Genesis 48

Iqmoeq 48

Yaqkov, Maqnaqseiq dai khi Eilphaqlaqyinq bhai geeqlaoq bivq-a nail ganl

1Teevq n kev lal-u phao, Yaqkov jaol hal maq dov nail ganl yu Yaolsai bhai cavq gaiq lai-a nail ngaol. Al heel ngel-i mail, Yaolsai neq, aivq nail yaqyov Maqnaqseiq dai khi Eilphaqlaqyinq hevq khi, Yaqkov jaol nail bha ail-a nail ngaol.

2Yaqkov neq, aivq nail yaqyov Yaolsai kev lal-a nail bhai ya gaiq-u phao, gaq iqsanl mail hal dov-a nail nee ovqtavq, iq thaiq duq bhai jaol deel khi jaol lee-a nail ngaol.

3Yaqkov neq, Yaolsai bhai niail hai ge bhiq-a nail ngaol: "Iqsanl nail kovtavq bhai uv thaiq nail bhaqaoq eeq nail Miqyail neq, Khaqnanq milkhaoq Lulsav meenq bhai ngal jaol-u phao, ngaq bhai bhi moel lavq khi geeqlaoq bivq lavq-a nail ngaol.

4Al ovqtavq, aivq ngaq bhai ge lavq-a nail: 'Ngal naoq bhai bhi jeq bhi el-ail khi, naoq-ai nee yavq kha lee thaq nail yaq juq, bhi mao lal nail ngaol. Naoq nail lavqkhoel nee jeq-e jaq-a juq mao dai, bhi dov lal khi, naoq-ai nee mail yavq kha lee thaq nail yaq juq bhai milkhaoq niil khaoq, nqmaq maqluv halyeel bivq ceiv ceiv nail ngaol' dai, iqsanl ge lavq-a nail ngaol.

5Ngal Iljiltuv milkhaoq bhai maq kev lee-u phao, bhao-a nail naoq nail yaqyov nvq gaq niil neq, ngaq-ai nee mail tavq nail ngaol. Eilphaqlaqyinq dai khi Maqnaqseiq neq, Lulbheiq dai khi Silmiqoq khe-ai ngaq nail yaqyov juq pevq nail ngaol.

6Thail hai ngaol-aoq, haoqnao khe ya nail naoq nail yaqyov juq neq, naoq nail ngaol. Yaqyov al juq neq, Eilphaqlaqyinq dai khi Maqnaqseiq nee mail teevq tiv jaiqbhoil ya nail juq pevq nail ngaol.

7Khul khi mail ngal thail hai nl nail dai, ge haq neq, aq-u phao ngal, Paqdanq Aqlanq nail miltsaq nee kovq lal-u phao, naoq nail aqma Laqkheiqlal neq, Khaqnanq milkhaoq Eilphaqlaqyinq meenq nail aqjail bhai sil-a nail ngaol. Aq-u phao, ngal noeq haq dee dee nail lavqkhoel nee, aivq bhai Eilphaqlaqyinq meenq bha lai nail gailkhaol aqjail bhai duq pheeq bhiq-a nail ngaol" dai, ge bhiq-a nail ngaol. (Eilphaqlaqyinq meenq bhai neq, Bhaiqlaiqhaiq meenq dai iqsanl khul nail ngaol.)

8Yaqkov neq, Yaolsai nail yaqyov nvq gaq bhai moel-u phao, "Yaqyov niil nvq gaq neq, khaq sil gaq" dai, nal daiq bhiq-a nail ngaol.

9Yaolsai iqsanl, "Miqyail neq, ngal Iljiltuv milkhaoq bhai jaol-u phao, bivq lavq-a nail yaqyov nvq gaq ngaol" dai ge kovq bhiq-a nail ngaol. Aq-u phao, Yaqkov neq, "Aqyu nvq gaq ngal jaol nail bha hel lavq yaoq. Ngal geeqlaoq bivq lal" dai, ge bhiq-a nail ngaol.

10Yaqkov neq, joiqmaoq maoq lai-aoq nail ngel-i mail, maivneev aqmeeq dai, maq moel haol nia-ail. Yaolsai neq, aivq nail yaqyov juq bhai Yaqkov nail aqjail bha khul laivq bhiq-u phao, Yaqkov neq, yaqyov al nvq gaq bhai phal thaiq khi mail moeqsaol saol bhiq-a nail ngaol.

11Al ovqtavq, Yaolsai bhai, "Ngal neq, naoq-ai teevq pov gaoq ya moel nail dai, maq noeq-al. Thail hai ngaol-aoq, Miqyail neq, niil aq-il, ngaq-ai naoq nail yaqyov juq bhai iqsanl bhi moel lavq-a nail ngaol" dai, ge bhiq-a nail ngaol.

12Aq-u phao, Yaolsai neq, aivq nail yaqyov juq bhai, aivq nail aqbhu nail peevqceevq nee hevq dov khi, aivq nail aqbhu nail sivtavq bhai maivphaoq miltsaq bha gaol beivq-a nail ngaol.

13A bhai nee ngal-aq, aivq nail yaqyov Eilphaqlaqyinq bhai neq, aivq aqlavq lavqmal-i mail aivq nail aqbhu Yaqkov nail aqlavq lavqtsel phao maqkhaiq, Maqnaqseiq bhai neq, aivq nail aqlavq lavqtsel-i mail, aqlavq lavqmal phao maqkhaiq, bhi thul phaol-a nail ngaol.

14Thail hai ngaol-aoq Yaqkov neq, aivq nail aqlavq khaoq laoq khaoq pav tsaoq khi aivq nail lavqtsel lavq neq, yaqyov aqivq gaq nail uqhuq kovtavq bhai maqkhaiq, lavqmal lavq neq yaqyov jaqbheq gaq nail uqhuq kovtavq bhai maqkhaiq, bavq dav bhiq-a nail ngaol.

15A bhai nee ngal-aq, aivq Yaolsai bhai geeqlaoq niail hai bivq-a nail ngaol:

"Ngaq nail aqbhal Aqbhaqlaqhaq dai khi

ngaq nail aqbhu Ilcav-i mail

saljial ivq nail lavqkhoel nee

uqhuq thaoq nail Miqyail-ol,

ngaq nail doevqyeel bhai yaq n n-gaol kev dai,

yaol lovq nail gaq khe-ai

hel daiq phail lavq nail Miqyail-ol,

16ngaq bhai haq nail aol nail iqsanl nee

bhi jel-ail lavq nail nqtavq gaqkhoel

khe-ai iqsanl dul nail Miqyail-ol,

yaqyov niil nvq gaq bhai geeqlaoq bivq dei-eiq.

Ngaq nail aqmil,

ngaq nail aqbhal Aqbhaqlaqhaq dai khi

aqbhu Ilcav nail aqmil neq,

yaqyov niil nvq gaq bhaq da nee ivq dei-eiq.

Aqyu nvq gaq nee

yavq kha lee thaq nail yaq juq bhai

bhi jeq bhi el-ail dei-eiq" dai,

geeqlaoq bivq-a nail ngaol.

17Yaolsai neq, aivq nail aqbhu Eilphaqlaqyinq nail uqhuq kovtavq bhai, lavqmal lavq bavq dav-ai thaq nail bhai ya moel-u phao, neema maq tsaq dai, pevq lal bhiq-a nail ngaol. Al heel ngel-i mail, Eilphaqlaqyinq nail uqhuq kovtavq khe aqlavq Maqnaqseiq nail uqhuq kovtavq bhai nieivq thaiq khi, bhi bavq dav phal-a nail ngaol.

18Aivq aivq nail aqbhu bhai, "Aqbhu-ol, naol aqlavq bavq dav-ai thaq nail maq tsaq-il. Niil gaq neq yaqyov aqivq gaq ngaol. Aivq nail kovtavq bhai lavqmal lavq bavq dav bhiq yaoq" dai, ge bhiq-a nail ngaol.

19Thail hai ngaol-aoq, aivq nail aqbhu ge nail: "Yaqyov-ol, ngal heeq kivq nail ngaol. Maqnaqseiq nail jeq-e jeq-e ma pevq lal khi ngaol-aoq, aivq nail jaqbheq neq, aivq nee maqtsil, eeq jaiq lal khi, aivq nail jeq-e iqsanl, jeq-e jaq-a mao dai pevq lal nail ngaol" dai, ge bhiq-a nail ngaol.

20Al ovqtavq, Yaqkov neq, yaqyov al nvq gaq bhai geeqlaoq niail hai bivq-a nail ngaol:

"Ilsaqleiqlav nail tsaol-aq juq neq,

nul juq nail aqmil bhai juq khi

geeqlaoq bivq lavq nail ngaol.

Aqyu juq niail hai ge lal nail ngaol:

'Eilphaqlaqyinq dai khi Maqnaqseiq khe-ai,

naoq bhai bhao lee ya lee nail galduq,

Miqyail tsao jao-ai bhiq dei-eiq" dai,

ge lal nail ngaol' dai,

aq-u n-gaol, yaqyov al nvq gaq bhai geeqlaoq niail hai gaoq bivq-a nail ngaol. Al heel ngel-i mail, Yaqkov neq, Eilphaqlaqyinq nail aqmil bhai Maqnaqseiq nail aqmil sivtavq phao bhi jiav-a nail ngaol.

21A bhai nee ngal-aq, Yaqkov neq, Yaolsai bhai ge bhiq-a nail: "Ngal neq, sil lee-aiq nail ngaol. Thail hai ngaol-aoq, Miqyail neq, nul juq nee mail teevq gaq khe-ai jaol khi, aqphiq aqbhal juq-i mail jaol-ail ceevq-a nail Khaqnanq milkhaoq bha gaoq hevq kol laivq lavq nail ngaol.

22Ngaq nail heeqnav dai khi thaoma juq bhai yuq khi, Aqmaolliv nail tsaol-aq khe dev ya-ai thaq nail miltsaq meeq dee dee nail Seiqkhinq miltsaq al, naoq nail algao juq bhai bivq nail nee maqtsil, ngal naoq bhai bivq nail ngaol" dai, ge bhiq-a nail ngaol.

Currently Selected:

Genesis 48: aeu

Highlight

Copy