aq tsi tsu dai jaol yaoq” dai, khaq khi, eel khaol bhai naq lai yaoq dai, ge bhiq-u phao, lilmoel lil ma bhoe nail naq lai khi, aq tsi tsu dai pevq ail-a nail ngaol.

40A bhai nee ngal-aq, Yeiqsul yaq laol juq bhai ge bhiq-a nail: “Khul khi mail nul juq thoiq dai dai ail gee sil nail-aiq. Neema thaq tsaol nail neema maq aol ail laiq” dai, aqyu juq bhai nal daiq-a nail ngaol.

41Aq-u phao, aqyu juq gee sil dee dee lal bhiq khi, teevq gaq nee teevq gaq ge nail: “Tsaol-aq thoil gaq khalheel nail tsaol-aq ngel-ail. Lil moel khi eel khaol iqsanl aivq nail daoq nal daiq-il” dai, ge nail ngaol.

Currently Selected:

Maqkul 4: aeu

Highlight

Copy