Genesis 46

Iqmoeq 46

Yaqkov dai khi aivq nail phaqyaq ma yaq Iljiltuv nail milkhaoq bha ail-a nail ganl

1Yaqkov neq, aivq nail ildaoq maoqgaiq juq iqsanl mail oil khi, gailkhaol dov lee-a nail ngaol. Aivq Bhaqlaqseiqbhal dai khul nail meenq bhai ail kev-u phao, aivq nail aqbhu Ilcav nail Miqyail bhai laol bhiq-a nail ngaol.

2Nqkiv livmav phao, Miqyail neq, aivq bhai aqhaqlal lavqkhoel nee, phao daiq bhiq khi "Yaqkov-ol, Yaqkov-ol" dai, khul-a nail ngaol. Yaqkov iqsanl "Ngal niai jaol naol" dai, ge kovq bhiq-a nail ngaol.

3Miqyail ge nail: "Ngal neq, Miqyail ngaol. Naoq nail aqbhu nail Miqyail pevq nail ngaol. Naol Iljiltuv milkhaoq bhai ail nail galduq thaq gee sil. Milkhaoq al khaoq nail lavqkhoel-ai, ngal naoq nail jeq-e bhai tsaol jeq-e jeq-e ma bhi pevq lal nail ngaol.

4Ngal naoq-ai nee mail teevq gaq khe-ai, Iljiltuv milkhaoq bhai lee khi ngaol-aoq, naoq nail jeq-e jaq-a bhai nia teevq pov gaoq hevq kol lavq nail ngaol. Thail hai ngaol-aoq, naol neq, Yaolsai-i mail tsu lovq nail lavqkhoel Iljiltuv milkhaoq bhai ya sil nail ngaol" dai, ge bhiq-a nail ngaol.

5A bhai nee ngal-aq Yaqkov neq, Bhaqlaqseiqbhal nail meenq nee mail dov lee-a nail ngaol. Aivq nail yaqyov juq neq, aqyu juq nail aqbhu Yaqkov, aqyu juq nail khaqma juq dai khi yaqmiq yaqyov juq bhai, Phaqlaol-i mail bhi thel lavq-a nail moeqphaq lavlaoq bhai bhi jeeq-a nail ngaol.

6Aqyu juq neq, Khaqnanq milkhaoq khe ya-a nail jaiqyaq juq dai khi, ildaoq maoqgaiq juq oil khi Iljiltuv milkhaoq bhai ail-a nail ngaol.

7Yaqkov neq, aivq nee mail daq-n khi, aivq nail yaq juq dai khi phaqyaq ma yaq aqjievq liqdee juq iqsanl mail, Iljiltuv milkhaoq bha ail gil-a nail ngaol.

8Yaqkov nee mail Iljiltuv milkhaoq bha ail kev-a nail, aivq nail yaqyov juq khi aqjievq juq nail aqmil juq neq, niail hai ngaol: Yaqyov aqivq ivq saq gaq neq Lulbheiq ngaol.

9Lulbheiq nail yaqyov juq neq, Haqnol, Phaqlul, Heiqsaqlonq dai khi Khaqmil, niil juq pevq nail ngaol.

10Silmiqoq nail yaqyov juq neq, Yiqmuqlal, Yaqminq, Aolhav, Yaqkhinq, Saolhaqlav dai khi Khaqnanq nail yaqmai-aq nee ya-a nail yaqyov Saq-ul, niil juq pevq nail ngaol.

11Leiqbhil nail yaqyov juq neq, Geiqlaqsonq, Khaolhav dai khi Meiqlaqlil, niil juq pevq nail ngaol.

12Yuldav nail yaqyov juq neq, Seiqlav, Phaqlail, Saqlav, Eillav dai khi Aolnanq, niil juq pevq nail ngaol. Eillav dai khi Aolnanq neq, Khaqnanq milkhaoq bha sil-a nail ngaol. Phaqlail nail yaqyov juq neq, Heiqsaqlonq dai khi Haqmullav ngaol.

13Ilsaqkhaq nail yaqyov juq neq, Taollav, Phul-aq, Yaqsul dai khi Silmoqlonq, niil juq pevq nail ngaol.

14Seiqbhullonq nail yaqyov juq neq, Seiqleivq, Eillonq dai khi Yaqleiqlal, niil juq pevq nail ngaol.

15Niil juq neq Paqdanq Aqlanq nail miltsaq bhai jaol-u phao, Yaqkov nail khaqma Leiqaq-i mail bhao-a nail yaqyov juq pevq nail ngaol. Yaqyov al juq taivq-ail maq ngel nail, Dilnav dai khul nail yaqmiq gail jaol-ai haq nail ngaol. Al heel ngel-i mail, Leiqaq nee ya-a nail yaqmiq yaqyov juq dai khi, aqjievq juq iqsanl mail neq, 33 gaq bhee nail ngaol.

16Gavq nail yaqyov juq neq, Silphiqonq, Haqgil, Sulniv, Eilsaqbhonq, Eilliv, Aqlaoldiv dai khi Aqleiqlil, niil juq pevq nail ngaol.

17Aqseiqlav nail yaqyov juq neq, Ilmaqnav, Ilsaqbhaq, Ilsaqbhiq, Beiqliqaq dai khi, aqyu juq nail jaqbheq yaqmiq Siqlal, niil juq pevq nail ngaol. Bheiqliqaq nail yaqyov juq neq, Heiqbheiq dai khi Maqkhillav ngaol.

18Yaqkov nail yaq juq khi aqjievq niil 16 gaq neq, Laqbhanq-i mail aivq nail yaqmiq Leiqaq bhai bivq-a nail yaqkav Sillaqphal nee ya-a nail yaq juq khi aqjievq juq pevq nail ngaol.

19Yaqkov nail khaqma Laqkheiqlal neq, Yaolsai dai khi Bheinqyaqminq dai khul nail yaqyov nvq gaq bhao-a nail ngaol.

20Yaolsai Iljiltuv milkhaoq bhai jaol-u phao, Aolnav meenq khe philma Paoltilpheiqlav nail yaqmiq Aqseiqnav nee mail ya-a nail yaqyov nvq gaq neq, Maqnaqseiq dai khi Eilphaqlaqyinq ngaol.

21Bheinqyaqminq nail yaqyov juq neq, Bheiqlav, Bheiqkaq, Aqsaqbheiqlal, Geiqla, Naqmanq, Eilhil, Laolsav, Mulpinq, Hulpinq dai khi Aqlaqdav, niil juq pevq nail ngaol.

22Niil 14 gaq neq, Yaqkov nail khaqma Laqkheiqlal nee ya-a nail yaqyov juq nee mail doevq lee-a nail juq ngaol.

23Danq nail yaqyov neq, Hulsinq ngaol.

24Naqtaqlil nail yaqyov juq neq Yaqsiqlav, Gulnil, Yeiqseiqlav dai khi Sillainq, niil juq pevq nail ngaol.

25Yaqkov nail nail yaqyov juq khi aqjievq niil sivq gaq neq, Laqbhanq-i mail aivq nail yaqmiq Laqkheiqlal bhai bivq-a nail yaqkav Bhillaqhaq nee mail ya-a nail yaq juq khi aqjievq juq pevq nail ngaol.

26Yaqkov nail khiqma juq maq ge dai, Iljiltuv milkhaoq bhai ail-a nail Yaqkov nee mail yavq kha lee thaq nail yaq juq neq, iqsanl mail 66 gaq bhee nail ngaol.

27Iljiltuv milkhaoq bhai Yaolsai neq, yaqyov nvq gaq jaol nail ngaol. Al heel ngel-i mail, Iljiltuv milkhaoq bhai kev ail-u phao, Yaqkov nail phaqyaq ma yaq neq, iqsanl mail 70 gaq bhee nail ngaol.

28Yaqkov neq, Gaolsinq dai khul nail miltsaq bhai khal hai ya-ail nail-aiq dai, Yaolsai bhai nail daiq lai nail haqbhoil, Yuldav bhai iqmoeq khoel gai-aivq-a nail ngaol. A bhai nee ngal-aq, aqyu juq gail Gaolsinq bhai ail kev-a nail ngaol.

29Yaolsai gail, aivq nail aqbhu Yaqkov bhai hav lav lai nail galduq, Gaolsinq bhai moeqphaq lavlaoq the khi mail, lai-a nail ngaol. Aivq nail aqbhu jaol nail bha kev lai-u phao, teevq pov taivq-ail, aivq nail aqbhu bhai phal thaiq-ai thaq khi, nioil dee dee-a nail ngaol.

30Yaqkov Yaolsai bhai ge bhiq-a nail: "Ngaq nail maivneev nee naol aqdoevq jaol-ai haq nail bhai, ya moel-a nail ngel-i mail, lavqkhiq tsail khi sil maol tsaol yaoq nail ngaol" dai, ge bhiq-a nail ngaol.

31A bhai nee ngal-aq, Yaolsai neq, aivq nail algao juq dai khi aivq nail aqbhu nail phaqyaq ma yaq juq bhai ge bhiq-a nail: "Ngal Phaqlaol jaol nail bha ail khi 'Khaqnanq milkhaoq khe jaol nail ngaq nail aqbhu nail ildaoq juq dai khi, ngal nail mailnail juq nail ildaoq juq, ngal jaol nail bha lee-aoq nail ngaol.

32Aqyu juq neq, jaiqyaq tsu nail tsaol-aq juq pevq nail ngaol. Al heel ngel-i mail, aqyu juq neq, yaol, civqmeiv dai khi khal jiav nail ildaoq maoqgaiq juq iqsanl mail oil leevq thaq nail ngaol' dai, ge bhiq lai la.

33Al heel ngel-i mail, Phaqlaol nul juq bhai khul khi, nul juq khul nail ganl nl jaq nail daiq nal daiq lal haq neq,

34'Nv juq neq, aqphiq aqbhal nail jaoq-ao nee mail yaq n n-gaol kev dai, jaiqyaq tsu tsu-ail jaol nail juq ngaol' dai, aivq bhai ge bhiq yaoq. Thail hai ge bhiq haq neq, aivq Gaolsinq nail miltsaq bhai bhi jaol lavq nail ngaol" dai, ge bhiq-a nail ngaol. Khul khi mail dai ngal-aq, Iljiltuv nail tsaol-aq juq neq, jaiqyaq tsu nail juq bhai aqjiivq aqcavq nail tsaol-aq dai, hel daiq theq nail ngel-i mail Yaolsai neq, aqyu juq bhai thail hai bhi ge-a nail ngaol.

Currently Selected:

Genesis 46: aeu

Highlight

Copy