Gaqkhoel 10

Bheiqtuvluv khi mail Gaoqneiqlil nail ganl

1Gailsaq lil meenq bhai Gaoqneiqlil dai mil-ai thaq nail tsaol-aq teevq gaq jaol nail ngaol. Aivq neq, Iqtaq liq genl mavq mav dai khul nail Lolmav tsaol-aq nail genl dev teevq yal gaq nail aqivq ngaol. 2Aivq khi mail aivq nail miqyaq khaqma juq iqsanl mail, Miqyail nail sivtavq bhai daol coev dai doevq khi, Miqyail bhai ev nail ngaol. Aivq Yuldav nail tsaol-aq haq yaq aoq yaq juq bhai mao dai tsao jao-ai bhiq khi, khaq mao iqsanl Miqyail bhai geeqlaoq hal nail ngaol. 3Teevq n neq, kivqhail lail ma phao, naqli hail lavq nii dai yanq bhai aivq aqhaqlal lavqkhoel nee bhaq laoq kheq dai, ya moel-a nail ngaol. Ya moel-a nail al neq, Miqyail nail nqtavq gaqkhoel teevq gaq aivq jaol nail bha lee khi, “Gaoqneiqlil-ol” dai, aivq bhai khul lee-a nail ngaol.

4Gaoqneiqlil aivq bhai hel daiq cov-ai thaq khi, gee sil dee dee nail lavqkhoel, “Heeqphaq-ol, khul” dai, nal daiq-a nail ngaol. Nqtavq gaqkhoel al gaq aivq bhai ge bhiq-a nail: “Naoq nail geeqlaoq hal daoq khi mail, naoq-i mail haq yaq aoq yaq juq bhai bivq-a nail juq, Miqyail nail sivtavq bhai kev lai khi, aivq neema tsaq nail ngaol. 5Niil aq-il Yilphuq meenq bhai khoel gai aivq khi, Bheiqtuvluv dai khul nail Sil moq bhai bhi khul ail yaoq. 6Aivq neq, bavkov lav sav gaoq nail Sil moq nail ilkhaol bhai jaol nail ngaol. Il khaol al il neq, iqyaq iqma nail daolbhaq bhai jiav nail ngaol” dai, ge bhiq-a nail ngaol.

7Aivq bhai ge bhiq lee-a nail nqtavq gaqkhoel al gaq kovq lai jel gaq-a ngal-aq, aivq aivq nail yaqkav nvq gaq khi mail Miqyail nail sivtavq bhai daol coev dai doevq nail, aivq nail genl dev yaq teevq gaq bhai iqsanl, khul-a nail ngaol. 8Pevq lal-a nail ganl iqsanl mail aqyu juq bhai ge daiq bhiq khi, Yilphuq meenq bhai, khoel gai aivq-a nail ngaol.

9Haoqnao n-gaol, n-gaol gaol lee-u phao, aqyu juq hail gaq, Yilphuq meenq aqjail bhai ail kev-a nail ngaol. Bheiqtuvluv neq, geeqlaoq hal nail dai khi, ilkhaol pultavq khe teiv-nvq bha dav lai-a nail ngaol. 10Aq-u phao, aivq aoq moevqlal khi, aoq jaq movq nail ngaol. Yu aoq jal liljal nl jaq thail thaiq-u phao, Bheiqtuvluv nv mav mav moel nail khe-ai, aqhaqlal lavqkhoel nee ya moel-a nail ngaol. 11Ya moel-a nail al neq, nqtavq phao-ai thaq khi, bheeyaq keiv ma khe-ai dul nail teevq keiv bhai, lavqtsoel liq phaoq liq tsoel-ai pheethaiq-ai thaq khi, miltsaq bhai phaiq kha-ai leevq nail bhai, Bheiqtuvluv ya moel-a nail ngaol. 12Al nail lavqkhoel bhai, liq khil covq nail jaiqyaq, soiq soiq ail tsao nail jaiqyaq, nqtavq khe khal bhail nail keivq-avq niil juq aol nail ngaol. 13Aq-u phao, “Bheiq tuv luv-ol, thul khi deeq heivq jaq yaoq” dai, aqthel meel dol-ai leevq-a nail bhai, aivq ya gaiq-a nail ngaol.

14Thail hai ngaol-aoq, Bheiqtuvluv ge nail: “Heeqphaq-ol, khul pevq lal khi ngaol-aoq, maq jaq. Aol daoq kovq daoq bhai tavq lai khi maq haol nail phaq, ngal teevq pov iqsanl maq jaq daiq haq-al” dai, ge kovq bhiq-a nail ngaol.

15Teevq pov aqthel al gaoq meel dol-ai leevq khi ge nail: “Miqyail-i mail bhi haol lal-a nail phaq bhai, maq haol dai thaq ge” dai, ge nail daoq aivq ya gaiq-a nail ngaol.

16Al hai hail pov pevq lal gaq khi, bheeyaq khe-ai dul nail al, teevq pov taivq-ail nqtavq bha he dal laivq-a nail ngaol.

17“Ngal aqhaqlal lavqkhoel nee ya moel-a nail al neq, khul bhai ge movq nail meeq” dai, Bheiqtuvluv noeq-u maq dov dai jaol-u phao, Gaoqneiqlil-i mail khoel-ai leevq-a nail tsaol-aq al juq, Sil moq nail ilkhaol bhai nal daiq nal daiq ail, govkhoiq bhai lal kev-aoq thaq nail ngaol. 18“Bheiq tuv luv dai khul nail Sil moq al gaq niil niai jaol naol laiq” dai, khul khul ail nal daiq nail ngaol.

19Aqhaqlal lavqkhoel nee bhi moel lavq-a nail bhai Bheiqtuvluv saol-nvq thail thaiq-u phao, Aqhaqlal Miqyail aivq bhai ge bhiq-a nail: “Tsaol-aq hail gaq naoq bhai hal pov thail thaiq nail ngaol. 20Thul khi yavq kha-ail yaoq. Al phaq niil phaq dai maq saol-nvq mail aqyu juq nee lai yaoq. Khul khi mail dai ngal-aq neq, ngal aqyu juq bhai khoel-ai leevq-a nail ngaol” dai, ge bhiq-a nail ngaol.

21Aq-u phao, Bheiqtuvluv tsaol-aq al juq jaol nail bha yavq kha-ail khi, “Nul juq hal pov nail gaq ngal ngaol. Khul loq nail lee-a nail-aiq” dai, aqyu juq bhai nal daiq-a nail ngaol.

22Aqyu juq ge kovq bhiq-a nail: “Miqyail nail sivtavq bhai daol coev dai doevq khi, Miqyail bhai ev khi Yuldav nail tsaol-aq iqsanl mail aivq nail ganl salkhil khanq nail, Gaoqneiqlil dai mil-ai thaq nail genl dev nail teevq yal gaq nail aqivq teevq gaq jaol nail ngaol. Naoq bhai aivq nail ilkhaol-ai khul bhoel khi, naoq nail daoq nal daiq yaoq dai, meeq nail haol nail nqtavq gaqkhoel teevq gaq aivq bhai ge bhiq-a nail ngaol” dai, aqyu juq Bheiqtuvluv bhai ge bhiq-a nail ngaol. 23Al heel ngel-i mail, Bheiqtuvluv aqyu juq bhai ilkhaol lavqkhoel-ai khul bhoel khi, aqmeeq-ai hav bhiq-a nail ngaol. Yaoq n yaoq Bheiqtuvluv aqyu juq nee mail lai-a nail ngaol. Yilphuq meenq bhai jaol nail aqivq jaqbheq Khali yaq teevq pav ga nav juq iqsanl, aqyu juq nee mail lai-a nail ngaol.

24Yaoq n yaoq aqyu juq Gailsaq lil meenq bhai lai kev-a nail ngaol. Gaoqneiqlil neq, aivq nail aqivq jaqbheq khi mail aqtsaoq juq bhai khul jil khi, aqyu juq bhai daonq thail thaiq nail ngaol. 25Bheiqtuvluv aol lal-u phao, Gaoqneiqlil aivq bhai hav-a nail ngaol. A bhai nee ngal-aq, Bheiqtuvluv nail aqkhil daoqthaoq bhai peevqceevq kovdoiq doiq khi uqhuq thaoq-a nail ngaol. 26Thail hai ngaol-aoq, Bheiqtuvluv aivq bhai he thul khi, “Thul yaoq. Ngal iqsanl tsaol-aq ngaol” dai, ge bhiq-a nail ngaol.

27A bhai nee ngal-aq, Bheiqtuvluv Gaoqneiqlil nee mail daoq ge tsaoq ge tsaoq ail ilkhaol bhai aol lai-u phao, tsaol-aq mao dai jil lal-a nail bhai ya moel-a nail ngaol. 28Bheiqtuvluv aqyu juq bhai ge bhiq-a nail: “Nv juq Yuldav nail tsaol-aq neq, yu nail jeq-e jaq-a bhai aqtsaoq tsaoq nail maqkhaiq, aqyu juq jaol nail bhai nalga ail nail maqkhaiq, maq nl khaoq ail dai, nul juq heeq nia nail ngaol. Thail hai ngaol-aoq, tsaol-aq teevq gaq bhai iqsanl, maq haol ail dai thaq ge dai, Miqyail ngaq bhai cavq lavq cov lavq-a nail ngaol. 29Al heel ngel-i mail ngaq bhai khul lee-u phao, daoq maq ge dai, ngal lal-a nail ngaol. Khul loq-i mail ngaq bhai khul lee-a nail-aiq dai, ngaq bhai nal daiq movq ail nial” dai, aqyu juq bhai ge bhiq-a nail ngaol.

30Gaoqneiqlil ge bhiq-a nail: “Jel lal-a nail liq n n-gaol, niil yanq bhai kivqhail lail ma phao naqli hail lavq nii dai bhai, ngal ilkhaol lavqkhoel bhai geeqlaoq hal-a nail ngaol. Aq-u phao, aqbhaq bhaq dee dee nail aqgaq aqdoi doi-nq thaq nail tsaol-aq teevq gaq ngaq nail sivtavq bhai thul phaol lee-a nail ngaol. 31Aivq ge nail: ‘Gaoqneiqlil-ol, naoq nail geeqlaoq hal daoq bhai Miqyail ya gaiq khi naoq-i mail haq yaq aoq yaq juq bhai bivq-a nail phaq bhai aivq neema tsaq nail ngaol. 32Al heel ngel-i mail, Yilphuq meenq bhai khoel gai aivq khi, Bheiqtuvluv dai khul nail Sil moq al gaq bhai bhi khul ail yaoq. Aivq neq, bavkov lav sav gaoq nail Sil moq nail ilkhaol bhai jaol nail ngaol. Il khaol al il neq, iqyaq iqma nail daolbhaq bhai jiav naol’ dai, ngaq bhai ge lavq-a nail ngaol. 33Al heel ngel-i mail, teevq pov taivq-ail naoq bhai bhi khul lee-a nail ngaol. Naol neema kev khi lal lavq-a nail, geeqlaoq eeq naol. Niil aq-il nv juq iqsanl mail, niil niai Miqyail nail sivtavq bhai jil lal-ai thaq khi, Miqyail aivq-i mail naoq bhai cavq bhiq cov bhiq khi bhi ge-a nail daoq juq bhai nal daiq nail khi nv juq daonq thail thaiq nail ngaol” dai, ge bhiq-a nail ngaol.

Bheiqtuvluv daoq cavq cavq nail ganl

34Aq-u phao, Bheiqtuvluv niail hai ge nail ngaol: “Miqyail neq, maivphaoq eeq nil maq tsel ail dai, ngal mal dil ya heeq kivq-a nail ngaol. 35Jeq-e yaoq jeq-e yaoq-ao nee mail, Miqyail bhai ev khi, tsaq nail daol nail phaq nl nail tsaol-aq yaoq gaq yaoq-ao nee bhai, aivq neema tsaq nail ngaol. 36Miqyail aivq nail daoq Ilsaqleiqlav nail tsaol-aq bhai bhi ge gaiq-a nail ngaol. Daoq al daoq neq, Yeiqsul Khali bhaq da nee, nee sal ovq naol dai, ge nail lavqkhiq tsail nail geeqlaoq daoq al daoq ngaol. Yeiqsul Khali al gaq neq, iqsanl nail kovtavq bhai Heeqphaq ngaol. 37Yaol haq ulcuvq saol nail ganl cavq bhiq cov bhiq gaq khi pultavq, Gaq liq lail milkhaoq nee mail Yuldav milkhaoq khaoq lao bhai pevq lal-a nail ganl al gaiq doi ail-a nail ngaol dai, nul juq heeq nia nail ngaol. 38Pevq lal-a nail ganl al neq, Naq saq lail meenq yaq Yeiqsul nail ganl ngaol. Miqyail aivq bhai Meeq nail Haol nail Aqhaqlal maqkhaiq, bhaqaoq maqkhaiq, hoel dav bhiq-a nail ngaol. Miqyail aivq nee mail jaol nail ngel-i mail, aivq doi doi dai tsao-u phao, yu bhai aqmeeq phaq nl bhiq khi, neivq heeqphaq-i mail khoeq nail jiovq nail tsaol-aq iqsanl bhai bhi meeq lai-a nail ngaol.

39Yuldav milkhaoq lavqkhoel bhai maqkhaiq, Yeiqlulsaqlaiq meenq lavqkhoel bhai maqkhaiq, aivq-i mail khal nl-a nail iqsanl bhai nv juq iqsanl salkhil khanq nail ngaol. Yu aivq bhai lavqyavq kovtavq bhai tavq heivq-a nail ngaol. 40Thail hai ngaol-aoq, hail n bhee lal-u phao, Miqyail aivq bhai gaoq bhi doevq kovq lal khi, tsaol-aq teevq pav ga nav juq bhai, aivq nail aqmaol bhi moel-a nail ngaol. 41Tsaol-aq iqsanl bhai bhi moel-a nail maq ngel-ail. Salkhil bhi khanq nail dai khi, iqmoeq-u nee mail Miqyail-i mail tsel dov-ai thaq nail nv juq bhai taivq-ail bhi moel lavq-a nail ngaol. Tsel dov-ai thaq nail nvjuq, Yeiqsul gaoq doevq kovq lal gaq khi mail, aivq nee mail jaq tavq daol tavq-a nail ngaol. 42Yu bhai cavq bhiq yaoq dai, aivq nv juq bhai daoq bivq ail ceevq lavq-a nail ngaol. Al ovqtavq, doevq nail tsaol-aq bhai maqkhaiq, sil-a nail tsaol-aq bhai maqkhaiq, Yeiqsul neq, yalkhaq dal nail gaq bhi jiovq nail dai khi, salkhil bhi khanq lavq-a nail ngaol. 43Aivq bhai neema khal thaq tsaol nail tsaol-aq iqsanl bhai, aivq nail aqmil bhaq da nee aivq oeqbal phaiq bhiq naol dai, Miqyail nail haqbhoil ge dan nail tsaol-aq iqsanl mail, aivq nail ganl salkhil khanq-ai thaq nail ngaol” dai, Bheiqtuvluv aqyu juq bhai ge bhiq-a nail ngaol.

Yu nail jeq-e jaq-a Meeq nail Haol nail Aqhaqlal ya nail ganl

44Bheiqtuvluv daoq al juq ge thail thaiq-u phao, aivq nail daoq gaiq thail thaiq nail tsaol-aq iqsanl nail kovtavq bhai Meeq nail Haol nail Aqhaqlal yavq kha lee-a nail ngaol. 45Yu nail jeq-e jaq-a nail kovtavq bhai iqsanl, Miqyail Meeq nail Haol nail Aqhaqlal hoel dav bhiq-a nail ngel-i mail, Bheiqtuvluv nee mail lal-a nail neema thaq tsaol nail Yuldav nail tsaol-aq al juq noeq-u maq dov dai, pevq ail-a nail ngaol. 46Khul khi mail dai ngal-aq neq, tsaol-aq al juq mee nia phaq nail daoq ge ge ail tsiq eeq khi, Miqyail bhai thaq eeq thaq heel thail thaiq nail bhai aqyu juq ya gaiq ya moel-a nail ngaol. Aq-u phao, Bheiqtuvluv ge nail: 47“Ngadao juq Meeq nail Haol nail Aqhaqlal ya-a nail khe-ai, ya-a nail niil juq bhai ulcuvq lavqkhoel bhai ulcuvq thaq saol bhiq dai, khaq sil gaq lav tsoiq nia nail-aiq” dai, ge nail ngaol. 48“Yeiqsul Khali nail aqmil kov-uvq nee ulcuvq saol yaoq” dai, Bheiqtuvluv aqyu juq bhai daoq bivq-a nail ngaol. A bhai nee ngal-aq, “Nv juq nee mail micil tsaq dai jaol lavq yaoq” dai, aqyu juq Bheiqtuvluv bhai hal-a nail ngaol.

Currently Selected:

Gaqkhoel 10: aeu

Highlight

Copy