Piiligu 35

Yakubu pori n gaa Betel

1Niŋi n na, Naawunni yeli Yakubu “Nyisigi n gaa Betel wa ti zi, ka me sariga daaŋu ti mani Naawunni, so n daa n ta e saani, ka e daa n kpali e mabii Isawu zu zora la”. 2Yakubu yeli o laanta dima zaa, “Ya naa ya buga zaa basi, ka niŋi ya maŋsi nyem, a cherigi ya bimpinna. 3Ka ya ta ti gaa Betel. Nisaaniŋi n na, ma ya n me sariga daaŋu ti Naawunni, so n daa n wumi m suusigu, jemanso ni daa n ba sufusaaŋu niŋi, ka ba m saani seela zaa ni wara”. 4A zu, ba naa ba buga ni ba kundesi zaa ti Yakubu, o pi a, a yi tikarigu gbinni, a leeli Sekem.

5Niŋi n na, ba yi soori, Naawunni ti dabeem gbaa tiŋseesi n poli n jili ba maa zaa, lala zu, nira zaa bi kari n pa ba zu. 6Yakubu ni o niriba maa zaa ta Luzi (Betel n na la), a yi Keenan dima tiŋgbaŋŋu niŋi. 7Nisaaniŋi n na, o me sariga daaŋu, ka digili u El-Betel, a kpali, nisaaniŋi n na Naawunni daa n nyisi o maŋŋa wusi u jemanso o n daa n kpali o beeri zu zora la.

8Niŋi n na, Rabeeka bipoga Debora kpi, ba pi u tikarigu gbinni, a yi Betel falimini puwa. A zu, ba boona nisaaniŋi Kumsi Tiya.

9Yakubu n daa n pori n yi Mesopoteemiya ta la, Naawunni lee n maali n nyisi o maŋŋa wusi u, ka nafa u. 10Naawunni yeli u, “E yuuri n niŋi Yakubu, ama, ba ki lee n boona i Yakubu, pimparaŋa ba ni boona i Izireel.”

11Naawunni yeli u, “Mani n niŋi Naawunni, kpeeŋu zaa daana, dogi n wasi n paali ziya. E baligaa niŋi n na balidamta ni nadima ya n yi. 12Tiŋgbaŋaa m ni daa n naa n ti Ibrahim ni Yisaaka la, m naag u ti i, ka m ni naag u ti e yaŋsi”. 13Niŋi n na, Naawunni yi seela o n togsi o saani maa gaa saazu.

14Yakubu naa kugiri sabi seela Naawunni n togsi o saani la ti u, ka kpaa buŋŋuura sariga pa o niŋi, ka lee n kpaa kpaam pa o niŋi. 15Yakubu digili seela Naawunni n daa n togsi o saani la yuuri Betel. (O gbinni n niŋi, Naawunni laanta.)

Benjamin dogim ni Rachel kum yela

16Yakubu ni o nyaaŋa dima n daa n yi Betel wara Efirata, ka na bi leeli. Niŋi n na, dogim paa Rachel, dogim maa mi daa n ba toom ti u. 17O dogim maa n daa ba toom maa zu, pogiso n deegira dogim maa yeli u, “Rachel, da zora dabeem, biduu n na e lee n nye.” 18O n digili bii maa yuuri Benoni, o vuusini o baasigu vuusim, ka kpi. Ama bii maa ba digili o yuuri Benjamin#35.18 Benoni gbinni n niŋi, beerim. Benjamin gbinni n niŋi, zusuŋŋu biya.. 19A zu, Rachel daa n kpini yi Efirata soori, ba pi u sogbarimini. (Efirata, Betiliham n na la). 20Yakubu daa n naa kugiri sabi o kaa zu, a ti yini zinni, kugiri maa na sabi Rachel kaa maa zu.

21Niŋi n na, Yakubu lee n maali n nyisigi nisaaniŋi naag o gbana suga wa ti gali Migdal-Eda, a sabi.

22Jemanso Yakubu n daa n zi nisaaniŋi paaligu maa n na, Rubin kpabi o ba pogibila Biliha, o ba n wumi lala yelli maa, o suuri nyisigi.

Yakubu biduusi pii ni bayi yela n ŋa. 23Liya biisi n ŋa: Rubin, Yakubu bikpeema, Simiyon, Livai, Juuda, Isaka, a ni Zebulun. 24Rachel biisi n ŋa: Yisifu ni Benjamin. 25Rachel bipoga Biliha biisi n ŋa: Dan ni Nafitali. 26Liya bipoga Zilipa biisi n ŋa: Gadi ni Asa. Yakubu biisi n na la, seesi ba n daa dogi, a yi Mesopoteemiya.

Yisaaka kum yela

27Niŋi n na, Yakubu pori n gaa o ba Yisaaka saani, a yi Mamiri, a leeli Kiriyaf-Aba (Hebiron n na la) seela Ibrahim ni Yisaaka n daa n be. 28Yisaaka daa n dini yuma koowa ni pisinii. 29Niŋi n na, o vuusi o baasigu vuusim, a ka niŋi, a gaari o yaadima saani, ka o kurigiya nene. O biisi Isawu ni Yakubu pi u.

Currently Selected:

Piiligu 35: hag

Highlight

Copy