Piiligu 34

Ba bibi Dayina kpabi

1Dindaso n na, Dayina, so n niŋi Yakubu ni Liya bipuŋŋu la, yi n gaa o taaba pogiba saani yi tiŋŋa maa puwa. 2Niŋi n na, Sekem, Hamo so n niŋi Hivati nira, ka niŋi paaligu maa naaba biduwa, nye Dayina, ka gbaag u wa ti bibi u kpabi. 3Ama, o n nye bipuŋŋu maa, o yela peri u ga, o togsi u kpabirisim yela, a kpabira maa o loobi o poga. 4Sekem yeli o ba Hamo, “Naa bipuŋŋaa ti ma, o niŋi m poga.”

5Yakubu n wumi maa ba saami o bii Dayina la, ka o biduusi na mari o buŋkobiri ba moopuwa, o na muuri yelli maa, a ti paa jemanso ba n ta yiri. 6Niŋi n na, Sekem ba Hamo wa ti togsi Yakubu saani. 7Yakubu biduusi n yi moo puu ta, ba wumi yaso n niŋi maa, sufusaaŋu ni suuri gbaa ba ga, seema Sekem n niŋi n ŋa ŋaaba yelli, a yi Yakubu biisi puwa, a kpabi Yakubu biya, yaso n di n bi daga o niŋi.

8Hamo yeli Yakubu, “M bii Sekem kpabira e bipuŋŋaa ga. Jaande, naag u ti u, o niŋi o poga. 9Ti naagira taaba, ya ti ti naagira ya bipunsi, ka ya gba ya naagira ti bipunsi. 10Ya ni tee n zi tiŋgbaŋaa niŋi, ya niŋi bunso zaa ya n kpabira. Ya zi o niŋi, a dira yawu, a nye bindira yi o niŋi”.

11Niŋi n na, Sekem yeli Dayina ba ni o sunzodabisi, “Ya paasi m niŋi, ka bunso zaa ya n kpabira, m ni ti ya. 12Ya wusi ma samiso n di n yo poga maa zu, seema zaa ya n kpabira samini maa sagi, m ni yo. Ka ya ni sagi n naag u ti ma n na la.”

13A kpali ba n sagimi ba sunzopoga Dayina zu, Yakubu biduusi yomsi Sekem ni o ba Hamo. 14Ba yeli ba, “Ti ki tee n niŋi lala, ti ki tee n naa ti sunzopoga ti daba so yoori n bi ŋma, o lala n niŋi ŋaaba ti ti. 15Ti ni zaali ya zaaligu luŋko, a maa, ya ba seema ti ni be ŋa, dabsi zaa ba ŋma ba yoya. 16Lala wune, ti ni naa ti bipunsi tira ya, ka ti gba ti naagira ya bipunsi. Ti zi ya puwa, ti ni ya zaa ti loobi luŋko. 17Ama, ka ya yi bi sagi maa, ya ni ŋma ya yoya wune, ti ni mari ti sunzopoga gaari.”

18Bunso ba n yeli maa ŋmaani yasuŋŋu ti Hamo ni o bii Sekem. 19Bipollaa, so n niŋi jilima zaa daana, a daga, a yi o ba laanta, o bi lee n mari yela maa seema ba n yeli maa yuu, a kpali, o daa n kpabira Yakubu bipuŋŋu maa ga.

20A zu, Hamo ni o bii Sekem yi n gaa tiŋŋa maa voori noori, seela ba n laŋsira, ba wa ti togsi n ti tiŋŋa maa dima. 21Ba yeli ba, “Niribaa niŋini nivumansi ti ti, ya cheli ti ti ba zi tiŋgbaŋaa niŋi, ba dira yawu, zii maa yeligiya ba n di n zi, ti ni tee n naagira ba bipunsi, ka ba gba ba naagira ti bipunsi. 22Niriba maa ni sagi ti ni ba ti zi maa nivu luŋko, ka ti sagiya maa ti ni ŋma ti yoya, a maa barima. 23Ba buŋguuna ŋa ni ba bindaalim binaa zaa ki loobi ti bini? A zu, ya ti ti wumi n ti ba, ka ti ni ba ti zi”.

24Niseesi zaa ni laŋsi maa wumi n ti Hamo ni o bii Sekem, ka daba zaa n ba tiŋŋa maa puu ŋma ba yoya.

25Dabaa ata nyaaŋa, jemanso niriba maa zaa ni ba beerim niŋi, Yakubu biduusi bayi, Simiyon ni Livai, Dayina sunzodabisi naa ba tokobisi kpe tiŋŋa maa puwa, seema niriba maa ni bi fe, a ku ba dabsi zaa nyem. 26Ba ku Hamo ni o bii Sekem, ka kpe Sekem dii mari Dayina yi n gaa.

27Niriba maa kuubu nyaaŋa, Yakubu biduseesi n che la kpe tiŋŋa maa puu nye kpiinsi maa, ka kaasi ba kapete bini, a kpali ba n sagimi ba sunzopoga la zu. 28Ba gbaa ba peeri, buusi, naagi, a ni buŋsi ni bunso zaa n ba tiŋŋa maa puwa, a ni ba puuri niŋi. 29Ba naa ba bindaalim bini zaa, a ni ba pogiba ni biisi, a kaasi ba diisi puu bini zaa, a di ba afuwa.

30Niŋi n na, Yakubu yeli Simiyon ni Livai, “Ya kpabi yela ti ma, ya ti ma yubee yi niseesi n ba tiŋgbaŋaa niŋi, Keenan dima ni Periziti dima balisaa. Ti bi zoo, ba wune si n laŋsi taaba, ba ni ku ma, m ni m laanta zaa ni muri.”

31Ba yeli u, “Seema o n niŋi ti sunzopogaa, a maa jagimilo ŋa, o veela?”

Currently Selected:

Piiligu 34: hag

Highlight

Copy