Pédáesh 25

Ebráhémay mark

1Ebráhémá dega jané geptagat ke námi Keturah at. 2Ebráhémay chokk Zemrán o Yokshán o Médán o Midyán o Yashbák o Shawáh cha Keturahá pédá butant. 3Cha Yoksháná Shébá o Didán pédá butant. Didánay óbádag Áshuri o Letushi o Layumi atant. 4Midyánay mardénchokk, Epád o Éper o Hanuk o Abidah o Eldáh atant. É sajjahén Keturahay óbádag atant.

5Ebráhémá wati sajjahén hasti Esákárá dát. 6Hamá mardénchokk ke Ebráhémá cha soriatán butagatant, wati zendá áyáná thékii dát o cha wati chokk Esáká dur, ródarátki molká ráh dátant.

7Ebráhémá sad o haptád o panch sál omr kort o 8wati goddhi dami kasshet, sharrén mazanén omré korti o mort. Ebráhém piriá pa delémeni gón wati mortagén mahluká hawár but. 9Áiay chokk Esák o Esmáélá wati pet Mamrehay nazzikká, Makpélahay gáray tahá kabr kort, hamá dhagárá ke Hitti Sóharay chokk Eprunay butagat o 10Ebráhémá cha Hittián bahá zortagat. Ebráhém hamódá wati lógi Sárahay kerrá kabr kanag but. 11Cha Ebráhémay marká rand Hodáyá áiay chokk Esák barkat dát. Esák Behér-Lahái-Ruiay nazzikká jahmenend but.

Esmáélay nasl o padréch

12Ebráhémay chokk Esmáél, ke cha Sárahay Mesri móled Hájerá pédá butagat, áiay nasl o padréchay kessah chosh ent:

13Esmáélay mardénchokkáni nám, omray hesábá pa red esh ant:

Masterén chokk Nebáyut o é dega chokk, Kédar o Adbil o Mebsám o 14Meshmá o Dumá o Massá o 15Hadád o Témá o Yatur o Nápish o Kedmah atant. 16Hankén#25:16 Hankén, bezán nendagay jágah, métag, menendjáh. o gedánáni hesábá, Esmáélay chokkáni nám hamesh atant, dwázdah sardár, wati kabilaháni red o banday sará. 17Esmáélá yakk sad o si o hapt sál omr kort. Wati goddhi dami kasshet o mort o gón wati mortagén mahluká hawár but. 18Áiay óbádag, Mesray simsará ke dém pa Áshurá raway, cha Hawilahá beger tán Shuray zeminá jahmenend butant. Á gón wati sajjahén brátán arhetagatant.

Ákub o Issu

19Ebráhémay chokk Esákay kessah chosh ent:

Esákay pet Ebráhém at. 20Esákay omr chell sál at wahdé gón Rebekkáyá suri kort. Rebekká, Betwél Aramáiay jenekk o Lábán Aramáiay gohár at. Betwél Paddán-Arámay mardomé at.

21Esákay lógi santh o béawlád at o paméshká Esáká pa wati lógiá cha Hodáwandá dwá lóthet. Hodáwandá áiay dwá gósh dásht o Esákay lógi Rebekkáay láp porr but. 22Doén chokk, mátay lápá gón yakdomiá kassh o chill kanagá atant. Rebekkáyá gwasht: “Gón man chéá chosh bayagá ent?” Shot o cha Hodáwandá josti kort. 23Hodáwandá gwasht:

“Do ráj tai lápá ent.

Do kawm cha tai lápay tahá sedit.

Yakk rájé cha domiá zórmandtera bit o

masterén, kasterénay hezmatá kant.”

24Chokmátiay máh o róch ke purah butant, Rebekkáyá járh áwort. 25Awali chokk ke pédá but, sohragé at o áiay sajjahén badan chó mudi kabáhá at. Áiay námesh Issu#25:25 Issuay máná pothó ent, hamá ke báz pothi per bebit. kort. 26Randá áiay brát pédá but o pédá bayagay wahdá Issuay páday punzi#25:26 Páday punz, bezán páday kunzok, páday poshti némag. dáshtagat. É chokkay námesh Ákub#25:26 Ákubay labz gón Ebráni zobánay do labzá nazzikk ent ke yakkéay máná “páday punzá gipt” ent o domiay máná “páday kasshók” yá “rán kanók” ent. kort. Wahdé Rebekkáyá é járh áwortant, Esáká shast sál at. 27Chokk rost o mazan butant. Issu zabardastén shekárié but o dasht o gyábánán gardókén mardé at. Ákub árámtabén mardé at o géshter gedáná neshtagat. 28Esáká Issu dóstter at ke shekáray góshtáni támi wassha but. Rebekkáyá Ákub dóstter at.

29Yakk róché Ákub nároshtay grádagá at, Issu cha gyábáná átk, shodá chang#25:29 Shodá chang bayag, bezán cha shodá sakk nátwán bayag, cha shodá dotal bayag. at. 30Gón Ákubá gwashti: “Cha é sohrén nároshtán toshé day golombán, cha é sohrénán, ke maná shodá kosht.” Paméshká Issuesh Edum#25:30 Edumay máná “sohr” ent. ham gwasht. 31Ákubá passaw dát: “Awalá wati pédáeshi hakká#25:31 Pédáeshi hakk: Esráiliáni kerrá pet o piroki málay tahá awali mardénchokkay bahr cha é dega chokkáni bahrá do sari at. mani kerrá bahá kan.” 32Issuá gwasht: “Maná shodá kosht, pédáeshi hakk mani che kárá kayt?” 33Ákubá gwasht: “Pésará gón man sawgend bwar.” Gorhá áiá sawgend wárt o wati pédáeshi hakki Ákubay kerrá bahá kort. 34Nun Ákubá lahtén nagan o dhálay nárosht Issuárá dát. Áiá wárt o randá pád átk o shot. É paymá Issuá wati pédáeshi hakk béezzat kort.

Currently Selected:

Pédáesh 25: HPKB

Highlight

Copy