Piiligu 7
7
Seema Naawunni n daa n naa koom muri durinye bunso zaa n ŋa
1Lala jemani n ti paa, Duuma yeli Nuhu, “E ni e baligu ya kpe ŋarintintaa la puwa, a kpali bo, m nyeya maa e ko n niŋi nivusuŋŋu a yi durinye ŋa niŋi. 2Mari buŋkobseesi n daga sariga nyisigu tulum buyapoinyapoin daba ni poga, a ni buŋkobseesi n bi daga sariga nyisigu daba ni poga ayaayi ko, 3a ni niinsi balisi tulum buyapoinyapoin daba ni poga, ka nyaasira a, a wasira durinye ŋa puwa. 4Daba ayapoin nyaaŋa, m ni ti saa ta dapisinaasi, wuntoona ni yiina, a muri bunvuusigu zaa ni maali durinye ŋa puwa”. 5Nuhu niŋi bunso zaa Naawunni n yeli o niŋi la.
6Jemanso koom maa n daa n paali maa, Nuhu daa n niŋini yuma kobsiyoobu. 7O ni o poga, a ni ba biisi, ni ba deempogiba kpe ŋarintintaa maa puwa, kopaali maa da muri ba. 8-9Niŋi n na, Nuhu mari buŋkobseesi n daga sariga nyisigu, a ni seesi n bi daga, niinsi a ni bunvuurigusi zaa kpe ŋarintintaa maa puwa, daba ni poga, a maa seema Naawunni n yeli u la. 10Daba ayapoin maa nyaaŋa, komutugu maa piili.
11Nuhu yuma kobsiyoobu, o dapii ni ayapoin, ŋmerisi ayi yumini maa niŋi, tiŋkoom ni kosoosi zaa chibi, sakoom kpaa n yi sagbana zu. 12Saa maa ta dapisinaasi wuntoona ni yiina.
13Dindaso saa maa n piili n chena n na, Nuhu ni o poga, a ni o biduusi ba boona Sem, Ham ni Jafeti ni ba pogiba kpe ŋariŋu maa. 14Ka ba mari buŋkobiri balisi zaa gba paasi n kpe ŋariŋu maa. 15Binnyaara zaa baligu ayaayi gba paasi Nuhu niŋi kpe ŋariŋu maa. 16Bunvuusira maa daa niŋini daba ni poga, a maa seema Duuma Naawunni n daa yeli la. Nuhu ni bini maa zaa n kpe n baasi, Duuma gbagba yo ŋarintintaa maa noori.
17Saa maa n ta dapisinaasi la, seela zaa paali koom, a mari ŋariŋu maa du n pa kozu. 18Koom maa paali ga, ŋariŋu maa laŋina. 19Koom maa paali n muni zoori zaa. 20A muni zoori maa noba limsim pisiyi, 21-22binnyaara zaa ni ba tiŋgbaŋŋu maa zaa muri, niinsi, buŋkobiri balisi ni nisaaladima zaa. 23Seema Duuma daa n muri binnyaara zaa n ba tiŋgbaŋŋu maa niŋi n na la, nisaaladima, buŋkobiri a ni niinsi zaa. Ama Nuhu ni o niriba, a ni binseesi n daa ba ŋariŋu la puu ko daa n bi muri. 24Koom maa n daa n paali n za, daasi koowa ni pisinu.
Currently Selected:
Piiligu 7: hag
Highlight
Share
Copy
Want to have your highlights saved across all your devices? Sign up or sign in
© 2015, Ghana Institute of Linguistics, Literacy and Bible Translation (GILBTT)
