Piiligu 37

Yisifu zaasima

1Yakubu daa n zinni Keenan tiŋgbaŋŋu niŋi, seela o ba n daa n zi, a niŋi saana la. 2Yakubu ni o biisi yela n ŋa.

Yisifu yuma pii ni ayapoin bipolli. O ni o beseesi n niŋi Biliha ni Zilipa biisi, o ba pogiba, nyaasira peeri ni buusi. Yisifu ti ti o ba baaru dagiri yi ba pelli.

3Yakubu kpabira Yisifu ga, a gaari o biisi maa zaa, a kpali, o kurigirisim jemani n na o dogi u, o se tagite wogili so n veela ga ti u. 4Jemanso o beya n nye maa ba ba kpabira u gaari ba, ba chisi u, ka bi togsira o saani kpabirisim yatoga.

5Dindaso, Yisifu zaasi zaasim, ka togsi o yela ti o beya maa, ba chisi u ga paasi. 6O yeli ba, “Ya wumi m zaasimaa. 7Ti zaa ba ni pu, a leera chi kapaasi, noba maa niŋi, m toori nyisigi n damsi n za, ka ya bini mi ti poli n jili u, ka dobi u tiŋŋa.” 8O beya maa boosi u, “E wusini maa, e ni niŋi ti naaba, ka nyaasira ti?” Ba chisi u ga paasi, kpali o zaasim la ni seema o n yeli la zu.

9O lee n maali n zaasi zaasim, ka yeli o beya, “Ya wumi, m lee n zaasini zaasim, ŋala wune, wuluŋu, ŋmeriga, a ni ŋmeribiisi pii ni yinni n ti dobi ma tiŋŋa.” 10O n poli n wusi o ba seema o n yeli o beya la, o ba tasi u, ka boosi u, “Bo zaasim n na e zaasi lala? Yamonsitiri, m ni e ma ni e beya ŋa zaa ni ti dobi i tiŋŋa?”

11O yela daa n marini o beya la pubeerim, ama o ba wune daa n naani yela maa niŋi o fere niŋi.

Yisifu beya koosi u

12Dindaso Yisifu beya daa gaa Sekem, a wa ti nyaasira ba ba buŋkobiri. 13O ba Yakubu daa n booli u yeli, “E beya ba Sekem, a nyaasira buŋkobiri, m ni tumi i ba saani.” Yisifu sagi, “To.” 14“Gaa n wa ti nyaasi e beya maa alaanfiya, a ni buŋkobiri maa ni ba seem, ka pori n ti yeli ma bunso n ba niŋi.” O ba tumi u, o yi Hebiron nantaŋŋu puu chaŋŋi n we Sekem.

15O n daa n paa, ka chaŋŋi n kpabira o beya maa yi moo maa puwa, dabso daa nye u, ka boosi u, “Bo n na e kpabira kpe?” 16Yisifu yeli u, “M beya n ta kpe, jaande, ka e baŋŋi seela ba ni ba buŋkobiri ni be, e wusi ma.”

17Daba maa yeli u, “Ba lee n ka kpe, m daa wumi ba n yetira taaba, ni ba gaa Dodan tiŋŋa.” Niŋi n na, Yisifu kari ba bobiri gaa Dodan tiŋŋa maa, a paa ba niŋi. 18O daa na bani wogila chena, ka o beya maa nye o n chena ba saani. Ba niŋi naŋgbanluŋko maa, ka o yi ta, ba ku u.

19O n chena maa, ba yeli taaba, “Zaasim zaasira la n chena la. 20Ya cheli ti ku u lobi n niŋi bulukuuma ŋa yindaana niŋi, ka ti wa ti yeli moo puu buŋ n gbaag u, ka ti nye bunso n lee n ya n yi o zaasim niŋi.” 21Rubin n wumi n ŋa, o niŋi aniya, seema o n di n niŋi n moligi biyaa yi o beya ŋa saani. Ka yeli ba, “Ti da ku u. 22Ya da kpaag o zeem. Ti naag u lobi n niŋi bulukuuŋaa yindaana niŋi, moogaa puwa, ka da siisi u.” O daa n yelini n ŋa, lala jemani o ni nye daama moligi u, ka mari u wa ti ti o ba.

23Yisifu n daa n ti paa o beya maa saani, ba gbaag u, ka pirigi o tagite wogiliso, o n daa n pili maa. 24Ba naag u lobi n niŋi bulugu so koom n ka niŋi. 25Ŋama nyaaŋa, ba zi tiŋŋa ba di bindira, ka nye Isimeel baligu yawdiriba seesi n yi Giliyadi, a wara Yijipiti. Yawdiriba ŋa nyogimasi daa n zinni tulalesi, dugisi, a ni buŋŋusa baligu baligu. 26Juuda boosi o mabiisi maa, “Bo tono n na ti ya n nye, ka ti ku ti sunzo ŋa, ka naag o yela sogi? 27Ti koosi u ti Isimeel dimaa, o so ti n ku u, koo, a niŋi u daaŋu. Ti sunzo n na, ka ti niŋi zeem luŋko.” Niŋi n na, o taaba maa wumi seema o n yeli maa. 28Jemanso Isimeel yawdiriba ŋa n ya n ti gaari, o beya maa darigi u nyisi bulukuuŋu la puwa, a koosi u gbitisi pisiyi ti ba, ba mari u gaari Yijipiti.

29Niŋi n na, Rubin daa n lee n pori ta bulugu maa ziya, ka bi nye Yisifu yi o puwa, sufusaaŋu gbaag u, o darigi o bimpinna kasigi. 30Ka we o sunzoba la saani, a wa ti boosi ba, “Biyaa lee n ka bulugu maa puwa? Wula n na ma ya n niŋi?”

31A zu, ba gbaa buu korigi, a naag o zeem sariga Yisifu tagite wogili maa, 32ka naag u kuli, a wa ti wusi ba ba, ka boosi u, “Nyaasi, bunso ti ni nye, e bii la tagite n ŋa? Koo ka wune n na?” 33O nyaasi u, ka baŋŋi u, ka sagi, “Mm, m bii maa tagite n na, ama moo puu buŋ n gbaag u toog u ŋobi.”

34Niŋi n na, Yakubu darigi o bimpinna kasigi, ka naa sufusaaŋu bimpinna pili, a kumi o bii maa kuuri ga. 35O biduusi ni bipunsi zaa daa n ti maagira o sufu, o zagsi, ka yeli ba, “M ni sufusaaŋu ni kumsi n ni gaa kaa puwa, a zu, o ba kpali o zu kumina.”

36Jemanso yawdiriba la n daa n da Yisifu maa, ba mari u gaa Yijipiti paaligu, a koosi u ti daba yindaana, ba n boona Potifa. Dabaa daa n niŋini Yijipiti paaligu zaa naaba guuriba la kpeema.

Currently Selected:

Piiligu 37: hag

Highlight

Copy