Gaqkhoel 12

Heeqphaq Heiq lol Yaqkov bhai heivq khi, Bheiqtuvluv bhai thaonq bhai laol-a nail ganl

1Yanq al lavqkhoel, heeqphaq Heiq lol Khali yaq nail munl lavqkhoel bhai jaol nail teevq pav ga nav juq bhai, khoeq dee jiovq dee dee bhiq-a nail ngaol. 2Aivq neq, Yaol haq nail aqivq Yaqkov bhai thaoma-i mail bhi heivq-a nail ngaol. 3Al hai heivq nail bhai Yuldav nail tsaol-aq neema tsaq nail niil dai, aivq ya moel-u phao, Bheiqtuvluv bhai iqsanl nieivq-a nail ngaol. Yanq al yanq neq, deqtsiq maq aol nail khaqmul jaq nail aqbhee lav sav nail yanq ngaol. 4Bheiqtuvluv bhai nieivq khi thaonq bhai laol-a nail ngaol. Aq-u phao, aivq bhai bhi lovq nail khi genl dev nail tsaol-aq tsel kovq gaq nail aqlavq lavqkhoel bhai av bhiq-a nail ngaol. Bhaqsaqkhaq aqbhee lav sav gaq haq neq, milkhaoq yaq nail sivtavq-ai Bheiqtuvluv bhai hevq dol lavq naol dai, Heiq lol noeq-ai thaq nail ngaol.

5Al heel ngel-i mail, Bheiqtuvluv thaonq bhai ya aol-a nail ngaol. Thail hai ngaol-aoq, Khali yaq munl juq neq, aivq nail haqbhoil Miqyail bhai geeqlaoq hal dee dee thail thaiq nail ngaol.

Bheiqtuvluv thaonq lavqkhoel nee ya jel ail-a nail ganl

6“Niaohao Bheiqtuvluv bhai hevq dol lavq naol” dai, heeqphaq Heiq lol noeqceiv-ai thaq nail ngaol. Aq-u nqkiv genl dev nail tsaol-aq juq Bheiqtuvluv bhai genl dev nail tsaol-aq nvq gaq nail aqlavq bhai teevq phao teevq lavq dai, hailcav nvq deeq-i mail pheethaiq-ai thaq khi aqyu nvq gaq nail gaoltsi bhai iq thaiq kov-ai thaq nail ngaol. Lovq nail juq iqsanl, thaonq nail lolgov lavqniil phao lovq nail ngaol. 7Thaiq phuq dai, Heeqphaq Miqyail nail nqtavq gaqkhoel teevq gaq dov lee khi, thaonq lavqkhoel bha kev dai, aqbhaq bhaq bhoel lal-a nail ngaol. Nqtavq gaqkhoel al gaq, Bheiqtuvluv nail aq bhail bhai doeq doeq ail, “Lavq tsail mail thul yaoq” dai, lav noeq-a nail ngaol. Aq-u phao, hailcav juq Bheiqtuvluv nail aqlavq nee mail ga loev gil-a nail ngaol.

8“Jiovqpavq pavq khi saiqnaov tsaoq yaoq” dai, nqtavq gaqkhoel al gaq aivq bhai ge bhiq-u phao, aivq al hai nl-a nail ngaol. “Naoq nail phailkhaoq heelma doi khi, ngaq nail haoqnao tsao thel lavq yaoq” dai, gaoq ge bhiq-a nail ngaol. 9A bhai nee ngal-aq, nqtavq gaqkhoel al gaq nail haoqnao lao tsao, thaonq lavqniil bha tsao dol aivq-a nail ngaol. Nqtavq gaqkhoel al gaq al hai nl lee-a nail al neq, mal dil ngel ail nial dai, aivq maq heeq nia dai, aqhaqlal lavqkhoel nee ya moel thaq nail niil dai, aivq noeq nail ngaol. 10Aqyu nvq gaq neq, iqmoeq khe dao lovq nail juq bhai jel-ail khi, nvq dao teevq dao bhai iqsanl jel-ail khi mail, meenq bhai aol ail nail, hail-i mail lav sav-ai thaq nail lolgov gov ma bhai ail kev-a nail ngaol. Aqyu nvq gaq nail haqbhoil lolgov al aivq bhai aivq phao lal khi, aqyu nvq gaq thaonq nee mail dov ail-a nail ngaol. Aqyu nvq gaq gailkhaol teevq khaol bhai ail-u phao, nqtavq gaqkhoel Bheiqtuvluv nee mail thaiq phuq dai, pav ail-a nail ngaol.

11Aq-u phao, Bheiqtuvluv neema lavqkhoel bhai noeq lal khi ge nail: “Heeqphaq Miqyail aivq nail nqtavq gaqkhoel bhi lee khi, Heiq lol nail aqlavq lavqkhoel nee maqkhaiq, Yuldav nail tsaol-aq juq noeq thunq nail lavqkhoel nee maqkhaiq, ngaq bhai bhi jel-ail lavq thaq nail niil dai, mal dil ngal heeq kivq lal-aoq naol” dai, ge nail ngaol.

12Aivq ganl al ganl bhai heeq nia lal-u phao, Maqkul dai khul nail Yaol haq nail aqma Maq lil nail ilkhaol bhai ail-a nail ngaol. A bhai tsaol-aq mao dai jil lai khi geeqlaoq hal thail thaiq nail ngaol. 13Aivq lolgov lavqniil khe gov bhai kov thail thaiq-u phao, Loldeiq dai mil-ai thaq nail yaqkav yaqmiq teevq gaq hel daiq lee-a nail ngaol. 14Bheiqtuvluv nail aqthel niil dai, aivq heeq nia-u phao, lavqkhiq tsail dee dee nail ngel-i mail, lolgov maq phao dai, ilkhaol bhai tsaoq bhoel laivq khi, “Bheiq tuv luv lolgov lavqniil phao thul phaol-nvq thaq nail ngaol” dai, aqyu juq bhai ge bhiq-a nail ngaol.

15Aq-u phao, “Naol neq naiquq uq ail-aoq thaq nail niil” dai, aqyu juq ge kovq bhiq khi ngaol-aoq, “Mal dil Bheiqtuvluv ngaol” dai, aivq ge thail thaiq nail ngel-i mail, “Bheiq tuv luv nail nqtavq gaqkhoel niil” dai, aqyu juq ge bhiq-a nail ngaol.

16Bheiqtuvluv neq, lolgov bhai kov thail thaiq-ai haq nail ngaol. Aqyu juq lolgov phao ail-u phao, Bheiqtuvluv bhai ya moel-a nail ngel-i mail, noeq-u maq dov dai, pevq ail-a nail ngaol. 17Aq tsi tsu dai jaol yaoq dai, Bheiqtuvluv aqyu juq bhai aqlavq dao naq bhiq khi, Miqyail aivq bhai thaonq lavqkhoel nee khal hai hevq dov lavq-a nail ganl, aqyu juq bhai ge bhiq-a nail ngaol. “Yaqkov#12.17 Yaqkov niil gaq neq, Yeiqsul nail jaqbheq ngaol. khi mail aqivq jaqbheq Khali yaq juq bhai ganl niil ganl ge bhiq yaoq” dai iqsanl, ge bhiq-a nail ngaol. A bhai nee ngal-aq, aivq dov-ail khi yaoq dao yaoq bha ail-a nail ngaol.

18Nqbhaq bhaq lal-u phao, Bheiqtuvluv khaq bha peivq ail thaq nail dai, a bhai lovq nail juq maq heeq nia nail ngel-i mail, neema suq saq dee dee-ai bhiq nail ngaol. 19Heiq lol daoq bivq khi aivq bhai bhi hal pov khi ngaol-aoq, maq hal pov moel-al. Al heel ngel-i mail, lovq nail genl dev nail tsaol-aq juq bhai, Bheiqtuvluv bhi tsaoq dol aivq thaq nail ganl nal daiq gaq khi lovq nail juq bhai heivq nail haqbhoil, aivq daoq bivq-a nail ngaol. A bhai nee ngal-aq, aivq Yuldav milkhaoq nee dov-ail khi Gailsaq lil meenq bha ail-a nail ngaol.

Heiq lol sil-a nail ganl

20Heiq lol neq, Dulluv meenq bhai jaol nail tsaol-aq khi mail Sildoq meenq bhai jaol nail tsaol-aq bhai neema phail dee dee nail ngaol. Al heel ngel-i mail, aqyu juq neema teevq heeq taivq-ail tavq khi, Heiq lol jaol nail bha lal-a nail ngaol. Heeqphaq nail haol bhai hel daiq nail aqivq gaq pevq nail Bhaqlaqdul dai mil-ai thaq nail gaq bhai iqmoeq ge tsaoq khi, Heiq lol bhai tsaq lai jil lai dai, aqyu juq hal-a nail ngaol. Khul khi mail dai ngal-aq neq, aqyu juq jaqjaq daoldaol Heiq lol nail milkhaoq bhai ya juq nail ngaol. 21Ge tsaq-ai thaq nail aqn kev lal-u phao, Heiq lol neq, heeqphaq nail aqgaq aqdoi doi khi, doiqbev bev ma bhai jaol deel khi mail, milkhaoq yaq juq bhai daoq ge bhiq-a nail ngaol. 22Aq-u phao, tsaol-aq al juq: “Daoq niil daoq neq, tsaol-aq yaq-i mail ge nail daoq maq ngel-il, miq yail-i mail ge nail daoq khe-ai dul-il” dai, mail ma-ail ge nail ngaol. 23Heiq lol neq, Miqyail bhai maq thaq eeq maq thaq heel nail ngel-i mail, Heeqphaq Miqyail nail nqtavq gaqkhoel teevq pov taivq-ail aivq bhai khoeq bhiq khi, aivq nail aqmaol bhai lovthaoq keivq khi sil-a nail ngaol.

24Thail hai ngaol-aoq, Miqyail nail daoq neq, teevq n nee teevq n gaiq doi ail-a nail ngaol.

Bhaq naqbhal khi mail Saol luv bhai tsel dov khi khoel gai aivq-a nail ganl

25Bhaq naqbhal khi mail Saol luv neq, phul al oil ha lai gaq khi mail, Maqkul dai khul nail Yaol haq bhai hevq khi, Yeiqlulsaqlaiq meenq nee mail Aqdil-aoq meenq bhai kovq ail-a nail ngaol.

Currently Selected:

Gaqkhoel 12: aeu

Highlight

Copy