Genesis 43

Iqmoeq 43

Yaolsai nail mailnail juq Iljiltuv milkhaoq bha gaoq ail-a nail ganl

1Khaqnanq milkhaoq bhai moevq nail sivq nail phaq maq gil lai dai, jiav nail ngaol.

2Iljiltuv nee mail ul lavq-a nail gov jaq gil-u phao, Yaqkov neq, aivq nail yaqyov juq bhai ge bhiq-a nail: "Iljiltuv milkhaoq bha kovq-ail khi mail, gov gaoq ul-ail yaoq" dai, khoel bhiq-a nail ngaol.

3Thail hai ngaol-aoq, Yuldav neq, aivq nail aqbhu bhai ge bhiq-a nail: "Iljiltuv milkhaoq bhai uv thaiq nail gaq neq, nv juq nail jaqbheq bheqsaq gaq maq hel leevq haq neq, aivq nail sivtavq bhai maq ya aol lal-ail dai, savtivq bivq lavq-a nail ngaol.

4Naol nv juq nail jaqbheq bheqsaq gaq bhai nv juq nee mail bhi ail nail neema tsaq haq neq, nv juq ail khi, naoq nail haqbhoil gov ul-ail nail ngaol.

5Thail hai ngaol-aoq, naol jaqbheq bheqsaq gaq bhai nv juq nee maq bhi ail lavq haq neq, 'Nul juq nail jaqbheq bheqsaq gaq maq aol haq neq, ngaq nail sivtavq bhai maq ya aol lal-ail' dai, ge-ai thaq nail ngel-i mail, nv juq bhai gail maq ail tseq-il" dai, ge bhiq-a nail ngaol.

6Aq-u phao, Yaqkov ge nail: "Nul juq bhai jaqbheq teevq gaq jaol-ai haq nail dai, aivq bhai khul khi mail ge bhiq-a nail-aiq. Ngaq bhai neema noeq haq heeq phaq-ail khul khi mail, nii dai dai-ail nl lavq nail-aiq" dai, ge bhiq-a nail ngaol.

7Aqyu juq ge nail: "Aivq neq, ngadao nail phaqyaq ma yaq nail ganl yavq yavq-ai nal daiq lavq-a nail ngaol. Aivq ge nail: 'Nul juq nail aqbhu doevq-ai haq naol laiq. Nul juq bhai jaqbheq jaol-ai haq naol laiq' dai, nal daiq lavq-a nail ngaol. Nv juq gail aivq-i mail khal nal daiq nail khe-ai, ge kovq bhiq-al teevq-eel ngaol. Aivq neq, nv juq nail jaqbheq bhai Iljiltuv milkhaoq bha bhi hel leevq lavq nail dai, nv juq khal hai khi mail heeq kivq nail-aiq" dai, ge kovq bhiq-a nail ngaol.

8Aq-u phao, Yuldav neq, aivq nail aqbhu bhai ge bhiq-a nail: "Naoq nail yaqyov bhai ngaq-ai nee mail bhi lee yaoq. Niil aq-il gailkhaol dov-ail yaoq nail ngaol. Maq ngel haq neq, ngadao juq maq ya jaq mail ya sil gil nail ngaol.

9Ngaq nail aqmaol aivq bhai aqmeeq-ai hel daiq phail bhiq nail ngaol. Aivq bhai naol jaol nail bha maq hevq kol lavq kivq haq neq, ngaq nail teevq yeel yeel lao bhai, naol oeqbal thaq dei-eiq.

10Ngadao juq niail hai maq he nii maq he dao-a nail kheel nul-uq neq, Iljiltuv milkhaoq bha nvq pov ail khi mail, kovq kev lal kivq-ao nail ngaol" dai, ge bhiq-a nail ngaol.

11Aq-u phao aqyu juq nail aqbhu ge nail: "Thail hai phal-iq neq, niail hai lav sav yaoq. Khaqnanq milkhaoq khe jiav nail khal meeq jaiq nail yalkav pevq nail bhaq laq nail aqtseel micil, bhaiqtsil bhaiqeel micil, Bheiqdeiqlal dai, khul nail aqbhaol nee dov lee thaq nail huqbhiq nil nail khaqjiq micil, Mullaq nail aqtseel micil, abhai aqniul micil, bhaq danq abhai micil, daqiq bhai oil bhoel khi kovpavq bivq ail yaoq.

12Nul juq nail daqiq bhai oil bhoel lavq-a nail phul bhai gaoq ya bivq kovq nail ngel-i mail, phul nvq bhoil oil-aivq yaoq. Oil bhoel lavq thaq nail phul neq, aqyu juq lav bheeq khi mail oil bhoel lavq thaq nail khe-ai, dul nail ngaol.

13Nul juq nail jaqbheq hevq khi tsaol-aq al gaq jaol nail bha ail yaoq.

14Nul juq tsaol-aq al gaq nail sivtavq bhai aol lai-u phao, aivq Silmiqoq dai khi Bheinqyaqminq bhai phaiq kovq bhiq nail haqbhoil, iqsanl nail kovtavq bhai uv thaiq nail bhaqaoq eeq nail Miqyail nul juq bhai gaoq haq gaiq-a bhiq dei-eiq. Thail hai ngaol-aoq, ngal ngaq nail yaqyov juq bhai ya sunq lao haq neq, ya sunq nail teevq-eel ngaol" dai, ge bhiq-a nail ngaol.

15A bhai nee ngal-aq neq, aqyu juq neq, kovpavq aqtoev dai khi, phul nvq bhoil oil-a nail nee ovqtavq, Iljiltuv milkhaoq bha dov ail-a nail ngaol. Aqyu juq nee mail teevq gaq khe-ai, Bheinqyaqminq gail, tsao thel-aivq-a nail ngaol. Milkhaoq al khaoq bhai kev ail-u phao, aqyu juq Yaolsai nail sivtavq bhai thul phaol lai-a nail ngaol.

16Yaolsai neq, aqyu juq nee mail teevq gaq khe-ai, Bheinqyaqminq hel leevq thaq nail bhai ya moel-u phao, aivq nail ilkhaol khe hel daiq phail nail aqivq teevq gaq bhai, "Tsaol-aq niil juq, ngaq nail ilkhaol bha khul-aivq yaoq. Jaiqyaq teevq maol heivq khi jaltsoiq bhi nl jaq yaoq. Ngal aqyu juq nee mail teevq gaq khe-ai aoq n jaq tavq nail ngaol" dai, khul bhiq-a nail ngaol.

17Aqivq al gaq gail, Yaolsai-i mail khoel bhiq-a nail khe-ai, aqyu juq bhai ilkhaol bha hel-aivq bhiq-a nail ngaol.

18Yaolsai nail mailnail juq neq, aivq nail ilkhaol bha bhi hel-aivq thail thaiq-u phao, "Iqmoeq-u khe pov, ngadao juq nail daqiq bhai phul oil bhoel lavq-a nail ganl nee mail tavq lai khi, aivq neq, ngadao juq bhai nieivq, yaqkav bhi jiovq lavq nail nee ovqtavq, moeqphaq laljieiv juq iqsanl oil lavq nail khul-il" dai, ge ge-ail, gee sil dee dee-ai bhiq nail ngaol.

19Al heel ngel-i mail, aqyu juq neq, Yaolsai nail ilkhaol govkhoiq bhai aol kev lai-u phao, Yaolsai nail ilkhaol khe bhi hel daiq phail thaq nail aqivq al gaq bhai ge bhiq-a nail:

20"Aqivq gaq-ol, nv juq neq, milkhaoq niil khaoq bhai gov ul nail haqbhoil, gaq-u phao gail, teevq pov lee-aoq nail ngaol.

21Ilkhaol bha kovq lai thail thaiq-u phao, gail phail lail ma bhai nqkiv phao gaq naq naq-u bhai, daqiq phao daiq-u phao neq, yaoq gaq yaoq-ao nee nail daqiq lavqkhoel bhai neq, yovqgavq nail phul iqsanl mail aol nail bhai, ya moel-a nail ngaol. Al heel ngel-i mail, nv juq phul al niil aq-il gaoq oil kol leevq-a nail ngaol.

22Gov gaoq ul nail galduq, phul al jaiq iqsanl mail gaoq oil leevq-a nail ngaol. Nv juq nail daqiq bhai khaq sil gaq-i mail phul oil bhoel-ai lal thaq nail dai, maq heeq kivq-ail" dai, ge bhiq-a nail ngaol.

23Aqivq al gaq ge nail: "Thaq gee sil. Neema aqsal sal dai, thaq yaoq. Nul juq dai khi nul juq nail aqbhu nail Miqyail neq, nul juq nail gov, daqiq bhai nul juq nail galduq, phul thoil oil bhoel bhiq thaq nail niil. Nul juq nail gov aqphoiq ngal ya-aoq nail ngaol" dai, ge bhiq-a nail ngaol. A bhai nee ngal-aq, Silmiqoq bhai aqyu juq jaol nail bha hevq dol leevq bhiq-a nail ngaol.

24Aqivq al gaq neq, aqyu juq bhai ilkhaol lavqkhoel bha bhi aol lai-a nail ngaol. Aqyu juq nail aqkhil bhi tsiq nail galduq, ulcuvq bivq khi aqyu juq nail moeqphaq laljieiv bhai aqjal bhi jaq-a nail ngaol.

25N-gaol laol ma phao, Yaolsai neq, aqyu juq nee mail teevq gaq khe-ai, aoq jaq tavq lee nail dai, ya gaiq-a nail ngel-i mail, aqyu juq-i mail oil leevq-a nail kovpavq bhai aqmeeq meeq dai, lainq thaq gai-a nail ngaol.

26Yaolsai ilkhaol bha kovq kev ail-u phao, aqyu juq neq, aqyu juq-i mail oil leevq-a nail kovpavq juq bhai ilkhaol lavqkhoel bha oil bhoel lavq khi, Yaolsai bhai bivq-a nail ngaol. Aqyu juq Yaolsai nail sivtavq bhai peevqceevq kovq doiq doiq-a nail nee ovqtavq, uqhuq miltsaq bhai gaol beiv khi jaol-a nail ngaol.

27Yaolsai neq, aqyu juq bhai daoq tsaoq phuq gaq-al nee ngal-aq, "Nul juq-i mail ge nail nul juq nail aqbhu joiqmaoq, jaol hal dov-ail laiq. Aivq aqdoevq jaol-ai haq nail ngaol laiq" dai, nal daiq bhiq-a nail ngaol.

28Aqyu juq ge nail: "Naoq nail yaqkav pevq nail nv juq nail aqbhu neq, jaol hal dov nail lavqkhoel, doevq-ai haq nail ngaol" dai, ge kovq bhiq-a nail ngaol. A bhai nee ngal-aq, Yaolsai bhai uqhuq gaoq thaoq bhiq-a nail ngaol.

29Yaolsai neq, aivq nail aqma nail yaqyov pevq nail aivq nail jaqbheq Bheinqyaqminq bhai ya moel-u phao, "Niil neq, nul juq nail jaqbheq bheqsaq gaq laiq. Yaqyov-ol, Miqyail naoq bhai geeqlaoq bivq dei-eiq" dai, ge bhiq-a nail ngaol.

30Yaolsai neq, aivq nail jaqbheq bhai ya moel-u phao, al jaiq-ail gaoq haq gaiq-a lal bhiq khi maivbhil doeq lee bhiq-a nail ngel-i mail, aivq nail iq thaiq duq bha lavqtsail mail aol lai khi, nioil lai-a nail ngaol.

31A bhai nee ngal-aq, aivq maiv puvq puvq khi gaoq dov lee-a nail ngaol. Aivq, aivq nail neema bhai ol nail lavqkhoel nee, jaq jaq daol daol bhi tsiq dal lavq nail galduq daoq bivq-a nail ngaol.

32Aq-u phao, jaq jaq daol daol tsiq dal lavq-a nail juq neq, Yaolsai nail galduq teevq khail, aivq nee teevq gaq khe-ai jaq nail Iljiltuv nail tsaol-aq juq nail galduq teevq khail dai khi aivq nail mailnail juq nail galduq teevq khail deiv khaoq bhiq-a nail ngaol. Khul khi mail dai ngal-aq, Iljiltuv nail tsaol-aq neq, Heiqbhail nail tsaol-aq nee mail teevq gaq khe-ai, aoq jaq tavq haq neq, aqjiivq aqcavq phaq pevq nail dai, noeq nail ngel-i mail ngaol.

33Aivq nail mailnail juq bhai neq, eeq nail nee nil nail bha kev dai, Yaolsai nail sivtavq bhai bhi jaol deel gil-a nail ngaol. Al heel ngel-i mail, aqyu juq teevq gaq nee teevq gaq hel daiq khi, noeq-u maq dov-ail pevq nail ngaol.

34Yaolsai neq, aqyu juq bhai bhi jaq nail galduq, aivq nail kovqkhail khe jaq jaq daol daol bivq-a nail ngaol. Bheinqyaqminq neq, aivq nail algao juq nee mail, ngaq bhoil ya jaiq-a nail ngaol. Aqyu juq gail, Yaolsai nee mail teevq gaq khe-ai, bov lal-u kev dai, jaq tavq daol tavq-a nail ngaol.

Currently Selected:

Genesis 43: aeu

Highlight

Copy