Genesis 41

Iqmoeq 41

Heeqphaq Phaqlaol nail nvmav bhai Yaolsai daoqceevq pheel-a nail ganl

1Nvq kovq jel ail-u phao, heeqphaq Phaqlaol nvmav mav lee bhiq thaq nail ngaol. Nvmav lavqkhoel bhai aivq neq, Nal-eil nail laoljaol daolbhaq bhai jaol nail ngaol.

2Aq-u phao, aqgoil tsul dee dee nail niaoqnel niaoq ma sivq maol neq, laoljaol nee mail dov lal khi, moeqgaq jaq jaq-ail jaol nail ngaol.

3Al juq dav gaq lal khi haoqnaol phao neq, aqgail gail dai khi, maq meeq nail niaoqnel niaoq ma sivq maol laoljaol nee mail, gaoq dov lal-a nail nee ovqtavq, iqmoeq-u khe dov lal-a nail niaoqnel juq jaol nail laoljaol daolbhaq aqjail bhai, thul phaol lai-a nail ngaol.

4A bhai nee ngal-aq, aqgail gail dai khi maq meeq nail niaoqnel al sivq maol-i mail, aqgoil tsul dee dee nail niaoqnel sivq maol bhai moevq bhoel gai-aivq bhiq-a nail ngaol. Aq-u phao, Phaqlaol gail, tsaoq noeq lal bhiq-a nail ngaol.

5Haoqnao aivq teevq pov gaoq iq thaiq kol laivq khi, nvq pov teevq pov nvmav gaoq mav lee bhiq-a nail ngaol. Nvmav lavqkhoel bhai gov gov bhaol teevq bhaol nee mail, gov nail lov dee dee nail sivq nail dov lal-a nail ngaol.

6A bhai nee ngal-aq, govnail micil cil deel tsalhail daikav khe bhoel leevq-a nail lilmoel nail aqlaol bhaq da nee, aqgee aqkov kov lai thaq nail gov nail sivq nail dov lal-a nail ngaol.

7Govnail micil cil deel al neq, govnail lov dee dee nail al juq bhai, moevq bhoel-a nail ngaol. Aq-u phao, Phaqlaol tsaoq noeq lal bhiq khi, nvmav teevq pov gaoq mav lee thaq-il dai, heeq nia-a nail ngaol.

8Nqhao lao ma kev lal-u phao, aivq neq neema maq sal nail ngel-i mail, Iljiltuv milkhaoq khe jaol nail bhoilmaoq juq dai khi, neenoeq neekha aol nail juq iqsanl mail bhai, bhi khul jil-a nail ngaol. A bhai nee ngal-aq, aivq nail nvmav aqyu juq bhai ge bhiq khi mail ngaol-aoq, teevq gaq gail daoqceevq maq pheel nia-ail.

9Aq-u phao, aivq bhai khaoqanq tsiq kheel bhiq nail aqivq gaq ge bhiq-a nail: "Yaq n n-gaol ngaq-i mail teevq laiq nl laiq-a nail bhai noeq moel lal-aoq nial.

10Heeqphaq-ol, jel lal-u phao, naoq-i mail neema phail nail bhai ya daq-a nail, ngal dai khi khaqmul nl jaq kheel bhiq nail aqivq nv nvq gaq bhai, genl dev nail aqivq gaq nail ilkhaol bhai jiav nail thaonq bha, nieivq bhoel lavq-a nail ngaol.

11Teevq kivq, nv nvq gaq bhai, nvmav teevq gaq bhai teevq laiq, mav lee-a nail ngaol.

12Nv juq nee mail teevq gaq khe-ai, naoq nail genl dev nail aqivq teevq gaq nail yaqkav pevq nail, Heiqbhail nail yaqyov-aq yaqnoil teevq gaq jaol nail ngaol. Nv juq nail nvmav gail, aivq bhai ge bhiq khi aivq neq, nvmav nail daoqceevq ge lavq-a nail ngaol.

13Aivq-i mail daoqceevq pheel lavq-a nail khe-ai, naol neq, ngaq bhai ganl gaoq bhi nl kovq lavq khi, khaqmul nl jaq nail al gaq bhai neq, heivq bhiq-a nail ngaol" dai, ge bhiq-a nail ngaol.

14A bhai nee ngal-aq Phaqlaol neq, Yaolsai bhai aivq jaol nail bha bhi hevq bhoel lavq nail galduq, daoq bivq-a nail ngel-i mail, aivq bhai lavqtsail mail thaonq nee hevq dol lavq-a nail ngaol. Aivq neq, moeqmevq khu-a nail nee ovqtavq, aqgaq aqdoi phal khi Phaqlaol nail sivtavq bha ya aol lai-a nail ngaol.

15Aq-u phao, Phaqlaol neq, Yaolsai bhai ge bhiq-a nail: "Ngaq bhai nvmav mav lee-a nail ngaol. Thail hai ngaol-aoq, teevq gaq gail daoqceevq maq pheel nia-il. Naoq bhai nvmav nail ganl ge bhiq-u phao, daoqceevq pheel nia nail dai, ngal ya gaiq-a nail ngaol" dai, ge bhiq-a nail ngaol.

16Yaolsai ge kovq bhiq-a nail: "Heeqphaq-ol, ngaq bhai thail hai ge dov kivq nail bhaqaoq maq aol-ail. Thail hai ngaol-aoq, Miqyail neq, naoq bhai tsaq lai nail daoqceevq pheel lavq nail ngaol" dai, ge bhiq-a nail ngaol.

17Phaqlaol ge nail: "Ngaq nail nvmav lavqkhoel bhai ngal neq, Nal-eil nail laoljaol daolbhaq bhai thul phaol khi jaol-u phao,

18aqgoil tsul dee dee nail niaoqnel 7 maol neq, laoljaol nee nail dov lal khi, moeqgaq jaq jaq-ail jaol nail ngaol.

19A bhai nee ngal-aq, aqgail gail dai khi maq meeq nail niaoqnel sivq maol iqsanl, laoljaol nee mail dov lal-a nail ngaol. Thoi dai dai-ail doil nail niaoqnel bhai neq, Iljiltuv nail milkhaoq-ai, ngal teevq pov-ail maq moel daiq haq-al.

20Niaoqnel aqgail gail dai khi maq meeq nail juq neq, niaoqnel aqgoil tsul nail sivq maol bhai moevq bhoel-a nail ngaol.

21Thail hai ngaol-aoq, aqyu juq neq, aqgail gaoq gail-ai haq nail bhaq da nee niaoqnel al sivq maol bhai moevq bhoel-a nail dai, teevq gaq iqsanl maq heeq nia-ail. A bhai nee ngal-aq, ngal noeq lal-a nail ngaol.

22Haoqnao teevq pov ngal nvmav gaoq mav lee-a nail ngaol. Nvmav lavqkhoel bhai neq, gov govbhaol teevq bhaol nee mail, govnail lov dee dee nail sivq nail dov lal-a nail bhai, ngal ya moel-a nail ngaol.

23A bhai nee ngal-aq, govnail micil cil deel tsalhail daikav khe bhoel leevq-a nail lilmoel nail aqlaol bhaq da nee, aqgee aqkov kov lai thaq nail govnail sivq nail, dov lal-a nail bhai, ngal gaoq ya moel-a nail ngaol.

24Govnail micil cil deel al juq neq, lov dee dee nail govnail al juq bhai, moevq bhoel-a nail ngaol. Ngaq nail nvmav al nvq laiq, bhoilmaoq juq bhai ge bhiq khi mail ngaol-aoq, khaq sil gaq gail, ngaq bhai daoqceevq maq pheel lavq nia-il" dai, ge bhiq-a nail ngaol.

25Aq-u phao Yaolsai ge bhiq-a nail: "Heeqphaq-ol, naoq-i mail, mav thaq nail nvmav nvq laiq neq, daoqceevq teevq laiq bhao nail teevq-eel ngaol. Miqyail neq, aivq-i mail nl nail ganl, naoq bhai iqmoeq-u nee ge bhiq thaq nail phaq pevq nail ngaol.

26Aqgoil tsul dee dee nail niaoqnel sivq maol neq, sivq kovq bhai ge movq nail ngaol. Govnail lov dee dee nail sivq nail gail, sivq kovq bhai ge movq nail ngaol. Nvmav al nvq laiq neq, daoqceevq teevq phaq taivq-ail bhao nail ngaol.

27Haoqnao khe dov lal-a nail niaoqnel aqgail gail dai khi, maq meeq nail sivq maol iqsanl, sivq kovq bhai ge movq nail ngaol. Tsalhail daikav khe bhoel leevq-a nail lilmoel nail aqlaol bhaq da nee, aqgee aqkov kov lai thaq nail govnail sivq nail iqsanl, sivq kovq bhai ge movq nail ngaol. Al neq, moevq nail sivq nail sivq kovq pevq nail ngaol.

28Ngaq-i mail naoq bhai ge bhiq-a nail khe-ai, Miqyail neq, aivq-i mail nl nail ganl naoq bhai iqmoeq-u nee, ge bhiq thaq nail phaq pevq nail ngaol.

29Iljiltuv milkhaoq teevq khaoq khaoq lao bhai jaq jaq daol daol bhao lee ya lee nail sivq kovq, jiav lal nail ngaol.

30Al sivq kovq jel-ail haq neq, moevq nail sivq nail aqkovq sivq kovq, kev lee nail ngaol. Aq-u phao, tsaol-aq juq neq, jaq jaq daol daol bhao lee ya lee nail aqkovq bhai maq noeq moel yaoq-aol. Maq ya jaq, maq ya daol nail bhaq da nee, milkhaoq teevq khaoq khaoq lao luq-ail seil-ail nail ngaol.

31Moevq nail sivq nail aqkovq thoil neq, al jaiq-ail doil nail bhaq da nee, tsaol-aq yaq juq neq, bhao lee ya lee nail al sivq kovq bhai nioil peivq gil-ail nail ngaol.

32Naol neq, nvmav niil nvq pov bhee dai mav-a nail neq, Miqyail ganl al bhai mal dil nl nail ngaol dai, phaoq dai lavq-a nail phaq pevq nail ngaol. Ganl al juq aivq lavqtsail mail bhi pevq lal nail ngaol.

33Al heel ngel-i mail, heeqphaq-ol, neenoeq neekha aol nail nee ovqtavq, noeqheeq nee dov nia nail teevq gaq bhai tsel dov khi, Iljiltuv milkhaoq bhai bhi uv thaiq nail tsaq nail ngaol.

34Bhao lee ya lee nail sivq kovq nail lavqkhoel khe, khal ya lee nail gov juq, ngaq bhoil teevq bhoil bhai oil jil khi, milkhaoq teevq khaoq khaoq lao bhai, hel daiq phail nail juq bhi jaol yaoq.

35Aqyu juq bhai, kev lal nail bhao lee ya lee nail sivq kovq khe, khal ya lee nail al juq iqsanl mail, bhi tavq jil khi meenq juq bhai Phaqlaol nail yalkav hav bhoel nail ilkhaol-ai bhi hav bhoel gil nail nee ovqtavq, bhi hel daiq phail yaoq.

36Khal ya lee-a nail phaq oil jil gai nail bhaq da nee, Iljiltuv nail milkhaoq bhai moevq nail sil nail kev lee-u phao, Iljiltuv nail tsaol-aq juq nail miltsaq ma ya peivq-ail dai, ya jel-ail nail ngaol" dai, Phaqlaol bhai ge bhiq-a nail ngaol.

Yaolsai Iljiltuv milkhaoq bhai uv thaiq nail gaq pevq lal-a nail ganl

37Heeqphaq Phaqlaol dai khi, aivq nail haol khe hel daiq phail nail aqivq aqtsu juq gail, Yaolsai-i mail ge nail bhai neema tsaq nail ngaol.

38Aq-u phao, Phaqlaol neq, aivq nail aqivq aqtsu juq bhai, "Yaqyov-aq niil gaq neq, Miqyail nail aqhaqlal-i mail bhee nail gaq pevq nail ngaol. Aivq kheel yaoq gaq yaoq, ngadao juq maq hal pov moel kivq-ail" dai, ge bhiq-a nail ngaol.

39Yaolsai bhai iqsanl gaoq ge bhiq-a nail: "Miqyail neq, naoq bhai nvmav nail daoqceevq phao daiq bhiq-a nail ngel-i mail, naoq-ai nee mail neenoeq nee khaq aol jaiq khi noeq heeq noeq dov jaiq nia nail teevq gaq iqsanl, maq jaol yaoq-aol.

40Ngal naoq bhai ngaq nail milkhaoq-ai bhi uv thaiq nail ngaol. Ngaq nail milkhaoq yaq juq gail, naoq-i mail daoq bivq nail bhai ya nal daiq nail ngaol. Ngaq nail joiq jaq doiqbev nee mail ge-u taivq-ail, ngal naoq-ai nee mail eeq jaiq nail teevq-eel ngaol.

41Niil aq-il, ngal naoq bhai Iljiltuv milkhaoq teevq khaoq khaoq lao bhai bhi uv thaiq nail gaq dai, ngal kha bhiq naol" dai, ge bhiq-a nail ngaol.

42Aq-u phao, Phaqlaol neq, aivq nail junq deeq-ai thaq nail noiltsaoq loev khi, Yaolsai bhai heiv tsaoq bhiq-a nail nee ovqtavq, haqphal aqjeel-i mail yavq-ai thaq nail phailkhaoq gail, bhi doi-a nail ngaol. Aivq nail leelkhaol bhai neq, heel-i mail lav sav-ai thaq nail heelju he deivq bhiq-a nail ngaol.

43A bhai nee ngal-aq, Yaolsai bhai aivq nail moeqphaq lavlaoq nvq lanl teevq lanl-ai bhi jeeq khi, aivq nail sivtavq phao nee yaqkav juq iqmoeq bhi ail-a nail nee ovqtavq, "Peevqceevq doiq doiq yaoq, peevqceevq doiq gil yaoq" dai, bhi gul-a nail ngaol. Al hai nl nail lavqkhoel, Yaolsai bhai Iljiltuv milkhaoq khe uv thaiq nail gaq kha bhiq-a nail ngaol.

44Aq-u phao, Phaqlaol neq Yaolsai bhai, "Ngal mal dil heeqphaq pevq khi ngaol-aoq, naoq nail daoq maq jiav mail, Iljiltuv milkhaoq nail lavqkhoel bhai teevq gaq iqsanl aqkhil aqlavq maq ya tsaoq dil-ail" dai, ge bhiq-a nail ngaol.

45Phaqlaol neq, Yaolsai bhai "Saqphaiqnaqtal Phaqyiqnav" dai khul bhiq khi Aolnav meenq bhai jaol nail philma Paoltilpheiqlav nail yaqmiq Aqsaiqnav nee mail bhi hevq-a nail ngaol. Aq-u phao, Yaolsai neq, Iljiltuv milkhaoq khaoq laol bhai, uv thaiq nail bhaqaoq ya-a nail ngaol.

46Yaolsai neq, Iljiltuv milkhaoq khe heeqphaq Phaqlaol nail ganl nl lal-u phao, 30 kovq bhee-aiq nail ngaol. Aivq neq, heeqphaq nail sivtavq nee mail dov-ail khi, Iljiltuv milkhaoq teevq khaoq khaoq lao doil dai tsao doi thaq nail ngaol.

47Bhao lee ya lee nail sivq kovq nail lavqkhoel, milkhaoq teevq khaoq khaoq lao heeqlaoq gaoqjal al jaiq-ail mao khi meeq nail ngaol.

48Yaolsai neq, sivq kovq al nail lavqkhoel khal ya lee-a nail juq meenq juq bhai, hav bhee gil-a nail ngaol. Khal ya thaq nail gov juq neq, aqjail khal jail nail meenq juq bhai, hav bhoel thaq-ai lai-a nail ngaol. Meenq aqjail aqthao khe jiav nail daiyal nail gov juq iqsanl, meenq lavqkhoel bhai bhi hav bhoel thaq-a nail ngaol.

49Aivq-i mail hav jil-a nail juq neq, iqyaq iq ma khe jiav nail tsalhail khe-ai, mao nail ngel-i mail, Yaolsai lai jai khi ge daiq khi ngaol-aoq, maq ge dai gil tsaol dai, bhi jiav-a ail ngaol.

50Moevq nail sivq nail aqkovq maq kev lal nail bhai, Yaolsai neq, aivq nail khaqma Aqseiqnav nee mail yaqyov nvq gaq ya-a nail ngaol.

51Yaolsai ge nail: "Miqyail neq, ngaq-i mail ya daq-a nail haq nail aoq nail bhai maqkhaiq, aqbhu nail ilkhaol khe phaqyaq ma yaq juq bhai maqkhaiq, bhi nioil peivq lavq-a nail ngaol" dai, ge khi aivq nail yaqyov aqivq gaq bhai neq, Maqnaqseiq#41.51 Maqnaqseiq Maqnaqseiq dai, ge nail daoqceevq neq, bhi nioil peivq nail dai, ge movq nail ngaol. dai, mil bhiq-a nail ngaol.

52Yaqyov nvq gaq teevq gaq ya-u phao, aivq ge nail: "Miqyail neq, ngaq-i mail haq nail aoq nail ya daq-a nail milkhaoq bhai, ngaq bhai yaqmiq yaqyov bhi jaol lee lavq-a nail ngaol" dai, ge khi yaqyov al gaq bhai neq, Eilphaqlaqyinq#41.52 Eilphaqlaqyinq Eilphaqlaqyinq dai, ge nail daoqceevq neq, bhi maol lal nail dai, ge movq nail ngaol. dai mil bhiq-a nail ngaol.

53A bhai nee ngal-aq, Iljiltuv nail milkhaoq bhai bhao lee ya lee nail sivq kovq jel ail-a nail ngaol.

54Aq-u phao, Yaolsai-i mail ge jel-ail ceevq-a nail khe-ai, moevq nail sivq nail sivq kovq kev lee-a nail ngaol. Milkhaoq yaoq khaoq yaoq-ao nee mail jaq jaq daol daol maq jiav khi ngaol-aoq, Iljiltuv milkhaoq bhai neq, jiav nail ngaol.

55Iljiltuv milkhaoq khe tsaol-aq juq neq, maq ya jaq maq ya daol nail kev lee bhiq-u phao, Phaqlaol bhai jaq jaq daol daol hal lai-a nail ngaol. Aq-u phao Phaqlaol neq: "Yaolsai jaol nail bha ail yaoq. Aivq-i mail khal ge nail khe-ai nl yaoq" dai, ge bhiq-a nail ngaol.

56Moevq nail sivq nail phaq Iljiltuv nail milkhaoq teevq khaoq khaoq lao doi ail-a nail bhaq da nee, Yaolsai neq, govjil khal jiav nail juq iqsanl mail phao khi, Iljiltuv nail tsaol-aq juq bhai gaoq bhiq-a nail ngaol.

57Milkhaoq yaoq khaoq yaoq-ao nee, moevq nail sivq nail phaq kev lee-aoq nail ngel-i mail, yaoq khaoq yaoq mil yaoq khe juq gail, Yaolsai jaol nail bha, gov ul nail galduq lal gil-a nail ngaol.

Currently Selected:

Genesis 41: aeu

Highlight

Copy